٩
أَضْهَارْ وِيسّْ ثْنَاينْ ن سِيذِي إِ سُولِيمَانْ
١ أَوَارْنِي ڒَامِي إِكمّڒْ سُولِيمَانْ ڒبْنِي ن ثَادَّارْثْ ن سِيذِي ؤُ ڒبْنِي ن ثَادَّارْثْ ن ؤُجدْجِيذْ، وَاهْ، مَارَّا مِينْ ثُوغَا إِمّژْرِي ؤُ ثُوغَا إِخْسْ أَذْ ث إِڭّْ،
٢ إِبَانْ-د سِيذِي إِ سُولِيمَانْ إِ ثْوَاڒَا وِيسّْ ثْنَاينْ، أَمْ مَامّشْ إِ ذ أَسْ د-إِبَانْ ذِي جِيبْعُونْ.
٣ إِنَّا أَسْ سِيذِي: ”نشّْ سْڒِيغْ إِ ثْژَادْجِيثْ نّشْ ؤُ إِ ؤُحشّمْ نّشْ إِ زِي ثْحشّْمذْ زَّاثْ إِ وُوذمْ إِنُو. ثَادَّارْثْ إِ ثبْنِيذْ، سّْقدّْسغْ ت، حِيمَا أَذْ سّْمثْنغْ ذِينْ إِسمْ إِنُو إِ ڒبْذَا ؤُشَا ثِيطَّاوِينْ إِنُو ذ وُوڒْ إِنُو أَذْ ذِينْ إِڒِينْ إِ ڒبْذَا!
٤ مَاڒَا شكْ ثُويُورذْ زَّاثْ إِ وُوذمْ إِنُو أَمْ مَامّشْ ثُوغَا إِڭُّورْ بَابَاشْ ذَاوُوذْ س وُوڒْ إِمُونْ ؤُ س ڒصْفَايثْ، أَذْ ثڭّذْ أَمْ مَامّشْ مَارَّا إِ ذ أَشْ ؤُمُورغْ ؤُ أَذْ ثحْضِيذْ ثِيوصَّا إِنُو ذ لْفَارَايِيضْ إِنُو،
٥ خنِّي أَذْ سّْمثْنغْ ڒْْعَارْشْ ن ثْڭلْذَا نّشْ خْ إِسْرَائِيل إِ ڒبْذَا، أَمْ مَامّشْ سِّيوْڒغْ غَارْ بَابَاشْ ذَاوُوذْ، نِّيغْ: ’وَارْ زَّايكْ إِتّْوَاقسِّي شَا ن ورْيَازْ زِي ڒْْعَارْشْ ن إِسْرَائِيل!‘
٦ مَاشَا مَاڒَا كنِّيوْ، شكْ ذ إِحنْجِيرنْ نْومْ، أَذْ ثْحيّْذمْ زِي ضفَّارْ إِنُو ؤُ كنِّيوْ وَارْ ثْحطَّامْ عَاذْ ڒُْومُورَاثْ إِنُو ذ ثْوصَّا إِنُو نِّي وْشِيغْ زَّاثْ إِ وُوذمْ نْومْ، ؤُ كنِّيوْ أَذْ ثُويُورمْ أَذْ ثْسخَّارمْ إِ إِربِّيثنْ نّغْنِي، أَذْ أَسنْ ثْبنْذْقمْ،
٧ خنِّي أَذْ قْضِيغْ إِسْرَائِيل زِي ثمُّورْثْ نِّي ذ أَسنْ وْشِيغْ ؤُشَا ثَادَّارْثْ-أَ إِ سّْقدّْسغْ إِ يِيسمْ إِنُو أَذْ ت مّنْضَارغْ زڭْ وُوذمْ إِنُو ؤُ إِسْرَائِيل أَذْ إِذْوڒْ ذ إِجّْ ن ؤُمذْيَا ذ إِشْثْ ن ڒْْقشْعثْ ن ؤُسْثهْزِي جَارْ مَارَّا ڒڭْنُوسْ.
