٣٧
ثَانُوكْرَا ن إِسْرَائِيل
١ ثُوغَا ؤُفُوسْ ن سِيذِي خَافِي ؤُشَا سِيذِي إِسُّوفّغْ أَيِي-د ذِي أَرُّوحْ ؤُشَا إِسَّارْسْ أَيِي ذِي ڒْْوسْطْ ن ڒوْضَا نِّي ثُوغَا يشُّورنْ س إِغْسَانْ. ٢ نتَّا إِنْذهْ أَيِي ذڭْ ونّضْ نّسْ، ؤُ خْزَارْ، أَقَا ذِينْ أَطَّاسْ س وَاطَّاسْ ن إِغْسَانْ خْ وُوذمْ ن ڒوْضَا، ؤُ خْزَارْ، أَقَا أَثنْ ؤُژْغنْ أَطَّاسْ. ٣ نتَّا إِنَّا أَيِي: ”أَ مِّيسْ ن بْنَاذمْ، مَا أَذْ دَّارنْ إِغْسَانْ-أَ عَاوذْ؟“ نِّيغْ نشّْ: ”أَ سِيذِي إِنُو، سِيذِي، شكْ ثسّْنذْ ث!“ ٤ خنِّي إِنَّا أَيِي: ”نَابّْ خْ يغْسَانْ-أَ، إِنِي أَسنْ: ’أَ إِغْسَانْ ؤُژْغنْ، سْڒمْ إِ وَاوَاڒْ ن سِيذِي. ٥ أَمُّو إِ إِقَّارْ سِيذِي إِنُو، سِيذِي، إِ إِغْسَانْ-أَ: خْزَارْ، نشّْ أَذْ ذَايْومْ سِّيذْفغْ بُوحْبڒْ ؤُشَا أَذْ ثدَّارمْ عَاوذْ. ٦ أَذْ خَاومْ ڭّغْ إِژوْرَانْ ؤُ أَذْ خَاومْ سّْڭعّْذغْ أَيْسُومْ ؤُشَا أَذْ كنِّيوْ ذْڒغْ س إِڒمْ ؤُشَا أَذْ ذَايْومْ ڭّغْ بُوحْبڒْ، أَذْ ثدَّارمْ عَاوذْ. خنِّي أَذْ ثسّْنمْ بلِّي نشّْ ذ سِيذِي.‘ “
٧ ڒَْامِي ثُوغَا تّْنَابّغْ أَمْ مَامّشْ ذ أَيِي إِتّْوَاوصَّا، ؤُشَا ثُوغَا ذِينْ إِجّْ ن ڒْْحسّْ ڒَْامِي ثُوغَا تّْنَابّغْ، ؤُ خْزَارْ، أَقَا ذَا إِشْثْ ن ثَارْجِيجِيثْ ؤُشَا إِغْسَانْ مُوننْ، كُوڒْ إِغسْ أَكْ-ذ إِغسْ نّسْ. ٨ ژْڒِيغْ، ؤُ خْزَارْ، أَقَا ذوْڒنْ خَاسنْ-د إِژوْرَانْ ؤُ يُوڒِي خَاسنْ ويْسُومْ ؤُ نتَّا إِذْڒَا إِ-ثنْ س يِيڒمْ سنّجْ نْسنْ، مَاشَا وَارْ ذَايْسنْ ثُوغِي عَاذْ بُوحْبڒْ. ٩ نتَّا إِنَّا أَيِي: ”نَابّْ إِ أَرُّوحْ، نَابّْ، أَ مِّيسْ ن بْنَاذمْ، ؤُشَا إِنِي إِ أَرُّوحْ: ’أَمُّو إِ إِقَّارْ سِيذِي إِنُو، سِيذِي: أَسْ-د زِي أَربْعَا ن ثْغمُّورَا ن ؤُسمِّيضْ، أَ أَرُّوحْ، ؤُ سُوضْ ذڭْ إِنَا إِنِّي إِتّْوَانْغنْ، حِيمَا أَذْ دَّارنْ.‘ “ ١٠ خنِّي نَابّغْ أَمْ مَامّشْ إِ ذ أَيِي إِتّْوَاوصَّا. ؤُشَا يُوذفْ أَرُّوحْ ذَايْسنْ ؤُشَا دَّارنْ عَاوذْ ؤُشَا كَّارنْ بدّنْ خْ إِضَارنْ نْسنْ، أَقَا ذ إِجّْ ن ڒْْعسْكَارْ ذ أَمقّْرَانْ أَطَّاسْ س وَاطَّاسْ.
