٥
ڒْحَاكمْ إِ د غَا يَاسنْ زِي بَايْثْ-لَاهْمْ
١ ”ؤُ شكْ، بَايْثْ-لَاحْمْ إِفْرَاثَا،
وَاخَّا شكْ ذ أَمژْيَانْ
أَڒَامِي وَارْ ثْزمَّارذْ
أَذْ ثِيڒِيذْ جَارْ ڒُْوڒُوفْ ن يَاهُوذَا،
أَقَا زَّايكْ إِ د غَا إِفّغْ نتَّا إِ نشّْ،
مَاحنْذْ أَذْ يِيڒِي ذ ڒْْحَاكمْ خْ إِسْرَائِيل.
أَبَانِي نّسْ أَقَا-ث زِي مشْحَاڒْ ؤُيَا،
زڭْ وُوسَّانْ ن ڒبْذَا.
٢ س ؤُيَا نتَّا أَذْ ثنْ إِسلّمْ
أَڒْ ڒْْوقْثْ نِّي،
أَقَا ثنِّي إِ غَا يَارْونْ، أَقَا ثُورُووْ-د.
خنِّي أَذْ د-إِذْوڒْ ڒْْبَاقِي ن يَايْثْمَاسْ،
جْمِيعْ أَكْ-ذ أَيْثْ ن إِسْرَائِيل.
٣ نتَّا أَذْ إِبدّْ ذِينِّي
ؤُشَا أَذْ يَارْوسْ ذِي جّهْذْ ن سِيذِي،
ذِي ڒُْوعْڒَا ن يِيسمْ ن سِيذِي، أَربِّي نّسْ.
نِيثْنِي أَذْ زذْغنْ ذِينِّي،
مَاغَارْ نتَّا أَذْ يِيڒِي ذ أَمقّْرَانْ
أَڒْ إِنڭُّورَا ن ثمُّورْثْ.
٤ وَانِيثَا أَذْ يِيڒِي ذ ڒهْنَا.“
”خْمِي د غَا يَاسْ أَشُّورْ غَارْ ثمُّورْثْ نّغْ،
ؤُ خْمِي د غَا يَاذفْ غَارْ ڒقْصُورْ نّغْ،
خنِّي أَذْ أَسْ نسّڒْقَا
سبْعَا ن إِمكْسَاونْ
ذ ثْمنْيَا ن أَيْثْ ن جّهْذْ زِي مِيدّنْ.
٥ نِيثْنِي أَذْ حْضَانْ
خْ ثمُّورْثْ ن أَشُّورْ س سِّيفْ
ؤُ ثَامُّورْثْ ن نِيمْرُوذْ ذِي ثوُّورَا نّسْ.
أَمُّو نتَّا أَذْ أَنغْ إِسّنْجمْ
زڭْ ؤُفُوسْ ن أَشُّورْ،
خْمِي د غَا يَاسْ وَانِيثَا
غَارْ ثمُّورْثْ نّغْ
ؤُ خْمِي د غَا يَاذفْ
غَارْ وُوذمْ ن ثمُّورْثْ نّغْ.“
ڒْبَاقِي ن يَاعْقُوبْ
٦ ”ڒْْبَاقِي ن يَاعْقُوبْ أَذْ يِيڒِي
ذِي ڒْْوسْطْ ن ڒڭْنُوسْ
أَمشْنَاوْ نّْذَا ن سِيذِي،
أَمشْنَاوْ ثِيدُّومِينْ خْ وفْسُو أَزِيزَا،
ونِّي وَارْ إِخزَّارنْ
غَارْ ؤُڒَا ذ إِجّْ ن ورْيَازْ
ؤُ وَارْ إِتّْرِيجِينْ ثَارْوَا ن بْنَاذمْ.
٧ ڒْْبَاقِي ن يَاعْقُوبْ أَذْ يِيڒِي جَارْ ڒڭْنُوسْ،
ذِي ڒْْوسْطْ نْ ڒڭْنُوسْ،
أَمشْنَاوْ أَيْرَاذْ جَارْ ڒْْمَاڒْ ن يزْغَارْ،
أَمشْنَاوْ أَيْرَاذْ ذ أَمژْيَانْ
جَارْ ثْحِيمْرِيوِينْ ن وُودْجِي،
ونِّي، خْمِي غَا إِعْذُو،
إِعفّسْ ؤُ إِتّْشَارَّاڭْ
ؤُشَا وَارْ ذِينْ ؤُڒَا ذ إِجّْ إِ غَا إِفكّنْ.
٨ أَفُوسْ نّشْ أَذْ يِيڒِي إِتّْوَاسّْڭعّذْ
سنّجْ إِ يِينِّي إِ شكْ إِحصَّارنْ،
ؤُشَا مَارَّا ڒْْعذْيَانْ نّشْ
أَذْ تّْوَامْحَانْ.“
٩ ”أَذْ إِمْسَارْ ذڭْ وَاسّْ نِّي،
أَمُّو إِ إِقَّارْ سِيذِي،
أَقَا نشّْ أَذْ ثحِّيغْ إِيْسَانْ نّشْ
زِي ڒْْوسْطْ نّشْ
ؤُ أَذْ سّْهلّْكغْ إِكَارُّوثنْ نّشْ.
١٠ أَذْ مْحِيغْ ثِيندَّامْ زِي ثمُّورْثْ نّشْ،
أَذْ هذْمغْ مَارَّا لْقلْعَاثْ نّشْ.
١١ نشّْ أَذْ قضْعغْ ثَاسحَّارْثْ نّشْ
زڭْ ؤُفُوسْ نّمْ
ؤُ وَارْ غَاركْ تِّيڒِينْ عَاذْ إِبزْڭَاونْ.
١٢ ڒخْيَاڒَاثْ نّمْ إِنقْشنْ
ذ إِمَايْضُوثنْ نّشْ إِقدّْسنْ
أَذْ ثنْ مْحِيغْ زِي ڒْوسْثْ نّشْ،
حِيمَا وَارْ ثتّْبنْذَاقذْ عَاذْ
إِ ڒْْخذْمثْ ن إِفَاسّنْ نّشْ.
١٣ ؤُ ثِيربِّينْ نّشْ ن شْوَارْثِي
أَذْ ثنْثْ ثحِّيغْ زِي ڒْْوسْطْ نّشْ.
مَاشَا أَذْ هذْمغْ ڒْْعذْيَانْ نّشْ
١٤ ؤُشَا أَذْ نْثَاقْمغْ س وغْضَابْ ؤُ س وسْعَارْ
خْ ڒڭْنُوسْ نِّي وَارْ إِتّخْسنْ أَذْ سْڒنْ.“