٨
أَذشّنْ ن زَّاوشْثْ ثَامقّْرَانْثْ
١ خنِّي إِسّْمُونْ سُولِيمَانْ إِمْغَارنْ ن إِسْرَائِيل، مَارَّا إِزدْجِيفنْ ن ثْقبَّاڒْ، ڒْْحُوكَّامْ ن ثُوذْرِينْ ن ڒجْذُوذْ ن أَيْثْ ن إِسْرَائِيل غَارْ ؤُجدْجِيذْ سُولِيمَانْ ذِي ؤُرْشَالِيمْ، حِيمَا أَذْ سّْڭعّْذنْ تَّابُوثْ ن ڒْْعَاهْذْ ن سِيذِي زِي ثنْذِينْثْ ن ذَاوُوذْ، ثنِّي ذ صِيهْيُونْ.
٢ مَارَّا إِرْيَازنْ ن إِسْرَائِيل مُوننْ-د غَارْ ؤُجدْجِيذْ سُولِيمَانْ غَارْ ڒْْعِيذْ ذڭْ ؤُيُورْ ن إِثَانِيمْ، أَقَا-ث ذ أَيُورْ وِيسّْ سبْعَا.
٣ مَارَّا إِمْغَارنْ ن إِسْرَائِيل ؤُسِينْ-د ؤُ إِكهَّاننْ سّْڭعّْذنْ تَّابُوثْ.
٤ نِيثْنِي سّْڭعّْذنْ تَّابُوثْ ن سِيذِي أَكْ-ذ ؤُقِيضُونْ ن ؤُمْسَاڭَارْ ؤُڒَا ذ مَارَّا ڒقْشُوعْ إِقدّْسنْ إِ ثُوغَا إِدْجَانْ ذڭْ ؤُقِيضُونْ. سّْڭعّْذنْ ت إِكهَّاننْ ذ إِلَاوِييّنْ.
٥ أَجدْجِيذْ سُولِيمَانْ أَكْ-ذ مَارَّا ثَامسْمُونْثْ ن إِسْرَائِيل إِ ثُوغَا غَارسْ د-ثْمُونْ ؤُ ثُوغَا-ت أَكِيذسْ زَّاثْ إِ تَّابُوثْ، مَارَّا نِيثْنِي وهّْبنْ ؤُدْجِي ذ إِفُونَاسنْ ذ ثْفُونَاسِينْ، إِنِّي وَارْ زمَّارنْ أَذْ تّْوَاحسْبنْ زِي سِّيبّثْ ن ڒْْقدّْ أَمقّْرَانْ نْسنْ.
٦ إِكهَّاننْ إِوْينْ تَّابُوثْ ن ڒْْعَاهْذْ ن سِيذِي غَارْ ومْشَانْ نّسْ، غَارْ وخَّامْ ن ذَاخڒْ ن ثَادَّارْثْ، ذڭْ وقْذَاسْ خْ ؤُقدَّاسْ، أَڒْ سَاذُو وَافْرِيونْ ن إِكِيرُوبنْ.
٧ مَاغَارْ إِكِيرُوبنْ بزّْعنْ ثْنَاينْ ن وَافْرِيونْ نْسنْ ثِيوَا ن ومْشَانْ ن تَّابُوثْ، ؤُشَا إِكِيرُوبنْ ذْڒِينْ تَّابُوثْ ذ إِعُومَاذْ نّسْ إِ ثَاربُّوثْ زِي سنّجْ.
٨ إِعُومَاذْ نّسْ ن ثَاربُّوثْ ثُوغَا فّْغنْ-د أَڒَامِي تّْوَاژَارّنْ إِخْفَاونْ ن إِعُومَاذْ نّسْ زڭْ ؤُقدَّاسْ زَّاثْ إِ وُوذمْ ن وخَّامْ ن ذَاخڒْ ن زَّاوشْثْ، مَاشَا زِي بَارَّا وَارْ زمَّارنْ أَذْ ثنْ ژَترنْ. إِعُومَاذْ قِّيمنْ ذِينِّي أَڒْ أَسّْ-أَ.
٩ وَارْ إِدْجِي ؤُڒَا ذ شَا ذِي تَّابُوثْ مْغِيرْ ثْنَاينْ ن ثڒْوِيحِينْ إِ ثُوغَا ذَايسْ إِسَّارْسْ مُوسَا غَارْ هُورِيبْ، ڒَْامِي إِڭَّا سِيذِي ڒْْعَاهْذْ أَكْ-ذ أَيْثْ ن إِسْرَائِيل ؤُمِي د-فّْغنْ زِي مِيصْرَا.
