١١١
١ هَالِّيلُو-يَاهْ!
أَلِيفْ. أَذْ قَاذغْ سِيذِي
س مَارَّا ؤُڒْ إِنُو،
بِيثْ. ذِي ڒَْامَانْ ن وڭْرَاوْ
ن يِينِّي إِڭُّورنْ نِيشَانْ، ذِي ثْمسْمُونْثْ.
٢ ڭِيملْ. ڒفْعَايڒْ ن سِيذِي ذ إِمقّْرَاننْ،
ذَالِيثْ. أَقَا ثْوَارزُّونْ
زِي مَارَّا إِنِّي زَّايْسنْ إِفَارّْحنْ.
٣ هِي. نتَّا إِڭَّا س لْعَاضَامَا ذ ڒْْعزّْ،
وَاوْ. ثَاسڭْذَا نّسْ ثتّْغِيمَا إِ ڒبْذَا.
٤ زَايِينْ. نتَّا إِڭَّا إِجّْ ن ڒْْعِيذْ
إِ ڒِْيذَارثْ ن لْمُوعْجِيزَاثْ نّسْ.
خِيثْ. سِيذِي ذ أَحْنِينْ ذ أَرْحِيمْ.
٥ ثِيث. نتَّا إِوْشَا مَاشَّا
إِ يِينِّي ث إِتّڭّْوذنْ،
يُوذْ. إِتِّيذَارْ ڒْْعَاهْذْ نّسْ إِ ڒبْذَا.
٦ كَافْ. نتَّا إِسّْشنْ إِ ڒْْڭنْسْ نّسْ
ثِيمڭَّا نّسْ إِجهْذنْ،
لَامِيذْ. حِيمَا أَذْ أَسنْ إِوْشْ
ثَاسْغَارْثْ ن ڒڭْنُوسْ.
٧ مِيمْ. ڒفْعَايڒْ ن إِفَاسّنْ نّسْ
ذ ثِيذتّْ ذ ڒْْحقّْ،
نُونْ. مَارَّا ثِيوصَّا نّسْ
ذَايْسنْثْ ڒَْامَانْ،
٨ سَامِيخْ. أَقَا أَثنْ بدّنْ إِ ڒبْذَا،
عَايِينْ. تّْوَاڭّنْ ذِي ثِيذتّْ ؤُ س ڒصْفَايثْ.
٩ بِي. نتَّا إِسّوْجذْ تَّامَانْ ن وصْڒَاحْ
إِ ڒْْڭنْسْ نّسْ،
ثْسَاذِي. إِڭَّا ڒْْعَاهْذْ نّسْ إِ ڒبْذَا.
قُوفْ. إِسمْ نّسْ
ذ أَمْقدَّاسْ ذ إِسّڭّْوَاذنْ.
١٠ رِيخْ. ثِيڭّْوُوذِي ن سِيذِي ذ بدُّو ن ثِيغِيثْ.
شِينْ. مَارَّا إِنِّي إِتّڭّنْ أَمنِّي،
أَقَا غَارْسنْ ڒعْقڒْ ذ لمْلِيحْ.
ثَافْ. شَّانْ نّسْ إِتّْغِيمَا إِ ڒبْذَا.