18
Ndo Jesús juako ndo kondee nchri kaꞌan tjanchia nchra ijie̱
1 Ndo Jesús juinchekuenꞌen ndo sen teyuu chrikao ndo ixi kain nchakon xronichjeꞌe sen ndo Dio ko tsonchrjenꞌa sen sincheꞌe sen meꞌe.
2 Méxin jaꞌin nichja ndo:
―Bakeꞌe naa xi juez, kuachóndeꞌa xa juasaya ndo Dio, ko chóndeꞌa xa juasaya ngajin chujni.
3 Ko tjajna meꞌe bakeꞌe kaxon naa nchri kaꞌan, nchri meꞌe nanaó bakji nchra ngajin xi juez ñaꞌi ixi tjanchia nchra tsoñeꞌe nchra ijie̱ ngajin naa xi bake̱to̱kaꞌo nchra.
4 Tsango kueya vez ikjui nchra kuitsjeꞌe nchra xi juez meꞌe ixi sinchéña xa ijie̱, ko jeꞌe xa juincheꞌa xa nchra kuenta, ko tjumeꞌe xraxaon xi juez meꞌe: “Maski janꞌan chondaꞌi juasaya ndo Dio ko chondaꞌi juasaya chujni,
5 ixi nchri kaꞌan jiꞌi nanaó ti̱i̱ nchra tjanchia nchra ijie̱ ko tsango tajondaxin nchra ixra̱, janꞌan cháña sintaña ijie̱ ngajin nchra ixi jaña ítsiꞌa nchra ícha.”
6 Ko ndachro ndo Jesús:
―Jaña ndachro xi juez ñaꞌi.
7 Méxin, ¿á jeꞌa ndo Dio ícha tsingijna ndo kain sen kuincheꞌe ndo ti tinóatée sen ngajin ndo tiie, nchakon? ¿Á tsonchrjenꞌen ndo tsjateꞌe ndo?
8 Janꞌan ndachrja̱n ixi jeꞌe ndo tuinxin tsingijna ndo sen. Ko nchakon xrokjanna janꞌan, Chjenꞌen ndo Dio, xjan jongíꞌe xranchi chujni, ¿á xratsitja ngisen ngataꞌa nunte ntiꞌi xrochuntia ngajin janꞌan?
Ndo Jesús beki ndo naa chijni kondee xi fariseo ko xi tjáka tomi
9 Ko tjumeꞌe ndo Jesús beki ndo inaa chijni ngajin kaxin ni xraxaon ixi jeꞌe na̱ tsango jian na̱, ko batjaunꞌa na̱ ni kaxin. Ko ndachro ndo:
10 ―Yuu xi ikjui xa niꞌngo kuinichjeꞌe xa ndo Dio. Naa xi fariseo, ko naa xi tjáka tomie tjajna Roma.
11 Ko xi fariseo meꞌe siin xa, jinichjeꞌe xa ndo Dio jaꞌin: “Ndotána Dio, juasianta ixi janꞌan chondaꞌi ijie̱ xranchi xicheꞌe, xiñaꞌi, ko xi ncheyeꞌe janchriꞌe ko xranchi xi tjáka tomi jiꞌi.
12 Janꞌan ntakatsaꞌa aséenna yuu nchakon ngujngu semana, ko tantsjendáa tomi ti tjacha ngujngu semana tikinixinꞌen Ndo Dio.”
13 Ko xi tjáka tomi siin xa nchion ikjín ko jiséya xa nunte, tjenduaꞌi ikon xa noi, ko tandeꞌe xa ntakuin xa ko ndachro xa: “¡Ndotána Dio, tikonóananinta ixi chonda ijie̱!”
