٣
إِزْڒِي وِيسّْ ثْڒَاثَا - أَودّبْ ذ ؤُفوّجْ ن ؤُنَابِي
١ أَلِيفْ. نشّْ ذ أَرْيَازْ نِّي إِژْرِينْ ڒغْبنْ
س وعْمُوذْ ن ؤُذُوقّزْ نّسْ ن ؤُفُوڭمْ.
٢ أَلِيفْ. نتَّا إِنْذهْ أَيِي
ؤُشَا إِجَّا أَيِي أَذْ ؤُيُورغْ ذِي ثَادْجسْثْ،
وَارْ إِدْجِي ذِي ثْفَاوْثْ.
٣ أَلِيفْ. س ثِيذتّْ،
نتَّا يَارَّا ڒبْذَا أَفُوسْ نّسْ ضِيدّْ إِنُو،
أَسّْ إِكْمڒْ.
٤ بِيثْ. نتَّا إِضيّعْ أَيْسُومْ إِنُو ذ ثڒْمشْثْ إِنُو،
يَارْژَا إِغْسَانْ إِنُو.
٥ بِيثْ. نتَّا بْنَا إِشْثْ ن ڒبْنِييّثْ خَافِي
ؤُ إِقُووَّارْ أَيِي
س أَرّْهَاجْ ذ ثَامَارَا.
٦ بِيثْ. ذِي طّْڒَامْ إِجَّا أَيِي زدّْغغْ،
أَمْ إِمتَّانْ ن وَاطَّاسْ زڭْ وَامِي.
٧ ڭِيملْ. نتَّا إِبلّعْ أَيِي جَارْ ڒحْيُوضْ،
وَارْ زمَّارغْ أَذْ نجْمغْ.
إِسّذْقڒْ خَافِي سّْنَاسڒْ إِنُو ن نّْحَاسْ.
٨ ڭِيملْ. عَاذْ مڒْمِي تّْڒَاغِيغْ ؤُ سْغُويُّوغْ،
نتَّا إِقِّيمْ إِبْكمْ غَارْ ثْژَادْجِيثْ إِنُو.
٩ ڭِيملْ. س ثْصُوضَارْ إِنْجَارنْ
إِبلّعْ خَافِي أَبْرِيذْ،
إِسّْفَارْغْ إِمسْرَاقْ إِنُو.
١٠ ذَالِيثْ. ثُوغَا نتَّا إِ نشّْ أَمْ دُّوبْ إِتّْحَامَانْ،
أَمْ وَايْرَاذْ ذڭْ إِمُوشَانْ إِنُّوفَارنْ.
١١ ذَالِيثْ. نتَّا يُوژّڒْ خَافِي زڭْ وبْرِيذْ،
إِمزّقْ أَيِي،
وَارْ ذ أَيِي إِجِّي شَا.
١٢ ذَالِيثْ. نتَّا إِسّمْحضْ ڒْْقوْسْ نّسْ
ؤُشَا إِجَّا أَيِي أَذْ إِڒِيغْ ذ أَوَاضْ إِ فْڒِيثْشَا نّسْ.
١٣ هِي. فْڒِيثْشَاثْ زڭْ وقْرَابْ نّسْ
إِجَّا إِ-ثنْثْ أَذْ أَذْفنْثْ ذِي ثِيژَّاڒْ إِنُو.
١٤ هِي. ذوْڒغْ ذ ثَاسضْهَاشْثْ إِ مَارَّا ڒْْڭنْسْ إِنُو،
ذ إِزْڒِي نْسنْ ن ؤُزَاوَارْ أَسّْ إِمُونْ.
١٥ هِي. نتَّا إِسّْجِّيونْ أَيِي س ثَارْزُوڭِي،
إِسّسُّو أَيِي س شِّيحْ.
١٦ وَاوْ. ثِيغْمَاسْ إِنُو إِجَّا إِ-ثنْثْ زعّْفنْثْ
ذڭْ ؤُقَايَاسْ أَڒَامِي أَرْژِينْثْ،
إِذْڒَا أَيِي س يِيغّذْ.
