١٨
١ إِ ؤُمقّْرَانْ ن إِمغْنَاجنْ. ن ؤُمْسخَّارْ ن سِيذِي. ن ذَاوُوذْ، ونِّي إِسِّيوْڒنْ أَوَاڒنْ ن يزْڒِي-يَا إِ سِيذِي، ذڭْ وَاسّْ ؤُمِي ث إِفكّْ سِيذِي زڭْ ؤُفُوسْ ن مَارَّا ڒْْعذْيَانْ نّسْ ؤُ زڭْ ؤُفُوسْ ن شَاوُولْ.
٢ نتَّا إِنَّا:
”نشّْ تّخْسغْ شكْ، أَ سِيذِي،
جّهْذْ إِنُو ذ شكْ.
٣ سِيذِي ذ ثَاسْضَارْثْ إِنُو
ذ لْبُورْجْ إِنُو ذ أَمْفكِّي إِنُو،
أَربِّي إِنُو، ثَاصْضَارْثْ إِنُو،
نشّْ غَارسْ أَركّْوَاڒغْ.
شكْ ذ ثَاسدَّارْثْ إِنُو ن ؤُسڒْقِي
ذ يِيشّْ ن ؤُسنْجمْ إِنُو،
لْبُورْجْ إِنُو يُوعْڒَانْ.
٤ نشّْ ڒَْاغِيغْ-د خْ سِيذِي،
ونِّي إِسْذَاهدْجنْ أَسمْغَارْ،
ؤُ نشّْ أَقَا تّْوَاسّْنجْمغْ
زِي ڒْْعذْيَانْ إِنُو.
٥ إِسغْوَانْ ن ڒْْموْثْ نّْضنْ أَيِي-د،
سِّيڭّْوذنْثْ أَيِي ڒْْحمْڒَاثْ ن وَامَانْ إِهَاجنْ.
٦ إِسغْوَانْ ن ڒَْاخَارْثْ شَارْفنْ أَيِي،
ثِيخشْفِينْ ن ڒْْموْثْ حْصَارنْثْ أَيِي.
٧ ذِي ڒحْصَارثْ إِنُو ڒَْاغِيغْ-د خْ سِيذِي،
خْ أَربِّي إِنُو إِ خْ د-ڒَْاغِيغْ.
زِي زَّاوشْثْ نّسْ ثَامقّْرَانْثْ
إِسْڒَا نتَّا إِ ثْمِيجَّا إِنُو،
إِغُويَّانْ إِنُو ؤُذْفنْ
غَارْ إِمزُّوغنْ نّسْ.
٨ خنِّي ثنْهزّْ ؤُ ثَارْجِيجْ ثمُّورْثْ،
ذْسُوسَا ن إِذُورَارْ
تّْرَاحنْ-د تَّاسنْ-د ؤُ نْهزّنْ،
مَاغَارْ إِتّْوَاسَّارْغْ وغْضَابْ نّسْ.
٩ إِڭعّذْ دّخَّانْ زڭْ ونْزَارنْ نّسْ،
ثِيمسِّي زڭْ ؤُقمُّومْ نّسْ ثْصَارْضْ،
إِتّْوَاسَّارْغْ زَّايسْ ڒفْحمْ.
١٠ نتَّا إِجَّا أَجنَّا أَذْ يَاضَارْ
ؤُشَا خنِّي إِهْوَا-د نتَّا،
أَقَا ذِينْ إِجّْ ن ؤُسيْنُو إِبُّومْبسْ
سَاذُو إِضَارنْ نّسْ.
١١ إِنْذهْ خْ إِجّْ ن ؤُكِيرُوبْ، وَاهْ، إِضْوَا،
نتَّا إِحوّمْ خْ وَافْرِيونْ ن ؤُسمِّيضْ.
