٢٣
بَالْعَامْ إِبَاركْ إِسْرَائِيل
١ خنِّي إِنَّا بَالْعَامْ إِ بَالَاكْ: ”بْنَا سبْعَا ن إِعَالْطَارنْ ذَانِيثَا إِ نشّْ ؤُشَا سوْجذْ أَيِي سبْعَا ن إِفُونَاسنْ إِمژْيَاننْ ذ سبْعَا ن إِشَارِّييّنْ.“
٢ بَالَاكْ إِڭَّا أَمْ مَامّشْ ذ أَسْ إِنَّا بَالْعَامْ ؤُشَا بَالَاكْ ذ بَالْعَامْ قدّْمنْ إِجّْ ن ؤُفُونَاسْ أَمژْيَانْ ذ إِجّْ ن إِشَارِّي خْ كُوڒْ إِجّْ ن ؤُعَالْطَارْ.
٣ خنِّي بَالْعَامْ إِنَّا إِ بَالَاكْ: ”بدّْ ذِينْ زَّاثْ إِ ثْغَارْصْثْ ن وشْمَاضْ نّشْ، خنِّي نشّْ أَذْ رَاحغْ. أَذْ ثَاغْ أَذْ كِيذِي إِمْسَاڭَارْ سِيذِي ؤُشَا مَامّشْ مَا إِڭَّا وَاوَاڒْ نِّي ذ أَيِي غَا إِسّْشنْ، نشّْ أَذْ أَشْ ث-إِ-د-سَّارْڭْبغْ.“ خنِّي إِرُوحْ بَالْعَامْ غَارْ ثْقِيشَّاثْ ذ ثَاقشَّارْثْ ن وذْرَارْ.
٤ ؤُ إِمّڒْقَا أَربِّي أَكْ-ذ بَالْعَامْ ؤُشَا نتَّا إِنَّا أَسْ: ”أَقَا سّْوجْذغْ سبْعَا ن إِعَالْطَارنْ ؤُشَا قدّْمغْ إِجّْ ن ؤُفُونَاسْ أَمژْيَانْ ذ إِجّْ ن إِشَارِّي خْ كُوڒْ إِجّْ ن ؤُعَالْطَارْ.“
٥ خنِّي إِڭَّا سِيذِي إِجّْ ن وَاوَاڒْ ذڭْ ؤُقمُّومْ ن بَالْعَامْ ؤُشَا إِنَّا: ”ذْوڒْ غَارْ بَالَاكْ ؤُشَا سِيوڒْ أَكِيذسْ أَمُّو.“
٦ ؤُشَا ؤُمِي غَارسْ-د إِذْوڒْ، خْزَارْ، إِبدّْ زَّاثْ إِ ثْغَارْصْثْ ن وشْمَاضْ نّسْ، جْمِيعْ أَكْ-ذ مَارَّا ڒْْحُوكَّامْ ن مُوآبَ.
٧ خنِّي إِبْذَا إِقَّارْ أَوَاڒْ نّسْ إِوزْننْ، إِنَّا:
”زِي أَرَامْ إِنْذهْ أَيِي-د بَالَاكْ، أَجدْجِيذْ ن مُوآبَ،
زڭْ إِذُورَارْ ن شَّارْقْ، إِنَّا:
’أَسْ-د، نْعڒْ أَيِي يَاعْقُوبْ،
أَسْ-د، زَاوَارْ إِسْرَائِيل!‘
٨ مَاشَا مَامّشْ غَا نعْڒغْ،
ونِّي وَارْ إِتّْوَانعْڒنْ زِي أَربِّي،
ؤُ مَامّشْ غَا زَاوَارغْ
ونِّي وَارْ إِزَاوَارْ سِيذِي؟
٩ مِينْزِي زِي ثْقِيشَّاثْ ن ثْصُوضَارْ ثْوَاڒِيغْ ث،
ؤُشَا زِي ثِيوْرِيرِينْ خزَّارغْ ذَايسْ.
أَقَا وَا ذ إِجّْ ن ڒْْڭنْسْ إِزدّْغنْ وحّْذسْ
ؤُ وَارْ إِحسّبْ إِخفْ نّسْ جَارْ ڒڭْنُوسْ.
