٣٠
أَقَارُّو ن ڒْْعَاهْذْ
١ ”خْمِي خَاكْ د غَا يَاسنْثْ مَارَّا ثْمسْڒَايِينْ-أَ، لْبَارَاكَا ذ نّعْڒثْ نِّي ڭِّيغْ زَّاثكْ، ؤُشَا أَذْ ثنْثْ ثَارّذْ غَارْ وُوڒْ نّشْ جَارْ مَارَّا ڒڭْنُوسْ غَارْ مَانِي سِيذِي، أَربِّي نّشْ، خَاكْ يُوژّڒْ،
٢ ؤُشَا أَذْ ثْعقْبذْ غَارْ سِيذِي، أَربِّي نّشْ، أَذْ ثسْڒذْ إِ ثْمِيجَّا نّسْ س مَارَّا ؤُڒْ نّشْ ؤُ س مَارَّا ڒعْمَارْ نّشْ أَنشْثْ ن مَارَّا مِينْ خْ شكْ ؤُمُورغْ أَسّْ-أَ، شكْ جْمِيعْ أَكْ-ذ إِحنْجِيرنْ نّشْ،
٣ خنِّي سِيذِي، أَربِّي نّشْ، أَذْ إِبْضڒْ أَحبّسْ نّشْ ؤُشَا أَذْ خَاكْ يَارْحمْ ؤُشَا أَذْ شكْ إِسّْمُونْ زِي جَارْ مَارَّا ڒڭْنُوسْ غَارْ مَانِي شكْ إِبزّعْ سِيذِي، أَربِّي نّشْ.
٤ وَاخَّا إِنِّي خْ يُوژّْڒنْ زَّايكْ، أَقَا أَثنْ غَارْ ؤُنڭَّارُو ن ؤُجنَّا، أَقَا سِيذِي، أَربِّي نّشْ، أَذْ شكْ إِسّْمُونْ ؤُشَا أَذْ شكْ د-إِنْذهْ سّنِّي.
٥ سِيذِي، أَربِّي نّشْ، أَذْ شكْ إِسِّيذفْ غَارْ ثمُّورْثْ نِّي وَارْثنْ ڒجْذُوذْ نّشْ ؤُشَا أَذْ ت ثكْسِيذْ عَاوذْ ذ ڒْْوَارْثْ. نتَّا أَذْ ذَايكْ إِڭّْ ثْشُونِي ؤُ أَذْ ذَايكْ يَارْنِي عَاذْ كْثَارْ زِي ڒجْذُوذْ نّشْ.
٦ سِيذِي، أَربِّي نّشْ، أَذْ إِخْثنْ ؤُڒْ نّشْ ذ وُوڒْ ن ثَارْوَا نّشْ حِيمَا أَذْ ثخْسذْ سِيذِي، أَربِّي نّشْ، س مَارَّا ؤُڒْ نّشْ ذ مَارَّا ڒعْمَارْ نّشْ، حِيمَا أَذْ ثدَّارذْ.
٧ سِيذِي، أَربِّي نّشْ، أَذْ يَارّْ مَارَّا نّْعَاڒِي نِّي خْ ڒْْعذْيَانْ نّشْ ؤُ خْ يِينِّي شكْ إِشَارّْهنْ، إِنِّي خَاكْ د-إِذَارّْشنْ عَاوذْ.
٨ أَذْ ثْعقْبذْ، أَذْ ثسْڒذْ إِ ثْمِيجَّا ن سِيذِي ؤُشَا أَذْ ثڭّذْ مَارَّا ڒُْومُورَاثْ نِّي خفْ أَشْ تُّومُورغْ أَسّْ-أَ.
٩ سِيذِي، أَربِّي نّشْ، أَذْ أَشْ إِوْشْ أَفيّضْ ذِي مَارَّا ڒْْخذْمثْ ن إِفَاسّنْ نّشْ، ذِي ڒْْغِيدْجثْ ن ؤُعذِّيسْ نّشْ، ذِي ڒْْغِيدْجثْ ن ڒبْهَايمْ نّشْ ؤُ ذِي ڒْْغِيدْجثْ ن ثمُّورْثْ نّشْ، أَيَا أَذْ يِيڒِي إِ ڒْْخَارْ نّشْ، مِينْزِي سِيذِي أَذْ إِعْقبْ حِيمَا أَذْ زَّايكْ إِفَارْحْ إِ ڒْْخَارْ نّشْ، أَمْ مَامّشْ ثُوغَا إِفَارْحْ إِ ڒجْذُوذْ نّشْ،
١٠ خْمِي غَا ثسْڒذْ إِ ثْمِيجَّا ن سِيذِي، أَربِّي نّشْ حِيمَا أَذْ ثحْضِيذْ ڒُْومُورَاثْ نّسْ ذ ثْوصَّا نّسْ، ثِينِّي يُورِينْ ذڭْ وذْلِيسْ-أَ إِتّْوَانْضنْ ن شَّارِيعَا ؤُشَا خْمِي د غَا ثْذوْڒذْ غَارْ سِيذِي، أَربِّي نّشْ، س مَارَّا ؤُڒْ نّشْ، س مَارَّا ڒعْمَارْ نّشْ.“
١١ ”مِينْزِي ڒُْومُورْ-أَ إِ خْ شكْ تُّومُورغْ نشّْ أَسّْ-أَ، وَارْ إِدْجِي يُوعْڒَا خَاكْ ؤُ وَارْ إِڭّْوِيجْ شَا.
