٢٣
ثَامْوَارِّيثْ ن أَيُوبْ خْ إِلِيفَازْ ذ وذْفَاعْ نّسْ زَّاثْ إِ أَربِّي
١ يَارَّا-د أَيُوبْ، إِنَّا:
٢ ؤُڒَا ذ أَسّْ-أَ أَشثْشِي إِنُو ذ أَغنَّانْ،
إِسّذْقڒْ أَفُوسْ إِنُو خْ ؤُنفّسْ إِنُو.
٣ مْڒِي سّْنغْ، مَانِي زمَّارغْ أَذْ ث أَفغْ،
مَاحنْذْ أَذْ أَوْضغْ غَارْ ثْزذِّيغْثْ نّسْ.
٤ خنِّي أَذْ بزّْعغْ زَّاثسْ دّعْوثْ،
أَذْ شُّورغْ أَقمُّومْ إِنُو
س وَاوَاڒنْ إِ ؤُشَارّعْ.
٥ أَذْ سّْنغْ أَوَاڒنْ إِ خَافِي د غَا يَارّْ،
أَذْ فهْمغْ مِينْ إِ ذ أَيِي غَا يِينِي.
٦ مَا إِتّْخصَّا أَسْ أَذْ إِمْشَارّعْ أَكِيذِي
س جّْهذْ أَمقّْرَانْ؟
لَّ، أجّْ إِ-ث أَذْ أَيِي إِوْشْ ثَايْنِيثْ وَاهَا.
٧ ذِينِّي أَذْ كِيذسْ إِمْشَارّعْ ونِّي إِشْنَانْ
ؤُ أَمُّو نشّْ أَذْ نُّوفْسْڒغْ إِ ڒبْذَا زِي ڒْْقَاضِي إِنُو.
٨ مَاشَا خْزَارْ، مَاڒَا ؤُيُورغْ غَارْ شَّارْقْ،
أَمُّو وَارْ ذِينْ إِدْجِي نتَّا،
ؤُ مَاڒَا ؤُيُورغْ غَارْ ڒْْغَارْبْ،
أَمُّو وَارْ ذ أَسْ تّْحكَّارغْ.
٩ مَاڒَا غَارسْ شْغڒْ ذِي شَّامَالْ،
وَارْ ث تّْوِيڒِيغْ،
مَاڒَا إِنّقْڒبْ-د غَارْ لْجَانُوبْ،
وَارْ ث ژَترّغْ.
١٠ مَاشَا نتَّا إِسّنْ أَبْرِيذْ إِ ڭُّورغْ،
إِتّْقدْجبْ أَيِي، أَذْ فّْغغْ أَمْ وُورغْ.
١١ إِمْنعْ ؤُضَارْ إِنُو ذِي جُّورَّاثْ نّسْ،
أَبْرِيذْ نّسْ ضْفَارغْ ث، وَارْ زَّايسْ فِّيغغْ.
١٢ ثَاوْصِييّثْ زڭْ ؤُقمُّومْ نّسْ
وَارْ زَّايسْ أَرْخُوغْ.
أَوَاڒنْ ن ؤُقمُّومْ نّسْ خمّْڒغْ ثنْ،
مَاهُو مِينْ خفْ تّْوَاوصِّيغْ.
١٣ مَاشَا مَاڒَا نتَّا ضِيدّْ ن شَا ن يِيجّنْ،
مَانْ ونْ إِ ث غَا إِمنْعنْ زِي مَانْ أَيَا؟
مِينْ إِخْسْ ڒعْمَارْ نّسْ، أَذْ ث يڭّْ.
١٤ مَاغَارْ نتَّا إِسّقْفَاڒْ مِينْ إِ ذ أَيِي يُورَا،
ؤُ أَقَا ذِينْ أَطَّاسْ ن ثْمسْڒَايِينْ
أَمْ ثِينَا غَارسْ ذِي ڒْْبَاڒْ.
١٥ خْ ؤُيَا تّْنخْڒَاعغْ زَّاثْ إِ ؤُغمْبُوبْ نّسْ،
أَقَا فهْمغْ ت مْلِيحْ،
ؤُ تّڭّْوذغْ زَّايسْ.
١٦ مَاغَارْ أَربِّي إِسّفْشِيڒْ ؤُڒْ إِنُو،
أَمْزمَّارْ خْ كُوڒْشِي إِسّْنخْڒَاعْ أَيِي.
١٧ مَاغَارْ وَارْ تّْنخْڒِيعغْ زِي ثَادْجسْثْ،
ؤُڒَا زڭْ وُوذمْ إِنُو
نِّي إِتّْڒحّفْ س ثُوبَّارْشنْثْ.