٤
ثَاڭلْذِيثْ إِ د غَا يَاسنْ زِي صِيهْيُونْ
١ ”ذڭْ ؤُنڭَّارْ ن وُوسَّانْ أَذْ إِمْسَارْ،
أَقَا أَذْرَارْ ن ثَادَّارْثْ ن سِيذِي
أَذْ إِبدّْ إِمْثنْ
خْ ثْقِيشّثْ ن إِذُورَارْ.
أَذْ يِيڒِي يُوعْڒَا خْ ثوْرِيرِينْ،
ؤُشَا ڒڭْنُوسْ أَذْ غَارسْ د-أَزّْڒنْ.
٢ أَطَّاسْ ن ڒڭْنُوسْ أَذْ ڭعّْذنْ، أَذْ إِنِينْ:
”جّمْ أَنغْ أَذْ نْڭعّذْ
غَارْ وذْرَارْ ن سِيذِي
ؤُ غَارْ ثَادَّارْثْ ن أَربِّي ن يَاعْقُوبْ،
حِيمَا أَذْ أَنغْ إِسّڒْمذْ
زڭْ إِبْرِيذنْ نّسْ،
أَذْ نُويُورْ نشِّينْ ذڭْ إِمسْرَاقْ نّسْ،
مِينْزِي زِي صِيهْيُونْ أَذْ د-ثفّغْ شَّارِيعَا
ؤُ أَوَاڒْ ن سِيذِي زِي ؤُرْشَالِيمْ.
٣ نتَّا أَذْ إِشَارّعْ جَارْ ڒڭْنُوسْ إِمْغَارنْ
ؤُ أَذْ إِسڭّمْ ڒڭْنُوسْ
نِّي غَارْ إِدْجَا ثِيزمَّارْ ثِيمقّْرَانِينْ،
عَاذْ ؤُڒَا ذ ڒڭْنُوسْ إِڭّْوجنْ.
نِيثْنِي أَذْ ڭّنْ ڒسْيُوفْ نْسنْ ذ دُّوزَانْ
ؤُ فْڒِيثْشَاثْ نْسنْ ذ ڒمْوَاسْ ن وزْبَارْ.
وَارْ إِسّْڭِيعِّيذْ ؤُڒَا ذ إِجّْ ن ڒْْڭنْسْ
عَاذْ سِّيفْ خْ ونّغْنِي،
ؤُ نِيثْنِي وَارْ ڒمّْذنْ عَاذْ أَمنْغِي.
٤ نِيثْنِي أَذْ قِّيمنْ،
كُوڒْ إِجّْ سَاذُو ثْزَايَارْثْ نّسْ
ؤُ سَاذُو وَارْثُو ن ثَازَارْثْ نّسْ،
ؤُشَا ؤُڒَا ذ إِجّنْ أَذْ ثنْ إِسّْنخْڒعْ،
مَاغَارْ أَقمُّومْ ن سِيذِي ن ڒْْعسْكَارَاثْ
أَقَا إِنَّا ث.“
٥ ”مِينْزِي مَارَّا ڒڭْنُوسْ أَذْ ؤُيُورنْ،
كُوڒْ إِجّْ زَّايْسنْ ذڭْ يِيسمْ ن أَربِّي نّسْ،
مَاشَا نشِّينْ أَذْ نُويُورْ ذڭْ يِيسمْ ن سِيذِي،
أَربِّي نّغْ،
إِ ڒبْذَا قَاعْ.“
سِيذِي أَذْ إِسّنْجمْ صِيهْيُونْ
٦ ”ذڭْ وَاسّْ نِّي، إِقَّارْ سِيذِي،
نشّْ أَذْ يَارْوغْ مِينْ إِقجْذْحنْ،
ؤُ أَذْ غَارِي سّْمُونغْ مِينْ خْ ؤُزّْڒنْ،
ؤُ وِي ذِي ڭِّيغْ نشّْ ڒْْغَارْ.
٧ مِينْ إِقجْذْحنْ أَذْ ث ڭّغْ ذ ڒْْبَاقِي،
ؤُڒَا مِينْ إِتّْوَاعَارّْننْ غَارْ ڒَْاڭّْوَاجْ،
أَذْ ث ڭّغْ ذ إِجّْ ن ڒْْڭنْسْ
س ثْزمَّارْ ذ ثَامقّْرَانْثْ،
ؤُشَا سِيذِي أَذْ خَاسنْ يِيڒِي ذ أَجدْجِيذْ
خْ وذْرَارْ ن صِيهْيُونْ،
زِي ڒخُّو أَڒْ ڒبْذَا.
