١٩
١ إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ.
٢ إِجنْوَانْ تّْبَارّْحنْ س ؤُعُودْجِي ن أَربِّي،
ڒْْقُوبّثْ ثسَّاوَاڒْ
خْ ڒْْخذْمثْ ن إِفَاسّنْ نّسْ.
٣ أَسّْ إِسَّازَّاڒْ أَوَاڒنْ إِ وَاسّْ،
دْجِيڒثْ ثسّْشَانْ ثُوسّْنَا غَارْ دْجِيڒثْ.
٤ وَارْ إِدْجِي ذ ڒْْهَارْذْ ؤُ وَارْ دْجِينْ شَا ذ أَوَاڒنْ،
ثْمِيجَّا نْسنْ وَارْ ذ أَسْ إِتّسْڒِي حذْ.
٥ ڒُْومُورَاثْ نْسنْ فّْغنْثْ خْ ثمُّورْثْ مَارَّا،
أَوَاڒنْ نْسنْ فّْغنْ أَڒْ طَّارْفْ ن دُّونشْثْ.
نتَّا إِڭَّا ذِيهَا إِجّْ ن ؤُقِيضُونْ إِ ثْفُوشْثْ،
٦ أَمْ مُوڒَايْ نِّي د-إِسِّيجّنْ
زڭْ وخَّامْ ن ڒمْڒَاشْ،
إِسْڒِيوْڒوْ أَمْ يِيجّْ ن بُو-ثرْيَاسْثْ،
حِيمَا أَذْ إِكْسِي ذِي ثِيشْڒِي نّسْ.
٧ إِفّغْ-د زڭْ إِجّْ ن طَّارْفْ ن ؤُجنَّا،
ؤُشَا يُويُورْ أَڒْ طَّارْفْ نّسْ نّغْنِي،
وَارْ ثتّْنُوفَّارْ ؤُڒَا ذ إِشْثْ نْ ڒْحَاجثْ
إِ ڒْْحَاذُوقْ نّسْ.
٨ أَقَا ثكْمڒْ شَّارِيعَا ن سِيذِي،
ثِيوِي-د أَڭنْفُو إِ بُوحْبڒْ.
شّْهَاذَاثْ ن سِيذِي ذَايْسنْثْ ڒَْامَانْ،
تِّيشّنْثْ ثِيغِيثْ إِ ؤُحَافِي.
٩ ڒُْومُورَاثْ ن سِيذِي سڭّْذنْثْ،
سّْفَارّْحنْثْ ؤُڒْ.
ثَاوْصِييّثْ ن سِيذِي ثصْفَا،
ثسّْشَانَا ثَافَاوْثْ إِ ثِيطَّاوِينْ.
١٠ ثِيڭّْوُوذِي زِي سِيذِي ثصْفَا،
ثقِّيمْ ثْبدّْ إِ ڒبْذَا.
ڒحْكَامَاثْ ن سِيذِي ذ ثِيذتّْ،
أَقَا أَثنْثْ ذ ڒْْحقّْ مَارَّا.
١١ نِيثنْثِي جبّْذنْثْ مژْرِي كْثَارْ خْ وُورغْ،
وَاهْ، كْثَارْ زڭْ وُورغْ إِتّْوَاصفَّانْ،
أَقَا أَثنْثْ ذ ثِيمِيژِيذِينْ خْ ثَامّنْثْ
نِيغْ خْ ثَامّنْثْ ن ثغْرَاصْثْ.
١٢ ؤُڒَا ذ أَمْسخَّارْ نّشْ
إِتّْوَاوبّخْ زَّايْسنْثْ،
ذڭْ ؤُحطُّو نْسنْثْ ثتّْنُوفَّارْ
ذَايسْ ڒْْمُونثْ ثَامقّْرَانْثْ.
١٣ أَودَّارْ، وِي زَّايسْ يُوشِينْ؟
سِيزْذڭْ أَيِي زِي مِينْ وَارْ إِتّْبِيننْ.
١٤ حْضَا أَمْسخَّارْ نّشْ عَاوذْ زڭْ ؤُعفَّارْ،
حِيمَا وَارْ خَافِي إِتّْصدْجِيضْ،
حِيمَا أَذْ إِڒِيغْ ذ أَمزْذَاڭْ
زڭْ ؤُخطُّو إِمْغَارنْ.
١٥ أَذْ د-أَسنْ وَاوَاڒنْ ن ؤُقمُّومْ إِنُو
ذ إِخَارِيصّنْ ن وُوڒْ إِنُو،
خْ ڒْْخَاضَارْ نّشْ، أَ سِيذِي،
أَ ثَاصْضَارْثْ إِنُو ذ أَمفْذِي إِنُو!