١١ خنِّي إِنَّا أَيِي: ”أَ مِّيسْ ن بْنَاذمْ، إِغْسَانْ-أَ أَقَا أَثنْ مَارَّا ثَادَّارْثْ ن إِسْرَائِيل. خْزَارْ، نِيثْنِي قَّارنْ: ’إِغْسَانْ نّغْ ؤُژْغنْ ؤُشَا ڒَْايَاسْ نّغْ إِودَّارْ ؤُ نشِّينْ نتّْوَاقْضعْ!‘ ١٢ س ؤُيَا، نَابّْ، إِنِي أَسنْ: ’أَمُّو إِ إِقَّارْ سِيذِي إِنُو، سِيذِي: خْزَارْ، نشّْ أَذْ أَرْزْمغْ إِمضْڒَانْ نْومْ، أَذْ كنِّيوْ سّْڭعّْذغْ زڭْ إِمضْڒَانْ نْومْ، أَ ڒْْڭنْسْ إِنُو، ؤُ نشّْ أَذْ كنِّيوْ أَوْيغْ خْ وُوذمْ ن ثمُّورْثْ ن إِسْرَائِيل. ١٣ كنِّيوْ أَذْ ثسّْنمْ، بلِّي نشّْ ذ سِيذِي، ؤُمِي أَرْزْمغْ إِمضْڒَانْ نْومْ ؤُشَا سُّوفّْغغْ-د كنِّيوْ زڭْ إِمضْڒَانْ نْومْ، أَ ڒْْڭنْسْ إِنُو. ١٤ نشّْ أَذْ ڭّغْ أَرُّوحْ إِنُو ذَايْومْ ذِي ذَاخڒْ نْومْ ؤُ كنِّيوْ أَذْ ثدَّارمْ عَاوذْ ؤُ نشّْ أَذْ كنِّيوْ سَّارْسغْ خْ وُوذمْ ن ثمُّورْثْ نْومْ ؤُ كنِّيوْ أَذْ ثسّْنمْ بلِّي نشّْ، سِيذِي، سِّيوْڒغْ ؤُشَا ڭِّيغْ ث، أَمُّو إِ إِقَّارْ سِيذِي.‘ “
 
أَسْمُونِي ن إِسْرَائِيل ذ يَاهُوذَا
١٥ يُوسَا-د غَارِي وَاوَاڒْ ن سِيذِي، إِنَّا: ١٦ ”شكْ، أَ مِّيسْ ن بْنَاذمْ، كْسِي إِجّْ ن ؤُزدْجَاضْ ن ؤُكشُّوضْ ؤُشَا أَرِي ذَايسْ: ’إِ يَاهُوذَا ؤُ إِ أَرَّاوْ ن إِسْرَائِيل، إِمْعَاشَارنْ نّسْ!‘ كْسِي أَوَارْنِي أَسْ أَزدْجَاضْ نّغْنِي ؤُشَا أَرِي ذَايسْ: ’إِ يُوسُوفْ، أَزدْجَاذْ ن إِفْرَايِيمْ، ؤُ إِ مَارَّا ثَادَّارْثْ ن إِسْرَائِيل، إِمدُّوكَّاڒْ نّسْ!‘ ١٧ سْمُونْ ثنْ خنِّي إِجّْ أَكْ-ذ ونّغْنِي، أڭّْ زَّايْسنْ إِجّْ ن ؤُزدْجَاضْ إِ شكْ. أَذْ ذوْڒنْ ذ إِجّْ ذڭْ ؤُفُوسْ نّشْ.
١٨ خْمِي كِيكْ إِ غَا إِسِّيوْڒنْ ثَارْوَا ن ڒْْڭنْسْ نّشْ، أَذْ إِنِينْ: ’مَا وَارْ ثخْسذْ أَذْ أَنغْ ثسّشْنذْ مِينْ إِخْسْ أَذْ إِنِينْثْ ثْمسْڒَايِينْ-أَ إِ شكْ؟‘، ١٩ إِنِي أَسنْ: ’أَمُّو إِ إِقَّارْ سِيذِي إِنُو، سِيذِي: خْزَارْ، نشّْ أَذْ كْسِيغْ أَزدْجَاضْ ن يُوسُوفْ، ونِّي إِدْجَانْ ذڭْ ؤُفُوسْ ن إِفْرَايِيمْ، أَزدْجَاضْ ن ثْقبَّاڒْ ن إِسْرَائِيل، إِمْعَاشَارنْ نّسْ، ؤُشَا أَذْ ثنْ سّْمُونغْ أَكْ-ذ ؤُزدْجَاضْ ن يَاهُوذَا ؤُشَا أَذْ ثنْ ڭّغْ ذ إِجّْ ن ؤُزدْجَاضْ ؤُشَا أَذْ ذوْڒنْ ذ إِجّْ ذڭْ ؤُفُوسْ إِنُو.