١٠ ڒَْامِي د-فّْغنْ إِكهَّاننْ زڭْ ؤُقدَّاسْ غَارْ بَارَّا، إِمْسَارْ، أَقَا إِجّْ ن ؤُسيْنُو إِشُّورْ ثَادَّارْثْ ن سِيذِي.
١١ وَارْ زمَّارنْ إِكهَّاننْ أَذْ قِّيمنْ بدّنْ حِيمَا أَذْ سخَّارنْ زِي سِّيبّثْ ن ؤُسيْنُو، مِينْزِي أَعُودْجِي ن سِيذِي ثُوغَا إِشُّورْ ثَادَّارْثْ ن سِيذِي.
١٢ خنِّي إِنَّا سُولِيمَانْ: ”سِيذِي إِنَّا أَقَا نتَّا أَذْ إِزْذغْ ذڭْ إِجّْ ن ؤُسيْنُو إِبُّومْبسْ.
١٣ س ثِيذتّْ، نشّْ بْنِيغْ إِشْثْ ن ثَادَّارْثْ، إِشْثْ ن ثْزذِّيغْثْ إِ شكْ، إِجّْ ن ومْشَانْ إِمْثنْ إِ شكْ، حِيمَا أَذْ ذِينْ ثْزذْغذْ إِ ڒبْذَا.“
١٤ إِنّقْڒبْ ؤُجدْجِيذْ س ؤُغمْبُوبْ نّسْ ؤُشَا إِبَاركْ مَارَّا أَڭْرَاوْ-أَ ن ڒْْڭنْسْ ن إِسْرَائِيل ؤُ مَارَّا أَڭْرَاوْ ن إِسْرَائِيل ثُوغَا إِبدّْ.
١٥ نتَّا إِنَّا: ”أَذْ إِتّْوَابَاركْ سِيذِي، أَربِّي ن إِسْرَائِيل، ونِّي إِسِّيوْڒنْ س ؤُقمُّومْ نّسْ إِ بَابَا ذَاوُوذْ ذ ونِّي ث إِكمّْڒنْ س ؤُفُوسْ نّسْ ؤُمِي إِنَّا:
١٦ ’زڭْ وَاسّْ إِ ذِي نذْهغْ ڒْْڭنْسْ إِنُو إِسْرَائِيل زِي مِيصْرَا، وَارْ إِخْضَارغْ ؤُڒَا ذ إِشْثْ ن ثنْذِينْثْ زِي مَارَّا ثِيقبَّاڒْ ن إِسْرَائِيل، حِيمَا أَذْ ذِينِّي بْنِيغْ إِشْثْ ن ثَادَّارْثْ، حِيمَا أَذْ ذِينْ يِيڒِي إِسمْ إِنُو، مَاشَا نشّْ إِخْضَارغْ ذَاوُوذْ، حِيمَا أَذْ يِيڒِي ذ ڒْْحَاكمْ خْ ڒْْڭنْسْ إِنُو إِسْرَائِيل.‘
١٧ ثُوغَا ذڭْ وُوڒْ ن بَابَا ذَاوُوذْ، حِيمَا أَذْ إِبْنَا إِشْثْ ن ثَادَّارْثْ إِ يِيسمْ ن سِيذِي، أَربِّي ن إِسْرَائِيل.
١٨ إِنَّا سِيذِي إِ بَابَا ذَاوُوذْ: ’ؤُمِي ثڭِّيذْ ذڭْ وُوڒْ نّشْ حِيمَا أَذْ ثبْنِيذْ إِشْثْ ن ثَادَّارْثْ إِ يِيسمْ إِنُو، ذِي مَانْ أَيَا إِ ثڭِّيذْ مْلِيحْ ؤُمِي ت ثُوغَا ذڭْ وُوڒْ نّشْ.
١٩ مَاشَا وَارْ إِدْجِي شكْ إِ غَا إِبْنَانْ ثَادَّارْثْ نِّي، مَاشَا مِّيشْ إِ د-إِفّْغنْ زِي ثجْعِينَّا نّشْ. ذ نتَّا أَذْ إِبْنَا ثَادَّارْثْ إِ يِيسمْ إِنُو.‘
٢٠ سِيذِي إِسّمْثنْ أَوَاڒْ نّسْ نِّي إِسِّيوڒْ، مَاغَارْ نشّْ ذوْڒغْ بدّغْ ذڭْ ومْشَانْ ن بَابَا ذَاوُوذْ ؤُ قِّيمغْ خْ ڒْْعَارْشْ ن إِسْرَائِيل، أَمْ مَامّشْ ثُوغَا إِسِّيوڒْ سِيذِي، ؤُ نشّْ بْنِيغْ ثَادَّارْثْ إِ يِيسمْ ن سِيذِي، أَربِّي ن إِسْرَائِيل.