٨ ؤُ خْ ثَادَّارْثْ-أَ ثنِّي يُوعْڒَانْ قَاعْ، مَارَّا وِي خَاسْ إِ غَا إِكّنْ، أَذْ إِثبْهثْ أَذْ إِصفَّارْ. نِيثْنِي أَذْ إِنِينْ: ’مَايمِّي إِڭَّا سِيذِي أَمُّو ذِي ثمُّورْثْ-أَ ؤُ ذِي ثَادَّارْثْ-أَ؟‘
٩ أَذْ إِنِينْ: ’مِينْزِي نِيثْنِي سمْحنْ ذِي سِيذِي، أَربِّي نْسنْ، ونِّي د-إِسُّوفّْغنْ ڒجْذُوذْ نْسنْ زِي ثمُّورْثْ ن مِيصْرَا، ؤُ مِينْزِي نِيثْنِي شبَّارنْ ذِي إِربِّيثنْ نّغْنِي، ؤُيُورنْ أَذْ أَسنْ بنْذْقنْ ؤُ أَذْ أَسنْعبْذنْ، خْ ؤُيَا إِسِّيوضْ سِيذِي مَارَّا ڒْْغَارْ-أَ خَاسنْ.‘ “
ڒبْنِييَاثْ ن سُولِيمَانْ
١٠ أَوَارْنِي عِيشْرِينْ ن إِسڭّْوُوسَا إِ ذِي إِبْنَا سُولِيمَانْ ثْنَاينْ ن ثُوذْرِينْ، ثَادَّارْثْ ن سِيذِي ؤُ ثَادَّارْثْ ن ؤُجدْجِيذْ، إِمْسَارْ
١١ - أَمْ إِوْشَا حِيرَامْ، أَجدْجِيذْ ن صُورْ، إِ سُولِيمَانْ عْلَاحْسَابْ مژْرِي نّسْ أَكشُّوضْ ن ثْشجَّارْثْ ن ثنْڭلْثْ ذ ؤُكشُّوضْ ن ثْشجَّارْثْ ن ؤُمرْزِي ذ وُورغْ - أَقَا سُولِيمَانْ إِوْشَا إِ حِيرَامْ عِيشْرِينْ ن ثْندَّامْ ذِي ثمُّورْثْ ن لْجَالِيلْ.
١٢ حِيرَامْ إِفّغْ-د زِي صُورْ، حِيمَا أَذْ إِخْزَارْ ثِيندَّامْ نِّي ذ أَسْ إِوْشَا سُولِيمَانْ، مَاشَا ثُوغَا أَثنْثْ وَارْ شْنَانْثْ ذِي ثِيطَّاوِينْ نّسْ.
١٣ نتَّا إِنَّا: ”مَانَا ثِيندَّامْ-أَ إِ ذ أَيِي ثوْشِيذْ، أَوْمَا؟“ ؤُ نتَّا إِڒَاغَا أَسنْثْ: ’ثَامُّورْثْ ن كابُولْ‘. نِيثنْثِي تّْوَاڒَاغَانْثْ أَمُّو أَڒْ أَسّْ-أَ.
١٤ حِيرَامْ ثُوغَا إِسّكّْ إِ ؤُجدْجِيذْ مْيَا ؤُ-عِيشْرِينْ ثَالِينْثْ ن وُورغْ.
١٥ ذ وَا ذ أَوَاڒْ خْ لْجِيزْيَا إِ ثُوغَا إِسّْڭعّذْ ؤُجدْجِيذْ سُولِيمَانْ، مَاحنْذْ أَذْ إِبْنَا ثَادَّارْثْ ن سِيذِي ذ ثَادَّارْثْ نّسْ ذ لْقلْعَا ذ ڒْْحِيضْ ن ؤُرْشَالِيمْ ذ حَاصُورْ ذ مَاجِيدُّو ذ جَازَارْ.
١٦ فِيرْعُونْ، أَجدْجِيذْ ن مِيصْرَا، ثُوغَا إِڭعّذْ، إِطّفْ جَازَارْ، إِقدّْ أَسْ ثِيمسِّي. إِنْغَا أَيْثْ ن كنْعَانْ إِ ثُوغَا إِزدّْغنْ ذِي ثنْذِينْثْ ؤُشَا إِوْشَا إِ-ت ذ ثَارْزفْثْ ن ثسْڒِيثْ إِ يدْجِيسْ، ثَامْغَارْثْ ن سُولِيمَانْ.
١٧ سُولِيمَانْ إِبْنَا خنِّي جَازَارْ ذ بَايْثْ-حُورُونْ ن وَادَّايْ
١٨ ذ بَاعْلَاثْ ذِي ثمُّورْثْ نِّي ذ ثَاذْمَارْ ذِي ڒخْڒَا
١٩ ذ مَارَّا ثِيندَّامْ ن ڒخْزنْ نِّي غَارسْ غَارْ سُولِيمَانْ ؤُڒَا ذ ثِيندَّامْ ن إِكَارُّوثنْ ذ ثِيندَّامْ ن إِمْنَاينْ، ؤُ مَارَّا مِينْ ثُوغَا إِمّژْرِي سُولِيمَانْ أَذْ ث إِبْنَا ذِي ؤُرْشَالِيمْ، خْ إِذُورَارْ ن لُوبْنَانْ ؤُ ذِي مَارَّا ثَامُّورْثْ إِ خْ إِحْكمْ.
