١٠٩
١ إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ.
أَ أَربِّي ن ؤُصبّحْ إِنُو، وَارْ سْغِيذِي!
٢ مَاغَارْ أَقمُّومْ ن إِجّْ ن ؤُعفَّانْ،
أَقَا أَقمُّومْ إِشُّورْ س إِخَارِّيقنْ
إِنُّورْزمْ خَافِي.
نِيثْنِي سَّاوَاڒنْ أَكِيذِي
س يِيجّْ ن يِيڒسْ إِسّْخَارِّيقنْ.
٣ نّْضنْ أَيِي-د
س وَاوَاڒنْ إِشُّورنْ س وشْرَاهْ،
تّْمنْغَانْ أَكِيذِي خْ وَالُو.
٤ إِ ثْوَارِّيثْ خْ ثْمخْسِيوْثْ إِنُو،
شّثْشَانْ نِيثْنِي زَّايِي
ؤُ نشّْ كسِّيغْ س ڒْْمعْرُوفْ.
٥ نِيثْنِي خدْجْصنْ أَيِي ڒْْخَارْ س ڒْْغَارْ،
ثَامخْسِيوْثْ إِنُو س وشْرَاهْ.
٦ أڭّْ خَاسْ إِجّْ ن ؤُعفَّانْ،
أجّْ إِجّْ ن شِّيطَانْ أَذْ إِبدّْ
غَارْ ؤُغزْذِيسْ نّسْ.
٧ مَاڒَا خَاسْ شَارّْعنْ،
أَذْ إِفّغْ أَمْ ؤُقْطَاطْعِي
ؤُشَا أجّْ ثَاژَادْجِيثْ نّسْ أَذْ ثِيڒِي ذ دّنْبْ.
٨ أَذْ ذوْڒنْ ؤُسَّانْ نّسْ ؤُذْرُوسنْ،
أجّْ ونّغْنِي أَذْ إِطّفْ ڒْْفُوسِينَا نّسْ.
٩ أَذْ ذوْڒنْ إِحنْجِيرنْ نّسْ ذ إِيُوجِيڒنْ،
ثَامْغَارْثْ نّسْ ذ ثَاجَّاتْشْ.
١٠ أَذْ ثلّْعنْ إِحنْجِيرنْ نّسْ ذَا ذ ذِيهَا،
أَذْ تَّارنْ، أَذْ أَرْزُونْ خْ مَاشَّا
غَارْ ڒَْاڭّْوَاجْ ن ڒْْخِيرْبَاثْ ن ثْزذِّيغِينْ نْسنْ.
١١ أَذْ إِتَّارْ بُو-ؤُمَارْوَاسْ مَارَّا مِينْ غَارسْ،
أَذْ كشّْضنْ إِبَارَّانِييّنْ
ڒْْغِيدْجثْ ن وَارْبرْ نّسْ.
١٢ وَارْ غَارسْ إِتِّيڒِي ؤُڒَا ذ إِجّنْ
ونِّي ذ أَسْ إِ غَا إِڭِّينْ
س ثْمخْسِيوْثْ إِشوَّارنْ،
أجّْ ؤُڒَا ذ إِجّْ أَذْ إِحِينّْ
خْ إِيُوجِيڒنْ نّسْ.
١٣ أَذْ تّْوَاثحَّانْ ثَارْوَا نّسْ أَوَارْنِي أَسْ،
أَذْ إِتّْوَامْحَا إِسمْ نْسنْ
ذِي جِّيڒْ إِ د غَا يَاسنْ.
١٤ أَذْ يِيذَارْ سِيذِي ڒْْمُوعْصِييّثْ ن ڒجْذُوذْ نّسْ،
عمَّارْصْ وَارْ إِمحِّي دّنْبْ ن يمَّاسْ.
١٥ إِڒِي أَذْ بدّنْ ڒبْذَا قِيبَاتْشْ إِ سِيذِي،
أجّْ إِ-ث أَذْ إِكّسْ ڒِْيذَارثْ نْسنْ خْ ثمُّورْثْ.
١٦ مَاغَارْ نتَّا وَارْ إِعْقِيڒْ
حِيمَا أَذْ يڭّْ س ثْمخْسِيوْثْ إِشوَّارنْ،
مَاشَا إِمَارّثْ ڒْْمسْكِينْ ذ ؤُمزْڒُوضْ،
ؤُڒَا ذ ونِّي ؤُمِي إِتّْوَارْژْ وُوڒْ،
حِيمَا أَذْ ث إِنغْ.
