٣٠
أَيُوبْ إِسِّيوڒْ خْ ڒمْحَايمْ نّسْ ن يِيضَا
١ ڒخُّو مَاشَا ثُوغَا ضحّْشنْ خَافِي إِحُوذْرِييّنْ
نِّي إِدْجَانْ ذ إِمژْيَاننْ خَافِي ذڭْ وُوسَّانْ،
إِنِّي بَابَاثْسنْ وَارْ غَارِي سكّْوِينْ
مَاحنْذْ أَذْ ثنْ ڭّغْ
غَارْ يِيطَانْ إِ إِدْجَانْ خْ وُودْجِي إِنُو.
٢ مِينْ غَا ڭّغْ خنِّي س جّهْذْ ن إِفَاسّنْ نْسنْ؟
أَقَا إِفْنَا جّهْذْ نْسنْ زِي سِّيبّثْ ن ثوْسَارْ.
٣ زِي ڒْْقِيدْجثْ ؤُ زِي ڒَْاژْ ذوْڒنْ إِسْرِيونْ،
تّْمغْزَازنْ ذِي ڒْْوَاطَا يُوژْغنْ
ذِي ثُوبَّارْشنْثْ ثشُّورْ
س ؤُردّدْجْ ذ ؤُربّجْ.
٤ نِيثْنِي ڒقّْضنْ ڒبْزَارْ أَمدْجَاحْ جَارْ شْبَارْقْ،
إِژوْرَانْ ن ؤُززُّو ذ أَغْرُومْ نْسنْ.
٥ ؤُژّْڒنْ خَاسنْ زِي ثْمُونثْ ن إِوْذَانْ،
كّْوَارنْ ثنْ أَمْ يِيخوَّاننْ،
٦ حِيمَا أَذْ زذْغنْ ذِي ثغْزُورِينْ إِسَّاڭّْوَاذنْ،
ذڭْ إِفْرَانْ ن ؤُشَاڒْ ؤُ ذِي ڒجْرُوفْ.
٧ سْغُويُّونْ جَارْ شْبَارْقْ،
سَاذُو ثِيزڭّْوَارِينْ سّْمُونَانْ.
٨ ثَارْوَا ن إِبُوهَاڒِييّنْ ذ ثَارْوَا بْڒَا إِسمْ،
ذ إِنِّي ؤُژّْڒنْ خَاسنْ زِي ثمُّورْثْ س ؤُزدْجَاضْ.
٩ ڒخُّو مَاشَا أَقَا أَيِي
ذڭْ إِزْڒِي نْسنْ ن ثْژَاوَارْثْ،
ذوْڒغْ أَسنْ إِ ڒْْهَارْذْ.
١٠ شَارّْهنْ أَيِي، تَّاڭّْوَاجنْ خَافِي،
وَارْ تّْسضْحِينْ شَا
مَاحنْذْ أَذْ سُّوسْفنْ خْ ؤُغمْبُوبْ إِنُو.
١١ مَاغَارْ نتَّا إِسّفْسِي أَسْغُونْ ن ثْقِيضُونْثْ إِنُو
ؤُشَا إِسّهْوَا أَيِي.
نِيثْنِي نْضَارنْ سّْرِيمثْ نْسنْ زَّاثِي.
١٢ غَارْ ؤُغزْذِيسْ أَفُوسِي إِنُو
كَّارنْ-د خَافِي إِغذِّيونْ ن ثَارَّاوْثْ،
عَارّْننْ إِضَارنْ إِنُو،
سّْڭعَّاذنْ خَافِي إِمسْرَاقْ ن أَرْژِييّثْ نْسنْ.
١٣ أَبْرِيذْ إِنُو أَرْژِينْ ث،
أَرنّْينْ ثَامَارَا خْ ثَامَارَا إِنُو
وَاخَّا نِيثْنِي سِيمَانْثْ نْسنْ
وَارْ غَارْسنْ إِدْجِي وِي ذ أَسنْ غَا إِوْشنْ أَفُوسْ.
١٤ أَخْمِي د-تَّاسنْ
زڭْ إِجّْ ن ؤُنُوقِّيبْ ذ مِيرِيوْ،
تَّاكّْوَاضنْ أَمْ ڒمْوَاجْ يَاردّْدْجنْ.
١٥ تّْوَاكبّنْ-د خَافِي إِنخْڒِيعنْ،
أَمْ ؤُسمِّيضْ ضفَّارنْ نِيثْنِي شَّانْ إِنُو،
إِضْوَا زّْهَارْ إِنُو أَمْ يِيجّْ ن ؤُسيْنُو.
