٥٧
١ إِ ؤُمقّْرَانْ ن إِمغْنَاجنْ. ’وَارْ ث تَّاردّدْجْ!‘ ن ذَاوُوذْ. ثِيرَا إِنقْشنْ. ؤُمِي يَارْوڒْ زِي شَاوُولْ ذڭْ إِفْرِي.
٢ حِينّْ خَافِي، أَ أَربِّي، حِينّْ خَافِي،
مَاغَارْ ڒعْمَارْ إِنُو يَاركّْوَاڒْ-د غَاركْ.
نشّْ ؤُفِيغْ أَذُورِّي
ذِي ثِيڒِي ن وَافْرِيونْ نّشْ،
أَڒْ غَا عْذُونْثْ ڒْْمُوصِيبَاثْ.
٣ نشّْ أَذْ ڒَْاغِيغْ غَارْ أَربِّي،
أَمْعُودْجِي خْ كُوڒْشِي،
غَارْ أَربِّي ونِّي ذ أَيِي غَا إِنذْهنْ
غَارْ ؤُنڭَّارْ إِصبْحنْ.
٤ نتَّا أَذْ د-إِسّكّْ أَسنْجمْ إِنُو
زڭْ ؤُجنَّا،
أَذْ إِسّْبهْذڒْ ونِّي إِخْسنْ
أَذْ أَيِي إِسَارْضْ. سِيلَاهْ.
أَربِّي أَذْ إِسّكّْ
ثَامخْسِيوْثْ نّسْ إِشوَّارنْ
ذ ڒَْامَانْ نّسْ.
٥ ڒعْمَارْ إِنُو أَقَا-ث جَارْ إِيْرَاذنْ،
زّْڒغْ جَارْ إِصفْضَاونْ يَارقّنْ،
ثَارْوَا ن بْنَاذمْ، إِنِّي ثِيغْمَاسْ نْسنْ
أَمْ لَانْسَاثْ ذ فْڒِيثْشَاثْ ن ڒْْقوْسْ،
إِڒسْ نْسنْ أَمْ يِيجّْ ن سِّيفْ إِقْضعْ.
٦ أَ أَربِّي، سْڭعّذْ إِخفْ نّشْ
ثِيوَا إِ إِجنْوَانْ،
أَرّْ أَعُودْجِي نّشْ
سنّجْ إِ مَارَّا ثَامُّورْثْ.
٧ نِيثْنِي ڭِّينْ ثْرَاشَّا إِ إِصُورَافْ إِنُو،
ڒعْمَارْ إِنُو ثُوغَا إِغْنسْ.
نِيثْنِي غْزِينْ أَيِي أَحْفُورْ،
مَاشَا وْضَانْ ذَايسْ سِيمَانْثْ نْسنْ.
سِيلَاهْ.
٨ أَ أَربِّي، ؤُڒْ إِنُو يَاركّنْ،
ؤُڒْ إِنُو يَاركّنْ.
أَقَا نشّْ أَذْغنّْجغْ أَذْ زهّْذغْ.
٩ فَاقْ، أَعُودْجِي إِنُو! فَاقْ،
لْهَارْبَا ذ ڒْْڭَامْبْرِي!
نشّْ تّخْسغْ أَذْ سّْفَاقغْ
ثَافَاوْثْ ن ڒفْجَارْ.
١٠ نشّْ أَذْ شكْ قَاذِيغْ جَارْ ڒڭْنُوسْ،
أَ سِيذِي إِنُو،
أَذْ زهّْذغْ جَارْ شُّوعُوبْ إِ شكْ.
١١ مَاغَارْ ثَامخْسِيوْثْ نّشْ إِشوَّارنْ
ثتَّاكّْوَاضْ أَڒْ إِجنْوَانْ،
ڒَْامَانْ نّشْ أَڒْ إِسيْنُوثنْ.
١٢ أَ أَربِّي، سْڭعّذْ إِخفْ نّشْ
ثِيوَا إِ إِجنْوَانْ،
أَرّْ أَعُودْجِي نّشْ
سنّجْ إِ مَارَّا ثَامُّورْثْ.