38
أَهْجَامْ ن هَاجُوجْ
1 يُوسَا-د غَارِي وَاوَاڒْ ن سِيذِي، إِنَّا:
2 ”أَ مِّيسْ ن بْنَاذمْ، أَرّْ ؤُذمْ نّشْ غَارْ هَاجُوجْ زِي ثمُّورْثْ ن مَاجُوجْ، ڒْحَاكمْ ن رُوشْ، مَاشِيكْ ذ ثُوبَالْ، ؤُشَا نَابّْ ضِيدّْ نّسْ،
3 إِنِي: ’أَمُّو إِ إِقَّارْ سِيذِي إِنُو، سِيذِي: خْزَارْ، نشّْ أَقَا أَيِي ضِيدّْ نّشْ، أَ هَاجُوجْ، ڒْحَاكمْ ن رُوشْ، مَاشِيكْ ذ ثُوبَالْ.
4 نشّْ أَذْ شكْ قمّْعغْ ؤُ أَذْ ڭّغْ ثِيسنَّارِينْ ذڭْ إِقَابْسِيونْ نّشْ ؤُشَا أَذْ شكْ سُّوفّْغغْ، شكْ ذ مَارَّا ڒْعسْكَارْ نّشْ، إِيْسَانْ ذ إِمْنَاينْ، مَارَّا أَرْضنْ أَرُّوضْ مْلِيحْ أَطَّاسْ، إِجّْ ن وڭْرَاوْ ذ أَمقّْرَانْ أَطَّاسْ، س ثْسدَّارْثْ ثَامقّْرَانْثْ ذ ثْسدَّارْثْ ثَامژْيَانْثْ ن ؤُعسْكَارِي، مَارَّا نِيثْنِي غَارْسنْ ثِيزمَّارْ ذڭْ ؤُمنْغِي س سِّيفْ.
5 أَيْثْ ن لْفُورْسْ، ن كُوشْ ؤُ ن فُوطْ أَكِيذْسنْ، مَارَّا إِذْسنْ س ثْسدَّارْثْ ن ؤُعسْكَارِي ذ لْكَاسْكْ ن ؤُعسْكَارِي،
6 جُومَارْ أَكْ-ذ مَارَّا ڒْعسْكَارْ نّسْ، ذ ثَادَّارْثْ ن ثُوجَارْمَا زِي طّْرُوفَا ن شَّامَالْ قَاعْ أَكْ-ذ مَارَّا ڒْعسْكَارْ نّسْ، وَاهْ، أَطَّاسْ ن ڒڭْنُوسْ أَذْ د-أَسنْ أَكِيذكْ.
7 إِڒِي ثْوجْذذْ ؤُ سوْجذْ إِخفْ نّشْ، شكْ ذ مَارَّا أَڭْرَاوْ نّشْ نِّي ثسّْمُونذْ غَاركْ، ؤُ إِڒِي ذ أَمحْضَايْ نْسنْ.
8 أَوَارْنِي وَاطَّاسْ ن وُوسَّانْ أَذْ ثتّْوَاڒَاغِيذْ، أَوَارْنِي ڒَامِي عْذُونْ أَطَّاسْ ن إِسڭّْوُوسَا أَذْ د-ثَاسذْ غَارْ ثمُّورْثْ نِّي إِتّْوَاعذْڒنْ زِي سِّيفْ، غَارْ إِجّْ ن ڒْڭنْسْ إِ إِتّْوَاسّْمُوننْ زِي ڒڭْنُوسْ خْ إِذُورَارْ ن إِسْرَائِيل نِّي ثُوغَا ذ ڒْخِيرْبثْ إِ يِيجّْ ن ڒْوقْثْ ذ أَزِيرَارْ، غَارْ إِجّْ ن ڒْڭنْسْ نِّي إِتّْوَاسُّوفّْغنْ زِي ڒڭْنُوسْ، ؤُ مَارَّا نِيثْنِي زدّْغنْ ذِينِّي ذِي ڒَامَانْ.
