٢٠
ڒْهَارْدْ وِيسّْ ثْنَاينْ ن صُوفَارْ خْ ڒفْڒحْ ذ ڒْْحُوكْمْ
١ خنِّي يَارَّا-د صُوفَارْ، ونِّي د-يُوسِينْ زِي نَاعْمَا، إِنَّا:
٢ إِخَارِّيصنْ إِنُو تّْغِيمَانْ
ذكّْوَاڒنْ-د غَارِي
زِي سِّيبّثْ ن ؤُقدْجقْ
إِ وَارْ إِتّْبذِّينْ ذِي ڒْْبَاڒْ إِنُو.
٣ سْڒِيغْ إِجّْ ن ؤُوبّخْ إِ ذ أَيِي إِسّْبهْذَاڒنْ،
مَاشَا بُوحْبڒْ أَذْ خَافِي د-يَارّْ
س ڒفْهَامثْ إِنُو.
٤ إِوَا ثسّْنذْ أَيَا،
أَقَا-ث ذِينْ زڭْ وشْحَاڒْ ؤُيَا،
زڭْ وَامِي إِتّْوَاسَّارْسْ بْنَاذمْ خْ ثمُّورْثْ،
٥ أَقَا أَسْڒِيوْڒوْ ن إِعفَّاننْ
إِتّكّْ ذْرُوسْ وَاهَا،
ڒفْرَاحثْ ن ؤُمْنَافقْ مْغِيرْ إِشْثْ ن ثْزحْزِيحْثْ.
٦ وَاخَّا ثتّْڭعَّاذْ نّْفَاخثْ نّسْ أَڒْ إِجنْوَانْ،
وَاخَّا إِتّْحَاذَا أَزدْجِيفْ نّسْ أَڒْ إِسيْنُوثنْ،
٧ أَمْ مَامّشْ إِسُوفْغَانْ نّسْ
أَذْ قْضَانْ إِ ڒبْذَا،
أَذْ إِقْضَا ؤُڒَا ذ نتَّا إِ ڒبْذَا.
إِنِّي ث إِژْرِينْ، أَذْ إِنِينْ: ’مَانِي إِدْجَا نتَّا؟‘
٨ أَمْ إِشْثْ ن ثِيرْجَا أَذْ إِضُووْ،
أَڒَامِي وَارْ إِتّْوِيفْ عَاذْ،
أَذْ إِتّْوَاسّثْلعْ أَمْ إِجّْ ن ڒوْحِييْ ن دْجِيڒثْ.
٩ ثِيطّْ إِ ث إِژْرِينْ وَارْ ث ثْژَارّْ عَاوذْ،
ؤُ أَمْشَانْ نّسْ وَارْ ث إِژَارّْ عمَّارْصْ.
١٠ إِحنْجِيرنْ نّسْ أَذْ سّْجِيوْننْ إِمزْڒَاضْ،
أَمُّو إِ د غَا يَارّنْ
إِفَاسّنْ نّسْ أَڭْڒَا نّسْ.
١١ إِخْسَانْ نّسْ إِشُّورنْ س ثمْژِي،
أَذْ زّْڒنْ أَكِيذسْ ذڭْ ؤُشَاڒْ.
١٢ مَاڒَا ڒْْغَارْ ذڭْ ؤُقمُّومْ نّسْ ذ أَمِيژِيذْ،
مَاڒَا إِسّْنُوفَّارْ إِ-ث سَاذُو إِڒسْ نّسْ،
١٣ مَاڒَا إِحْضَا إِ-ث، وَارْ إِخْسْ أَذْ خَاسْ إِحيّذْ،
مَاشَا إِمنّعْ إِ-ث ذڭْ وَانغْ نّسْ،
١٤ خنِّي أَذْ ثْبدّڒْ مَاشَّا نّسْ
ذڭْ ؤُعذِّيسْ نّسْ،
ذِي ذَاخڒْ نّسْ أَذْ ثذْوڒْ
ذ أَرّْهَاجْ ن ثْرفْسِيوِينْ.
١٥ إِصَارْضْ أَڭْڒَا، مَاشَا أَذْ ث-إِ-د-إِعُوقّْ عَاوذْ.
أَذْ ث-إِ-د-إِنْضَارْ أَربِّي
غَارْ بَارَّا زڭْ ؤُعذِّيسْ نّسْ.
