٣
أَشثْشِي ن أَيُوبْ
١ أَوَارْنِي مَانْ أَيَا يَارْزمْ أَيُوبْ أَقمُّومْ نّسْ، إِنْعڒْ أَسّْ ن وخْڒَاقْ نّسْ.
٢ أَيُوبْ إِطّفْ ذڭْ وَاوَاڒْ، إِنَّا:
٣ أَذْ إِفْنَا أَسّْ إِ ذِي د-تّْوَاخڒْقغْ،
ؤُڒَا ذ دْجِيڒثْ إِ ذِي نَّانْ:
’إِجّْ ن ورْيَازْ إِتّْوَاكْسِي.‘
٤ أجّْ أَسّْ نِّي أَذْ إِذْوڒْ ذ ثَادْجسْثْ،
عمَّارْصْ وَارْ خَاسْ إِتّْسّقْسِي أَربِّي
زڭْ ؤُجنَّا،
ؤُ وَارْ خَاسْ ثتّْشعْشِيعْ ثْفَاوْثْ ن ؤُزِيڒْ عَاذْ.
٥ إِڒِي ثَادْجسْثْ ذ ثِيڒِي ن ڒْْموْثْ أَذْ خَاسْ أَرْزُونْثْ،
أجّْ إِسيْنُوثنْ أَذْ زذْغنْ ثِيوَا نّسْ.
إِڒِي أَذْ خَاسْ وْضَانْثْ ثْكبَّاسِينْ س ؤُزِيڒْ!
٦ أَذْ ثكّسْ ثْكبَّاسْثْ يُودْجْغنْ دْجِيڒثْ نِّي،
أجّْ دْجِيڒثْ نِّي وَارْ ثْفَارّحْ
جَارْ وُوسَّانْ ن ؤُسڭّْوَاسْ،
أجّْ إِ-ت وَارْ د-ثتِّيسْ
ذِي ڒحْسَابْ ن إِيُورنْ.
٧ خْزَارْ، أجّْ دْجِيڒثْ نِّي
عمَّارْصْ وَارْ د-ثتِّيرُووْ،
وَارْ ذَايسْ إِتِّيذفْ ؤُسْڒِيوْڒوْ.
٨ أجّْ إِنِّي إِسّْفطّْحنْ أَسّْ،
أَذْ ث نعْڒنْ،
إِنِّي إِتّْحَاكَانْ أَذْ سّكَّارنْ ’لِيبِييَاثَانْ‘.
٩ أجّْ أَذْ تّْوَاكبّْسنْ إِثْرَانْ ن ثُوفُّوثْ نّسْ،
أجّْ إِ-ث أَذْ إِرَاجَا ثَافَاوْثْ، ڒَْامِي وَارْ ذِينْ ثدْجِي.
أجّْ أَبْڒِيونْ ن ثْفَاوْثْ نْ ڒفْجَارْ
وَارْ ت ژَترّنْ!
١٠ مَاغَارْ نتَّا وَارْ إِبلّعْ ثِيوُّورَا
ن ؤُعذِّيسْ ن يمَّا،
وَارْ إِفَّارْ ڒغْبنْ زَّاثْ إِ ثِيطَّاوِينْ إِنُو.
١١ مَايمِّي وَارْ مُّوثغْ
ڒَْامِي ذ أَيِي ثُوغَا ذڭْ ؤُعذِّيسْ ن يمَّا،
مَايمِّي وَارْ سُّوفّْغغْ بُوحْبڒْ،
ڒَْامِي د-فّْغغْ زڭْ ؤُعذِّيسْ ن يمَّا؟
١٢ مَايمِّي ذ أَيِي رَاجَانْ إِفَادّنْ
ؤُ مَايمِّي إِبَّاشْ،
حِيمَا أَذْ ذَايْسنْ طّضغْ؟
١٣ خنِّي إِڒِي أَذْ زّْڒغْ ڒخُّو، أَذْ سّْقَارغْ.
