٢٩
أَيُوبْ إِسِّيوڒْ خْ مَامّشْ ثُوغَا ثُوذَارْثْ نّسْ قْبڒْ
١ ؤُشَا يَارْنِي إِسّْڭعّذْ أَيُوبْ ڒْْهَارْذْ ن لْمَاثَالْ نّسْ، إِنَّا:
 
٢ مْڒِي دْجِيغْ أَمْ ذڭْ ؤُينِّي ن إِيُورنْ إِعْذُونْ
أَطَّاسْ زڭْ وَامِي،
أَمْ ذڭْ ؤُينِّي ن وُوسَّانْ
ڒَْامِي ذ أَيِي ثُوغَا إِحطَّا أَربِّي،
٣ ڒَْامِي إِڭَّا ڒفْنَارْ نّسْ
أَذْ يَارغْ خْ ؤُزدْجِيفْ إِنُو،
ؤُ ثُوغَا ڭُّورغْ ذِي ثَادْجسْثْ س ثْفَاوْثْ نّسْ.
٤ مْڒِي دْجِيغْ أَمْ ذڭْ وُوسَّانْ ن ثمْژِي إِنُو،
ؤُمِي أَمُونِي ذِي ڒَْامَانْ أَكْ-ذ أَربِّي
ثُوغَا إِبدّْ خْ ثْقِيضُونْثْ إِنُو،
٥ ؤُمِي أَمْزمَّارْ خْ كُوڒْشِي
ثُوغَا-ث عَاذْ أَكِيذِي،
ؤُ إِحنْجِيرنْ إِنُو عَاذْ نّْضنْ أَيِي-د،
٦ ؤُمِي إِصُورَافْ إِنُو ثُوغَا عُومّنْ ذِي ثْرُوسِّي،
ؤُ ثَاصْضَارْثْ ثُوغَا ثتّْزدْجَاعْ زَّاثِي
ثِيغزْرَاثِينْ ن زّشْثْ!
 
٧ ؤُمِي د-فّْغغْ غَارْ ثوَّارْثْ ن ثنْذِينْثْ،
جِّيغْ سّْبدّنْ أَيِي ڒْْكُورْسِي إِنُو ذڭْ وَازَّايْ،
٨ نُّوفَارنْ إِحُوذْرِييّنْ ڒَْامِي ذ أَيِي ژْرِينْ،
ؤُ إِمشَّايْبُوثنْ كَّارنْ، قِّيمنْ بدّنْ.
٩ ڒْْحُوكَّامْ منْعنْ أَوَاڒنْ نْسنْ
ؤُ سَّارْسنْ أَفُوسْ خْ ؤُقمُّومْ نْسنْ.
١٠ ثْمِيجَّا ن ڒْْحُوكَّامْ ثسْقَارْ،
إِڒْسقْ إِڒسْ نْسنْ غَارْ وَانغْ نْسنْ.
 
١١ مَاڒَا إِسْڒَا أَيِي ؤُمزُّوغْ، إِسّمْغَارْ أَيِي،
مَاڒَا ثژْرَا أَيِي ثِيطّْ، ثشْهذْ خْ ڒْْخَاضَارْ إِنُو.
١٢ مَاغَارْ سّْنجْمغْ ڒْْمسْكِينْ نِّي إِسْغُوينْ،
أَيُوجِيڒْ نِّي وَارْ غَارسْ ثُوغِي
ونِّي ث إِ غَا إِعَاوْننْ.
١٣ ڒْْخَاضَارْ ن ونِّي ثُوغَا عْڒَاينْ أَذْ إِهلّكْ،
ثُوسَا-د خَافِي،
ؤُڒْ نْ ثَاجَّاتْشْ ڭِّيغْ ث إِسْڒِيوْڒوْ س ڒفْرَاحثْ.
١٤ يَارْضغْ ثَاسڭْذَا ؤُ ثَاسڭْذَا ثسّْيَارْضْ أَيِي.
ثُوغَا شّْرعْ إِنُو أَمْ ؤُسڒْهَامْ ؤُ أَمْ أَرژّثْ.
 
١٥ ثُوغَا أَيِي ذ ثِيطَّاوِينْ إِ إِذَارْغَاڒنْ،
ؤُڒَا ذ إِضَارنْ إِ إِقِيضَارنْ.
١٦ ثُوغَا أَيِي ذ بَابَاثْسنْ إِ إِمزْڒَاضْ،
ؤُشَا دّعْوثْ ن ونِّي وَارْ سِّينغْ،
بقّْشغْ ت.
١٧ أَرْژِيغْ ثِيغْمَاسْ ن ثغْمَارْثْ
ن ونِّي إِڭِّينْ مِينْ وَارْ إِسڭّْذنْ
ؤُشَا كّْسغْ زَّارْذثْ إِ ثغْمَاسْ نّسْ.
 
١٨ نِّيغْ: ’أَذْ سُّوفّْغغْ بُوحْبڒْ إِنُو
خْ ڒْْعُوشّْ إِنُو،
أَذْ دَّارغْ ثُوذَارْثْ ثَازِيرَارْثْ
أَمْ ؤُجْضِيذْ ن فُونِيكْسْ.‘
١٩ إِژوْرَانْ إِنُو بزّْعغْ ثنْ أَڒْ أَمَانْ
ؤُ ذِي دْجِيڒثْ إِقِّيمْ نّْذَا خْ ڒفْرُوعْ إِنُو.
٢٠ ثُوغَا ڒْْعزّْ إِنُو إِقِّيمْ أَكِيذِي ڒبْذَا،
ڒْْقوْسْ إِنُو إِسْهڒْ ذڭْ ؤُفُوسْ إِنُو ڒبْذَا.
 
٢١ سْڒِينْ-د غَارِي، رَاجَانْ،
سْقَارنْ ذِي طّْوعْ ن شّْوَارْ إِنُو.
٢٢ أَوَارْنِي وَاوَاڒْ إِنُو
وَارْ سِّيوْڒنْ ثْوَاڒَا نّغْنِي،
أَوَاڒنْ إِنُو ؤُذُومنْ خَاسنْ.
٢٣ نِيثْنِي رَاجَانْ أَيِي أَمْ رَاجَانْ أَنْژَارْ،
أَرْزْمنْ أَقمُّومْ نْسنْ
أَمْ ث أَرزْمنْ غَارْ ونْژَارْ ن ثفْسُوثْ.
٢٤ مَاڒَا سْفَارْنِينغْ غَارْسنْ،
وَارْ زمَّارنْ عَاذْ أَذْ تِّيقّنْ،
مَاشَا ثَافَاوْثْ ن ؤُغمْبُوبْ إِنُو
وَارْ زْمِيرنْ أَذْ كِيذسْ مّْعَاڒَانْ.
٢٥ إِخْضَارغْ أَسنْ أَبْرِيذْ،
بدّغْ أَسنْ غَارْ ؤُزدْجِيفْ،
زذْغغْ أَمْ ؤُجدْجِيذْ جَارْ ڒْْعسْكَارْ،
أَمْ ونِّي إِتّْعزَّانْ إِنِّي إِشضْننْ.
 
 
٢٩:١٢ إِزهد. 72‏:‏12؛ أَوڒن. 21‏:‏13 ٢٩:١٤ إِشا. 59‏:‏17؛ أَفا. 6‏:‏10‏-‏17؛ 1 تس. 5‏:‏8