٨ إِ شمْ، مِيڭْذَالْ-عِيذْرْ،
أَ شمْ، ثَاوْرِيرْثْ ن يدْجِيسْ ن صِيهْيُونْ!
أَذْ غَارمْ د-ثَاسْ،
وَاهْ، أَذْ غَارمْ د-ثَاسْ ڒحْكَامثْ
ثنِّي إِ ثُوغَا إِدْجَانْ ذڭْ ؤُمزْوَارُو،
ثَاڭلْذِيثْ ن يدْجِيسْ ن ؤُرْشَالِيمْ.“
٩ ”ڒخُّو مَاشَا،
مَايمِّي ثسْغُويُّوذْ أَمُّو س جّهْذْ؟
مَا وَارْ غَارمْ إِدْجِي ؤُجدْجِيذْ؟
مَا إِتّْوَاهلّكْ ؤُمْشَاوَارْ نّمْ،
أَقَا إِطّفْ إِ شمْ ڒحْرِيقْ
أَمْ ن يِيشْثْ ن ثمْغَارْثْ إِتَّارْونْ؟
١٠ غْنسْ ؤُ ثْعبّْزذْ،
أَ شمْ، يدْجِيسْ ن صِيهْيُونْ،
أَمْ إِشْثْ ن ثمْغَارْثْ إِتَّارْونْ.
مَاغَارْ وَاخَّا ڒخُّو
أَذْ ثفّْغذْ زِي ثنْذِينْثْ،
أَذْ ثْزذْغذْ ذڭْ إِيَّارْ،
ؤُشَا أَذْ د-ثَاسذْ أَڒْ بَابِيلْ.
مَاشَا ذِينْ أَذْ ثْنجْمذْ،
ذِينِّي أَذْ شمْ إِفكّْ سِيذِي
زڭْ ؤُفُوسْ ن ڒْْعذْيَانْ نّمْ.“
١١ ڒخُّو مَاشَا مُوننْ خَاكْ
أَطَّاسْ نْ ڒڭْنُوسْ.
نِيثْنِي قَّارنْ: ’نتَّاثْ أَذْ ثتّْوَاعَارَّا!‘
ثِيطَّاوِينْ نّغْ أَذْ ژَترنْثْ صِيهْيُونْ.
١٢ نِيثْنِي وَارْ سِّيننْ إِنْوَاينْ ن سِيذِي،
ؤُ وَارْ فهّْمنْ شَا شّْوَارْ نّسْ!
مَاغَارْ نتَّا إِكْسِي ثنْ غَارسْ
أَمْ ثْقبِّيضِينْ ن إِمنْذِي ذڭْ ؤُنذْرَارْ.“
١٣ ”كَّارْ، ثسَّاروْثذْ،
أَ شمْ، يدْجِيسْ ن صِيهْيُونْ،
مَاغَارْ نشّْ أَذْ أَرّغْ
يِيشّْ نّمْ ذ ؤُزَّاڒْ،
ؤُ أَذْ أَمْ ڭّغْ ثِيشضْيِينْ نّمْ زِي نّْحَاسْ،
ؤُ شمْ أَذْ ثْڒبْزذْ أَطَّاسْ ن ڒڭْنُوسْ
ؤُ نشّْ أَذْ حَارّْمغْ
ثَاكشَّاضْثْ نْسنْ مَارَّا إِ سِيذِي،
ؤُڒَا ذ أَڭْڒَا نْسنْ إِ سِيذِي ن مَارَّا ثَامُّورْثْ.
١٤ خنِّي ڒخُّو، ڒحْممْ
إِجّنْ غَارْ ونّغْنِي،
أَ شمْ يدْجِيسْ
ن إِشْثْ ن بَانْذِييَّا ن إِخوَّاننْ!
نتَّا إِحصَّارْ أَنغْ.
نِيثْنِي أَذْ شَّاثنْ ڒْْقَاضِي ن إِسْرَائِيل
خْ ؤُقَابْسِي س إِجّْ ن وعْمُوذْ.“