إِڒِي أَذْ طّْصغْ.
خنِّي بَالَاكْ أَذْ غَارِي ثِيڒِي ڒْْهُوذْنثْ
١٤ جْمِيعْ أَكْ-ذ إِجدْجِيذنْ
ذ إِمْشَاوَارنْ ن ثمُّورْثْ،
إِنِّي إِبْنَانْ إِ يِيخفْ نْسنْ أَرّْوِينَاثْ إِخْڒَانْ،
١٥ نِيغْ جْمِيعْ أَكْ-ذ ڒْْحُوكَّامْ
نِّي غَارْ إِدْجَا وُورغْ،
إِنِّي إِشُّورنْ ثُوذْرِينْ نْسنْ س نُّوقَارْثْ،
١٦ نِيغْ نشّْ وَارْ تِّيڒِيغْ عَاذْ
أَمْ يِيجّْ ن وغْرَايْ ن ثمْغَارْثْ سّْنُوفَّارنْ ث،
أَمشْنَاوْ إِسيْمَانْ
نِّيعمَّارْصْ وَارْ إِژْرِينْ ثَافَاوْثْ.
١٧ ذِينِّي سّْبدّنْ إِعفَّاننْ زِي صّْذعْ،
ذِينِّي تَّاريَّاحنْ
إِنِّي ؤُمِي إِفْنَا جّهْذْ نْسنْ.
١٨ ذِينِّي تَّاريَّاحنْ إِمحْبَاسْ مُوننْ،
وَارْ قِّيمنْ تّسْڒَانْ عَاذْ
إِ ثْمِيجَّا ن إِمْزيَّارنْ ن إِسمْغَانْ.
١٩ أَقَا ذِينْ أَمژْيَانْ ذ ؤُمقّْرَانْ،
إِسْمغْ إِنُّوفْسڒْ ذِينْ زِي بَابْ نّسْ.
٢٠ مَايمِّي ثمّوْشْ ثْفَاوْثْ إِ ڒْْمسْكِينْ،
ؤُ ثُوذَارْثْ إِ يِينِّي
ؤُمِي إِتّْوَاسَّارْزڭْ ڒعْمَارْ نْسنْ،
٢١ إِ يِينِّي إِتّْمژْرنْ ذِي ڒْْموْثْ،
مَاشَا وَارْ ت ؤُفِينْ،
إِنِّي إِغزَّانْ خْ ڒْْموْثْ كْثَارْ
خْ ڒكْنُوزْ إِنُّوفَارنْ،
٢٢ إِنِّي إِفَارّْحنْ أَطَّاسْ
أَڒَامِي ذوْڒنْ نڭّْزنْ،
ؤُ تّْغبَّانْ مژْرِي خْمِي تَّافنْ أَنْضڒْ؟
٢٣ مَايمِّي ثمّوْشْ ثْفَاوْثْ إِ ورْيَازْ
ونِّي ؤُمِي إِتّْوَاسّْنُوفَّارْ وبْرِيذْ نّسْ،
إِ ورْيَازْ ونِّي خفْ إِبلّعْ أَربِّي
زِي مَارَّا إِغزْذِيسنْ؟
٢٤ مِينْزِي ذڭْ ومْشَانْ ن وغْرُومْ إِنُو
إِتَّاسْ-د ؤُوحْوحْ إِنُو،
إِغُويَّانْ إِنُو تّْوَازدْجْعنْ أَمْ وَامَانْ.
٢٥ مِينْزِي ثُوغَا تّْنخْڒَاعغْ
ؤُ أَمنِّي د-إِفّغْ
مِينْ زِي ثُوغَا تّڭّْوذغْ، وْضِيغْ ذَايسْ.
٢٦ وَارْ غَارِي ڒْْهُوذْنثْ، وَارْ أَرْسِيغْ شَا
ؤُ وَارْ تَّاريِّيحغْ.
أَقَا ؤُسِينْ-د إِمْخُومْبَارْ.