١٢ نتَّا إِڭَّا ثَادْجسْثْ
أَمْ يِيجّْ ن ؤُسڒْقِي خْ يِيخفْ نّسْ،
أَعِيشُّو نّسْ أَقَا-ث ذڭْ ونّضْ نّسْ،
أَمَانْ إِبُّوبّْسنْ،
إِسيْنُوثنْ إِبَّارشْننْ.
١٣ زِي ثِيسِّيقْثْ قِيبَاتْشْ نّسْ
تّكّنْ إِسيْنُوثنْ نّسْ،
أَكْ-ذ ثبْرُورِي ذ ڒفْحمْ إِتّحْذُوذُوقنْ.
١٤ سِيذِي إِڭَّا أَجَّاجْ أَذْ إِدُّوقّزْ ذڭْ إِجنْوَانْ،
أَمْعُودْجِي خْ كُوڒْشِي إِڭَّا ثْمِيجَّا نّسْ تّْنفْرَارَا:
ثَابْرُورِي ذ ڒفْحمْ إِتّحْذُوذُوقنْ.
١٥ نتَّا إِسّكّْ فْڒِيثْشَاثْ ن ڒْْقوْسْ نّسْ
ؤُشَا إِبزّعْ إِ-ثنْ،
إِزَّارْيضْ أَسَّامنْ ؤُشَا إِسِّيڭّْوذْ إِ-ثنْ.
١٦ ثِيسِيوِينْ ن إِغزْرَانْ ذوْڒنْثْ تّْبَاننْثْ،
ذْسُوسَا ن دُّونشْثْ ذوْڒنْ عَارَّانْ
زڭْ ؤُودّبْ نّشْ، أَ سِيذِي،
زڭْ ؤُسُوضِي ن ڒعْوِينْ زڭْ ونْزَارنْ نّشْ.
١٧ زِي سنّجْ إِسّْوِيژّضْ-د أَفُوسْ نّسْ،
يِيوِي أَيِي،
إِجْبذْ أَيِي-د زڭْ وَامَانْ مْغَارنْ.
١٨ نتَّا إِفكّْ أَيِي-د زِي ڒعْذُو إِنُو إِجهْذنْ،
زڭْ إِنِّي ذ أَيِي إِشَارّْهنْ،
مِينْزِي نِيثْنِي ثُوغَا جهّْذنْ خَافِي.
١٩ نِيثْنِي حْصَارنْ أَيِي
ذڭْ وَاسّْ ن أَرْژِييّثْ إِنُو،
مَاشَا سِيذِي ثُوغَا ذ أَمْعمّذْ إِنُو.
٢٠ نتَّا إِنْذهْ أَيِي غَارْ تَّاسِيعْ
ؤُشَا إِسّنْجمْ أَيِي،
مَاغَارْ نتَّا ثُوغَا إِسّْعِيزَّا أَيِي.
٢١ سِيذِي إِخْڒفْ أَيِي عْلَاحْسَابْ ثَاسڭْذَا إِنُو،
عْلَاحْسَابْ ثَازْذُوڭِي ن إِفَاسّنْ إِنُو إِخدْجصْ أَيِي.
٢٢ مَاغَارْ نشّْ حْضِيغْ إِبْرِيذنْ ن سِيذِي،
وَارْ حيّْذغْ شَا خْ أَربِّي إِنُو س ؤُخيّبْ.
٢٣ مَاغَارْ مَارَّا لْفَارَايِيضْ نّسْ
ثُوغَا جَارْ ثِيطَّاوِينْ إِنُو،
وَارْ حيِّيذغْ شَا خْ ثْوصَّا نّسْ.
٢٤ أَقَا-يِي كمّْڒغْ نِيشَانْ أَكِيذسْ،
حْضِيغْ إِخفْ إِنُو زِي ڒْْمُوعْصِييّثْ إِنُو.
٢٥ سِيذِي إِخْڒفْ أَيِي أَنشْثْ ن ثْسڭْذَا إِنُو،
أَنشْثْ ن ثَازْذُوڭِي ن إِفَاسّنْ إِنُو
زَّاثْ إِ ثِيطَّاوِينْ نّسْ.
