٢
إِزْڒِي وِيسّْ ثْنَاينْ - لْغَاضَابْ ن سِيذِي
١ أَلِيفْ. مَامّشْ إِذْڒَا سِيذِي إِنُو
يدْجِيسْ ن صِيهْيُونْ
س إِسيْنُوثنْ إِبَارْشَاننْ؟
أَقَا أَعُودْجِي ن إِسْرَائِيل إِنْضَارْ إِ-ث
زڭْ ؤُجنَّا غَارْ ثمُّورْثْ،
نتَّا وَارْ إِخَارّصْ ذِي ثْنبْذَاثْ ن إِضَارنْ نّسْ
ذڭْ وَاسّْ ن وغْضَابْ نّسْ.
٢ بِيثْ. إِقْضَا سِيذِي إِنُو
خْ مَارَّا ثِيزدَّاغْ ن يَاعْقُوبْ،
وَارْ ثنْثْ إِجِّي أَذْ نجْمنْثْ.
ذڭْ ؤُذُوقّزْ نّسْ ن ؤُفُوڭمْ
إِهْذمْ لْقلْعَاثْ ن يدْجِيسْ ن يَاهُوذَا،
إِبقّضْ إِ-ثنْثْ خْ ثمُّورْثْ،
إِسّْعَارَّا ثَاڭلْذِيثْ ذ ڒْْحُوكَّامْ نّسْ.
٣ ڭِيملْ. ذِي ڒْْحَاذُوقْ ن وغْضَابْ نّسْ
إِقسّْ قَاعْ إِشّْ ن إِسْرَائِيل.
يَارَّا أَفُوسْ أَفُوسِي نّسْ غَارْ ضفَّارْ
زَّاثْ إِ ڒعْذُو،
ؤُ نتَّا يَارْغَا ضِيدّْ إِ يَاعْقُوبْ
أَمْ ثْمسِّي إِتّحْذُوذُوقنْ،
ثتّتّْ مَارَّا مِينْ إِ ذ أَسْ د-إِنّْضنْ.
٤ ذَالِيثْ. نتَّا إِمْحضْ ڒْْقوْسْ نّسْ أَمْ ڒعْذُو،
إِسّْڭعّذْ أَفُوسِي نّسْ أَمْ ڒعْذُو،
ونِّي إِوْثِينْ مَارَّا مِينْ ثمّژْرِي ثِيطّْ.
ذڭْ ؤُقِيضُونْ ن يدْجِيسْ ن صِيهْيُونْ
إِفَارّغْ أَسْعَارْ نّسْ أَمْ ثْمسِّي.
٥ هِي. سِيذِي إِنُو إِذْوڒْ أَمْ ڒعْذُو،
إِصَارْضْ إِسْرَائِيل،
إِصَارْضْ مَارَّا ڒقْصُورْ نّسْ،
إِهْذمْ لْقلْعَاثْ نّسْ،
ؤُ يَارْنِي عَاذْ ذڭْ وشْضَانْ ذ إِغُويَّانْ
غَارْ يدْجِيسْ ن يَاهُوذَا.
٦ وَاوْ. نتَّا إِقْڒعْ س لْعُونْفْ أَعِيشُّو نّسْ،
أَمْ إِجّْ ن وحْوِيشْ.
يَاريّبْ أَمْشَانْ ن ؤُمْسَاڭَارْ.
إِسّتُّو سِيذِي ذِي صِيهْيُونْ
أَسّْ ن ڒْْعِيذْ ذ أَسّْ ن سّبْثْ،
ؤُ ذڭْ وسْخضْ نّسْ
إِنْضَارْ أَجدْجِيذْ ذ ؤُكهَّانْ.
٧ زَايِينْ. إِذْوڒْ سِيذِي إِنُو إِشَارّهْ
أَعَالْطَارْ نّسْ،
إِنْضَارْ زَّاوشْثْ إِقدّْسنْ نّسْ،
إِوْشَا ڒحْيُوضْ ن يخَّامنْ ن ڒقْصَارْ
ذڭْ ؤُفُوسْ ن ڒعْذُو.
نِيثْنِي ڭِّينْ أَذْ سْڒنْ إِ ثْمِيجَّا نْسنْ
ذِي ثَادَّارْثْ ن سِيذِي،
أَمْ ذڭْ إِجّْ ن وَاسّْ ن ڒْْعِيذْ.
٨ خِيثْ. سِيذِي إِخَارّصْ أَذْ إِهْذمْ
ڒْْحِيضْ ن يدْجِيسْ ن صِيهْيُونْ،
إِسَارّحْ خَاسْ فِيڒُو ن ڒعْبَارْ،
وَارْ د-إِجْبِيذْ غَارسْ أَفُوسْ نّسْ زڭْ ؤُصَارْضْ.
