١ إِڒَاغَا-د مُوسَا خْ مَارَّا إِسْرَائِيل، إِنَّا أَسنْ:

”كنِّيوْ أَقَا ثژْرِيمْ مَارَّا مِينْ إِڭَّا سِيذِي ذِي ثمُّورْثْ ن مِيصْرَا زَّاثْ إِ ثِيطَّاوِينْ نْومْ ذِي فِيرْعُونْ ذ مَارَّا إِمْسخَّارنْ نّسْ ذ مَارَّا ثَامُّورْثْ نّسْ، ◘ ٢ ثِيقدْجُوبَا ثِيمقّْرَانِينْ، ثِينِّي ثژْرِيمْ س ثِيطَّاوِينْ نْومْ، ڒعْڒَامَاثْ ذ لْمُوعْجِيزَاثْ نِّي إِمْغَارنْ. ◘ ٣ أَڒْ أَسّْ-أَ سِيذِي وَارْ ذ أَومْ إِوْشِي ؤُڒْ حِيمَا أَذْ ثْفهْممْ ؤُڒَا ذ ثِيطَّاوِينْ حِيمَا أَذْ ثْژَارمْ ؤُڒَا ذ إِمزُّوغنْ حِيمَا أَذْ ثسْڒمْ. ٤ سّْنذْهغْ كنِّيوْ أَربْعِينْ ن إِسڭّْوُوسَا ذِي ڒخْڒَا. أَرُّوضْ نْومْ وَارْ إِذْوِيڒْ ذ ڒْْبَاڒِي ؤُ ثِيسِيڒَا نْومْ وَارْ دُّويْسَارنْثْ خْ إِضَارنْ نْومْ. ٥ وَارْ ثشِّيمْ أَغْرُومْ، وَارْ ثسْوِيمْ بِينُو ؤُڒَا ذ شّْرَابْ، حِيمَا أَذْ ثسّْنمْ بلِّي نشّْ ذ سِيذِي، أَربِّي نْومْ.“

٦ ”ڒَْامِي ثْرحّْڭمْ غَارْ ومْشَانْ-أَ، إِفّغْ-د سِيحُونْ، أَجدْجِيذْ ن حَاشْبُونْ، أَكْ-ذ عُوجْ، أَجدْجِيذْ ن بَاشَانْ، حِيمَا أَذْ كِيذْنغْ إِمْسَاڭَارْ إِ ؤُمنْغِي ؤُشَا نغْڒبْ إِ-ثنْ ◘ ٧ ؤُشَا نطّفْ ثَامُّورْثْ نْسنْ ؤُشَا نوْشْ إِ-ت ذ ڒْْوَارْثْ إِ إِرُوبِينِييّنْ ذ إِجَاذِييّنْ ؤُ إِ وزْينْ ن ثقْبِيتْشْ ن مَانَاسَّا. ◘

٨ حْضَامْ أَوَاڒنْ ن ڒْْعَاهْذْ-أَ، ثڭّمْ ثنْ، حِيمَا أَذْ ثَاوْضمْ س ڒعْقڒْ غَارْ مَارَّا مِينْ غَا ثڭّمْ. ٩ أَسّْ-أَ مَارَّا كنِّيوْ ثْبدّمْ زَّاثْ إِ وُوذمْ ن سِيذِي، أَربِّي نْومْ - إِزدْجِيفنْ ن ثْقبَّاڒْ نْومْ ذ إِمْغَارنْ نْومْ ذ إِمحْضَاينْ نْومْ، مَارَّا إِرْيَازنْ ن إِسْرَائِيل، ١٠ إِمژْيَاننْ نْومْ، ذ ثمْغَارِينْ نْومْ، إِبَارَّانِييّنْ نِّي إِزدّْغنْ ذِي ڒْوسْثْ ن ڒْْمَارْڭحْ ن ڒْْعسْكَارْ نْومْ، زڭْ ونِّي إِتّْقسّنْ أَكشُّوضْ أَڒْ ونِّي د-إِتَّايْمنْ أَمَانْ - ١١ حِيمَا أَذْ يَاذفْ كُوڒْ إِجّْ زَّايْومْ غَارْ ڒْْعَاهْذْ ن سِيذِي، أَربِّي نّشْ نِّي إِ غَا إِقّنْ سِيذِي، أَربِّي نّشْ أَسّْ-أَ أَكِيذكْ، ؤُ غَارْ نّعْڒثْ إِ إِدْجَانْ ذ ؤُغزْذِيسْ نّسْ نّغْنِي، ١٢ حِيمَا أَذْ أَشْ يڭّْ أَسّْ-أَ أَذْ ثكَّارذْ أَمْ ڒْْڭنْسْ نّسْ ؤُشَا نتَّا أَذْ أَشْ يِيڒِي ذ أَربِّي، أَمْ ذ أَشْ إِنَّا ؤُ أَمْ إِجِّيدْجْ إِ ڒجْذُوذْ نّشْ إِبْرَاهِيمْ ذ إِسْحَاقْ ذ يَاعْقُوبْ. ◘ ١٣ وَارْ إِدْجِي أَكِيذْومْ وَاهَا إِ غَا ڭّغْ ڒْْعَاهْذْ-أَ ذ نّعْڒثْ-أَ إِ إِدْجَانْ ذ ؤُغزْذِيسْ نّسْ نّغْنِي، ١٤ أَكْ-ذ يِينِّي ذَا غَارْنغْ إِحْضَارنْ أَسّْ-أَ زَّاثْ إِ وُوذمْ ن سِيذِي، أَربِّي نّغْ، مَاشَا عَاوذْ أَكْ-ذ يِينِّي وَارْ ذَا غَارْنغْ إِدْجِينْ أَسّْ-أَ. ١٥ مِينْزِي كنِّيوْ ثسّْنمْ مَامّشْ ثُوغَا نْزدّغْ ذِي ثمُّورْثْ ن مِيصْرَا، ؤُ مَامّشْ نژْوَا ذِي ڒْْوسْطْ ن ثمُّورَا ن ڒڭْنُوسْ نِّي خْ د-ثكّمْ ؤُڒَا ذ كنِّيوْ، ١٦ ؤُشَا ثژْرِيمْ نّْعَاوَاثْ نْسنْ ن لْ-أَصْنَامْ ذ إِميْضَا ن لْ-أَصْنَامْ نْسنْ نِّي غَارْسنْ ن وژْرُو ذ ؤُكشُّوضْ ذ نُّوقَارْثْ ذ وُورغْ.“

١٧ ”وَارْ إِتِّيڒِي جَارْ أَومْ أَرْيَازْ نِيغْ ثَامْغَارْثْ نِيغْ ڒَْادْجْ نِيغْ ثَاقْبِيتْشْ أَذْ إِسِّيڭّْوجْ أَسّْ-أَ ؤُڒْ نّسْ خْ سِيذِي، أَربِّي نْومْ، حِيمَا أَذْ إِسخَّارْ إِ إِربِّيثنْ ن ڒڭْنُوسْ نِّي ؤُ وَارْ إِتِّيڒِي جَارْ أَومْ أَژْوَارْ نِّي إِ غَا إِتَّارْونْ أَرّْهَاجْ نِيغْ شِّيحْ، ◘ ١٨ ؤُشَا أَذْ إِمْسَارْ، ؤُمِي غَا إِسڒْ أَوَاڒنْ ن نّعْڒثْ-أَ، أَقَا نتَّا أَذْ إِسڭّمْ إِخفْ نّسْ ذڭْ وُوڒْ نّسْ، أَذْ يِينِي: ’أَذْ غَارِي يِيڒِي ڒهْنَا، وَاخَّا ڭُّورغْ ذِي ڒقْسَاحثْ ن وُوڒْ إِنُو، أَڒْ غَا إِهلّكْ مِينْ إِسُّونْ أَكْ-ذ مِينْ إِفُّوذنْ.‘ ١٩ سِيذِي وَارْ ذ أَسْ إِسمّحْ، مَاشَا أَغْضَابْ ن سِيذِي ذ ثُوسْمِي نّسْ إِقدّْسنْ أَذْ دُّوخّْننْ ذڭْ ورْيَازْ نِّي، ؤُ مَارَّا نّعْڒثْ نِّي يُورِينْ ذڭْ وذْلِيسْ-أَ إِتّْوَانّْضنْ أَذْ خَاسْ ثِيڒِي ؤُشَا سِيذِي أَذْ إِمْحَا إِسمْ نّسْ زِي سَاذُو ؤُجنَّا. ٢٠ سِيذِي أَذْ ث إِحُوزْ خْ مَارَّا ثِيقبَّاڒْ ن إِسْرَائِيل إِ ڒْْغَارْ، عْلَاحْسَابْ مَارَّا نّْعَاڒِي ن ڒْْعَاهْذْ نِّي يُورِينْ ذڭْ وذْلِيسْ-أَ إِتّْوَانْضنْ ن شَّارِيعَا-يَا. ٢١ خنِّي جِّيڒْ إِ د غَا يَاسنْ، إِحنْجِيرنْ نْومْ، إِنِّي غَا إِڭعّْذنْ أَوَارْنِي أَومْ، ؤُڒَا ذ ؤُبَارَّانِي نِّي إِ د غَا يَاسنْ زڭْ إِشْثْ ن ثمُّورْثْ ثِيڭّْوجْ، مَارَّا نِيثْنِي أَذْ إِنِينْ أَمُّو خْمِي غَا ژَترنْ جّْرَايحْ ن ثمُّورْثْ-أَ ذ ڒهْڒَاشَاثْ إِ زِي إِسّهْڒشْ سِيذِي ثَامُّورْثْ: ٢٢ ’ڒشْبَارِييّثْ ذ ثْمدْجَاحْثْ، أَقَا ثشْمضْ مَارَّا ثَامُّورْثْ، وَارْ ثتّْوَاژُّو نِيغْ ثسّْغمِّي عَاذْ ؤُ وَارْ إِسّْڭعِّيذْ أَفْسُو أَزِيزَا، أَمْ مَامّشْ إِمْسَارْ ذڭْ ؤُنقْڒبْ ن سَاذُومْ ذ عَامُورَّا ذ أَذْمَا ذ صابُويِيمْ نِّي إِسّْنقْڒبْ سِيذِي ذڭْ وغْضَابْ نّسْ ذ وسْعَارْ نّسْ!‘، ٢٣ ؤُشَا عَاوذْ مَارَّا ڒڭْنُوسْ أَذْ إِنِينْ: ’مَايمِّي إِڭَّا سِيذِي مَانْ أَيَا إِ ثمُّورْثْ-أَ؟ مَانَا ڒْْحَاذُوقْ ن وغْضَابْ-أَ إِمْغَارنْ؟‘ ◘ ٢٤ خنِّي أَذْ د-أَرّنْ: ’مِينْزِي نِيثْنِي جِّينْ ڒْْعَاهْذْ ن سِيذِي، أَربِّي ن ڒجْذُوذْ نْسنْ، ڒْْعَاهْذْ نِّي إِقّنْ نتَّا أَكِيذْسنْ ؤُمِي ثنْ د-إِسُّوفّغْ زِي ثمُّورْثْ ن مِيصْرَا. ٢٥ ؤُيُورنْعبْذنْ إِ إِربِّيثنْ نّغْنِي ؤُشَا بنْذْقنْ أَسنْ، إِ إِربِّيثنْ نِّي وَارْ سِّيننْ نِيثْنِي، وَارْ ذ أَسنْ ثنْثْ-إِ-د-إِوْشِي نتَّا. ٢٦ أَغْضَابْ ن سِيذِي يَارْغَا خْ ثمُّورْثْ-أَ مَاحنْذْ أَذْ غَارسْ إِنْذهْ مَارَّا نّعْڒثْ نِّي يُورِينْ ذڭْ وذْلِيسْ-أَ إِتّْوَانّْضنْ. ٢٧ سِيذِي إِقْڒعْ إِ-ثنْ زِي ثمُّورْثْ ذڭْ وغْضَابْ ذ وسْعَارْ ذ ؤُذُوقّزْ ن وغْضَابْ إِمْغَارْ ؤُشَا إِنْضَارْ إِ-ثنْ غَارْ ثمُّورْثْ نّغْنِي، أَمْ ثدْجَا أَسّْ-أَ.‘ ٢٨ ثِيمسْڒَايِينْ إِنُّوفَارنْ أَقَا ثنْثْ إِ سِيذِي، أَربِّي نّغْ، مَاشَا ثِيمسْڒَايِينْ تّْوَاسَّارڭْبنْثْ أَقَا ثنْثْ إِ نشِّينْ ؤُ إِ إِحنْجِيرنْ نّغْ إِ ڒبْذَا، مَاحنْذْ أَذْ نڭّْ مَارَّا أَوَاڒنْ ن شَّارِيعَا-يَا.“