٢٤
أَوَاڒنْ إِوزْننْ ن بَالْعَامْ
١ إِژْرَا بَالْعَامْ بلِّي أَقَا يَارْضَا إِ ثِيطَّاوِينْ ن سِيذِي ؤُمِي إِبَاركْ إِسْرَائِيل ؤُشَا خنِّي وَارْ يَارزُّو، أَمْ ؤُمُورْ أَمزْوَارُو ذ ؤُمُورْ وِيسّْ ثْنَاينْ، حِيمَا أَذْ إِعزّمْ س إِفِيغْرَانْ، مَاشَا يَارَّا ؤُذمْ نّسْ غَارْ ڒخْڒَا.
٢ ؤُمِي إِسّْڭعّذْ ثَامُوغْڒِي نّسْ، إِژْرَا إِسْرَائِيل إِزْذغْ ذِينْ، ثتّْوَاستّفْ عْلَاحْسَابْ ثِيقبَّاڒْ نّسْ، خنِّي يُوسَا-د أَرُّوحْ ن أَربِّي خَاسْ.
٣ إِبْذَا نتَّا أَوَاڒْ نّسْ إِوزْننْ، إِنَّا:
”أَوَاڒْ ن بَالْعَامْ، مِّيسْ ن بَاعُورْ،
أَوَاڒْ ن ورْيَازْ إِجهْذنْ، ونِّي ؤُمِي ثقّنْ ثِيطّْ،
٤ إِجّْ ن وَاوَاڒْ ن ونِّي إِسْڒِينْ أَوَاڒنْ ن أَربِّي،
ذ ونِّي إِخزَّارنْ ڒوْحِييْ
ن ؤُمْزمَّارْ خْ كُوڒْشِي،
أَمْ د-إِوْضَا س ثِيطَّاوِينْ يَارزْمنْ.
٥ أَ يَاعْقُوبْ، مشْحَاڒْ صبْحنْ إِقِيضَانْ نّشْ،
ذ ثْزذِّيغِينْ نّشْ، أَ إِسْرَائِيل!،
٦ أَقَا سّْوِيژَّاضنْ أَمشْنَاوْ ثِيغْزُورِينْ،
أَمشْنَاوْ أَغمُّويْ إِشوَّارنْ أَكْ-ذ يغْزَارْ،
أَمشْنَاوْ أَشْفِيڒْ نِّي إِژُّو سِيذِي،
أَمشْنَاوْ ثِيشجِّيرَا ن ثنْڭلْثْ
زَّاثْ إِ وَامَانْ.
٧ زڭْ إِبُوقَاڒنْ نّسْ أَذْ سِّيزّْڒنْ وَامَانْ
ؤُشَا زَّارِيعثْ نّسْ أَذْ ثِيڒِي ذِي ثُوفّثْ.
أَجدْجِيذْ نّسْ أَذْ إِتّْوَاسّْڭعّذْ خْ أَجَاجْ
ؤُ ثَاڭلْذِيثْ نّسْ أَذْ ثتّْوَاسُّوعْڒَا.
٨ أَربِّي إِسُّوفّغْ إِ-ث-إِ-د زِي مِيصْرَا.
جّهْذْ نّسْ أَمْ وَاشَّاونْ إِزِيرَارنْ
ن إِغَايْضْ ن ڒخْڒَا.
أَذْ يشّْ ڒڭْنُوسْ، إِغْرِيمنْ نّسْ،
أَذْ إِڒْبزْ إِغُوسَّانْ نْسنْ
ؤُشَا أَذْ ثنْ إِسّْنُوقّبْ س فْڒِيثْشَاثْ نّسْ.
٩ أَقَا إِغْنسْ،
إِسّزّڒْ إِخفْ نّسْ أَمْ ويْرَاذْ،
أَمْ ثيْرَاذْثْ.
وِي ث إِ د غَا إِسّكَّارنْ؟
ونِّي شكْ إِتّْبَارْكنْ، أَذْ إِتّْوَابَاركْ
ؤُ ونِّي شكْ إِنعّْڒنْ، أَذْ يِيڒِي إِتّْوَانْعڒْ!‘ “
١٠ خنِّي يَارْغَا ؤُخيّقْ ن بَالَاكْ خْ بَالْعَامْ. إِوْثَا نتَّا ذڭْ إِفَاسّنْ نّسْ ؤُشَا بَالَاكْ إِنَّا إِ بَالْعَامْ: ”أَقَا ڒَْاغِيغْ-د شكْ مَاحنْذْ أَذْ ثْنعْڒذْ ڒْْعذْيَانْ إِنُو، مَاشَا خْزَارْ، أَقَا ثْبَارْكذْ إِ-ثنْ عَاذْ نِيشَانْ ثْڒَاثَا ن إِمُورنْ!