١٢ وَارْ إِدْجِي ذڭْ ؤُجنَّا، حِيمَا أَذْ ثِينِيذْ: ’وِي غَا إِڭعّْذنْ غَارْ ؤُجنَّا ذِي طّْوعْ نّغْ حِيمَا أَذْ أَنغْ ث-إِ-د-يَاوِي إِ نشِّينْ ؤُشَا أَذْ أَسْ نْسڒْ، حِيمَا نْزمَّارْ أَذْ زَّايسْ نڭّْ؟‘
١٣ وَارْ إِدْجِي خْ ؤُجمَّاضْ ن ڒبْحَارْ، أَڒَامِي غَا ثْزمَّارذْ أَذْ ثِينِيذْ: ’وِي غَا إِژْوَانْ غَارْ ؤُجمَّاضْ ن ڒبْحَارْ حِيمَا أَذْ أَنغْ ث-إِ-د-يَاوِي إِ نشِّينْ ؤُشَا أَذْ أَسْ نْسڒْ، حِيمَا نْزمَّارْ أَذْ زَّايسْ نڭّْ؟‘،
١٤ مِينْزِي أَوَاڒْ-أَ يُوذسْ إِ شكْ أَطَّاسْ، أَقَا-ث ذڭْ ؤُقمُّومْ نّشْ، أَقَا-ث ذڭْ وُوڒْ نّشْ، حِيمَا أَذْ زَّايسْ ثڭّذْ.“
١٥ ”خْزَارْ، نشّْ ڭِّيغْ زَّاثكْ أَسّْ-أَ ثُوذَارْثْ ذ ڒْْخَارْ ؤُڒَا ذ ڒْْموْثْ ذ ڒْْغَارْ،
١٦ مِينْزِي نشّْ تُّومُورغْ شكْ أَسّْ-أَ حِيمَا أَذْ ثخْسذْ سِيذِي، أَربِّي نّشْ، أَذْ ثُويُورذْ ذڭْ إِبْرِيذنْ نّسْ ؤُشَا أَذْ ثحْضِيذْ ڒُْومُورَاثْ نّسْ ذ ثْوصَّا نّسْ ذ لْفَارَايِيضْ نّسْ مَاحنْذْ أَذْ ثدَّارذْ ؤُ أَذْ ثتّْوَامَّارْنِيذْ، ؤُشَا سِيذِي، أَربِّي نّشْ، أَذْ أَشْ إِبَاركْ ذِي ثمُّورْثْ نِّي غَارْ غَا ثَاذْفذْ حِيمَا أَذْ ت ثطّْفذْ ذ ڒْْوَارْثْ.
١٧ مَاشَا مَاڒَا ؤُڒْ نّشْ إِتَّاڭّْوجْ ؤُ وَارْ ثتّسْڒِيذْ ؤُشَا أَذْ ثتّْوَاسُّوفّْغذْ زڭْ وبْرِيذْ، أَذْ ثْبنْذْقذْ زَّاثْ إِ إِربِّيثنْ نّغْنِي ؤُشَا أَذْ أَسنْ ثْعبْذذْ،
١٨ خنِّي نشّْ تّْبَارّْحغْ أَومْ أَسّْ-أَ بلِّي س ثِيذتّْ أَذْ ثمّْثمْ. وَارْ ثَارنّْيذْ شَا ؤُسَّانْ نّشْ خْ ثمُّورْثْ مَانِي غَا ثَاذْفذْ أَوَارْنِي ڒَْامِي ثژْوِيذْ لْ-ؤُرْذُونْ، حِيمَا أَذْ ت ثطّْفذْ ذ ڒْْوَارْثْ.
١٩ أَسّْ-أَ نشّْ ڒَْاغِيغْ خْ ؤُجنَّا ذ ثمُّورْثْ، مَاحنْذْ أَذْ إِڒِينْ ذ ڒشْهُوذْ خَاومْ: ڭِّيغْ زَّاثكْ ثُوذَارْثْ ذ ڒْْموْثْ، لْبَارَاكَا ذ نّعْڒثْ! إِخْضَارْ خنِّي ثُوذَارْثْ، حِيمَا أَذْ ثدَّارذْ، شكْ ذ زَّارِيعثْ نّشْ،
٢٠ مَاحنْذْ أَذْ ثخْسذْ سِيذِي، أَربِّي نّشْ، ؤُشَا أَذْ ثسْڒذْ إِ ثْمِيجَّا نّسْ، أَذْ أَسْ ثْڒصْقذْ، مِينْزِي نتَّا ذ ثُوذَارْثْ نّشْ ؤُڒَا ذ ثُوزّڭَارْثْ ن وُوسَّانْ نّشْ، حِيمَا ثْزمَّارذْ أَذْ ثْزذْغذْ خْ ثمُّورْثْ نِّي خْ إِجِّيدْجْ سِيذِي إِ ڒجْذُوذْ نّشْ أَذْ أَسنْ ت-إِ-د-إِوْشْ، إِ إِبْرَاهِيمْ ذ إِسْحَاقْ ذ يَاعْقُوبْ.“