٢١ نشّْ ڭِّيغْ ذِينْ إِجّْ ن ومْشَانْ إِ تَّابُوثْ ثنِّي ذِي إِدْجَا ڒْْعَاهْذْ ن سِيذِي إِ إِڭَّا نتَّا أَكْ-ذ ڒجْذُوذْ نّغْ ؤُمِي ثنْ د-إِنْذهْ زِي مِيصْرَا.“
٢٢ سُولِيمَانْ إِبدّْ زَّاثْ إِ ؤُعَالْطَارْ ن سِيذِي أَرنْذَاذْ ن مَارَّا أَڭْرَاوْ ن ڒْْڭنْسْ ن إِسْرَائِيل، ؤُشَا نتَّا إِكْسِي إِفَاسّنْ نّسْ غَارْ ؤُجنَّا،
٢٣ إِنَّا:
”أَ سِيذِي، أَربِّي ن إِسْرَائِيل، وَارْ إِدْجِي ؤُڒَا ذ إِجّْ ن أَربِّي أَمْ شكْ ذڭْ ؤُجنَّا سنّجْ ؤُ خْ ثمُّورْثْ سْوَادَّايْ، ونِّي إِحْضَانْ ڒْْعَاهْذْ ذ ثْمخْسِيوْثْ إِشوَّاڒنْ إِ إِمْسخَّارنْ نّشْ نِّي إِڭُّورنْ زَّاثْ إِ وُوذمْ نّشْ س مَارَّا ؤُڒْ نْسنْ،
٢٤ ونِّي إِحْضَانْ ذِي طّْوعْ ن ؤُمْسخَّارْ نّشْ، بَابَا ذَاوُوذْ، خْ مِينْ خفْ أَكِيذسْ ثسِّيوْڒذْ، مِينْزِي س ؤُقمُّومْ نّشْ إِ ثسِّيوْڒذْ ؤُ س ؤُفُوسْ نّشْ إِ د-ثَارِّيذْ أَذْ إِتّْوَاكمّڒْ، أَمْ ثدْجَا أَسّْ-أَ.
٢٥ خنِّي ڒخُّو، سِيذِي، أَربِّي ن إِسْرَائِيل، حْضَاثْ ذِي طّْوعْ ن ؤُمْسخَّارْ نّشْ، بَابَا ذَاوُوذْ، خْ مِينْ كِيذسْ ثسِّيوْڒذْ ؤُمِي ثنِّيذْ: ’وَارْ إِتّْوَاقسّْ زَّايكْ ؤُڒَا ذ إِجّْ ن ورْيَازْ زِي زَّاثْ إِ وُوذمْ إِنُو ونِّي إِقِّيمنْ خْ ڒْْعَارْشْ ن إِسْرَائِيل، مِينْ غَا كّنْ إِحنْجِيرنْ نّشْ أَذْ حْضَانْ أَذْ ؤُيُورنْ أَبْرِيذْ نْسنْ زَّاثْ إِ وُوذمْ إِنُو أَمْ مَامّشْ ثُويُورذْ شكْ زَّاثْ إِ وُوذمْ إِنُو!‘
٢٦ خنِّي ڒخُّو، أَ أَربِّي ن إِسْرَائِيل، أڭّثْ أَذْ ذوْڒنْ ذ ثِيذتّْ أَوَاڒنْ نِّي ثسِّيوْڒذْ أَكْ-ذ ؤُمْسخَّارْ نّشْ، بَابَا ذَاوُوذْ.
٢٧ مَاغَارْ مَا س ثِيذتّْ أَذْ إِزْذغْ أَربِّي خْ ثمُّورْثْ؟ خْزَارْ، أَجنَّا، وَاهْ، أَجنَّا ن إِجنْوَانْ وَارْ إِزمَّارْ أَذْ شكْ إِكْسِي، مشْحَاڒْ س ذْرُوسْ ثَادَّارْثْ-أَ نِّي سّْبدّغْ نشّْ!