14 *’Ko janꞌan ndachrja̱n ixi xi tjáka tomi, ícha jian ikjan xa ndoꞌa xa ixi ndo Dio juincheméꞌe ndo kain jíee xa, ko xi fariseo naꞌi. Méxin ngisen ícha tojié, ícha tjinteꞌa na̱ ngajin ndo Dio. Ko ngisen tojiéꞌa, Ndo Dio ícha xrotjueꞌe ndo sen.
Ndo Jesús juinchenchaon ndo ichjan
(Mt. 19:13-15; Mr. 10:13-16)
15 Kaxon itsjé na̱ bikao na̱ chjenꞌen na̱ ti jii ndo Jesús ixi jeꞌe ndo tsakeꞌe ndo itja ndo ngataꞌa jaa xjan. Ko sen teyuu chrikao ndo, kuaxi sen kuyakutee sen ni bikao chjenꞌen.
16 Ko ndo Jesús kuiyeꞌe ndo sen ko ndachro ndo:
―Tintuꞌenta ichjan tsi̱i̱ xjan ngajin, ko tingakuenꞌanta xjan. Ixi ngisen tayéꞌe ti tetuanꞌan ndo Dio, sen meꞌe, ikjan sen xranchi naa ichjan.
17 Nduaxin xrontatjunta ngisen xrokjanꞌi xranchi naa chjan, juaꞌi tsayéꞌe sen ti tetuanꞌan ndo Dio.
Naa xi tsango tetuanꞌan juao xa Ndo Jesús
(Mt. 19:16-30; Mr. 10:17-31)
18 Naa xi tetuanꞌan ningue ni judío juanchangiꞌe xa ndo Jesús ko ndachro xa:
―Maestro, jian jaꞌanta, ndachronta, ¿ingeꞌe sintaꞌa ixi tsjacha tsarichón kain nchakon?
19 Ko tjumeꞌe ndo Jesús ndachro ndo:
―¿Sonda ndachijiana ixi jianna? Xroꞌan ngisen jian, jeꞌo Ndo Dio jian ndo.
20 Ó noꞌa chijnie ndo Dio: “Xrochondaꞌia inaa nchri, tóñaiꞌa chujni, temaꞌia, jeꞌa xruenxon tjankataꞌa ijie̱ inaa chujni, ko chóndeꞌe juasaya ndotáa ko janáa.”
21 Ko jeꞌe xa ndachro xa:
―Kain ña̱ ó juintaꞌa, xranchiona.
22 Ko kuinꞌen ndo Jesús ngeꞌe ichro xa, ko jeꞌe ndo juatingíexin ndo:
―Xratitjáña naa ngeꞌe sincheꞌe. Nchekjia kain ngeꞌe chonda ko tonchjeyeꞌé ni nóa tomi meꞌe, ko xrochónda ngeꞌe ícha tjintee ngajní. Ko tjumeꞌe tsjiꞌia ruaꞌna̱na.
23 Ko xi meꞌe kuinꞌen xa ngeꞌe ichro ndo ko tsango kuechíín xa ixi itsjé ngeꞌe tjintee chónda xa.
24 Ko ti bikon ndo Jesús ixi tsango kuechíín xa, ndachro ndo:
―¡Tangi tixinꞌin naa ngisen chónda itsjé tomi ti tetuanꞌan Ndo Dio!
25 Ícha tangiꞌa tixinꞌin naa kucamello ikon naa ntachika ixi naa ngisen chónda itsjé tomi tixinꞌin ti tetuanꞌan ndo Dio.
26 Ko ni kuinꞌen jiꞌi ndachro na̱:
―¿Ngisen chao tixinꞌin ti tetuanꞌan ndo Dio tjumeꞌe?
27 Ko juatingíexin ndo Jesús:
―Ngeꞌe juaꞌi sincheꞌe chujni, Ndo Dio chao sincheꞌe ndo.
28 Ndo Pedro ndache ndo ndo Jesús:
―Nchána, janꞌanna kuintuꞌana kain ti kuachondana ko ruaꞌananta.
