١٩
ثَامْوَارِّيثْ ن أَيُوبْ خْ بِيلْذَاذْ خْ ؤُسِيثمْ نّسْ ذِي أَربِّي
١ يَارَّا-د أَيُوبْ، إِنَّا:
٢ مشْحَاڒْ عَاذْ إِ غَا ثكّمْ
ثْشضْنمْ ڒعْمَارْ إِنُو،
أَذْ أَيِي ثْڒبْزمْ س وَاوَاڒنْ؟
٣ ڒخُّو عَاذْ وِيسّْعشْرَا ن ثْوَاڒَاوِينْ
تّكّْوَارمْ أَيِي،
وَارْ ثتّْسضْحِيمْ
ؤُمِي ذ أَيِي د-ثْغطّْڒمْ أَوَاڒْ.
٤ مَاڒَا س ثِيذتّْ ودَّارغْ،
أَذْ إِقِّيمْ ؤُودَّارْ إِنُو إِ إِخفْ إِنُو.
٥ مَاڒَا س ثِيذتّْ ثخْسمْ أَذْ خَافِي ثسّْڭعّْذمْ
إِخفْ نْومْ س شِّيكِي،
أَذْ أَيِي ثسّْقنْعمْ س ڒفْضِيحثْ إِنُو،
٦ سْنمْ خنِّي، أَقَا أَربِّي إِنّقْڒبْ خَافِي،
ؤُشَا إِنّضْ أَيِي-د س ثْرَاشَّا نّسْ.
٧ خْزَارْ، سْغُويُّوغْ: ’ڒخْشُونثْ!‘،
مَاشَا وَارْ خَافِي د-يَارِّي ؤُڒَا ذ إِجّْ،
تّْڒَاغِيغْ إِ ثْوِيزَا،
مَاشَا ڒْْحقّْ وَارْ ذِينْ إِدْجِي.
٨ أَبْرِيذْ إِنُو إِقّنْ إِ-ث،
أَڒَامِي وَارْ زمَّارغْ أَذْ عْذُوغْ،
ثَادْجسْثْ إِسُّو ت خْ إِمسْرَاقْ إِنُو.
٩ ڒْْعزّْ إِنُو إِكشّضْ إِ-ث زَّايِي،
ؤُ تَّاجْ إِ إِدْجَانْ خْ ؤُزدْجِيفْ إِنُو إِكّسْ إِ-ث.
١٠ نتَّا يَاردّدْجْ أَيِي زِي مَارَّا إِغزْذِيسنْ،
أَذْ تّْوَاهلّْكغْ!
إِقْڒعْ ڒَْايَاسْ إِنُو أَمْ يِيشْثْ ن ثْشجَّارْثْ.
١١ أَغْضَابْ نّسْ يَارْغَا ذَايِي،
نتَّا إِحسّبْ أَيِي
أَمْ إِجّْ زڭْ إِغْرِيمنْ نّسْ.
١٢ مُوننْثْ فّْغنْثْ-د بَانْذِييَّاثْ نّسْ،
سّْوجْذنْثْ-إِ-د أَبْرِيذْ نْسنْثْ غَارِي
ؤُشَا قُووَّارنْثْ إِ ثْقِيضُونْثْ إِنُو.
١٣ أَيْثْمَا إِسِّيڭّْوجْ إِ-ثنْ خَافِي،
إِنِّي ذ أَيِي إِسّْننْ ذوْڒنْ ذ مِيدّنْ خَافِي.
١٤ إِنِّي ذ أَيِي إِتّعْنَانْ جِّينْ أَيِي،
إِنِّي ذ أَيِي إِسّْننْ تُّونْ أَيِي.
١٥ إِمْسخَّارنْ ن ثَادَّارْثْ إِنُو ذ ثِييَّا إِنُو
حسّْبنْ أَيِي ذ ڒْْبَارَّانِي،
نشّْ ذ أَغْرِيبْ جَارْ ثِيطَّاوِينْ نْسنْ.