٢٨ ميّڒْ غَارْ ثْژَادْجِيثْ ن ؤُمْسخَّارْ نّشْ ؤُ غَارْ ؤُزَاوڭْ نّسْ، أَ سِيذِي، أَربِّي إِنُو، حِيمَا أَذْ ثسْڒذْ غَارْ ؤُڒَاغِي ؤُ غَارْ ثْژَادْجِيثْ نِّي إِژُّودْجْ ؤُمْسخَّارْ نّشْ أَسّْ-أَ زَّاثْ إِ وُوذمْ نّشْ.
٢٩ أجّْ ثِيطَّاوِينْ نّشْ أَذْ تّْوَارزْمنْثْ دْجِيڒثْ ذ وَاسّْ ثِيوَا إِ ثَادَّارْثْ-أَ، ثِيوَا إِ ومْشَانْ إِ خْ ثنِّيذْ: ’أَقَا إِسمْ إِنُو أَذْ ذِينْ يِيڒِي إِ ؤُسدْجِي غَارْ ثْژَادْجِيثْ إِ إِژُّودْجْ ؤُمْسخَّارْ نّشْ ذڭْ ومْشَانْ-أَ.‘
٣٠ سڒْ خنِّي إِ ؤُزَاوڭْ ن ؤُمْسخَّارْ نّشْ ؤُ ن ڒْْڭنْسْ نّشْ إِسْرَائِيل، إِ ؤُزَاوڭْ نِّي تَّارنْ نِيثْنِي ذڭْ ومْشَانْ-أَ، ؤُ سڒْ شكْ خنِّي ذڭْ ومْشَانْ ن ثْزذِّيغْثْ نّشْ، ذڭْ ؤُجنَّا، وَاهْ، سڒْ ؤُشَا غْفَارْ.
٣١ مَاڒَا إِخْضَا إِجّْ أَكْ-ذ جَّارْ نّسْ ؤُ ثتّْوَاڭّْ خَاسْ إِشْثْ ن ثْجَادْجِيثْ، حِيمَا أَذْ ت إِجِّيدْجْ ؤُ وَانِيثَا يُوسَا-د ؤُشَا إِجِّيدْجْ زَّاثْ إِ ؤُعَالْطَارْ نّشْ ذِي ثَادَّارْثْ-أَ،
٣٢ سڒْ شكْ خنِّي ذڭْ ؤُجنَّا، كَّارْ، حْكمْ خْ إِمْسخَّارنْ نّشْ، حِيمَا أَذْ إِتّْوَاحْكمْ خْ ؤُعفَّانْ أَڒَامِي أَبْرِيذْ نّسْ أَذْ د-إِهْوَا خْ ؤُزدْجِيفْ نّسْ، ؤُ حِيمَا أَذْ ثتّْوَاڭّْ ثْسڭْذَا إِ ؤُمْسڭّذْ أَڒَامِي أَذْ أَسْ ثتّْوَاغْ ثسْغَارْثْ عْلَاحْسَابْ ثَاسڭْذَا نّسْ.
٣٣ مَاڒَا إِتّْوَاغْڒبْ ڒْْڭنْسْ نّشْ إِسْرَائِيل زَّاثْ إِ وُوذمْ ن ڒعْذُو، مِينْزِي نِيثْنِي خْضَانْ أَكِيذكْ، مَاشَا نِيثْنِي أَذْ غَاركْ د-ذوْڒنْ ؤُشَا أَذْ قَاذَانْ إِسمْ نّشْ ؤُ أَذْ ژَتدْجنْ أَذْ كْسِينْ س ڒْْمعْرُوفْ إِ شكْ ذِي ثَادَّارْثْ-أَ،
٣٤ سڒْ شكْ خنِّي ذڭْ ؤُجنَّا ؤُ غْفَارْ دّْنُوبْ ن ڒْْڭنْسْ نّشْ إِسْرَائِيل ؤُ نْذهْ إِ-ثنْ أَذْ د-ذوْڒنْ غَارْ ثمُّورْثْ نِّي ثوْشِيذْ إِ ڒجْذُوذْ نْسنْ.