١٠ وِي غَا إِحسْبنْ أَشَاڒْ ن يَاعْقُوبْ
نِيغْ وِي إِ غَا إِحسْبنْ ڒْْقدّْ ن إِجّْ ن أَرْبعْ زِي إِسْرَائِيل؟
أجّْ أَذْ إِمّثْ ڒعْمَارْ إِنُو
ڒْْموْثْ ن إِمْسڭَّاذنْ
ؤُ أجّْ عَاوذْ أَذْ يِيڒِي ؤُنڭَّارْ ن ثُوذَارْثْ إِنُو
أَذْ إِمْقُودَّا أَكِيذسْ!“
١١ خنِّي إِنَّا بَالَاكْ إِ بَالْعَامْ: ”مِينْ ذ أَيِي ثڭِّيذْ؟ نشّْ إِوْيغْ شكْ حِيمَا أَذْ ثْنعْڒذْ ڒْْعذْيَانْ إِنُو، مَاشَا خْزَارْ، أَقَا نِيشَانْ ثْبَارْكذْ إِ-ثنْ!“
١٢ نتَّا يَارَّا-د، إِنَّا: ”مَا وَارْ إِتّْخصِّي أَذْ حْضِيغْ مَاحنْذْ أَذْ سِّيوْڒغْ مِينْ إِڭَّا سِيذِي ذڭْ ؤُقمُّومْ إِنُو؟“
١٣ خنِّي إِنَّا بَالَاكْ: ”تّْزَاوْڭغْ شكْ أَذْ د-ثَاسذْ أَكِيذِي غَارْ إِجّْ ن ومْشَانْ نّغْنِي زِي مَانِيسْ غَا ثْژَارذْ ڒْْڭنْسْ عَاوذْ. أَذْ ثْژَارذْ طّْرُوفَا نّسْ وَاهَا، وَارْ ث ثْژَارّذْ مَارَّا. سّنِّي أَذْ ث ثْنعْڒذْ ذِي طّْوعْ إِنُو!“
١٤ ؤُشَا يِيوْيِي إِ-ث غَارْ ڒوْضَا ن صُوفِيمْ خْ ثْقِيشَّاثْ ن فِيسْجَا ؤُشَا إِبْنَا ذِينْ سبْعَا ن إِعَالْطَارنْ ؤُشَا خْ كُوڒْ إِجّْ ن ؤُعَالْطَارْ إِقدّمْ إِجّْ ن ؤُفُونَاسْ أَمژْيَانْ ذ إِجّْ ن إِشَارِّي.
١٥ نتَّا إِنَّا إِ بَالَاكْ: ”مَاڒَا شكْ أَذْ ثْبدّذْ ذَا زَّاثْ إِ ثْغَارْصْثْ نّشْ ن وشْمَاضْ، خنِّي نشّْ أَذْ كِيسْ مّْسَاڭَارغْ ذِينْ.“
١٦ ؤُشَا إِمْسَاڭَارْ سِيذِي أَكْ-ذ بَالْعَامْ ؤُشَا إِڭَّا إِجّْ ن وَاوَاڒْ ذڭْ ؤُقمُّومْ نّسْ، إِنَّا: ”ذْوڒْ غَارْ بَالَاكْ ؤُشَا إِنِي أَسْ أَمُّو.“
١٧ ؤُشَا نتَّا يُوسَا-د غَارسْ، ؤُ خْزَارْ، نتَّا ثُوغَا إِبدّْ زَّاثْ إِ ثْغَارْصْثْ ن وشْمَاضْ نّسْ ؤُشَا ڒْْحُوكَّامْ ن مُوآبَ بدّنْ زَّاثسْ. إِنَّا أَسْ بَالَاكْ: ”مِينْ إِنَّا سِيذِي؟“
١٨ خنِّي إِبْذَا نتَّا أَوَاڒْ نّسْ إِوزْننْ، إِنَّا:
”كَّارْ، بَالَاكْ، سْحسّْ!
سڒْ غَارِي، شكْ، مِّيسْ ن صِيفُّورْ!
١٩ أَربِّي وَارْ إِدْجِي ذ مِّيسْ ن بْنَاذمْ،
مَاحنْذْ زعْمَا أَذْ إِسّْخَارِّيقْ،
نِيغْ ذ مِّيسْ ن بْنَاذمْ
مَاحنْذْ زعْمَا أَذْ ث إِڒْقفْ ونْذَامْ.
