4
Ndo Jesús juao ndo naa nchri samaritana
1 Tjumeꞌe ni fariseo konoꞌe na̱ ixi ícha itsjé chujni ruéꞌe ndo Jesús ko ícha itsjé chujni bikitée ndo ixi ndo Juan.
2 Ko jeꞌa ndo Jesús tikitée ndo na̱. Sen chrikao ndo, sen meꞌe bikitée chujni.
3 Hora konoꞌe ndo Jesús ixi jaña tsikinꞌen ni fariseo, kuachrjexin ndo nunte Judea ko íjngo ikjan ndo nunte Galilea.
4 Ko hora kuachrjexin ndo ntiꞌa xrokonda tsatsinga ndo nunte Samaria.
5 Ko kuiji ndo naa tjajna Sicar nunte Samaria, tjenka nunte tsikajon ndo Jacob kuayéꞌe chjenꞌen ndo, ndo José.
6 Ntiꞌa jii naa pozo tjiá inda kuachónda ndo Jacob. Ko ndo Jesús kuiji ndo ntiꞌa ko tsango konchrje ndo ixi tsango ikjín tsikjixin ndo, méxin bakeꞌe ndo nunte tjenka pozo. Hora meꞌe xranchi ngusine nchakon.
7 Ko tuinxin kui̱i̱ naa nchri tjajna Samaria, kui̱i̱ nchra ti pozo meꞌe ixi tsantsje nchra inda. Ko ndo Jesús ndache ndo nchra:
―Chjána̱na nchíín inda tsiꞌi.
8 Ko sen teyuu chrikao ndo satsikintekji sen tjajna tjenka ntiꞌa bikeꞌna sen ngeꞌe sinekao sen ndo.
9 Ko nchri samaritana juatingíexin nchra:
―¿Sonda jaꞌa naa chujni judío tjanchiana̱na inda ixi janꞌan naa nchri samaritanana?
(Jaña ichro nchra ixi ni judío tjentoꞌa na̱ ni samaritano.)
10 Ko juatingíexin ndo Jesús:
―Siá xrokonoꞌa ngeꞌe tajon ndo Dio ko xrochuxian ngisen jitjanchiaꞌa inda, jaꞌa xrojuanchana̱na inda ko janꞌan xrotjáꞌa inda jichón.
11 Ko jeꞌe nchra juateꞌe nchra:
―Jaꞌa chondaiꞌa ngeꞌe tsantsjexian inda ko pozo tsango yasoꞌe pozo, ¿no xrochjánaxianna inda jichón?
12 Ndo Jacob, ndo kuachrjenixinna, ndo meꞌe kuituna̱na ndo pozo jiꞌi, ko jeꞌe ndo bakiꞌi ndo inda ko chjenꞌen ndo ko kain kuée ndo kaxon. ¿Á jaꞌa, á ícha tjintee ixi jeꞌe ndo?
13 Ko juatingíexin ndo Jesús:
―Kain ni tiꞌi inda jiꞌi, íjngo tsenꞌen na̱ inda.
14 Ko sen tsiꞌi inda tajon janꞌan, naiꞌa tsintekenꞌen sen inda. Ixi inda tajon janꞌan tsoña̱ xranchi inda jitachrjexin ngaya aséen sen ko jiꞌi tajon juachaxin tsechón sen kain nchakon.
15 Ko ndachro nchra:
―Chjána̱na inda meꞌe, ixi tsenꞌana inda íjngo ko íxrokjanꞌina tsantsje inda ntiꞌi.
16 Ko ndachro ndo Jesús:
―Itjia tiyeꞌé ndoxiꞌa ko tjumeꞌe tsjiꞌia ntiꞌi íjngo.
17 Ko jeꞌe nchra ndachro nchra:
―Chondaꞌi xixiꞌna.
Méxin, ndachro ndo Jesús:
―Nduaxin ndachrua ixi chondaꞌia xixiꞌa.
18 Ixi kuachonda naꞌó xixiꞌa, ko xi chonda jai jeꞌa xixiꞌa. Nduaxin ndachrua ixi chondaꞌia xixiꞌa.
19 Ko kuinꞌen nchra jiꞌi ko ndachro nchra:
―Nóna ixi jaꞌa naa ngisen chronga chijnie ndo Dio.