9 خنِّي أَذْ ثْڭعّْذذْ أَمْ ثْحَارْيَاضْثْ، أَمْ ؤُسيْنُو مَاحنْذْ أَذْ ثذْڒذْ ثَامُّورْثْ، شكْ ذ مَارَّا ڒْعسْكَارْ نّشْ ؤُڒَا ذ أَطَّاسْ ن ڒڭْنُوسْ نِّي كِيكْ إِدْجَانْ.‘ “
10 ”أَمُّو إِ إِقَّارْ سِيذِي إِنُو، سِيذِي: ’ذڭْ وَاسّْ نِّي أَذْ إِمْسَارْ، أَقَا أَذْ أَذْفنْ إِخَارِّيصنْ ذڭْ وُوڒْ نّشْ ؤُ شكْ أَذْ ثْخَارّْصذْ ذِي ثْمعْمُوتْشْ ثَاعفَّانْثْ.
11 أَذْ ثِينِيذْ: أَذْ ڭعّْذغْ غَارْ إِشْثْ ن ثمُّورْثْ س ثْندَّامْ بْڒَا ڒحْيُوضْ، أَذْ د-أَسغْ غَارْ ينِّي ذِينْ إِدَّارنْ ذِي ڒهْنَا ؤُ غَارْ يِينِّي ذِينْ إِزدّْغنْ ذِي ڒَامَانْ، إِنِّي ذِينْ إِزدّْغنْ مَارَّا بْڒَا ڒْحِيضْ ؤُ بْڒَا زّكْرُونَاثْ نِيغْ ثِيوُّورَا،
12 مَاحنْذْ أَذْ كشّْضغْ ؤُ أَذْ أَشَارغْ أَڭْڒَا! وَاهْ، مَاحنْذْ أَذْ ثَارّذْ أَفُوسْ نّشْ خْ ڒْخِيرْبَاثْ نِّي ذِي زدّْغنْ عَاوذْ إِوْذَانْ، خْ يِيجّْ نْ ڒْڭنْسْ نِّي إِتّْوَاسّْمُوننْ زِي ڒڭْنُوسْ، ونِّي إِكسْبنْ ڒْمَاڒْ ذ وَاڭْڒَا، ونِّي إِزدّْغنْ خْ ثْعبُّوضْثْ ن ثمُّورْثْ.
13 شَابَا ذ ذَاذَانْ ذ تُّوجَارْ ن ثَارْشِيشْ ذ مَارَّا أَيْرَاذنْ إِمژْيَانِينْ نْسنْ أَذْ أَشْ إِنِينْ: مَا د-ثُوسِيذْ مَاحنْذْ أَذْ ثطّْفذْ ثَاكشَّاضْثْ؟ مَا ثسّْمُونذْ أَڭْرَاوْ نّشْ مَاحنْذْ أَذْ ثْكشّْضذْ، حِيمَا أَذْ ثكْسِيذْ نُّوقَارْثْ ذ وُورغْ، حِيمَا أَذْ ثطّْفذْ ڒْمَاڒْ ذ وَاڭْڒَا، حِيمَا أَذْ ثَاشَارذْ ثَاكشَّاضْثْ ثَامقّْرَانْثْ؟‘ “
14 ”س ؤُيَا، نَابّْ، أَ مِّيسْ ن بْنَاذمْ، ؤُشَا إِنِي إِ هَاجُوجْ ’أَمُّو إِ إِقَّارْ سِيذِي إِنُو، سِيذِي: ذڭْ وَاسّْ نِّي، خْمِي غَا إِزْذغْ ڒْڭنْسْ إِنُو إِسْرَائِيل ذِي ڒَامَانْ، مَا شكْ وَارْ ثسِّينذْ مِينْ إِتّْخصَّا أَذْ ث ثڭّذْ؟
15 أَذْ د-ثَاسذْ زڭْ ومْشَانْ نّشْ، زِي طّْرُوفَا ن شَّامَالْ قَاعْ، شكْ ذ وَاطَّاسْ نْ ڒڭْنُوسْ أَكِيذكْ. مَارَّا نِيثْنِي ذ إِمْنَاينْ س إِيْسَانْ، إِجّْ ن وڭْرَاوْ ذ أَمقّْرَانْ ذ يِيجّْ ن ڒْعسْكَارْ إِجهْذنْ.
