٥٦
١ إِ ؤُمقّْرَانْ ن إِمغْنَاجنْ. س ثغْنِينْثْ ن ’إِشْثْ ن ثذْبِيرْثْ إِبكّْممْ ذڭْ إِمُوشَانْ إِڭّْوجنْ‘. ن ذَاوُوذْ. ثِيرَا إِنقْشنْ، ڒَْامِي ث طّْفنْ إِفِيلِيسْطِينِييّنْ ذِي جَاثْ.
٢ حِينّْ خَافِي، أَ أَربِّي،
مَاغَارْ إِجّْ ن بْنَاذمْ يَارزُّو
أَذْ أَيِي إِسَارْضْ،
إِحصَّارْ أَيِي ؤُمْجَاهذْ أَسّْ مَارَّا.
٣ إِنِّي ذ أَيِي إِحصَّارنْ خْسنْ
أَذْ أَيِي صَارْضنْ أَسّْ مَارَّا،
مَاغَارْ إِنِّي كِيذِي إِتّْمنْغَانْ س نّْفَاخثْ،
أَقَا أَثنْ ذڭْ وَاطَّاسْ!
٤ ذڭْ وَاسّْ إِ ذِي إِ غَا ڭّْوذغْ،
أَذْ خَاكْ تّشْڒغْ،
٥ خْ أَربِّي، ونِّي ؤُمِي غَا صبْحغْ
أَوَاڒْ نّسْ،
خْ أَربِّي إِ تّشْڒغْ،
وَارْ تّڭّْوِيذغْ شَا،
مَاغَارْ مِينْ زمَّارنْ
أَذْ أَيِي ڭّنْ مِيدّنْ؟
٦ نِيثْنِي قدْجْبنْ أَوَاڒنْ إِنُو أَسّْ إِكْمڒْ،
مَارَّا ثْنَاوِي نْسنْ أَقَا أَثنْ خَافِي ذ ڒْْغَارْ.
٧ نِيثْنِي مُوننْ، نُوفَّارنْ،
نِيثْنِي حطَّانْ إِنَارْزِيونْ إِنُو،
خْمِي أَرزُّونْ أَذْ نْغنْ ڒعْمَارْ إِنُو.
٨ مَا زمَّارنْ أَذْ أَروْڒنْ
وَاخَّا ڭِّينْ ڒْْغشّْ؟
سهْوَا ڒڭْنُوسْ
ذڭْ وغْضَابْ نّشْ، أَ أَربِّي!
٩ شكْ ثْحسّْبذْ ؤُسَّانْ ن وطْلَاعْ إِنُو.
أڭّْ إِمطَّاونْ إِنُو ذِي ثْزيَّاثْ ن وَامَانْ نّشْ،
- مَا وَارْ دْجِينْ ذڭْ وذْلِيسْ نّشْ؟ -
١٠ خنِّي أَذْ ذوْڒنْ ڒْْعذْيَانْ إِنُو غَارْ ضفَّارْ،
ذڭْ وَاسّْ ؤُمِي غَا ڒَْاغِيغْ.
نشّْ سّْنغْ أَيَا: أَربِّي أَقَا-ث أَكِيذِي.
١١ خْ أَربِّي، ونِّي ؤُمِي
غَا سّمْغَارغْ أَوَاڒْ نّسْ،
خْ سِيذِي، ونِّي ؤُمِي
غَا سّمْغَارغْ أَوَاڒْ نّسْ،
١٢ خْ أَربِّي إِ خفْ تّشْڒغْ،
وَارْ تّڭّْوِيذغْ شَا،
مَاغَارْ مِينْ إِزمَّارْ بْنَاذمْ
أَذْ أَيِي يڭّْ؟
١٣ خَافِي، أَ أَربِّي،
أَرْسِينْ لْوُوعُوذْ إِ شكْ إِتّْوَاڭّنْ.
أَذْ ثنْ كمّْڒغْ إِ شكْ س ؤُقَاذِي.
١٤ مَاغَارْ شكْ ثْفكّذْ ڒعْمَارْ إِنُو
زِي ڒْْموْثْ!
مَا وَارْ ثحْضِيذْ إِضَارنْ إِنُو
زڭْ ؤُنقْرَاضْ،
حِيمَا أَذْ ؤُيُورغْ
زَّاثْ إِ وُوذمْ ن أَربِّي
ذِي ثْفَاوْثْ ن ثُوذَارْثْ؟