20 Sen kuachrjenixinna, kuaxraxaonxin sen ndo Dio ijna̱ ntiꞌi. Ko jaꞌanta, ni judíonta ndachronta ixi xrokonda xroxraxaonxinna ndo Dio niꞌngo ijié jii tjajna Jerusalén.
21 Ko ndo Jesús ndache ndo nchra:
―Titikáoanna ixi tsi̱i̱ nchakon xrokondaꞌi xroxraxaonxinnta Ndotáina Dio ijna̱ ntiꞌi ko xroxraxaonxinꞌanta ndo tjajna Jerusalén.
22 Jaꞌanta chujni samaritanonta noaꞌinta ngisen xraxaonnta. Ko janꞌan naa chujni judío chuxinna ngisen xraxaꞌonna. Méxin, ndo tantsje ijie̱ chónda chujni, ndo meꞌe tsikachrjexin ndo ni judío.
23 Ko jitiji nchakon ko jai nchakon meꞌe, ixi sen nduaxin tjaun sen tsajon sen juasaya ngajin Ndotáina Dio, xrokonda ixi nchijíi aséen sen xroxraxaonxin sen Ndo. Ko Ndo Dio tsakeꞌe ndo juaxruxin ixi jaña xroxraxaon sen ndo.
24 Ndo Dio espíritu ndo, ko sen xraxaon ndo xrokonda xroxraxaonxin sen ndo ixi aséen sen.
25 Ko ndachro nchra:
―Janꞌan nóna ixi tsi̱i̱ ndo Mesías, ndo Cristo. Ko nchakon tsi̱i̱ ndo sinchekuanna̱na ndo kain ngeꞌe.
26 Ko juatingíexin ndo Jesús:
―Ndo meꞌe najanꞌan, ndo ritjáoa jai.
27 Xrastetjao sen jaꞌin, sen teyuu chrikao ndo kuiji sen, ko xronka sen ixi bikon sen jinichjeꞌe ndo naa nchri, ko xroꞌan ngisen juanchangiꞌe ndo ngeꞌe tjaun nchra, o̱ sonda jinichjeꞌe ndo nchra.
28 Tjumeꞌe jeꞌe nchra bakeꞌe nchra nchixran nunte ko sakjui nchra tjajna bekiꞌe nchra kain chujni:
29 ―Ichjina, tsikonnta naa ndo chronga kain ngeꞌe juintaꞌa. ¿Á jeꞌa ndo Cristo ndo meꞌe?
30 Tjumeꞌe chujni kuachrjexin na̱ tjajna kuitsjeꞌe na̱ ndo Jesús.
31 Xratijiꞌa na̱, sen teyuu chrikao ndo tinóatée sen ngajin ndo, ndachro sen:
―Maestro, inte ngeꞌe.
32 Ko ndachro ndo:
―Janꞌan chónda ngeꞌe iné ko jaꞌanta chuxinꞌanta meꞌe.
33 Ko sen teyuu chrikao ndo kuaxi sen juanchangiꞌe kichuu sen:
―¿Á xrojan chujni bikenꞌen ndo ngeꞌe juine ndo?
34 Ko ndachro ndo Jesús:
―Ti iné janꞌan meꞌe ixra̱ sintaꞌa ti tsiketuanꞌan ngisen xruanꞌanna, ko xrokonda sintajexin ixra̱.
35 Jaꞌanta ndachronta: “Xratitjáña noó nchanitjao tsandáanta noatrigo.” Ko janꞌan ntatjunta: Tsjeꞌenta no tsikinga ixi ó kuicha noa ko ó chao tsandáani.
36 Sen tandáa, xengeꞌe sen ꞌna̱. Ko ngeꞌe tandáa sen meꞌe chujni, ko chujni meꞌe tsechón kain nchakon. Ko sen tenga ko sen tandáa xreꞌó juaxruxin takeꞌe sen.
37 Ko nduaxin ngeꞌe ndachro sen: “Naa sen tenga, ko inaa sen tsandáa.”
38 Méxin, janꞌan xruanꞌannta ixi tsandáanta naa nunte tsikengaꞌinta. Inaa sen tsijincheꞌe ixra̱ ko jaꞌanta tsjachanta tsasiinnta ngeꞌe benga sen.