١٧ وَاوْ. شكْ ثسِّيڭّْوجذْ ڒعْمَارْ إِنُو خْ ڒهْنَا،
نشّْ تُّوغْ مَارَّا ثْشُونِي.
١٨ وَاوْ. نشّْ نِّيغْ: ”جّهْذْ إِنُو إِقْضَا،
ؤُڒَا ذ أَسِيثمْ إِنُو ذِي سِيذِي.“
١٩ زَايِينْ. عْقڒْ خْ ڒغْبنْ إِنُو ذ ثْمحْبَاسْثْ إِنُو،
خْ شِّيحْ ذ أَرّْهَاجْ.
٢٠ زَايِينْ. ڒعْمَارْ إِنُو إِتّْخَارّصْ نِيشَانْ ذِي مَانْ أَيَا،
أَقَا إِشْضنْ ذَايِي.
٢١ زَايِينْ. أَيَا خْسغْ أَذْ ث أَرّغْ غَارْ وُوڒْ،
خْ ؤُيَا أَذْ قِّيمغْ سِّيثِيمغْ عَاذْ.
٢٢ خِيثْ. س ثْمڭَّا ن ثْمخْسِيوْثْ ن سِيذِي،
أَقَا وَارْ نتّْوَاهلّكْ شَا،
مِينْزِي أَرّحْمثْ نّسْ عمَّارْصْ وَارْ ثتّْبذِّي.
٢٣ خِيثْ. أَقَا-ت ذ جْذِيذْ كُوڒْ صّْبحْ،
ڒَْامَانْ نّشْ ذ أَمقّْرَانْ.
٢٤ خِيثْ. ثَاسْغَارْثْ إِنُو ذ سِيذِي،
أَمُّو إِ إِقَّارْ ڒعْمَارْ إِنُو،
خْ ؤُيَا تّْغِيمِيغْ سِّيثِيمغْ ذَايسْ.
٢٥ ثِيث. إِصْبحْ سِيذِي إِ يِينِّي ذَايسْ إِسِّيثِيمنْ،
إِ ڒعْمَارْ نِّي خَاسْ يَارزُّونْ.
٢٦ ثِيث. أَقَا مْلِيحْ أَرَاجِي س ؤُسِيثمْ غَارْ زَّاثْ،
أَرَاجِي ذِي ڒْْهُوذْنثْ غَارْ ؤُسنْجمْ زِي سِيذِي.
٢٧ ثِيث. مْلِيحْ إِ ورْيَازْ أَذْ يَارْبُو أَزَايْڒُو
ذِي ثمْژِي نّسْ.
٢٨ يُوذْ. أجّْ إِ-ث أَذْ إِقِّيمْ حَافِي، أَذْ إِسّغْذْ،
مَاغَارْ سِيذِي إِڭَّا إِ-ت خَاسْ.
٢٩ يُوذْ. أجّْ إِ-ث أَذْ إِڭّْ أَقمُّومْ نّسْ ذِي ثْعجَّاجْثْ،
أَذْ يِينِي: ”أَذْ ثَاغْ إِدْجَا ڒَْايَاسْ!“
٣٠ يُوذْ. أجّْ إِ-ث أَذْ إِوْشْ أَمڭِّيزْ إِ ونِّي ث إِشَّاثنْ،
أجّْ إِ-ث أَذْ إِتّْوَاجِّيونْ س ؤُسحْقَارْ.
٣١ كَافْ. مِينْزِي سِيذِي إِنُو وَارْ إِنطَّارْ حذْ إِ ڒبْذَا،
٣٢ كَافْ. مَاشَا مَاڒَا نتَّا إِسّشْضنْ حذْ،
أَذْ خَاسْ إِحِينّْ عَاوذْ
عْلَاحْسَابْ ڒمْغَارثْ ن ثْمخْسِيوْثْ نّسْ إِشُووَّارنْ،
٣٣ كَافْ. مَاغَارْ نتَّا وَارْ إِحصَّارْ
نِيغْ إِسّشْضِينْ ثَارْوَا ن ورْيَازْ س وُوڒْ.