إِجَّا أَشْبَارْ ن زَّاثْ ذ ڒْْحِيضْ أَذْ شضْننْ،
أَقَا تّْوَاغضْڒنْ جْمِيعْ غَارْ ثمُّورْثْ.
٩ ثِيث. ثِيوُّورَا نّسْ غَارْقنْثْ ذڭْ ؤُشَاڒْ،
إِعُومَاذْ نّسْ ن ؤُبلّعْ يَاردّدْجْ إِ-ثنْ،
يَارْژَا إِ-ثنْ.
أَجدْجِيذْ نّسْ ذ ڒْْحُوكَّامْ نّسْ أَقَا أَثنْ جَارْ ڒڭْنُوسْ،
وَارْ ذِينْ بُو ؤُسڒْمذْ ن شَّارِيعَا،
إِنَابِييّنْ نّسْ وَارْ تّطِّيفنْ شَا ڒوْحِييْ ن سِيذِي.
١٠ يُوذْ. إِمْغَارنْ ن يدْجِيسْ ن صِيهْيُونْ
قِّيمنْ خْ ثمُّورْثْ، بكْمنْ،
زُوزَّارَانْ ؤُشَاڒْ خْ ؤُزدْجِيفْ نْسنْ،
بيْسنْ إِخفْ نْسنْ س ثْخُونْشَايْ ن وشْضَانْ.
ثِيعْزَارِييِّينْ ن ؤُرْشَالِيمْ سَّاضَارنْثْ
أَزدْجِيفْ نْسنْثْ غَارْ ثمُّورْثْ.
١١ كَافْ. ثِيطَّاوِينْ إِنُو ؤُهْڒنْثْ زڭْ إِمطَّاونْ،
ثَاكْرِيشْثْ إِنُو ثتّنْهزَّا،
ثتّْوَازدْجعْ ثْسَا إِنُو خْ ثمُّورْثْ،
خْ ثْرژِّيثْ ن يدْجِيسْ ن ڒْْڭنْسْ إِنُو،
مِينْزِي أَحنْجِيرْ ذ ؤُسيْمِي
تّْغَاشَانْ خْ وَازَّاينْ ن ثنْذِينْثْ.
١٢ لَامِيذْ. نِيثْنِي قَّارنْ إِ يمَّاثْسنْ:
”مَانِي إِدْجَا عَاذْ إِمنْذِي ذ بِينُو؟“،
خْمِي وطَّانْ خْ وَازَّاينْ ن ثنْذِينْثْ
أَمْ يِينِّي إِتّْوَانْغنْ،
خْمِي تّْوَاكّْسنْ زِي ثُوذَارْثْ نْسنْ
خْ إِفَادّنْ ن يمَّاثْسنْ.
١٣ مِيمْ. مِينْ ذ أَمْ إِ غَا إِنِيغْ،
مِينْ غَارْ شمْ إِ غَا سّمْقُوذِّيغْ،
أَ يدْجِيسْ ن ؤُرْشَالِيمْ؟
مِينْ غَارْ شمْ إِ غَا سّمْقُوذِّيغْ،
أَڒَامِي شمْ إِ غَا سّْفوّْجغْ،
أَ شمْ ثَاعْزَارشْثْ، يدْجِيسْ ن صِيهْيُونْ،
مَاغَارْ ثَارژِّيثْ نّمْ ذ ثَامقّْرَانْثْ أَمْ ڒبْحَارْ،
وِي إِزمَّارنْ أَذْ شمْ إِسّْڭنْفَا؟
١٤ نُونْ. إِنَابِييّنْ نّمْ ژْرِينْ
إِوحَّانْ إِخَارِّيقنْ ذ إِبُوحَاڒِييّنْ،
وَارْ سّْعَارَّانْ شَا خْ ڒْْمُوعْصِييّثْ نّمْ
أَڒَامِي إِ غَا سّنْقڒْبنْ ثَامحْبَاسْثْ نّمْ.
ذِي طّْوعْ نّمْ ژْرِينْ نِيثْنِي
مْغِيرْ ڒحْكَامَاثْ إِخَارِّيقنْ ذ ثْحُوجَا ن ؤُغَارِّي.
١٥ سَامِيخْ. مَارَّا إِنِّي خَامْ د-إِتّكّنْ
شَّاثنْ ذڭْ إِفَاسّنْ س ؤُنخْڒِيعْ زِي سِّيبّثْ نّمْ.
