٦١
١ إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ خْ إِفِيڒَانْ. ن ذَاوُوذْ.
٢ أَ أَربِّي، سڒْ إِ ؤُڒَاغِي إِنُو،
سڒْ مْلِيحْ إِ ثْژَادْجِيثْ إِنُو.
٣ زِي طَّارْفْ أَنڭَّارْ ن ثمُّورْثْ
تّْڒَاغِيغْ خَاكْ،
خْمِي إِتّفْشِيڒْ وُوڒْ إِنُو.
نْذهْ أَيِي خْ إِجّْ ن جَّارْفْ يُوعْڒَانْ خَافِي.
٤ مَاغَارْ شكْ ذ أَمْشَانْ ن ثَاروْڒَا إِ نشّْ،
ذ لْبُورْجْ إِجهْذنْ ضِيدّْ إِ ڒعْذُو.
٥ نشّْ أَذْ قِّيمغْ
ذڭْ ؤُقِيضُونْ نّشْ إِ ڒبْذَا،
أَذْ أَروْڒغْ
سَاذُو ؤُذُورِّي ن وَافْرِيونْ نّشْ. سِيلَاهْ.
٦ مَاغَارْ شكْ، أَ أَربِّي،
ثسْڒِيذْ غَارْ لْوُوعُوذْ إِنُو.
شكْ ثوْشِيذْ أَيِي ثَاسْغَارْثْ
ن يِينِّي إِتّڭّْوذنْ إِسمْ نّشْ.
٧ أَرْنِي عَاذْ ؤُسَّانْ خْ وُوسَّانْ ن ؤُجدْجِيذْ،
أجّْ أَذْ أَرذْفنْ إِسڭّْوُوسَا نّسْ
إِجّْ إِ ونّغْنِي
أَمْ جِّيڒْ إِضْفَارْ ؤُمَاسْ.
٨ نتَّا أَذْ إِقِّيمْ
زَّاثْ إِ وُوذمْ ن أَربِّي إِ ڒبْذَا.
أَذْ خَاسْ ثحْضَا
ثَامخْسِيوْثْ إِشوَّارنْ ذ ڒَْامَانْ.
٩ خنِّي أَذْ زهّْذغْ إِ يِيسمْ نّشْ إِ ڒبْذَا،
حِيمَا أَذْ كمّْڒغْ لْوُوعُوذْ إِنُو،
أَسّْ أَوَارْنِي ؤُمَاسْ.