٣٥ مَاڒَا إِبلّعْ ؤُجنَّا، خْمِي وَارْ ذِينْ إِتِّيڒِي ونْژَارْ، مِينْزِي نِيثْنِي خْضَانْ أَكِيذكْ ؤُ نِيثْنِي أَذْ ژَّادْجنْ أَمْ نّْقڒْبنْ غَارْ ومْشَانْ-أَ، أَذْ قَاذَانْ إِسمْ نّشْ ؤُ أَذْ د-ذوْڒنْ خْ دّْنُوبْ نْسنْ ؤُمِي شكْ ثنْ ثحْصَارذْ،
٣٦ سڒْ شكْ خنِّي ذڭْ ؤُجنَّا ؤُ غْفَارْ أَسنْ دّنْبْ ن إِمْسخَّارنْ نّشْ ؤُ ن ڒْْڭنْسْ نّشْ إِسْرَائِيل، مِينْزِي شكْ ثسّڒْمَاذذْ إِ-ثنْ أَبْرِيذْ أَصبْحَانْ نِّي إِتّْخصَّا أَذْ ؤُيُورنْ، ؤُ أوْشْ شكْ خنِّي أَنْژَارْ خْ ثمُّورْثْ نِّي ثوْشِيذْ ذ ڒْْوَارْثْ إِ ڒْْڭنْسْ نّشْ.
٣٧ مَاڒَا ذِينْ ڒَْاژْ ذِي ثمُّورْثْ، نِيغْ طَّاعُونْ، نِيغْ إِتّْوَاسّشْمضْ إِمنْذِي زڭْ ؤُسمِّيضْ، نِيغْ جّْرِيحشْثْ ن وفْسُو نِيغْ ثَامُوغْرِي ثنِّي إِصَارّْضنْ، نِيغْ مَاڒَا إِحْصَارْ إِ-ث ڒعْذُو غَارْ ثوُّورَا نّسْ، نِيغْ ثڒْقفْ إِ-ث مَامّشْ مَا ثڭَّا شَا ن جّْرِيحشْثْ نِيغْ شَا ن ڒحْڒَاشْ،
٣٨ خنِّي مَانْ مَا إِ غَا إِژُّودْجْ نِيغْ غَا إِتَّارْ إِجّْ ن بْنَاذمْ نِيغْ مَارَّا ڒْْڭنْسْ نّشْ إِسْرَائِيل، أَمْ نِيثْنِي، كُوڒْ إِجّْ زَّايْسنْ، سّْننْ جّْرِيحشْثْ ن وُوڒْ نْسنْ، ؤُ نتَّا إِكْسِي خنِّي إِفَاسّنْ نّسْ غَارْ ثَادَّارْثْ-أَ،
٣٩ سڒْ شكْ غَارسْ زڭْ ؤُجنَّا، أَمْشَانْ إِمْثنْ ن ثْزذِّيغْثْ نّشْ، غْفَارْ، كَّارْ ؤُ أوْشْ كُوڒْ إِجّْ عْلَاحْسَابْ ثِيبْرِيذِينْ نّسْ - أَمْ مَامّشْ ثسّْنذْ شكْ ؤُڒْ نّسْ، مَاغَارْ شكْ وَاهَا إِ إِسّْننْ ؤُڒْ ن كُوڒْ بْنَاذمْ -
٤٠ حِيمَا نِيثْنِي أَذْ شكْ ڭّْوذنْ مَارَّا ؤُسَّانْ إِ غَا كّنْ دَّارنْ خْ وُوذمْ ن ثمُّورْثْ نِّي ثوْشِيذْ إِ ڒجْذُوذْ نّغْ،
٤١ ؤُشَا سڒْ شكْ ؤُڒَا غَارْ ؤُبَارَّانِي نِّي وَارْ إِدْجَانْ زِي ڒْْڭنْسْ نّشْ إِسْرَائِيل، مَاشَا أَذْ د-يَاسْ ذِي طّْوعْ ن يِيسمْ نّشْ زڭْ إِشْثْ ن ثمُّورْثْ إِڭّْوجنْ.
٤٢ مَاغَارْ نِيثْنِي أَذْ سْڒنْ خْ يِيسمْ نّشْ أَمقّْرَانْ، خْ ؤُفُوسْ نّشْ إِجهْذنْ ؤُ خْ ؤُغِيڒْ نّشْ إِسّْوِيژّْضنْ! مَاڒَا نتَّا د-يُوسَا ؤُ أَذْ إِژَّادْجْ ذِي ثَادَّارْثْ-أَ،
٤٣ سڒْ شكْ خنِّي زڭْ ؤُجنَّا، أَمْشَانْ إِمْثنْ ن ثْزذِّيغْثْ نّشْ، ؤُ أڭّْ عْلَاحْسَابْ مَارَّا مِينْ خفْ ذ غَاركْ غَا إِڒَاغَا ؤُبَارَّانِي، حِيمَا مَارَّا ڒڭْنُوسْ ن دُّونشْثْ أَذْ سّْننْ إِسمْ نّشْ، حِيمَا نِيثْنِي أَذْ شكْ ڭّْوذنْ، أَمْ ڒْْڭنْسْ نّشْ إِسْرَائِيل، ؤُ أَذْ ؤُشِينْ، أَقَا إِسمْ نّشْ إِتّْوَابَارّحْ ثِيوَا إِ ثَادَّارْثْ-أَ إِ بْنِيغْ.