29 Ko ndo Jesús juatingíexin Ndo:
―Janꞌan nduaxin ntatjunta ixi ngisen kuintuꞌe ndoꞌa, ndotée, ko janée, xjan kichuu, o̱ janchriꞌe, chjenꞌen ixi kondeexin chijnie Ndo Dio ko ngeꞌe tetuanꞌan ndo,
30 sen meꞌe ícha itsjé ngeꞌe tsayéꞌe sen jai ti jichón sen ngataꞌa nunte ntiꞌi, ko kaxon tsayéꞌe sen nchakon tsi̱i̱ ti tsechónni kain nchakon.
Ndo Jesús íjngo ndachro ndo tsenꞌen ndo
(Mt. 20:17-19; Mr. 10:32-34)
31 Ndo Jesús kuiyeꞌe ndo sen teyuu chrikao ndo ko ndachro ndo:
―Jai satsjina tjajna Jerusalén. Ko ntiꞌa tsoenxin kain ti tsikjin sen profeta ó saꞌó xranchi sinchekaona, chjenꞌen ndo Dio, xjan jongíꞌe xranchi chujni.
32 Ko ni meꞌe tsajon na̱ xjan ngajin ni jeꞌa tjajna judío ko ni meꞌe tsjanoana xjan, ko chinga xrondache na̱ xjan, ko tsikitéena na̱ xjan ndatée na̱.
33 Tsaxi na̱ xjan nta̱a̱ ko ito̱n ko naatsóñaxón na̱ xjan. Ko nchakon nínxin xroxechón xjan.
34 Ko sen teyuu chrikao ndo Jesús kuienxinꞌa sen ti nichja ndo, ixi juaꞌi xrokuienxin sen.
Ndo Jesús juinchexruenꞌen ndo tjajna Jericó naa xi juaꞌi tikon
(Mt. 20:29-34; Mr. 10:46-52)
35 Ko nchakon ndo Jesús ko sen teyuu chrikao ndo kuiji sen tjenka tjajna Jericó, ko ngandeꞌe chaꞌo bakeꞌe naa xi juaꞌi tikon ko jitjanchiakaꞌa xa.
36 Ko jeꞌe ti xi tikonꞌa kuinꞌen xa ixi jitatsinga itsjé na̱, méxin juanchangi xa ngeꞌe jitonꞌen.
37 Ko ndache na̱ xa ixi ndo Jesús tjajna Nazaret jitatsinga ndo ntiꞌa.
38 Ko tjumeꞌe jeꞌe xa séen kuyako xa:
―¡Jesús, kuachrjenixinnta ndo David, tikonóananinta!
39 Ko ni stetaon ntiꞌa koñaoꞌe na̱ xa ko ndachro na̱ ixi xrotenko xa ko jeꞌe xa ícha séen kuyako xa:
―¡Jaꞌanta kuachrjenixinnta ndo David, tikonóananinta!
40 Ko tjumeꞌe ndo Jesús chónꞌen ndo ko kuetuanꞌan ndo ixi tsikaꞌo na̱ xi tikonꞌa. Ko bikaꞌo na̱ xa ti jii ndo, ko tjumeꞌe jeꞌe ndo Jesús juanchangiꞌe ndo xa:
41 ―¿Ngeꞌe tjauan sintaꞌa ixi jaꞌa?
Ko xi tikonꞌa juatingíexin xa:
―Nchána, janꞌan tjaꞌon tsikon.
42 Ko ndo Jesús ndachro ndo:
―¡Chao tsikuan!, ixi chuntia meꞌe koxruanꞌan.
43 Hora meꞌe xi juaꞌi bakikon chao bikon xa, ko ruéꞌe xa ndo Jesús, ko jitajon xa juasaya ngajin ndo Dio. Ko kain ni bikon ngeꞌe juincheꞌe Ndo Jesús kaxon kuajon na̱ juasaya ngajin ndo Dio.