١٨
١ ونِّي إِعزّْڒنْ إِخفْ نّسْ،
يَارزُّو خْ مژْرِي نّسْ،
نتَّا إِدُّوقُّوزْ خْ مَارَّا
مِينْ إِزمَّارنْ أَذْ يِيڒِي ذ أَذبَّارْ.
٢ أَبُوهَاڒِي وَارْ ذ أَسْ ثتّعْجِيبْ ڒفْهَامثْ،
إِتّعْجِيبْ أَسْ مْغِيرْ أَعَارِّي ن وُوڒْ نّسْ.
٣ خْمِي د-إِتَّاذفْ ؤُعفَّانْ،
إِتَّاسْ-د ؤُڒَا ذ أَسحْقَارْ،
ؤُ أَكْ-ذ ڒفْضِيحثْ إِتَّاسْ-د ڒْْعَارْ.
٤ أَوَاڒنْ زڭْ ؤُقمُّومْ ن ورْيَازْ
أَمْ وَامَانْ يُودْجْغنْ،
ڒْْعُونْصَارْ ن ثِيغِيثْ ذ إِشْثْ ن ثِيغْزَارْثْ إِتَّازّْڒنْ.
٥ وَارْ إِدْجِي شَا مْلِيحْ أَذْ ثسّْعِيزّذْ أَعفَّانْ،
مَاحنْذْ أَذْ ثسّْحيّْذذْ
أَمْسڭّذْ ذِي شّْرعْ.
٦ إِينْشِيشنْ ن ؤُبُوهَاڒِي ندّْهنْ ث
غَارْ ؤُمْشبّشْ،
أَقمُّومْ نّسْ إِتّْڒَاغَا-د إِ وعْمُوذْ.
٧ أَقمُّومْ ن ؤُبُوهَاڒِي ذ أَهلّكْ نّسْ،
إِينْشِيشنْ نّسْ ذ ڒْْفخْ إِ ڒعْمَارْ نّسْ.
٨ أَوَاڒنْ ن إِخْبَارْجِييّنْ أَمْ حَالَاوِيثْ،
هكّْوَانْثْ ذڭْ إِخَّامنْ
ن ذَاخڒْ ن ؤُعذِّيسْ.
٩ ونِّي إِدْجَانْ ذ أَمَارْخُو ذِي ڒْْخذْمثْ نّسْ،
أَقَا ث ذ ؤُمَاسْ ن بَابْ ن ؤُڒدّدْجْ.
١٠ إِسمْ ن سِيذِي ذ إِجّْ ن لْبُورْجْ إِمْثنْ،
أَمْسڭّذْ إِتَّازّڒْ غَارْ ذِينِّي،
ؤُشَا إِتّْوَاسَّاكّْوَاضْ أَڒْ ذِينْ ذِي ڒَامَانْ.
١١ أَڭْڒَا ن بُو-وَاڭْڒَا
ذ ثَانْذِينْثْ نّسْ إِجهْذنْ،
ثَانِيثَا أَمْ يِيجّْ ن ڒْْحِيضْ يُوعْڒَانْ قَاعْ
ذِي ڒْْبَاڒْ نّسْ.
١٢ قْبڒْ مَا إِ غَا إِتّْوَارْژْ،
إِتّْڭعَّاذْ وُوڒْ نْ بْنَاذمْ،
مَاشَا أَوَاضعْ إِتِّيزْوَاڒْ أَسْ إِ شَّانْ.
١٣ ونِّي د-إِتَّارَّانْ أَوَاڒْ
قْبڒْ إِ غَا إِسڒْ،
ذ مَانْ أَيَا ذ ثُوبُّوهڒْيَا
ذ ڒفْضِيحثْ إِ نتَّا.
١٤ بُوحْبڒْ ن ورْيَازْ
إِتّْسنّذْ إِ-ث غَارْ ڒهْڒَاشْ نّسْ،
مَاشَا بُوحْبڒْ إِتّْوَارْژنْ،
وِي إِزمَّارنْ أَذْ ث إِكْسِي؟
١٥ ؤُڒْ ن ؤُفهَّامْ يَارزُّو ثُوسّْنَا،
أَمزُّوغْ ن ؤُمِيغِيسْ يَارزُّو ثُوسّْنَا.
١٦ ثَارْزفْثْ ن بْنَاذمْ ثَارزّمْ أَسْ ثِيوُّورَا،
ثْندّهْ إِ-ث زَّاثْ إِ وُوذمْ ن إِمقّْرَاننْ.
١٧ ونِّي ذ أَمزْوَارُو ذِي دّعْوثْ نّسْ
إِتّْبَانْ ذ أَمْسڭّذْ،
مَاشَا خنِّي أَذْ د-يَاسْ جَّارْ نّسْ
ؤُشَا إِتّْنشّبْ ذِي ثْمسْڒَاشْثْ.
١٨ ثَاقدُّوحْثْ إِتّجَّانْ إِمنْغَانْ تّْبدَّانْ،
ثْبطَّا جَارْ إِنِّي غَارْ ثدْجَا صُّولْطَا.
١٩ إِجّْ ن ؤُمَا نِّي ؤُمِي ذِي ڭِّينْ ڒْْعِيبْ،
إِتّْوَاطّفْ كْثَارْ خْ إِشْثْ ن ثنْذِينْثْ إِجهْذنْ،
إِمنْغَانْ ڭِّينْ أَمْ زّكْرُونْ ن ڒقْصَارْ.
٢٠ زِي ڒْْغِيدْجثْ ن ؤُقمُّومْ ن إِجّْ ن ورْيَازْ
إِتّْيَاوَانْ ؤُعذِّيسْ نّسْ،
أَذْ إِجَّاونْ زِي صَّابثْ ن إِينْشِيشنْ نّسْ.
٢١ ڒْْموْثْ ذ ثُوذَارْثْ ذڭْ ؤُفُوسْ ن يِيڒسْ،
كُوڒْ إِجّنْ ونِّي ثنْ إِتّخْسنْ،
أَذْ يشّْ رْغِيدْجثْ نْسنْ.
٢٢ ونِّي يُوفِينْ ثَامْغَارْثْ،
يُوفَا مِينْ إِصبْحنْ،
ؤُ نتَّا إِطّفْ أَرْضَا ن سِيذِي.
٢٣ س ؤُحشّمْ إِسَّاوَاڒْ ؤُمزْڒُوضْ،
بُو-وَاڭْڒَا إِتَّارَّا-د س ڒقْسَاحثْ.
٢٤ أَرْيَازْ نِّي غَارْ دْجَانْ إِمدُّوكَّاڒْ أَطَّاسْ،
أَذْ إِوْضَا ذِي ثَامَارَا،
مَاشَا شَا ن إِمُورنْ
أَمدُّوكّڒْ إِتّخْسْ إِ شكْ
كْثَارْ زِي ثَاوْمَاثْ.