٤٤ مَاڒَا ڒْْڭنْسْ إِفّغْ غَارْ ؤُمنْغِي أَكْ-ذ ڒعْذُو نّسْ ذڭْ وبْرِيذْ مِينْ خفْ ثنْ ثسّكّذْ ؤُ نِيثْنِي أَذْ ژَّادْجنْ إِ سِيذِي أَمْ نّْقڒْبنْ غَارْ ثنْذِينْثْ-أَ إِ ثِيخْضَارذْ شكْ ؤُ غَارْ ثَادَّارْثْ إِ بْنِيغْ نشّْ إِ يِيسمْ نّشْ،
٤٥ سڒْ شكْ خنِّي ذڭْ ؤُجنَّا إِ ثْژَادْجِيثْ نْسنْ ؤُ إِ ؤُزَاوڭْ نْسنْ ؤُشَا ثَاغذْ أَسنْ ثَاسْغَارْثْ.
٤٦ مَاڒَا نِيثْنِي خْضَانْ أَكِيذكْ - مَاغَارْ وَارْ إِدْجِي ؤُڒَا ذ إِجّْ بْنَاذمْ إِ وَارْ إِخْضَانْ - ؤُ شكْ ثسْعَارذْ خَاسنْ، أَذْ ثنْ ثْسلّْمذْ زَّاثْ إِ وُوذمْ ن ڒعْذُو ؤُشَا نِيثْنِي أَذْ ثنْ نذْهنْ ذ إِمحْبَاسْ غَارْ ثمُّورْثْ ن ڒعْذُو، مَا ثڭّْوجْ نِيغْ ثُوذسْ إِ ثدْجَا،
٤٧ ؤُ نِيثْنِي أَذْ ثُوبنْ ذڭْ وُوڒْ نْسنْ ذِي ثمُّورْثْ مَانِي تّْوَاحبّْسنْ، وَاهْ، أَذْ ثُوبنْ ؤُ أَذْ خَاكْ د-ڒَْاغَانْ ذِي ثمُّورْثْ ن يِينِّي ثنْ إِحبّْسنْ، أَذْ إِنِينْ: ’نشِّينْ نخْضَا ؤُ نڭَّا مِينْ وَارْ إِسڭّْذنْ، أَقَا نڭَّا ثُوعفّْنَا!‘،
٤٨ ؤُ نِيثْنِي أَذْ غَاركْ د-ذوْڒنْ س مَارَّا ؤُڒْ نْسنْ ؤُ س مَارَّا ڒعْمَارْ نْسنْ ذِي ثمُّورْثْ ن ڒْْعذْيَانْ نْسنْ إِنِّي ثنْ إِحبّْسنْ ؤُشَا أَذْ غَاركْ ژَّادْجنْ أَمْ نّْقڒْبنْ غَارْ ثمُّورْثْ نِّي ثوْشِيذْ إِ ڒجْذُوذْ نْسنْ، غَارْ ثنْذِينْثْ-أَ إِ ثِيخْضَارذْ شكْ ؤُ غَارْ ثَادَّارْثْ-أَ إِ بْنِيغْ نشّْ إِ يِيسمْ نّشْ،
٤٩ سڒْ شكْ خنِّي ذڭْ ؤُجنَّا، أَمْشَانْ إِمْثنْ ن ثْزذِّيغْثْ نّشْ، إِ ثْژَادْجِيثْ نْسنْ ؤُ إِ ؤُزَاوڭْ نْسنْ ؤُشَا أَغْ أَسنْ ثَاسْغَارْثْ.
٥٠ غْفَارْ إِ ڒْْڭنْسْ نّشْ مِينْ زِي خْضَانْ أَكِيذكْ ؤُ غْفَارْ أَسنْ مَارَّا إِخطَّانْ نْسنْ إِ كِيذكْ إِخْضَانْ، ؤُ أوْشْ أَسنْ أَرّحْمثْ زَّاثْ إِ وُوذمْ ن يِينِّي إِ ثنْ إِحبّْسنْ، حِيمَا نِيثْنِي أَذْ خَاسنْ أَرحْمنْ.