١٦ أَرّْهَاجْ ن ثْرفْسِيوِينْ أَذْ ث إِطّضْ،
إِڒسْ ن ؤُفِيغَارْ أَذْ ث إِنغْ.
١٧ وَارْ إِژَارّْ إِغزْرَانْ،
ثِيغزْرَاثِينْ ذ ثَارْيَاوِينْ
إِتَّازّْڒنْ س ثَامّنْثْ ذ ؤُغِي.
١٨ أَذْ د-يَارّْ ڒفْضڒْ ن ؤُمَارّثْ نّسْ،
وَارْ ث إِسّغْڒَايْ،
وَارْ إِنڭّزْ س ڒفْرَاحثْ
زِي سِّيبّثْ ن وَاڭْڒَا إِ د-إِكْسبْ،
١٩ مَاغَارْ إِذدْجْ إِمزْڒَاضْ،
إِجَّا إِ-ثنْ بْڒَا ثْوِيزَا،
يُوشَارْ ثَادَّارْثْ نِّي وَارْ إِسّْبدّْ،
٢٠ مَاغَارْ وَارْ إِسِّينْ ڒْْهُوذْنثْ ذِي ذَاخڒْ نّسْ،
س ؤُيَا وَارْ إِنجّمْ
س مَارَّا مِينْ ذِي ثُوغَا إِمّژْرِي.
٢١ وَارْ إِتّْشطِّي وَالُو إِ ؤُمرْعِيقْ نّسْ،
خْ ؤُيَا وَارْ إِتّْغِيمِي زّْهَارْ نّسْ إِبدّْ.
٢٢ مَاڒَا غَارسْ أَفيّضْ إِمُونْ، أَذْ إِتّْوَاحْسَارْ،
أَذْ خَاسْ يِيڒِي ؤُفُوسْ ن كُوڒْ ڒْْمسْكِينْ.
٢٣ أَيَا أَذْ يِيڒِي حِيمَا أَذْ إِشُّورْ أَعذِّيسْ نّسْ،
وَاهْ، أَربِّي أَذْ خَاسْ إِسّكّْ
ڒْْحَاذُوقْ ن وغْضَابْ نّسْ،
أَذْ ث يَارّْ أَذْ خَاسْ إِوّثْ أَمْ ونْژَارْ
ؤُشَا أَذْ ث يَارّْ أَذْ إِشُوكّْ ذِي أَرِّيمثْ نّسْ.
٢٤ وَاخَّا أَذْ يَارْوڒْ زِي ڒسْنَاحْ ن وُوزَّاڒْ،
أَذْ ث إِسّْنُوقّبْ ڒْْقوْسْ ن نّْحَاسْ.
٢٥ إِجبّذْ إِجّنْ زَّايسْ فْڒِيثْشَا،
أَقَا ثفّغْ-د زِي أَرِّيمثْ نّسْ،
ڒْْمَاشَامْ يَارقّنْ إِتّفّغْ-د
زڭْ إِژِي نّسْ،
وَاهْ إِنخْڒِيعنْ أَذْ خَاسْ كّنْ.
٢٦ ثَادْجسْثْ ثكْمڒْ ثتّْحَامَا
غَارْ ثْخُوبَايْ نّسْ إِنُوفَّارنْ،
ثِيمسِّي وَارْ ت إِسِّيغْ ؤُڒَا ذ إِجّْ،
أَذْ ث ثشّْ، أَذْ ثَارّْ مژْرِي
أَكْ-ذ يِينِّي إِشطّنْ ذِي ثْقِيضُونْثْ نّسْ.
٢٧ أَجنَّا أَذْ إِعَارَّا ڒْْمُوعْصِييّثْ نّسْ،
ثَامُّورْثْ أَذْ خَاسْ ثْغوّغْ.
٢٨ ڒْْغِيدْجثْ ن ثَادَّارْثْ نّسْ أَذْ ثْرَاحْ،
أَذْ ثَازّڒْ ذڭْ وَاسّْ ن وغْضَابْ نّسْ.
٢٩ وَا ذ مِينْ إِ د-إِكَّارنْ
إِ إِعفَّاننْ زِي أَربِّي،
ثَاسْغَارْثْ إِ ذ أَسْ إِنَّا أَربِّي.