٣٤ لَامِيذْ. خْمِي غَا ڒبْزنْ سَاذُو إِضَارنْ
مَارَّا إِمحْبَاسْ ن ثمُّورْثْ،
٣٥ لَامِيذْ. خْمِي غَا حَارّْفنْ ثَاسْغَارْثْ ن ورْيَازْ
زَّاثْ إِ وُوذمْ ن ؤُمْعُودْجِي خْ كُوڒْشِي،
٣٦ لَامِيذْ. خْمِي غَا قڒْبنْ دّعْوثْ ن بْنَاذمْ،
مَا زعْمَا سِيذِي إِنُو وَارْ إِتّْوِيڒِي مَانْ أَيَا؟
٣٧ مِيمْ. مَانْ ونْ إِ إِقَّارنْ شَا ن ڒْْحَاجّثْ
ؤُشَا خنِّي ثمْسَارْ،
مَاڒَا وَارْ ت يُومُورْ سِيذِي إِنُو؟
٣٨ مِيمْ. مَا وَارْ د-إِتِّيسْ
زڭْ ؤُقمُّومْ ن ؤُمْعُودْجِي خْ كُوڒْشِي
مَارَّا مِينْ وَارْ إِحْڒِينْ ؤُڒَا ذ مَارَّا مِينْ إِصبْحنْ؟
٣٩ مِيمْ. مَامّشْ إِتّْشثْشَا بْنَاذمْ إِدَّارنْ عَاذْ؟
أجّْ ورْيَازْ أَذْ إِشثْشَا زِي سِّيبّثْ ن دّْنُوبْ نّسْ.
٤٠ نُونْ. أجّْ أَنغْ أَذْ نخْزَارْ إِبْرِيذنْ نّغْ،
أَذْ ذَايْسنْ نَارْزُو،
أجّْ أَنغْ أَذْ د-نذْوڒْ غَارْ سِيذِي.
٤١ نُونْ. أجّْ أَنغْ أَذْ نسّْڭعّذْ أَكْ-ذ إِفَاسّنْ نّغْ
ؤُڒَا ذ وُوڒَاونْ نّغْ،
غَارْ أَربِّي ذڭْ ؤُجنَّا.
٤٢ نُونْ. نشِّينْ نْعدَّا ؤُ نْغوّغْ،
شكْ وَارْ ثغْفَارذْ شَا إِ ؤُيَا.
٤٣ سَامِيخْ. شكْ ثْڒحّْفذْ أَنغْ س وغْضَابْ،
ثضْفَارضْ أَنغْ،
ثنْغِيذْ، وَارْ خَانغْ ثْحِيوْڒذْ شَا.
٤٤ سَامِيخْ. ثْڒحّْفذْ إِخفْ نّشْ ذڭْ ؤُسيْنُو،
مَاحنْذْ أَذْ ثَافْ ثَاژَادْجِيثْ وَارْ ثْزمَّارْ أَذْ ثعْذُو.
٤٥ سَامِيخْ. شكْ ثَارِّيذْ-د أَنغْ
ذ ثَاخْمُوجِي ذ وفْرَاضْ
ذِي ڒْْوسْطْ ن ڒڭْنُوسْ.
٤٦ بِي. مَارَّا ڒْْعذْيَانْ نّغْ
أَرْزْمنْ-د غَارْنغْ أَقمُّومْ نْسنْ.
٤٧ بِي. ثِيڭّْوُوذَا ذ ڒْْفخْ ذوْڒنْ ذ أَزْينْ زَّايْنغْ،
أَخَارّبْ ذ أَرْژِييّثْ.
٤٨ بِي. زِي ثِيطَّاوِينْ إِنُو تَّازّْڒنْثْ إِمطَّاونْ
خْ ثَارژِّيثْ ن يدْجِيسْ ن ڒْْڭنْسْ إِنُو.
٤٩ عَايِينْ. ثِيطّْ إِنُو ثقِّيمْ ثتَّازّڒْ س إِمطَّاونْ،
وَارْ ثتَّاريِّيحْ، وَارْ ثسّْبذِّي،
٥٠ عَايِينْ. أَڒْ ذ إِ غَا إِسِّيجّْ سِيذِي زڭْ ؤُجنَّا،
ؤُشَا أَذْ إِتّْوَاڒَا.
