١٣٢
١ إِزْڒِي ن ؤُڭعّذْ.
أَ سِيذِي، إِذَارْ ذَاوُوذْ،
إِذَارْ مَارَّا أَودّبْ نّسْ،
٢ مَامّشْ إِجِّيدْجْ إِ سِيذِي،
إِوَاعْذْ إِ ؤُمْزمَّارْ ن يَاعْقُوبْ:
٣ ”ؤُشْثْ، مَاڒَا أَذْ أَذْفغْ
غَارْ ثَاقِيذُونْثْ ن ثَادَّارْثْ إِنُو،
أَذْ حبْشغْ خْ قَامَا ن ڒشْثُو إِنُو،
٤ أَذْ سمّْحغْ يِيضصْ إِ ثِيطَّاوِينْ إِنُو،
ؤُڒَا ذ أَنُوذمْ إِ وَابْڒِيونْ إِنُو،
٥ قْبڒْ إِ غَا أَفغْ أَمْشَانْ إِ سِيذِي،
إِشْثْ ن ثْزذِّيغْثْ إِ سِيذِي،
أَمْزمَّارْ ن يَاعْقُوبْ!“
٦ خْزَارْ، نسْڒَا خْ تَّابُوثْ ذِي إِفْرَاثَا،
نُوفَا إِ-ت ذڭْ إِيَّارنْ ن يَاعَارْ.
٧ أَذْ نَاذفْ غَارْ ثْزذِّيغِينْ نّسْ،
أَذْ نسْجذْ إِ ثْنبْذَاثْ ن إِضَارنْ نّسْ.
٨ كَّارْ، سِيذِي، ؤُيُورْ غَارْ أَرَّاحثْ نّشْ،
شكْ ذ تَّابُوثْ ن جّهْذْ نّشْ.
٩ أجّْ إِكهَّاننْ نّشْ
أَذْ يَارْضنْ س ثْسڭْذَا،
إِمْثِيقَّانْ نّشْ أَذْ سْڒِيوڒْونْ.
١٠ وَارْ د-ثَارِّي ؤُذمْ ن ؤُمذْهُونْ نّشْ
ذِي طّْوعْ ن ؤُمْسخَّارْ نّشْ ذَاوُوذْ.
١١ سِيذِي إِجِّيدْجْ إِ ذَاوُوذْ س ڒَْامَانْ،
عمَّارْصْ أَذْ إِحيّذْ نتَّا
خْ ثْجَادْجِيثْ نّسْ:
”زِي ڒْْغِيدْجثْ ن ؤُعذِّيسْ نّشْ
أَذْ سّْغِيمغْ إِجّْ خْ ڒْْعَارْشْ نّشْ.
١٢ مَاڒَا إِحنْجِيرنْ نّشْ
أَذْ حْضَانْ ڒْْعَاهْذْ إِنُو ذ شّْهَاذَاثْ إِنُو،
ثِينِّي ذ أَسنْ إِ غَا سّْڒمْذغْ،
خنِّي ؤُڒَا ذ إِحنْجِيرنْ نْسنْ
أَذْ قِّيمنْ خْ ڒْْكُورْسِي نّشْ إِ ڒبْذَا.“
١٣ مَاغَارْ سِيذِي إِفَارْزْ صِيهْيُونْ،
إِمژْرِي ت ذ ثَازذِّيغْثْ إِ يِيخفْ نّسْ.
١٤ ”وَا ذ أَمْشَانْ ن أَرَّاهثْ إِنُو إِ ڒبْذَا،
ذَا إِ خْسغْ أَذْ زذْغغْ، نشّْ خْسغْ ث.
١٥ أَذْ بَارْكغْ نِّيعْمثْ ن صِيهْيُونْ،
أَذْ سّْجِيوْنغْ إِمزْڒَاضْ نّسْ س وغْرُومْ.
١٦ أَذْ سّْيَارْضغْ إِكهَّاننْ نّسْ
س ؤُسنْجمْ،
إِمْثِيقَّانْ نّسْ أَذْ سْڒِيوڒْونْ س جّهْذْ.
١٧ ذِينِّي أَذْ سّْغمّْيغْ
إِجّْ ن ؤُيِيشّْ إِ ذَاوُوذْ،
إِجّْ نْ ڒفْنَارْ إِ ؤُمذْهُونْ إِنُو
سّْوجْذغْ ث ذِينْ.
١٨ أَذْ سّْيَارْضغْ ڒْْعذْيَانْ نّسْ
س ؤُسضْحِي،
مَاشَا أَذْ خَاسْ إِنُّووَارْ
تَّاجْ ن وعْزَاڒْ نّسْ.“