٥١ نِيثْنِي مَاغَارْ ذ ڒْْڭنْسْ نّشْ ذ ثَاسْغَارْثْ نّشْ نِّي د-ثسُّوفّْغذْ زِي مِيصْرَا، زِي ڒْْوسْطْ ن ؤُفرَّانْ ن وُوزَّاڒْ.
٥٢ أجّْ ثِيطَّاوِينْ نّشْ أَذْ تّْوَارْزْمنْثْ إِ ؤُحشّمْ ن ؤُمْسخَّارْ نّشْ ؤُ إِ ؤُحشّمْ ن ڒْْڭنْسْ نّشْ إِسْرَائِيل، مَاحنْذْ أَذْ غَارْسنْ ثسْڒذْ أَكْ-ذ مَارَّا مِينْ غَاركْ إِ غَا ڒَْاغَانْ،
٥٣ مَاغَارْ شكْ ثْفَارْزذْ إِ-ثنْ إِ يِيخفْ نّشْ ذ ڒْْوَارْثْ زِي مَارَّا ڒڭْنُوسْ ن ثمُّورْثْ، أَمْ مَامّشْ ثسِّيوْڒذْ شكْ س ثْسخَّارْثْ ن مُوسَا، ؤُمْسخَّارْ نّشْ، ؤُمِي ثسُّوفّْغذْ ڒجْذُوذْ نّغْ زِي مِيصْرَا، أَ سِيذِي إِنُو، سِيذِي!“
٥٤ ڒَْامِي ثُوغَا سُولِيمَانْ إِكمّڒْ مَارَّا ثْژَادْجِيثْ-أَ ؤُ مَارَّا أَحشّمْ-أَ غَارْ سِيذِي، إِمْسَارْ، أَقَا نتَّا إِكَّارْ زِي زَّاثْ ن ؤُعَالْطَارْ ن سِيذِي، أَمْ ث ثُوغَا خْ إِفَادّنْ نّسْ س وعْرُورْ إِقْوسْ أَمْ تّْوَاسّْوِيژَّاضنْ إِفَاسّنْ نّسْ غَارْ ؤُجنَّا.
٥٥ نتَّا ثُوغَا إِبدّْ ذِينْ ؤُشَا إِبَاركْ مَارَّا أَڭْرَاوْ ن ڒْْڭنْسْ ن إِسْرَائِيل، إِنَّا س ثْمِيجَّا إِجهْذنْ:
٥٦ ”أَذْ إِتّْوَابَاركْ سِيذِي، ونِّي إِسَّاريّْحنْ ڒْْڭنْسْ نّسْ إِسْرَائِيل عْلَاحْسَابْ مَارَّا مِينْ ثُوغَا إِقَّارْ! زِي مَارَّا أَوَاڒْأنْ إِصبْحَاننْ إِ زِي إِسِّيوڒْ س ثْسخَّارْثْ ن ؤُمْسخَّارْ نّسْ مُوسَا، وَارْ د-إِوْضِي ؤُڒَا ذ إِجّْ.
٥٧ أَذْ يِيڒِي سِيذِي، أَربِّي نّغْ، أَكِيذْنغْ أَمْ ثُوغَا إِدْجَا أَكْ-ذ ڒجْذُوذْ نّغْ، مَاحنْذْ نتَّا وَارْ ذ أَنغْ إِتّجِّي ؤُ وَارْ ذ أَنغْ إِنطَّارْ،
٥٨ مَاشَا أَذْ إِنْذهْ ؤُڒَاونْ نّغْ غَارسْ، مَاحنْذْ نشِّينْ أَذْ نُويُورْ خْ ثبْرِيذِينْ نّسْ ؤُ أَذْ نحْضَا ڒُْومُورَاثْ نّسْ ذ ثْوصَّا نّسْ ذ لْفَارَايِيضْ نّسْ نِّي يُومُورْ إِ ڒجْذُوذْ نّغْ.
