٢
شِّيطَانْ يَارْنِي أَشثْشِي خْ أَيُوبْ
١ ذڭْ إِجّْ ن وَاسّْ ؤُسِينْ-د أَرَّاوْ ن أَربِّي، حِيمَا أَذْ بدّنْ زَّاثْ إِ سِيذِي، ؤُشَا يُوسَا-د ؤُڒَا ذ شِّيطَانْ ذِي ڒْْوسْطْ نْسنْ مَاحنْذْ أَذْ إِسّْبدّْ إِخفْ نّسْ زَّاثْ إِ سِيذِي.
٢ إِنَّا سِيذِي إِ شِّيطَانْ: ”مَانِيسْ إِ د-ثُوسِيذْ شكْ؟ شِّيطَانْ يَارَّا-د خْ سِيذِي، إِنَّا: ”ؤُسِيغْ-د زڭْ وثْلَاعْ خْ ثمُّورْثْ، كِّيغْ ت مَارَّا.“
٣ إِنَّا سِيذِي إِ شِّيطَانْ: ”مَا ثحْضِيذْ أَمْسخَّارْ إِنُو أَيُوبْ؟ أَمْ نتَّا وَارْ إِدْجِي خْ ثمُّورْثْ: ذ أَرْيَازْ إِكْمڒْ، إِڭُّورْ نِيشَانْ، إِتّڭّْوذْ أَربِّي ؤُ إِتّْحيَّاذْ خْ مِينْ إِدْجَانْ ذ أَعفَّانْ! عَاذْ يَارْنِي إِتّطّفْ ذِي ڒصْفَايثْ نّسْ، خْ مِينِّي شكْ ذ أَيِي ثْعَارّْنذْ حِيمَا أَذْ ث صَارْضغْ خْ وَالُو.“
٤ يَارَّا-د شِّيطَانْ خْ سِيذِي، إِنَّا: ”ثِيڒْمشْثْ س ثڒْمشْثْ، وَاهْ، مَارَّا مِينْ غَارسْ غَارْ بْنَاذمْ، أَذْ ث إِوْشْ إِ ثُوذَارْثْ نّسْ.
٥ سْوِيژّضْ مْغِيرْ أَفُوسْ نّشْ غَارسْ ؤُشَا حَاذَا إِغْسَانْ نّسْ ذ ويْسُومْ نّسْ، مَا خنِّي نتَّا س ثِيذتّْ وَارْ ذَايكْ إِتّْشقَّافْ ذڭْ وُوذمْ نّشْ؟“
٦ خنِّي إِنَّا سِيذِي إِ شِّيطَانْ: ”خْزَارْ، نتَّا ذڭْ ؤُفُوسْ نّشْ، مَاشَا أجّْ إِ-ث أَذْ إِدَّارْ!“
ثِيحبَّا يوْعَارنْ ڒقّْفنْثْ أَيُّوبْ
٧ خَاسْ ؤُشَا يُويُورْ شِّيطَانْ زِي زَّاثْ ن وُوذمْ ن سِيذِي ؤُشَا إِوْثَا أَيُوبْ س ثْحبَّا ثِيعفَّانِينْ، زِي ثْڒقَّا ن إِضَارنْ نّسْ أَڒْ ثْقِيشّثْ ن ؤُشقُّوفْ ن ؤُزدْجِيفْ نّسْ.
٨ نتَّا إِكْسِي أَشدْجِيقْ ن ثْقدُّوحْثْ، حِيمَا أَذْ زَّايسْ إِحكّْ إِخفْ نّسْ، ؤُشَا إِقِّيمْ ذِي ڒْْوسْطْ ن يِيغّضْ.
٩ ثنَّا أَسْ ثمْغَارْثْ نّسْ: ”مَا عَاذْ ثتّطّْفذْ ذِي ڒصْفَايثْ نّشْ؟ إِنِي أَسْ إِ أَربِّي: ’ذ ونِّي نتَّا!‘، ؤُشَا مّثْ!“
١٠ نتَّا مَاشَا إِنَّا أَسْ: ”أَمْ مَامّشْ سَّاوَاڒنْثْ ثمْغَارِينْ ثِيبُوهَاڒِييِّينْ ثسَّاوَاڒذْ ؤُڒَا ذ شمْ أَمْ يِيشْثنْ زَّايْسنْثْ. مَا نشِّينْ نْكسِّي ڒْْخَارْ زِي أَربِّي، مَاشَا وَارْ نْكسِّي خنِّي ؤُڒَا ذ ڒْْغَارْ؟“ س مَارَّا مَانْ أَيَا أَيُوبْ وَارْ إِخْضِي شَا س إِينْشِيشنْ نّسْ.
ثَارْزفْثْ ن إِمدُّوكّْوَاڒْ ن أَيُوبْ
١١ سْڒِينْ ثْڒَاثَا ن إِمدُّوكَّاڒْ ن أَيُوبْ مَارَّا مِينْ خَاسْ إِكِّينْ ذ ڒْْغَارْ ؤُ نِيثْنِي ؤُسِينْ-د كُوڒْ إِجّْ زِي ثمُّورْثْ نّسْ: إِلِيفَازْ زِي ثَايْمَانْ، بِيلْذَاذْ زِي شُوحَا ؤُ صُوفَارْ زِي نَاعْمَاثْ. ڭِّينْ أَذْ ذِينْ ؤُيُورنْ، حِيمَا أَذْ كِيذسْ سّْحِيسّْفنْ ؤُ حِيمَا أَذْ ذَايسْ ڭّنْ ؤُڒْ.
١٢ زِي ڒَْاڭّْوَاجْ سّْڭعّْذنْ ثَامُوغْڒِي نْسنْ، مَاشَا وَارْ ت عْقِيڒنْ شَا. نِيثْنِي سّْڭعّْذنْ ثْمِيجَّا نْسنْ ؤُشَا رُونْ. كُوڒْ إِجّْ إِشَارّڭْ أَسڒْهَامْ نّسْ ؤُشَا سُّويْسنْ إِغّضْ غَارْ ؤُجنَّا ثِيوَا إِ إِزدْجِيفنْ نْسنْ.
١٣ قِّيمنْ غَارسْ خْ ثمُّورْثْ، سبْعَا ن وُوسَّانْ ذ سبْعَا ن دْجِييَاڒِي. ؤُڒَا ذ إِجّنْ وَارْ إِسِّيوڒْ ؤُڒَا ذ إِجّْ ن وَاوَاڒْ غَارسْ، مَاغَارْ ژْرِينْ، أَقَا ڒحْرِيقْ نّسْ ثُوغَا ذ أَمقّْرَانْ أَطَّاسْ.