٢٦ إِ ؤُمدُّوكّڒْ أَمْثِيقِّي
إِ ثدْجِيذْ شكْ ذ أَمدُّوكّڒْ أَمْثِيقِّي،
إِ بُو-ثغْرُوضْثْ إِكمّْڒنْ
إِ ثدْجِيذْ شكْ ثْكمّْڒذْ.
٢٧ إِ ونِّي إِتّْوَاسِّيزذْڭنْ
أَقَا شكْ ذ أَمزْذَاڭْ،
أَكْ-ذ ونِّي إِفَارْغنْ، أَقَا ثتّْمُوغْزْڒذْ.
٢٨ شكْ ثسّْنجْمذْ ڒْْڭنْسْ إِتّْوَاحْصَارنْ،
مَاشَا ثِيطَّاوِينْعفَّارنْثْ
أَذْ ثنْثْ ثسّهْوِيذْ.
٢٩ مِينْزِي شكْ ذ ڒفْنَارْ إِنُو، أَ سِيذِي!
أَربِّي إِنُو إِتّڭّْ ثَافَاوْثْ ذِي ثَادْجسْثْ إِنُو.
٣٠ مِينْزِي أَكِيذكْ أَذْ أَزّْڒغْ خْ إِشْثْ ن بَانْذِييَّا،
أَكْ-ذ أَربِّي إِنُو أَذْ نڭْزغْ خْ إِجّْ ن ڒْْحِيضْ.
٣١ أَبْرِيذْ ن أَربِّي إِكْمڒْ،
مِينْ إِقَّارْ سِيذِي إِتّْوَاصفَّا ذِي ثْمسِّي.
نتَّا ذ أَسڒْقِي
إِ مَارَّا إِنِّي غَارسْ يَاركّْوَاڒنْ.
٣٢ مَاغَارْ مَانْ ونْ إِ إِدْجَانْ ذ أَربِّي،
مْغِيرْ سِيذِي،
ؤُ مَانْ ونْ إِ إِدْجَانْ ذ ثَاصْضَارْثْ،
مْغِيرْ أَربِّي نّغْ؟
٣٣ أَربِّي ونِّي ذ أَيِي إِتّْبيْسنْ س جّْهذْ،
ونِّي ذ أَيِي إِتِّيشنْ أَبْرِيذْ إِنُو إِكْمڒْ.
٣٤ نتَّا إِڭَّا إِضَارنْ إِنُو
أَمْ يِينِّي ن ثُوذَاذِينْ،
نتَّا يَارَّا أَيِي أَذْ بدّغْ خْ ڒڭْعُوذِي إِنُو.
٣٥ إِسّڒْمذْ إِفَاسّنْ إِنُو إِ ؤُمنْغِي،
إِغَادْجنْ إِنُو مَاحنْذْ أَذْ محْضنْ
إِجّْ ن ڒْْقوْسْ ن نّْحَاسْ.
٣٦ ثوْشِيذْ أَيِي ثَاسدَّارْثْ ن ؤُسڒْقِي
ن ؤُسنْجمْ نّشْ،
أَفُوسْ نّشْ أَفُوسِي ذ أَسنّذْ إِنُو،
أَوَاضعْ نّشْ ثسّمْغَارذْ أَيِي.
٣٧ أَقَا ثڭِّيذْ تَّاسِيعْ
إِ إِصُورِيفْأنْ إِنُو سَاذُو إِنُو،
ثِيشعْبِينْ إِنُو وَارْ ميّْڒنْثْ.
٣٨ نشّْ ضْفَارغْ ڒْْعذْيَانْ إِنُو ؤُ حَارْثغْ خَاسنْ،
وَارْ تّْعِيقِيبغْ أَڒْ ثنْ قْضِيغْ.