نِيثْنِي تّْصفَّارنْ ؤُ سّنْهزَّانْ أَزدْجِيفْ نْسنْ
خْ يدْجِيسْ ن ؤُرْشَالِيمْ،
قَّارنْ: ’مَا ذ ثَا ذ ثَانْذِينْثْ نِّي ؤُمِي نَّانْ:
”مَا وَارْ إِدْجِي أَژْرِي نّسْ إِكْمڒْ،
ذ ڒْْعُونْصَارْ ن ڒفْرَاحثْ إِ مَارَّا دُّونشْثْ!“؟
١٦ بِي مَارَّا ڒْْعذْيَانْ نّمْ أَرزْمنْ-د غَارْومْ
إِقمُّومنْ نْسنْ،
تّْصفَّارنْ ؤُ تّْغزَّانْ ثِيغْمَاسْ،
قَّارنْ: ”نشِّينْ نْصَارْضْ إِ-ت.
وَا ذ أَسّْ إِ ثُوغَا نتّْرَاجَا،
ڒخُّو نُوفَا إِ-ث، نتّْوَاڒَا إِ-ث!“
١٧ عَايِينْ. إِڭَّا سِيذِي مِينْ إِخَارّصْ،
إِكمّڒْ أَوَاڒْ نّسْ
ونِّي يُومُورْ زِي مشْحَاڒْ ؤُيَا.
إِهْذمْ إِ شمْ، وَارْ خَامْ إِحِيوڒْ.
ڒعْذُو إِجَّا إِ-ث إِفَارْحْ زَّايمْ،
إِسّْڭعّذْ إِشّْ ن إِغْرِيمنْ نّمْ.
١٨ ثْسَاذِي. ؤُڒْ نْسنْ إِسْغُويُّو غَارْ سِيذِي إِنُو،
”أَ ڒْْحِيضْ ن يدْجِيسْ ن صِيهْيُونْ،
أجّْ أَذْ أَزّْڒنْ إِمطَّاونْ نّمْ أَمْ ثغْزَارْثْ،
أَسّْ ذ دْجِيڒثْ بْڒَا مَا أَذْ نقْصنْ،
وَارْ تّجِّي مُومُّو ن ثِيطَّاوِينْ نّمْ أَذْ إِبدّْ!“
١٩ قُوفْ. كَّارْ، سْغُويّْ ذِي دْجِيڒثْ،
غَارْ ؤُمزْوَارُو ن ثْعسَّاسْثْ ن دْجِيڒثْ،
زدْجعْ ؤُڒْ نّمْ أَمْ وَامَانْ
زَّاثْ إِ وُوذمْ ن سِيذِي إِنُو.
سْڭعّذْ غَارسْ إِفَاسّنْ نّمْ
إِ ثُوذَارْثْ ن إِحنْجِيرنْ نّمْ إِمژْيَانِينْ،
إِنِّي إِوْضَانْ غَارْ ثمُّورْثْ س ڒَْاژْ،
غَارْ ثْغمَّارْ ن مَارَّا إِبْرِيذنْ.
٢٠ رِيخْ. خْزَارْ، أَ سِيذِي، وَاڒَا مْلِيحْ
ؤُمِي ثڭِّيذْ مَانْ أَيَا؟
مَا إِتّْخصَّا خنِّي أَذْ شّنْثْ ثمْغَارِينْ
ڒْْغِيدْجثْ ن ؤُعذِّيسْ نْسنْثْ،
إِحنْجِيرنْ نْسنْثْ إِ ذِي تّْهِيلَّانْثْ نِيثنْثِي؟
مَا إِتّْخصَّا أَذْ إِتّْوَانغْ ؤُنَابِي ذ ؤُكهَّانْ
ذِي زَّاوشْثْ إِقدّْسنْ ن سِيذِي؟
٢١ شِينْ. إِحُوذْرِييّنْ ذ إِوسُّورَا بُوزّْڒنْ
خْ ثمُّورْثْ ذڭْ إِبْرِيذنْ.
ثِيعْزَارِييِّينْ إِنُو ذ إِحُوذْرِييّنْ إِنُو وْضَانْ س سِّيفْ.
ثنْغِيذْ ثنْ ذڭْ وَاسّْ ن وغْضَابْ نّشْ،
ثْغَارْصضْ أَسنْ، وَارْ خَاسنْ ثْحِيوْڒذْ شَا.
٢٢ ثَافْ. ثْعَارّْنذْ-د غَارِي مِينْ إِسَّاڭّْوَاذنْ
زِي مَارَّا إِغزْذِيسنْ،
أَمْ مَامّشْ إِبَارّحْ س إِجّْ ن ؤُمُونِي إِفَارْزنْ.
وَارْ إِنجِّيمْ نِيغْ إِتَّاركّْوَاڒْ ؤُڒَا ذ إِجّْ
ذڭْ وَاسّْ ن وغْضَابْ ن سِيذِي.
إِنِّي إِ ذِي تّْهِيلِّيغْ ؤُ أَربِّيغْ
إِقْضَا إِ-ثنْ ڒعْذُو إِنُو.