٢٢
ڒْهَارْذْ وِيسّْ ثْڒَاثَا ن إِلِيفَازْ خْ دّنْبْ ذ وذْوَاڒْ غَارْ أَربِّي
١ خنِّي يَارَّا-د إِلِيفَازْ، ونِّي د-يُوسِينْ زِي ثَايْمَانْ، إِنَّا:
٢ مَا إِزمَّارْ بْنَاذمْ أَذْ إِنْفعْ أَربِّي؟
ونِّي إِڭِّينْ س ڒعْقڒْ إِنفّعْ
مْغِيرْ إِ يِيخفْ نّسْ.
٣ مَا أَقَا-ث ذ لْفَايْذَا إِ ؤُمْزمَّارْ خْ كُوڒْشِي
أَقَا شكْ ثْسڭّْذذْ،
نِيغْ ذ ڒفْضڒْ مَاڒَا شكْ ثڭُّورذْ
ذڭْ إِبْرِيذنْ نّشْ س ڒصْفَايثْ؟
٤ مَا إِوْثِي إِ شكْ
زِي سِّيبّثْ ن ثِيڭّْوُوذِي نّشْ زَّايسْ،
نِيغْ أَذْ يَاذفْ أَكِيذكْ غَارْ ثَادَّارْثْ ن شّْرعْ؟
٥ مَا وَارْ ثدْجِي ثُوعفّْنَا نّشْ
ذ ثَامقّْرَانْثْ،
ؤُ ڒْْمُوعْصِييَّاثْ نّشْ
مَا وَارْ دْجِينْثْ نْهْڒَا أَسْبذِّي؟
٦ مَاغَارْ ثْحوّْسذْ دِّييّثْ
زڭْ أَيْثْمَاشْ بَاطڒْ،
ثكّْسذْ أَرُّوضْ
إِ يِينِّي س ذْرُوسْ ن ورُّوضْ وَاهَا.
٧ ونِّي يُوحْڒنْ وَارْ ذ أَسْ ثوْشِيذْ أَذْ إِسُو،
ونِّي إِدْجُوزنْ ثْقضْعذْ أَسْ أَغْرُومْ.
٨ مَاشَا مَاڒَا ذِينْ أَرْيَازْ س ؤُغِيڒْ إِجْهذْ،
خنِّي ثَامُّورْثْ أَقَا-ت إِ وَانِيثَا،
أَذْ ذَايسْ إِزْذغْ شَا ن ورْيَازْ ن شَّانْ.
٩ ثِيجَّاڒْ ثْسكّذْ ثنْثْ س إِفَاسّنْ خْوَانْ،
إِغَادْجنْ ن ؤُيُوجِيڒْ تّْوَاڒبْزنْ.
١٠ خْ ؤُيَا نّْضنْثْ أَشْ ڒفْخُوخْ،
ؤُشَا ثوْضَاذْ-د خَاكْ ثِيڭّْوُوذِي.
١١ نِيغْ وَارْ ثتّْوِيڒِيذْ ثَادْجسْثْ،
ذ ڒْْحمْڒثْ ن وَامَانْ نِّي شكْ يذْڒِينْ؟
١٢ مَا وَارْ إِدْجِي أَربِّي يُوعْڒَا ذڭْ ؤُجنَّا؟
خْزَارْ إِثْرَانْ نِّي إِدْجَانْ سنّجْ قَاعْ،
مَامّشْ عُودْجنْ!
١٣ مَاشَا ثقَّارذْ: ’مِينْ إِسّنْ أَربِّي؟
مَا إِزمَّارْ أَذْ إِحْكمْ نِيشَانْ
زڭْ ؤُسيْنُو إِبُّومْبْسنْ؟
١٤ إِسيْنُوثنْ ذ أَڒحّفْ إِ نتَّا
أَڒَامِي وَارْ إِتّْوِيڒِي،
ؤُ خْ ڒْْقُوبّثْ ن ؤُجنَّا إِڭُّورْ نتَّا.‘
١٥ مَا ثخْسذْ أَذْ ثضْفَارضْ أَمسْرُوقْ ن وشْحَاڒْ ؤُيَا،
أَمسْرُوقْ نِّي كِّينْ يرْيَازنْ
إِشُّورنْ س ڒْْمُوعْصِييّثْ،
١٦ إِنِّي إِتّْوَاكّْسنْ أَمْ وَارْ د-يِيوِيضْ عَاذْ
ڒْْمِيجَاڒْ نْسنْ،
ؤُمِي ثْفيّضْ ڒْْحمْڒثْ ذْسَاسْ نْسنْ،
١٧ إِنِّي إِنَّانْ إِ أَربِّي: ’أَڭّْوجْ خَانغْ!‘
مِينْ إِزمَّارْ ؤُمْزمَّارْ خْ كُوڒْشِي
أَذْ يڭّْ عَاذْ إِ نِيثْنِي؟
١٨ إِوَا، وَاخَّا نتَّا إِشُّورْ
ثُوذْرِينْ نْسنْ س ڒْْخَارْ!
شّْوَارْ ن إِعفَّاننْ إِڭّْوجْ خَافِي.
١٩ ژْرِينْ ت إِمْسڭَّاذنْ ؤُشَا فَارْحنْ،
أَمزْذَاڭْ إِسْثهْزَا زَّايْسنْ.
٢٠ ’أَغْرِيمْ نّغْ إِتّْوَاكحّضْ
ؤُ مِينْ زَّايْسنْ إِقِّيمنْ ثشَّا إِ-ث ثْمسِّي.‘
٢١ قّنْ غَارسْ، أَذْ غَاركْ ثِيڒِي ڒْْهُوذْنثْ،
س ؤُيَا أَذْ غَاركْ د-يَاسْ مِينْ إِصبْحنْ.
٢٢ كْسِي خنِّي ثَاغُورِي زڭْ ؤُقمُّومْ نّسْ،
أڭّْ أَوَاڒنْ نّسْ ذڭْ وُوڒْ نّشْ.
٢٣ مَاڒَا ثْذوْڒذْ-د
غَارْ ؤُمْزمَّارْ خْ كُوڒْشِي،
أَذْ ثتّْوَاسّْبدّذْ.
سِيڭّْوجْ مِينْ وَارْ إِسڭّْذنْ
خْ ثْقِيضُونِينْ نّشْ.
٢٤ سَارْسْ ؤُرغْ إِقُّورنْ ذڭْ ؤُشَاڒْ،
ؤُرغْ زِي ؤُفِيرْ جَارْ إِژْرَا ن ثْغزْرَاثِينْ.
٢٥ خنِّي أَمْزمَّارْ خْ كُوڒْشِي
أَذْ يِيڒِي أَمشْنَاوْ ؤُرغْ إِقُّورنْ نّشْ،
أَمشْنَاوْ إِذُورَارْ يُوعْڒَانْ ن نُّوقَارْثْ إِ شكْ!
٢٦ مَاغَارْ خنِّي أَذْ ثْفَارْحضْ
زڭْ ؤُمْزمَّارْ خْ كُوڒْشِي،
أَذْ ثسّْڭعّْذذْ أَغمْبُوبْ نّشْ
غَارْ أَربِّي.
٢٧ أَذْ أَسْ ثتَّارذْ س ثْژَادْجِيثْ يُودْجْغنْ
ؤُ نتَّا أَذْ أَشْ إِسڒْ،
ؤُ شكْ أَذْ ثْكمّْڒذْ لْوُوعُوذْ نّشْ.
٢٨ مَاڒَا ثكّْسذْ أَوَاڒْ،
خنِّي أَذْ أَشْ د-ثفّغْ ثْمسْڒَاشْثْ،
ؤُ ثَافَاوْثْ أَذْ ثَارغْ ذڭْ إِبْرِيذنْ نّشْ.
٢٩ مَاڒَا سّهْوَانْ نِيثْنِي إِجّنْ، أَذْ ثِينِيذْ:
’سْڭعّذْ أَزدْجِيفْ نّشْ!‘،
نتَّا أَذْ إِسّنْجمْ
ونِّي إِسّْهكّْوَانْ ثِيطَّاوِينْ نّسْ.
٣٠ نتَّا أَذْ إِسّنْجمْ
ونِّي وَارْ إِدْجِينْ بْڒَا ڒْْعِيبْ،
مِينْزِي نتَّا أَذْ إِنْجمْ
س ثزْذُوڭِي ن إِفَاسّنْ نّشْ!