٥١ عَايِينْ. ثِيطّْ إِنُو ثتّڭّْ أَيِي ڒحْرِيقْ
ذِي ڒعْمَارْ إِنُو،
زِي سِّيبّثْ ن مَارَّا يسِّيسْ ن ثنْذِينْثْ إِنُو.
٥٢ ثْسَاذِي. أَردّْفنْ أَيِي-د ڒْْعذْيَانْ إِنُو بْڒَا قطُّو،
أَمْ يِيجّْ ن وجْضِيضْ، مَاشَا بْڒَا سِّيبّثْ.
٥٣ ثْسَاذِي. نِيثْنِي سّْبكْمنْ ثُوذَارْثْ إِنُو ذڭْ وَانُو،
ؤُشَا نْضَارنْ أَژْرُو خَافِي.
٥٤ ثْسَاذِي. أَمَانْ حمْڒنْ-د خْ ؤُزدْجِيفْ إِنُو،
نِّيغْ: ”أَقَا وَارْ قِّيمغْ دْجِيغْ!“
٥٥ قُوفْ. أَ سِيذِي، نشّْ ڒَْاغِيغْ خْ يِيسمْ نّشْ،
زِي ڒَْادْجَاغْ ن وَانُو.
٥٦ قُوفْ. شكْ ثسْڒِيذْ إِ ثْمِيجَّا إِنُو،
وَارْ تّقّنْ أَمزُّوغْ نّشْ زَّاثْ إِ ؤُزهَّارْ إِنُو،
زَّاثْ إِ إِغُويَّانْ إِنُو!
٥٧ قُوفْ. شكْ ثُوسِيذْ-د غَارِي
ذڭْ وَاسّْ إِ ذ أَشْ د-ڒَْاغِيغْ،
ثنِّيذْ: ”وَارْ تّڭّْوذْ شَا!“
٥٨ رِيخْ. شكْ، أَ سِيذِي إِنُو،
ثَارفْعذْ دّْعَاوِي خْ ڒعْمَارْ إِنُو،
شكْ ثْفكّذْ ثُوذَارْثْ إِنُو.
٥٩ رِيخْ. أَ سِيذِي، ثژْرِيذْ دّدْجْ إِ ذَايِي إِڭِّينْ،
أَغْ أَيِي ثَاسْغَارْثْ إِنُو.
٦٠ رِيخْ. شكْ ثژْرِيذْ مَارَّا أَخْڒَافْ نْسنْ،
مَارَّا مِينْ نْوَانْ ضِيدّْ إِنُو.
٦١ شِينْ. شكْ ثسْڒِيذْ ڒْْحڭْرَا نْسنْ، أَ سِيذِي،
مَارَّا مِينْ نْوَانْ ضِيدّْ إِنُو،
٦٢ شِينْ. أَوَاڒنْ نِّي د-إِتّفّْغنْ
زِي جَارْ إِينْشِيشنْ ن يِينِّي خَافِي إِكَّارنْ،
ؤُڒَا ذ ڒمْوَايَاڒْ نْسنْ ن ؤُخَارّصْ خَافِي أَسّْ إِمُونْ.
٦٣ شِينْ. خْزَارْ غَارْ ؤُغِيمِي ذ ؤُبذِّي نْسنْ،
نشّْ ذ إِزْڒِي نْسنْ ن ؤُسْثهْزِي.
٦٤ ثَافْ. أَ سِيذِي، خدْجصْ إِ-ثنْ ڒْْمُونثْ نْسنْ
إِ إِسْذَاهدْجنْ،
عْلَاحْسَابْ ثِيمڭَّا ن إِفَاسّنْ نْسنْ.
٦٥ ثَافْ. سْذَاغْرڒْ ؤُڒَاونْ نْسنْ،
أجّْ نّعْڒثْ نّشْ أَذْ د-خَاسنْ-ثوْضَا.
٦٦ ثَافْ. ضْفَارْ إِ-ثنْ ذڭْ وغْضَابْ نّشْ،
قْضَا خَاسنْ زِي سَاذُو ؤُجنَّا ن سِيذِي.