١٧
١ إِحْڒَا إِجّْ ن ؤُزعِّيفْ ن وغْرُومْ
يُوژْغنْ أَكْ-ذ ڒهْنَا،
خْ إِشْثْ ن ثَادَّارْثْ ثشُّورْ س ثْغَارْصَا،
ذَايسْ أَمنْغِي.
٢ إِجّْ ن يِيسْمغْ إِفثْننْ أَذْ إِضبَّارْ
خْ إِجّْ ن مِّيسْ نِّي إِتَّاوْينْ غَارْ ڒفْضِيحثْ،
ذِي ڒْْوسْطْ ن يَايْثْمَاسْ أَذْ إِبْضَا نتَّا ڒْْوَارْثْ.
٣ أَطنْجِيرْ ن ؤُسفْسِي إِ نُّوقَارْثْ
ؤُ أَفَارَّانْ إِ وُورغْ،
مَاشَا سِيذِي إِتّْجَارَّابْ ؤُڒَاونْ.
٤ أَعفَّانْ إِخزَّارْ غَارْ إِينْشِيشنْ إِعفَّاننْ،
بُو-إِخَارِّيقنْ إِتِّيشْ أَمزُّوغْ
إِ يِيڒسْ إِشُّورنْ س ڒْْغشّْ.
٥ ونِّي إِتّْحشّنْ خْ ؤُمزْڒُوضْ،
إِسّْفطّحْ ونِّي ث-إِ-د-إِخڒْقنْ،
ونِّي إِفَارّْحنْ خْ أَرْژِييّثْ،
وَارْ إِتّْوِيحْسِيبْ ذ أَمزْذَاڭْ.
٦ تَّاجْ ن إِوسُّورَا ذ أَيَّاونْ،
ثَالْوِيزْثْ ن إِحنْجِيرنْ ذ إِبَابَاثنْ نْسنْ.
٧ أَينْشِيشْ ن شَّانْ
وَارْ د-إِتِّيسْ أَكْ-ذ ؤُبُوهَاڒِي،
خنِّيعسَّاكْ عَاذْ أَينْشِيشْ إِسّْخَارِّيقنْ
أَكْ-ذ ؤُمْشنّعْ.
٨ ثَارْزفْثْ ن أَرّشْوثْ
ذ إِجّْ ن وژْرُو إِزوّْقنْ
ذِي ثِيطَّاوِينْ ن بَابْ نّسْ،
مَانِي مَا يَارَّا س ؤُزدْجِيفْ، إِتّفْڒِيحْ.
٩ ونِّي إِسّْذُورُّوينْ أَخطُّو،
يَارزُّو ثَايْرِي،
مَاشَا ونِّي إِتّْعَاوَاذنْ
إِشْثْ ن ڒْْحَاجّثْ زِي جْذِيذْ،
إِبطَّا إِمدُّوكَّاڒْ إِشْنَانْ.
١٠ إِتّْقَارَّا ؤُثخْثخْ خْ ؤُفهَّامْ
أَطَّاسْ خْ مْيَا ن ثيِّيثَا خْ يِيجّْ ن ؤُبُوهَاڒِي.
١١ أَمْغوّغْ يَارزُّو مْغِيرْ خْ ڒْْغَارْ،
خْ ؤُيَا أَذْ غَارسْ د-إِتّْوَاسّكّْ
إِجّْ ن ؤُمْسخَّارْ إِقسْحنْ ضِيدّْ نّسْ.
١٢ أجّْ أَذْ إِمّڒْقَا شَا ن دُّوبْ
إِ ؤُمِي تّْوَاشَارنْ ثَارْوَا أَكْ-ذ شَا ن يِيجّنْ،
مَاشَا وَارْ إِدْجِي أَبُوهَاڒِي ذِي ثُوبُّوهڒْيَا نّسْ.
١٣ ونِّي إِتّْخدْجَاصنْ مِينْ إِصبْحنْ س ڒْْغَارْ،
وَارْ ثتّْحيِّيذْ أَرْژِييّثْ خْ ثَادَّارْثْ نّسْ.
١٤ بدُّو ن ؤُمنْغِي
أَمشْنَاوْ أَرْزَامْ ن ڒْْحمْڒثْ ن وَامَانْ.
أجّْ أَمنْغِي أَذْ يَارْسْ قْبڒْ إِ غَا إِدُّوقّزْ.