١١ خنِّي ڒخُّو، أَرْوڒْ غَارْ ومْشَانْ مَانِي ثْزدّْغذْ! نشّْ نِّيغْ أَشْ ث، أَذْ شكْ شنْعغْ أَطَّاسْ، مَاشَا خْزَارْ، سِيذِي إِمْنعْ خَاكْ شّنْعثْ نِّي!“
١٢ خنِّي إِنَّا بَالْعَامْ إِ بَالَاكْ: ”مَا وَارْ سِّيوْڒغْ أَكْ-ذ إِرقَّاسنْ نِّي ذ أَيِي د-ثسّكّذْ ؤُشَا نِّيغْ:
١٣ ’وَاخَّا بَالَاكْ أَذْ أَيِي إِوْشْ ثَادَّارْثْ نّسْ ثشُّورْ س نُّوقَارْثْ ذ وُورغْ، خنِّي نشّْ عَاذْ وَارْ زْمِيرغْ أَذْعذِّيغْ خْ ڒُْومُورْ ن سِيذِي، مَاحنْذْ أَذْ ڭّغْ شَا ن ڒْْحَاجّثْ ن ڒْْخَارْ نِيغْ ن ڒْْغَارْ إِ د-إِتّفّْغنْ زڭْ وُوڒْ إِنُو. مِينْ غَا يِينِي سِيذِي، أَذْ ث إِنِيغْ.‘
١٤ ڒخُّو خنِّي، خْزَارْ، نشّْ أَذْ د-ذوْڒغْ غَارْ ڒْْڭنْسْ إِنُو. أَسْ-د، نشّْ أَذْ شكْ سَّارڭْبغْ خْ ڒفْهَامثْ ؤُشَا أَذْ أَشْ إِنِيغْ مِينْ ذ أَشْ غَا يڭّْ ڒْْڭنْسْ-أَ ذڭْ ؤُنڭَّارْ ن وُوسَّانْ.“
١٥ خنِّي إِبْذَا نتَّا أَوَاڒْ إِوزْننْ نّسْ، إِنَّا:
”أَوَاڒْ ن بَالْعَامْ، مِّيسْ ن بَاعُورْ،
أَوَاڒْ ن ورْيَازْ إِجهْذنْ،
ونِّي ؤُمِي ثقّنْ ثِيطّْ!
١٦ ثَاوَاڒْثْ ن ونِّي إِسْڒِينْ أَوَاڒنْ ن أَربِّي،
ذ ونِّي إِسّْننْ زِي ثُوسّْنَا
ن ونِّي ذ أَمْعُودْجِي خْ كُوڒْشِي،
ذ ونِّي إِخزَّارنْ ڒوْحِييْ
ن ؤُمْزمَّارْ خْ كُوڒْشِي،
أَمْ د-إِوْضَا س ثِيطَّاوِينْ يَارزْمنْ.
١٧ أَذْ ث ژَترْغْ، وَارْ إِدْجِي ڒخُّو،
أَذْ ث ثْوَاڒِيغْ، مَاشَا وَارْ إِدْجِي زِي ڒَْاذَاسثْ.
أَذْ د-إِفّغْ إِثْرِي زِي يَاعْقُوبْ
ؤُشَا أَذْ ثكَّارْ ؤُزدْجَاضْ
ن ڒْْحَاكمْ زِي إِسْرَائِيل،
ونِّي إِ غَا إِڒبْزنْ لْحنْكَاثْ
ن ؤُزدْجِيفْ ن مُوآبَ
ؤُشَا أَذْ إِڒْبزْ مَارَّا ثَارْوَا ن سّْذعْ
١٨ ؤُشَا أَذْ إِتّْوَاطّفْ إِذُومْ ذ ڒْْوَارْثْ
ؤُ سَاعِيرْ، ونِّي ذ ڒعْذُو نّسْ،
أَذْ ث طّْفنْ ذ ڒْْوَارْثْ عَاوذْ،
ؤُشَا أَمُّو إِ غَا يڭّْ إِسْرَائِيل س ثَارْيَاسْثْ.
١٩ ؤُ ونِّي إِ د غَا إِفّْغنْ زِي يَاعْقُوبْ أَذْ إِحْكمْ
ؤُ نتَّا أَذْ إِسّْهلّكْ
ونِّي يَاروْڒنْ زِي ثنْذِينْثْ.“
٢٠ ؤُمِي نتَّا إِژْرَا عَامَالِيقْ، إِبْذَا أَوَاڒْ إِوزْننْ نّسْ، إِنَّا:
”عَامَالِيقْ ذ أَمزْوَارُو ن ڒڭْنُوسْ،
مَاشَا أَنڭَّارُو نّسْ أَذْ إِذْوڒْ ذ أَهلّكْ!“
٢١ ڒَْامِي إِژْرَا إِقِينِييّنْ، إِبْذَا نتَّا أَوَاڒْ إِوزْننْ نّسْ، إِنَّا:
”ثَازذِّيغْثْ نّشْ ثمْثنْ
ؤُشَا ثڭِّيذْ ڒْْعُوشّْ نّشْ ذِي ثصْضَارْثْ.
٢٢ عَاذْ قَايِينْ أَذْ إِتّْوَاسّشْمضْ.
أَڒْ مڒْمِي إِزمَّارْ أَشُّورْ
أَذْ أَشْ د-يَاوِي ذ أَمحْبُوسْ؟“
٢٣ ؤُشَا إِبْذَا نتَّا أَوَاڒْ إِوزْننْ نّسْ، إِنَّا:
”أَيْ، وِي غَا إِقِّيمنْ إِدَّارنْ
خْمِي خَاسْ إِ غَا إِسَّارْسْ أَربِّي مَانْ أَيَا؟
٢٤ إِغَارُّوبَا زِي جّْوَايهْ ن كِيتِّيمْ
أَذْغزَّانْ أَشُّورْ
ؤُشَا أَذْغزَّانْ عَاوذْ عَابِيرْ
ؤُ نتَّا أَذْ إِتّْوَاثحَّا.“
٢٥ إِكَّارْ بَالْعَامْ، يُويُورْ ؤُشَا إِذْوڒْ غَارْ ومْشَانْ نّسْ ن ثْزذِّيغْثْ. ؤُڒَا ذ بَالَاكْ إِطّفْ أَبْرِيذْ نّسْ.