١٧ نتَّا ثُوغَا إِتّخْسْ نّعْڒثْ،
خنِّي أجّْ إِ-ت أَذْ خَاسْ ثوْضَا،
ؤُ ؤُمِي وَارْ إِفَارْحْ س لْبَارَاكَا،
أجّْ إِ-ت أَذْ خَاسْ ثِيڭّْوجْ.
١٨ ؤُمِي يَارْضْ نّعْڒثْ أَمْ وَارُّوضْ نّسْ،
أجّْ إِ-ت أَذْ ثَاذفْ خنِّي
أَمْ وَامَانْ غَارْ ذَاخڒْ نّسْ،
أَمْ زّشْثْ ذڭْ إِغْسَانْ نّسْ.
١٩ أجّْ أَذْ ثِيڒِي نّعْڒثْ نِّي
أَمْ وَارُّوضْ إِ ذِي إِتّْڒحّفْ،
أَمْ وبْيَاسْ إِ إِبكّسْ ڒبْذَا.
٢٠ ثَا ذ ڒْْمُونثْ ن سِيذِي إِ إِغْرِيمنْ إِنُو،
إِ يِينِّي إِسَّاوَاڒنْ ڒْْغَارْ خْ ڒعْمَارْ إِنُو.
٢١ مَاشَا شكْ، أَ سِيذِي، سِيذِي إِنُو،
أڭّْ ذَايِي أَمْ مَامّشْ ثخْسذْ
ذِي طّْوعْ ن يِيسمْ نّشْ،
مَاغَارْ ثَامخْسِيوْثْ نّشْ إِشوَّارنْ
ذ ثَاصبْحَانْثْ،
فكّْ أَيِي.
٢٢ مَاغَارْ نشّْ ذِي ڒغْبنْ ؤُ زڒْضغْ،
ؤُڒْ إِنُو إِتّْوَاسّْنُوقّبْ
غَارْ ذَاخڒْ ذڭْ إِذْمَارنْ إِنُو.
٢٣ أَمْ إِشْثْ ن ثِيڒِي إِزُّوڭَّارْثنْ قطِّيغْ،
زّْرُوزَانْ أَيِي أَمْ يِيشْثْ ن ثْمُورْغِي.
٢٤ إِفَادّنْ إِنُو تَّارْجِيجِينْ س ؤُژُومِّي،
أَرِّيمثْ إِنُو ذ ثَامُوسْرِيوْثْ،
إِتّْخصَّا إِ-ت ثَاذُونْثْ.
٢٥ نشّْ ذوْڒغْ أَسنْ
ذ إِشْثْ ن ڒْْقشْعثْ ن ؤُسحْقَارْ.
مَاڒَا ژْرِينْ أَيِي،
سّنْهزَّانْ أَزدْجِيفْ نْسنْ.
٢٦ أوْشْ أَيِي أَفُوسْ، أَ سِيذِي، أَربِّي إِنُو،
سنْجمْ أَيِي
عْلَاحْصَابْ ثَامخْسِيوْثْ نّشْ إِشوَّارنْ،
٢٧ حِيمَا أَذْ سّْننْ
أَقَا ذ مَانْ أَيَا ذ أَفُوسْ نّشْ،
أَقَا شكْ إِ إِڭِّينْ مَانْ أَيَا، أَ سِيذِي.
٢٨ نِيثْنِي ذ يِينِّي إِنعّْڒنْ،
مَاشَا شكْ أَذْ ثْبَارْكذْ،
مَاڒَا تّْغوّْغنْ،
أَذْ ذوْڒنْ تّْسضْحَانْ
مَاشَا أَمْسخَّارْ نّشْ أَذْ إِفَارْحْ.
٢٩ أجّْ إِغْرِيمنْ إِنُو أَذْ يَارْضنْ س ڒفْضِيحثْ،
أَذْ ڒحّْفنْ ذڭْ ؤُسضْحِي
أَمْ ذڭْ إِجّْ ن ؤُسڒْهَامْ.
٣٠ زڭْ وُوڒْ إِنُو أَذْ قَاذِيغْ سِيذِي
س ؤُقمُّومْ إِنُو،
أَذْ ث سّمْغَارغْ جَارْ وَاطَّاسْ.
٣١ مَاغَارْ نتَّا أَذْ إِبدّْ
أَكْ-ذ ؤُمزْڒُوضْ غَارْ ؤُفُوسْ نّسْ أَفُوسِي،
حِيمَا أَذْ ث إِسّنْجمْ
زڭْ إِنِّي إِحكّْمنْ خْ ڒعْمَارْ نّسْ.