١٥ ونِّي إِتّْبَارَّانْ أَعفَّانْ
ؤُ ونِّي إِتّْبَارَّاحنْ
أَقَا أَمْسڭّذْ ذ أَعفَّانْ،
أَقَا نِيثْنِي س ثْنَاينْ إِذْسنْ
ذ نّْعِي إِ سِيذِي.
١٦ مَايمِّي ذِينْ إِ غَا إِڒِينْثْ ثْمنْيَاثْ
ذڭْ ؤُفُوسْ ن ؤُبُوهَاڒِي
مَاحنْذْ أَذْ إِسغْ ثِيغِيثْ،
أَمْ وَارْ غَارسْ ؤُڒْ إِ مَانْ أَيَا؟
١٧ أَمدُّوكّڒْ ذ ثِيذتّْ إِتّخْسْ ڒبْذَا،
ؤُ ثَاوْمَاثْ ثتّْوَاخْڒقْ-د إِ ڒحْصَارثْ.
١٨ بْنَاذمْ نِّي وَارْ غَارْ إِدْجِي وُوڒْ إِمْثنْ،
إِشَّاثْ أَفُوسْ،
إِتّڭّْ إِخفْ نّسْ ذ أَضْمَانْ إِ جَّارْ نّسْ.
١٩ ونِّي إِتّخْسنْ أَخطُّو،
إِتّخْسْ أَمْشُوبّشْ،
ونِّي إِتّڭّنْ ثَاوَّارْثْ نّسْ ثْڭعّذْ،
يَارزُّو ثَارژِّيثْ.
٢٠ ونِّي غَارْ إِدْجَا ؤُڒْ إِفَارْغْ،
وَارْ إِتِّيفْ مِينْ إِصبْحنْ،
ونِّي إِفَارّْغنْ س إِينْشِيشنْ نّسْ،
أَذْ إِوْضَا ذِي أَرْژِييّثْ.
٢١ ونِّي د-يُورْونْ إِجّْ ن ؤُبُوهَاڒِي،
إِتَّاوِي-د أَشْضَانْ إِ يِيخفْ نّسْ،
بَابَاسْ ن ؤُبُوهَاڒِي وَارْ إِزمَّارْ أَذْ إِفَارْحْ.
٢٢ ؤُڒْ إِفَارْحنْ إِجبّذْ أَڭنْفُو،
مَاشَا بُوحْبڒْ إِشضْننْ إِسَّاژَاغْ إِغْسَانْ.
٢٣ أَعفَّانْ أَذْ د-إِكْسِي ثَارْزفْثْ ن أَرّشْوثْ
زڭْ وحْسِينْ،
حِيمَا أَذْ إِسّْفَارْغْ إِمسْرَاقْ ن ڒْْحقّْ.
٢٤ أَفهَّامْ إِتّڭّْ ثِيغِيثْ زَّاثْ إِ ثْمُوغْڒِي نّسْ،
مَاشَا ثِيطَّاوِينْ ن ؤُبُوهَاڒِي
تَّاوْينْثْ أَڒْ طَّارْفْ ن ثمُّورْثْ.
٢٥ إِجّْ ن مِّيسْ أَبُوهَاڒِي ذ ڒعْذَابْ إِ بَابَاسْ،
ذ إِجّْ ن ڒحْڒِيقْ أَمرْزَاڭْ
إِ ونِّي ث-إِ-د يُورْونْ.
٢٦ أَودّبْ ن ؤُمْسڭّذْ وَارْ إِدْجِي نِيشَانْ،
أَمْ ؤُڒَا ذ ثِييِّيثَا إِ أَيْثْ ن طَّاسِيڒثْ
ذِي سِّيبّثْ ن ڒصْفَايثْ نْسنْ.
٢٧ ونِّي غَارْ ثدْجَا ثُوسّْنَا،
إِمنّعْ أَوَاڒنْ نّسْ،
أَرْيَازْ أَفهَّامْ ذَايسْ بُوحْبڒْ نّسْ يَارْسَا.
٢٨ ؤُڒَا أَبُوهَاڒِي إِسّْغَاذنْ،
أَذْ إِتّْوَاحْسبْ ذ أَمِيغِيسْ،
ونِّي إِبلّْعنْ إِينْشِيشنْ نّسْ
أَذْ إِتّْوَاحْسبْ ذ أَفتَّانْ.