١٦ ڒَْاغِيغْ إِ ؤُمْسخَّارْ إِنُو،
مَاشَا وَارْ خَافِي د-يَارِّي،
ثُوغَا إِتّْخصَّا أَذْ ث حشّْمغْ
س ؤُقمُّومْ إِنُو.
١٧ ڒعْوِينْ ن ثمْوَارِّيثْ ن نّفْسْ إِنُو
إِسّْعِيفّْ ثَامْغَارْثْ إِنُو،
أَرْصُوضغْ إِ أَيْثْمَا.
١٨ عَاذْ إِحْرَامنْ إِمژْيَاننْ سّحْقَارنْ أَيِي.
مَاڒَا كَّارغْ بدّغْ، تّمْعَارَّانْ خَافِي
س وَاوَاڒنْ نْسنْ.
١٩ مَارَّا إِمّدُّوكَّاڒْ إِنُو إِعِيزّنْ
شَارّْهنْ أَيِي،
إِنِّي تّخْسغْ، نّْقڒْبنْ خَافِي.
٢٠ غَارْ ثڒْمشْثْ ذ ويْسُومْ إِنُو
ڒسّْقنْ إِغْسَانْ إِنُو.
نشّْ نجْمغْ
أَكْ-ذ ثِيڒْمشْثْ ن ثغْمَاسْ إِنُو وَاهَا.
٢١ حِينّمْ خَافِي، حِينّمْ خَافِي، أَ كنِّيوْ،
إِمدُّوكَّاڒْ إِنُو!
مَاغَارْ أَفُوسْ ن أَربِّي إِڒْقفْ أَيِي.
٢٢ مَايمِّي ذ أَيِي ثْضَافَّارمْ
أَمْ ت إِتّڭّْ أَربِّي،
ؤُ مَايمِّي وَارْ تّْجِيوِينمْ أَيْسُومْ إِنُو؟
٢٣ مْڒِي ؤُرَانْ أَوَاڒنْ إِنُو،
مْڒِي تّْوَازمّمنْ ذڭْ إِجّْ ن وذْلِيسْ!
٢٤ مْڒِي تّْوَانقْشنْ
س بْلُومَا ن وُوزَّاڒْ ؤُ س ڒخْفِيفْ
ذِي جَّارْفْ إِ ڒبْذَا.
٢٥ نشّْ سّْنغْ: ’أَمفْذِي إِنُو إِدَّارْ
ؤُ نتَّا أَذْ د-إِكَّارْ ذ أَنڭَّارْ خْ ؤُشَاڒْ.‘
٢٦ ؤُ أَوَارْنِي ڒَْامِي إِ غَا ثتّْوَاڒْبزْ
ثڒْمشْثْ إِنُو أَمُّو،
أَذْ ژَترغْ أَربِّي زِي أَرِّيمثْ إِنُو.
٢٧ أَذْ ث ژَترغْ زَّاثِي،
ثِيطَّاوِينْ إِنُو أَذْ ث ژَترنْثْ،
وَارْ إِدْجِي مِيدّنْ.
غَارسْ إِ تّْمژْرنْثْ ثِيژَّاڒْ إِنُو
غَارْ ذَاخڒْ إِنُو.
٢٨ وَاخَّا أَمنِّي كنِّيوْ أَذْ ثِينِيمْ:
’مَامّشْ إِ نْزمَّارْ أَذْ ث نضْفَارْ؟‘
مَاغَارْ أَژْوَارْ ن ثْمسْڒَاشْثْ إِتّْوَافْ ذَايِي.
٢٩ ڭّْوذمْ زِي سِّيفْ،
مَاغَارْ س سِّيفْ أَذْ د-يَاسْ وسْعَارْ
خْ دّْنُوبْ إِنقّنْ،
مَاحنْذْ أَذْ ثسّْنمْ أَقَا أَذْ يِيڒِي ڒْْحُوكْمْ.