‘ ٢٠ إِزدْجَاضنْ زڭْ ؤُكشُّوضْ إِ خْ ثُورِيذْ، أَذْ إِڒِينْ ذڭْ ؤُفُوسْ نّشْ زَّاثْ إِ ثِيطَّاوِينْ نْسنْ. ٢١ خنِّي إِنِي أَسنْ: ’أَمُّو إِ إِقَّارْ سِيذِي إِنُو، سِيذِي: خْزَارْ، نشّْ أَذْ طّْفغْ أَيْثْ ن إِسْرَائِيل زِي ڒْوسْثْ نْ ڒڭْنُوسْ مَانِي غَارْ ؤُيُورنْ ؤُشَا أَذْ ثنْ سّْمُونغْ زڭْ ونّضْ ؤُشَا أَذْ ثنْ أَوْيغْ غَارْ وُوذمْ ن ثمُّورْثْ نْسنْ. ٢٢ نشّْ أَذْ ثنْ ڭّغْ ذ إِجّْ ن ڒْْڭنْسْ ذِي ثمُّورْثْ، خْ إِذُورَارْ ن إِسْرَائِيل، ذ إِجّْ ن ؤُجدْجِيذْ أَذْ يِيڒِي إِ مَارَّا إِذْسنْ ذ أَجدْجِيذْ ؤُشَاعمَّارْصْ عَاذْ أَذْ إِڒِينْ إِ ثْنَاينْ نْ ڒڭْنُوسْ ؤُعمَّارْصْ عَاذْ أَذْ تّْوَابْضَانْ ذِي ثْنَاينْ ن ثْڭلْذِيوِينْ. ٢٣ وَارْ سّْخمَّاجنْ عَاذْ إِخفْ نْسنْ س إِميْضَا نْسنْ ن لْ-أَصْنَامْ، س نّْعَاوَاثْ نْسنْ ن لْ-أَصْنَامْ ؤُ س ڒْْمُوعْصِييَّاثْ نْسنْ. نشّْ أَذْ ثنْ سّْنجْمغْ زِي مَارَّا ثِيندَّامْ نْسنْ إِ ذِي خْضِينْ نِيثْنِي ؤُ نشّْ أَذْ ثنْ سِّيزذْڭغْ. خنِّي نِيثْنِي أَذْ أَيِي إِڒِينْ ذ ڒْْڭنْسْ ؤُ نشّْ أَذْ أَسنْ إِڒِيغْ ذ أَربِّي. ٢٤ أَمْسخَّارْ إِنُو ذَاوُوذْ أَذْ خَاسنْ يِيڒِي ذ أَجدْجِيذْ ؤُشَا أَذْ ذِينْ يِيڒِي إِجّْ ن ؤُمكْسَاوْ إِ مَارَّا نِيثْنِي. نِيثْنِي أَذْ ضْفَارنْ لْفَارَايِيضْ إِنُو ؤُشَا أَذْ حْضَانْ ثِيوصَّا إِنُو، أَذْ زَّايْسنْثْ ڭّنْ.    ٢٥ أَذْ زذْغنْ ذِي ثمُّورْثْ نِّي وْشِيغْ إِ ؤُمْسخَّارْ إِنُو يَاعْقُوبْ، إِ ذِي ثُوغَا زدّْغنْ ڒجْذُوذْ نْومْ، وَاهْ، نِيثْنِي أَذْ ذَايسْ زذْغنْ إِ ڒبْذَا، نِيثْنِي ذ إِحنْجِيرنْ نْسنْ ذ إِحنْجِيرنْ ن إِحنْجِيرنْ نْسنْ، ؤُشَا أَمْسخَّارْ إِنُو ذَاوُوذْ أَذْ يِيڒِي ذ ڒْْحَاكمْ نْسنْ إِ ڒبْذَا. ٢٦ نشّْ أَذْ كِيذْسنْ قضْعغْ إِجّْ ن ڒْْعَاهْذْ ن ڒهْنَا، أَذْ يِيڒِي ذ ڒْْعَاهْذْ إِ ڒبْذَا. نشّْ أَذْ ثنْ بَارْكغْ ؤُ أَذْ ذَايْسنْ أَرْنِيغْ أَطَّاسْ ؤُ نشّْ أَذْ ڭّغْ زَّاوشْثْ إِنُو إِقدّْسنْ ذِي ڒْْوسْطْ نْسنْ إِ ڒبْذَا. ٢٧ أَذْ غَارْسنْ ثِيڒِي ثْزذِّيغْثْ إِنُو ؤُ نشّْ أَذْ إِڒِيغْ ذ أَربِّي نْسنْ ؤُ نِيثْنِي أَذْ إِڒِينْ ذ ڒْْڭنْسْ إِنُو، ٢٨ ؤُشَا أَذْ سّْننْ ڒڭْنُوسْ، بلِّي نشّْ ذ سِيذِي نِّي إِسّْقدّْسنْ إِسْرَائِيل خْمِي غَا ثِيڒِي زَّاوشْثْ إِنُو إِقدّْسنْ ذِي ڒْْوسْطْ نْسنْ إِ ڒبْذَا.‘ “
 
 
٣٧:٢٢ يُوح. 10‏:‏16 ٣٧:٢٤ ’أَمكْسَا‘ - نِيغْ ’أَنِيتْشْ إِ‘. ٣٧:٢٤ إِشا. 40‏:‏11؛ إِرْم. 30‏:‏9؛ حِز. 34‏:‏23 ٣٧:٢٦ إِزهد. 89‏:‏4؛ حِز. 34‏:‏25؛ 2 كُور. 6‏:‏16 ٣٧:٢٧ حِز. 11‏:‏20؛ 14‏:‏11