٢٠ مَارَّا ڒْْڭنْسْ إِ إِقِّيمنْ ن إِمُورِييّنْ، إِحِيتِّييّنْ، إِفِيرِيزِييّنْ، إِحِيوِييّنْ ذ إِيابُوسِييّنْ، إِنِّي وَارْ إِدْجِينْ شَا زڭْ أَيْثْ ن إِسْرَائِيل،
٢١ ثَارْوَا نْسنْ نِّي إِقِّيمنْ أَوَارْنِي أَسنْ ذِي ثمُّورْثْ، إِنِّي وَارْ زمَّارنْ أَيْثْ ن إِسْرَائِيل أَذْ ثنْ حَارّْمنْ إِ ؤُثحِّي، إِڭَّا خَاسنْ سُولِيمَانْ لْجِيزْيَا ن ثسْمُوغِي أَڒْ أَسّْ-أَ.
٢٢ زڭْ أَيْثْ ن إِسْرَائِيل وَارْ إِڭِّي سُولِيمَانْ ؤُڒَا ذ إِجّْ ذ إِسْمغْ، مِينْزِي نِيثْنِي ثُوغَا أَثنْ ذ إِعسْكَارِييّنْ ذ إِمْسخَّارنْ نّسْ ذ ڒْْحُوكَّامْ نّسْ ذ إِنغْرَافنْ نّسْ ن ڒْْعسْكَارْ ذ إِمقّْرَاننْ ن إِكَارُّوثنْ نّسْ ذ إِمْنَاينْ نّسْ.
٢٣ إِنَا ذ إِمحْضَاينْ إِمقّْرَاننْ نِّي ثُوغَا إِتّْوَاڒقّْمنْ خْ ڒْْخذْمثْ ذِي طّْوعْ ن سُولِيمَانْ، خمْسَا-مْيَا ؤُ-خمْسِينْ ن يرْيَازنْ نِّي ثُوغَا إِضبَّارنْ خْ ڒْْڭنْسْ نِّي ثُوغَا إِتّطّْفنْ ذِي ڒْْخذْمثْ.
٢٤ مَاشَا يدْجِيسْ ن فِيرْعُونْ ثْڭعّذْ زِي ثنْذِينْثْ ن ذَاوُوذْ غَارْ ثَادَّارْثْ إِ ثُوغَا إِ ذ أَسْ إِبْنَا. ڒخْذنِّي إِبْنَا لْقلْعَا.
٢٥ ثْڒَاثَا ن ثْوَاڒَاوِينْ ذڭْ ؤُسڭّْوَاسْ إِسّْڭعّذْ سُولِيمَانْ ثِيغَارْصَا ن وشْمَاضْ ذ ثوْهِيبِينْ ن ڒهْنَا خْ ؤُعَالْطَارْ إِ ثُوغَا إِبْنَا إِ سِيذِي. عَاوذْ إِسّْبخَّارْ خْ ؤُعَالْطَارْ ن ڒبْخُورْ نِّي إِدْجَانْ زَّاثْ إِ وُوذمْ ن سِيذِي، ؤُشَا أَمُّو إِ إِسلّمْ نتَّا ثَادَّارْثْ أَمْ ثكْمڒْ إِ سِيذِي.
٢٦ أَجدْجِيذْ سُولِيمَانْ إِبْنَا ؤُڒَا ذ إِجّْ ن وَاڭْرَاوْ ن إِغَارُّوبَا ذِي عِيصْيُونْ-جَابَارْ إِ إِدْجَانْ غَارْ إِلَاثْ، غَارْ ثْمَا ن ڒبْحَارْ ن ثلْڭَا، ذِي ثمُّورْثْ إِذُومْ.
٢٧ حِيرَامْ إِسّكّْ إِمْسخَّارنْ نّسْ س وَاڭْرَاوْ ن إِغَارُّوبَا نِّي، إِبحْرِييّنْ إِنِّي إِسّْننْ ڒبْحَارْ، جْمِيعْ أَكْ-ذ إِمْسخَّارنْ ن سُولِيمَانْ.
٢٨ نِيثْنِي إِوْضنْ غَارْ ؤُفِيرْ ؤُ كْسِينْ سّنِّي أَربْعَا-مْيَا ؤُ-عِيشْرِينْ ثَالِينْثْ ن وُورغْ ؤُ إِوْينْ ث غَارْ ؤُجدْجِيذْ سُولِيمَانْ.