٥٩ أجّْ أَوَاڒنْ-أَ إِ سِّيوْڒغْ س ؤُحشّمْ زَّاثْ إِ وُوذمْ ن سِيذِي، أَسّْ ذ دْجِيڒثْ، أَذْ إِڒِينْ ؤُذْسنْ غَارْ سِيذِي، أَربِّي نّغْ، حِيمَا نتَّا أَذْ يَاغْ ثَاسْغَارْثْ إِ ؤُمْسخَّارْ نّسْ ذ ڒْْڭنْسْ نّسْ إِسْرَائِيل، كُوڒْ أَسّْ س مِينْ إِ إِتّْڒِيقنْ إِ وَاسّْ نِّي،
٦٠ مَاحنْذْ مَارَّا ڒڭْنُوسْ ن ثمُّورْثْ أَذْ سّْننْ أَقَا سِيذِي ذ أَربِّي، وَارْ ذِينْ نّغْنِي،
٦١ مَاحنْذْ ؤُڒْ نْومْ أَذْ يِيڒِي إِمُونْ أَكْ-سِيذِي، أَربِّي نّغْ، حِيمَا أَذْ ثُويُورمْ عْلَاحْسَابْ ثِيوصَّا نّسْ، أَذْ ثحْضَامْ ڒُْومُورَاثْ نّسْ، أَمْ ثدْجَا أَسّْ-أَ.“
٦٢ إِغَارْصْ ؤُجدْجِيذْ ذ مَارَّا إِسْرَائِيل أَكِيذسْ ثِيغَارْصَا زَّاثْ إِ وُوذمْ ن سِيذِي.
٦٣ سُولِيمَانْ إِغَارْصْ ثِيغَارْصَا ن ڒهْنَا نِّي إِغَارْصْ إِ سِيذِي: ثْنَاينْ ؤُ-عِيشْرِينْ-أَڒَافْ ن إِفُونَاسنْ ذ ثْفُونَاسِينْ ذ مْيَا ؤُ-عِيشْرِينْ-أَڒَافْ ن وُودْجِي ذ ثَاغَارْصْثْ ن ڒهْنَا. أَمُّو إِ إِذشّنْ ؤُجدْجِيذْ ثَادَّارْثْ ن سِيذِي جْمِيعْ أَكْ-ذ مَارَّا أَيْثْ ن إِسْرَائِيل.
٦٤ ذڭْ وَاسّْ ذ إِجّنْ إِسّْقدّسْ ؤُجدْجِيذْ ڒْْوسْطْ ن ڒمْرَاحْ ن زَّاثْ ونِّي إِدْجَانْ زَّاثْ إِ ثَادَّارْثْ ن سِيذِي، مِينْزِي إِسّوْجذْ ذِينْ ثَاغَارْصْثْ ن وشْمَاضْ ذ ثوْهِيبْثْ ن ڒْْغِيدْجثْ ؤُڒَا ذ ثَاذُونْثْ ن ثْغَارْصَا ن ڒهْنَا. مَاغَارْ أَعَالْطَارْ ن نّْحَاسْ ونِّي إِدْجَانْ زَّاثْ إِ وُوذمْ ن سِيذِي، ثُوغَا ذ أَمژْيَانْ حِيمَا أَذْ إِكْسِي ثِيغَارْصَا ن وشْمَاضْ ذ ثوْهِيبْثْ ن ڒْْغِيدْجثْ ذ ثَاذُونْثْ ن ثْغَارْصَا ن ڒهْنَا.
٦٥ ذِي ڒْْوقْثْ نِّي إِڭَّا سُولِيمَانْ ڒْْعِيذْ عَاوذْ ذ مَارَّا إِسْرَائِيل أَكِيذسْ، زِي مَانِي غَا ثِيوْضذْ غَارْ حَامَاثْ أَڒْ ثَاغْزَارْثْ ن مِيصْرَا: إِجّْ ن وڭْرَاوْ ن ڒْْڭنْسْ أَمقّْرَانْ زَّاثْ إِ وُوذمْ ن سِيذِي، أَربِّي نّغْ، سبْعَا ن وُوسَّانْ ؤُڒَا ذ سبْعَا ن وُوسَّانْ كْثَارْ، أَرْبعْطَاشْ ن وُوسَّانْ.
٦٦ ذڭْ وَاسّْ وِيسّْ ثْمنْيَا يَارْخُو نتَّا إِ ڒْْڭنْسْ، ؤُشَا نِيثْنِي بَارْكنْ أَجدْجِيذْ. أَوَارْنِي ؤُيَا ؤُيُورنْ غَارْ إِقِيضَانْ نْسنْ س وُوڒْ إِفَارْحْ ؤُ س ڒْْخَاضَارْ خْ مَارَّا ڒْْخَارْ إِ ثُوغَا إِڭَّا سِيذِي إِ ؤُمْسخَّارْ نّسْ ذَاوُوذْ ؤُ إِ ڒْْڭنْسْ نّسْ إِسْرَائِيل.