مَا أَذْ يِينِي ؤُشَا وَارْ ت إِتّڭّْ،
نِيغْ أَذْ إِسِّيوڒْ ؤُشَا وَارْ ت إِتّْكمِّيڒْ؟
٢٠ خْزَارْ، أَقَا طّْفغْ ڒُْومُورْ حِيمَا أَذْ بَارْكغْ.
ؤُمِي إِبَاركْ نتَّا،
نشّْ وَارْ زمَّارغْ أَذْ د-أَرّغْ أَيَا.
٢١ وَارْ إِتّْوِيڒِي ڒْْمُوعْصِييّثْ ن يَاعْقُوبْ
ؤُ ڒغْبنْ ن إِسْرَائِيل وَارْ ث إِژَارْ.
سِيذِي، أَربِّي نّسْ، أَقَا-ث أَكِيذسْ
ؤُشَا أَسُوضِي سْ وسْرُودّحْ ذِي ڒْْبُوقْ
ذِي طّْوعْ ن ؤُجدْجِيذْ أَقَا-ث ذَايسْ.
٢٢ أَربِّي إِسُّوفّغْ إِ-ثنْ-د زِي مِيصْرَا.
نتَّا إِ نِيثْنِي أَمْ وَاشَّاونْ إِزِيرَارنْ
ن إِغَايْضْ ن ڒخْڒَا.
٢٣ أَقَا زعْمَا وَارْ ذِينْ أَعزّمْ ذِي يَاعْقُوبْ
ؤُ وَارْ ذِينْ ثَاڭزَّانْثْ ذِي إِسْرَائِيل.
ثَا ذ ڒْْوقْثْ إِ ذِي ثتّْوَانَّا خْ يَاعْقُوبْ ذ إِسْرَائِيل:
’أَقَا خْزَارْ، مِينْ إِڭَّا أَربِّي!‘
٢٤ أَقَا ذَا، ڒْْڭنْسْ أَذْ إِكَّارْ أَمْ ثيْرَاذْثْ
ؤُ أَذْ د-إِڭعّذْ أَمْ ويْرَاذْ.
وَارْ إِسّزّڒْ إِخفْ نّسْ
أَڒْ غَا يشّْ ثَايْمَارْثْ نّسْ
ؤُشَا أَذْ إِسُّو إِذَامّنْ ن مِينْ إِمزّقْ.“
٢٥ خنِّي إِنَّا بَالَاكْ إِ بَالْعَامْ: ”مَاڒَا خنِّي وَارْ ثخْسذْ قَاعْ أَذْ ث ثْنعْڒذْ، وَارْ ث تّْبَارَاكْ شَا عَاوذْ.“
٢٦ بَالْعَامْ يَارَّا-د، إِنَّا إِ بَالَاكْ: ”مَا وَارْ ذ أَشْ نِّيغْ: ’مَارَّا مِينْ ذ أَيِي غَا يِينِي سِيذِي، أَذْ ث ڭّغْ؟‘ “
٢٧ خنِّي إِنَّا بَالَاكْ إِ بَالْعَامْ: ”تّْزَاوْڭغْ شكْ أَذْ د-ثَاسذْ، أَذْ شكْ أَوْيغْ غَارْ إِجّْ ن ومْشَانْ نّغْنِي. أَذْ ثَاغْ أَذْ يِيڒِي نِيشَانْ ذِي ثِيطَّاوِينْ ن أَربِّي مَاڒَا أَذْ ث ثْنعْڒذْ سّنِّي ذِي طّْوعْ إِنُو.“
٢٨ ؤُشَا بَالَاكْ إِنْذهْ بَالْعَامْ غَارْ ثْقِيشَّاثْ ن فَاغُورْ نِّي إِخزَّارنْ غَارْ ثْنزْرُوفْثْ.
٢٩ خنِّي إِنَّا بَالْعَامْ إِ بَالَاكْ: ”بْنَا ذَانِيثَا سبْعَا ن إِعَالْطَارنْ ؤُشَا سوْجذْ أَيِي ذَانِيثَا سبْعَا ن إِفُونَاسنْ إِمژْيَاننْ ذ سبْعَا ن إِشَارِّييّنْ.“
٣٠ بَالَاكْ إِڭَّا أَمْ مَامّشْ ذ أَسْ إِنَّا بَالْعَامْ ؤُشَا خْ كُوڒْ إِجّْ ن ؤُعَالْطَارْ إِقدّمْ ذِينْ إِجّْ ن ؤُفُونَاسْ أَمژْيَانْ ذ إِجّْ ن إِشَارِّي.