٣٩ نشّْ أَردّْدْجغْ ثنْ،
أَڒَامِي وَارْ زمَّارنْ أَذْ كَّارنْ عَاوذْ.
نِيثْنِي وْضَانْ-د سَاذُو إِضَارنْ إِنُو.
٤٠ شكْ ثْبيْسذْ أَيِي س جّهْذْ إِ ؤُمنْغِي،
ثَارِّيذْ-د إِنِّي غَارِي د-إِكَّارنْ
أَذْ أَضَارنْ سَاذُو إِنُو.
٤١ شكْ ثوْشِيذْ أَيِي ثِيمجَّارْثْ ن ڒْْعذْيَانْ إِنُو،
ن يِينِّي ذ أَيِي إِشَارّْهنْ،
ؤُ نشّْ أَردّْدْجغْ ثنْ.
٤٢ نِيثْنِي ڒَْاغَانْ،
مَاشَا وَارْ ذِينْ ثُوغِي أَمْسنْجمْ،
ڒَْاغَانْ خْ سِيذِي،
مَاشَا نتَّا وَارْ خَاسنْ د-يَارِّي.
٤٣ نشّْ ودَّارغْ ثنْ أَمْ ثْعجَّاجْثْ
زَّاثْ إِ ؤُسمِّيضْ،
أَمْ ؤُبدْجَاعْ خْ إِبْرِيذنْ فَارْضغْ زَّايْسنْ.
٤٤ شكْ ثْفكّذْ أَيِي زڭْ إِمْشُوبّْشنْ ن ڒْْڭنْسْ،
ثڭِّيذْ أَيِي ذ أَزدْجِيفْ ن ڒڭْنُوسْ،
إِجّْ ن ويْذُوذْ وَارْ ث سِّينغْ، أَذْ أَيِي إِسخَّارْ.
٤٥ مْغِيرْ ڒَْامِي ذ أَيِي إِسْڒَا ؤُمزُّوغْ نْسنْ وَاهَا،
سْڒِينْ-د غَارِي.
إِبَارَّانِييّنْ سّْنِيعْمِيڒنْ سُّوبُوضنْ أَيِي.
٤٦ فشْڒنْ إِبَارَّانِييّنْ،
وَاخَّا نّْضنْ أَسنْ-د لْبَارَاجَاثْ نْسنْ.
٤٧ ثُوذَارْثْ إِ سِيذِي! أَذْ ثتّْوَابَاركْ ثصْضَارْثْ إِنُو.
أَذْ إِتّْوَاسّْڭعّذْ أَربِّي ن ؤُسنْجمْ إِنُو.
٤٨ أَربِّي ونِّي خَافِي إِتّنْثَاقَامنْ
ونِّي ذ أَيِي إِتّڭّنْ ڒڭْنُوسْ سَاذُو ؤُفُوسْ إِنُو،
٤٩ ونِّي ذ أَيِي إِتّْفكَّانْ
زڭْ ؤُفُوسْ ن ڒْْعذْيَانْ إِنُو،
وَاهْ، شكْ ثسّْڭعَّاذذْ أَيِي
ثِيوَا ن يِينِّي ذ أَيِي إِتّْضَادَّانْ،
شكْ ثسّنْجَامذْ أَيِي زڭْ ورْيَازْ ن ڒخْشُونثْ.
٥٠ خْ ؤُيَا، سِيذِي، خْسغْ أَذْ شكْ قَاذِيغْ،
أَذْ زهّْذغْ إِسمْ نّشْ.
٥١ نتَّا إِڭَّا إِسنْجِيمنْ
ن ؤُجدْجِيذْ نّسْ مْغَارنْ،
إِسّْشنْ ثَامخْسِيوْثْ نّسْ إِشوَّارنْ
إِ ؤُمذْهُونْ نّسْ،
إِ ذَاوُوذْ ؤُ إِ زَّارِيعثْ نّسْ إِ ڒبْذَا.