16 أَذْ ثْڭعّْذذْ ضِيدّْ إِ ڒْڭنْسْ إِنُو إِسْرَائِيل، أَمْ يِيجّْ ن ؤُسيْنُو، مَاحنْذْ أَذْ ثذْڒذْ ثَامُّورْثْ. أَذْ يِيڒِي ذڭْ ؤُنڭَّارْ ن وُوسَّانْ. نشّْ أَذْ شكْ سِّيوْضغْ خْ ثمُّورْثْ إِنُو، حِيمَا ڒڭْنُوسْ أَذْ أَيِي سّْننْ، خْمِي زَّايكْ إِ غَا تّْوَاقدّْسغْ زَّاثْ إِ ثِيطَّاوِينْ نْسنْ، أَ هَاجُوجْ!‘
17 أَمُّو إِ إِقَّارْ سِيذِي إِنُو، سِيذِي: ’مَا أَقَا شكْ ذ ونِّي خْ سِّيوْڒغْ ذڭْ وُوسَّانْ ن زِيشْ، س ؤُفُوسْ ن إِمْسخَّارنْ إِنُو، إِنَابِييّنْ ن إِسْرَائِيل نِّي ثُوغَا إِتّْنَابّنْ ذڭْ وُوسَّانْ نِّي، ڒْْمِيجَاڒْ ن وَاطَّاسْ ن إِسڭّْوُوسَا، بلِّي نشّْ أَذْ شكْ سِّيوْضغْ ضِيدّْ نْسنْ؟
18 ذڭْ وَاسّْ نِّي، ذڭْ وَاسّْ إِ ذِي د غَا يَاسْ هَاجُوجْ ضِيدّْ إِ ثمُّورْثْ ن إِسْرَائِيل، أَمُّو إِ إِقَّارْ سِيذِي إِنُو، سِيذِي، أَقَا أَذْ يَاڒِي وسْعَارْ إِنُو ذڭْ ونْزَارنْ إِنُو.
19 ذِي ثُوسْمِي إِنُو إِقدّْسنْ، ذِي ثْمسِّي ن ؤُذُوقّزْ إِنُو ن ؤُفُوڭمْ نِّيغْ: س ثِيذتّْ، أَمْ دَّارغْ نشّْ، مَاڒَا ذڭْ وَاسّْ نِّي وَارْ إِتِّيڒِي إِجّْ ن ونْهزِّي ن ثمُّورْثْ أَمقّْرَانْ ذِي ثمُّورْثْ ن إِسْرَائِيل،
20 أَڒَامِي إِسڒْمَانْ ن ڒبْحَارْ ذ إِجْضَاضْ ن ؤُجنَّا ذ ڒْمَاڒْ ن ييَّارْ ذ مَارَّا ڒْمَاڒْ نِّي إِتّْبُوعنْ خْ ثمُّورْثْ ذ مَارَّا إِوْذَانْ نِّي إِدْجَانْ خْ وُوذمْ ن ثمُّورْثْ أَذْ أَرْجِيجنْ، ؤُ إِذُورَارْ أَذْ تّْوَامنْضَارنْ ؤُ ڒجْرُوفْ إِعُودْجنْ أَذْ هْرُورَانْ ذ مَارَّا ڒحْيُوضْ أَذْ وْضَانْ.
21 نشّْ أَذْ د-ڒَْاغِيغْ خْ سِّيفْ ضِيدّْ نّسْ خْ مَارَّا إِذُورَارْ إِنُو، أَمُّو إِ إِقَّارْ سِيذِي إِنُو، سِيذِي. سِّيفْ ن كُوڒْ إِجّْ أَذْ يِيڒِي خْ ؤُمَاسْ.
22 نشّْ أَذْ خَاسْ حكْمغْ س طَّاعُونْ ؤُ س إِذَامّنْ ؤُشَا أَذْ خَاسْ ڭّغْ ؤُ خْ ڒْعسْكَارْ نّسْ ؤُ خْ وَاطَّاسْ ن ڒڭْنُوسْ نِّي كِيذسْ إِ غَا يِيڒِينْ، أَنْژَارْ إِجهْذنْ ذ إِبْقُوقنْ إِمقّْرَاننْ ن ثبْرُورِي ذ ثْمسِّي ذ ڒشْبَارِييّثْ.
23 نشّْ أَذْ سّشْنغْ إِخفْ إِنُو ذ أَمقّْرَانْ ذ أَمْقدَّاسْ ؤُ أَذْ تّْوَاسّْنغْ زَّاثْ إِ ثِيطَّاوِينْ ن ڒڭْنُوسْ. نِيثْنِي أَذْ سّْننْ بلِّي نشّْ ذ سِيذِي.‘ “