١٦ س ؤُيَا إِفسِّي ڒخُّو ڒعْمَارْ إِنُو ذَايِي،
ؤُسَّانْ ن ڒغْبنْ منّْعنْ أَيِي.
١٧ ذِي دْجِيڒثْ إِسّْنُوقُّوبْ أَيِي
إِغْسَانْ إِنُو إِ ذَايِي إِدْجَانْ،
ڒحْرِيقْ إِ ذ أَيِي إِتّْغزَّانْ وَارْ يَارسِّي.
١٨ إِتّْوَابدّڒْ وَارُّوذْ إِنُو
س جّهْذْ نّسْ أَمقّْرَانْ
أَڒَامِي وَارْ خَافِي تّعْقِيڒنْ عَاذْ.
إِشَارْفْ أَيِي أَمْ ثْمَا إِ إِنّْضنْ
إِ وَارْزمْ ن يِيرِي ذڭْ وَارُّوضْ.
١٩ إِنْضَارْ أَيِي ذڭْ ؤُبدْجَاعْ،
ذوْڒغْ أَمْ ؤُشَاڒْ ذ يِيغّضْ.
٢٠ سْغُويُّوغْ غَاركْ،
مَاشَا شكْ وَارْ خَافِي د-ثتَّارِّيذْ،
نشّْ بدّغْ ذَا
ؤُشَا شكْ ثقِّيمذْ ثْحطِّيذْ ذَايِي.
٢١ شكْ ثْذوْڒذْ أَيِي أَمْ يِيجّْ ن بُو-ڒخْشُونثْ،
ثتّْذَارَّاشذْ خَافِي س ؤُفُوسْ نّشْ إِجهْذنْ.
٢٢ شكْ ثسّْڭعَّاذذْ أَيِي
ؤُ ثْندّْهذْ أَيِي ذڭْ ؤُسمِّيضْ،
ثسّفْرَاغذْ قَاعْ أَدُّوذْ إِنُو.
٢٣ مَاغَارْ نشّْ سّْنغْ
أَقَا شكْ أَذْ أَيِي ثْنذْهذْ غَارْ ڒْْموْثْ،
غَارْ ثَادَّارْثْ مَانِي تّْمُوننْ
مَارَّا إِنِّي إِدَّارنْ.
٢٤ مَا وَارْ إِنطَّارْ بْنَاذمْ أَفُوسْ نّسْ
مَاڒَا إِوْضَا حذْ،
مَا وَارْ إِسْغُويُّو وَالُو قَاعْ
غَارْ أَرْژِييّثْ نّسْ؟
٢٥ مَا وَارْ رُوغْ خْ ونِّي ثُوغَا غَارْ إِدْجَا
وُوسَّانْ ن ثَامَارَا،
مَا وَارْ إِشْضِينْ بُوحْبڒْ إِنُو خْ ؤُمزْڒُوضْ؟
٢٦ ؤُمِي سِّيثْمغْ غَارْ مِينْ إِصبْحنْ،
أَقَا يُوسَا-د مِينْ إِدْجَانْ ذ أَعفَّانْ،
ؤُمِي رَاجِيغْ ثَافَاوْثْ، ثُوسَا-د ثَادْجسْثْ.
٢٧ أَذَانْ إِنُو تّْننَّانْ، وَارْ أَرْسِينْ،
إِوْضنْ-د وُوسَّانْ ن ثَامَارَا غَارِي.
٢٨ نشّْ أَذْ ؤُيُورغْ ذڭْ وشْضَانْ،
بْڒَا ڒهْمُو ن ثْفُوشْثْ.
أَذْ كَّارغْ ذڭْ وڭْرَاوْ ن ڒْْڭنْسْ
ؤُشَا أَذْ قِّيمغْ سْغُويُّوغْ ذڭْ ؤُجنَّا.
٢٩ إِ وُوشَّاننْ ن ڒخْڒَا
ذوْڒغْ ذ ؤُمَاثْسنْ زَّايْسنْ،
إِ يسِّيسْ ن نّْعَامثْ ذ أَمْعَاشَارْ.
٣٠ ثِيڒْمشْثْ إِنُو ثذْوڒْ خَافِي
ذ أَكَارْكُوشْ أَبَارْشَانْ،
زِي ثْمسِّي شمّْضنْ إِغْسَانْ إِنُو.
٣١ ثذْوڒْ ثِيرَارْثْ ن ڒْْڭَامْبْرِي إِنُو إِ وشْضَانْ،
ثَامْجَا إِنُو إِ ڒْْحسّْ ن إِمطَّاونْ.