39 Ko itsjé ni tjajna samaritano ni ikjui nchra kuindache nchra, kuitikaon na̱ ndo Jesús ixi chronga nchra: “Ndo jiꞌi chronga ndo kain ngeꞌe juintaꞌa saꞌó.”
40 Ko hora kuinꞌen na̱ ngeꞌe juincheꞌe ndo, kui̱i̱ na̱ ngajin ndo ko kuinóatée na̱ ngajin ndo ixi tsituꞌe ndo ntiꞌa ngajin na̱. Ko ntiꞌa kuituꞌe ndo yuu nchakon.
41 Ko ícha kueya na̱ kuitikaon na̱ ndo ixi kuinꞌen na̱ ngeꞌe nichja ndo.
42 Ko ndache na̱ nchra:
―Jai titikaꞌonna, ko ixi jeꞌa jeꞌo ngeꞌe ndachijiana. Kaxon ixi jai janꞌanna kuitikaonna ixi kuinꞌanna ngeꞌe nichja ndo ko nónana ixi jeꞌe ndo nduaxin ndo Cristo ndo, ndo sincheméꞌe jíee kain chujni.
Ndo Jesús ko chjenꞌen xi ncheꞌe ixra̱ gobierno
43 Yuu nchakon tjumeꞌe, ndo Jesús kuachrjexin ndo nunte Samaria ko sakjui ndo no nunte Galilea.
44 *Xranchi tsindachro ndo Jesús, ninaa ndo chronga chijnie ndo Dio, ni tjajnée ndo xrochóndeꞌe na̱ ndo juasaya.
45 *Nchakon kuiji ndo nunte Galilea, ni ntiꞌa kuayéꞌe na̱ ndo ko kuajon na̱ juasaya ngajin ndo ixi kaxon tsikjin na̱ kia Pascua tjajna Jerusalén, ko bikon na̱ ngeꞌe juincheꞌe ndo kia ntiꞌa.
46 *Tjumeꞌe ikjan ndo Jesús tjajna Caná nunte Galilea, ti no tsijinchekjan ndo inda ixran vino. Ntiꞌa bakeꞌe naa xi tituanꞌan xrée gobierno. Ko kuachónda xi naa chjan niꞌe tjajna Capernaum.
47 Ko hora tsikinꞌen xa tsiki̱xi̱n ndo Jesús nunte Judea ko kuiji ndo nunte Galilea, ruéꞌe xa ndo ko kuinóatée xa ngajin ndo ixi itsji ndo ndoꞌa xa ko sinchexrjuenꞌen ndo chjenꞌen xa, ixi ó jiteꞌen xjan.
48 Ko ndachro ndo Jesús:
―Jaꞌanta, titikaonꞌanta siá tsikonꞌanta naa ngeꞌe jian sintaꞌa.
49 Ko kuinóatée xi ncheꞌe xrée gobierno ko ndachro xa:
―Taka ichjina ixi chjanꞌna ó jiteꞌen xjan.
50 Ko juateꞌe ndo Jesús:
―Ikjan ndúya ixi chjanꞌan chao jii xjan jai.
Ko xi meꞌe kuitikaon xa ngeꞌe ti ndachro ndo Jesús, ko sakjui xa.
51 Ko ikjan xa ndoꞌa xa, ni ncheꞌe xrée xa kuachrje na̱ biketan na̱ xa ngatja chaꞌo, ko ndache na̱ xa:
―Chajanꞌan ó jian jii chán.
52 Ko juanchangiꞌe xa na̱ ngixeꞌe hora kuaxi koxruenꞌen chán. Ko chronga na̱:
―Jnajna xranchi hora naa kóndo kuachrjeꞌe chán súa.
53 Ko jaña konoꞌe ndotée chán ixi hora ña̱ tsindachro ndo Jesús ixi chjenꞌen xa ó jian jii chán. Ko jeꞌe xa ko kain ni ndoꞌa xa kuitikaon na̱ ndo Jesús.
54 Jiꞌi yuxin ngeꞌe jian juincheꞌe ndo Jesús nchakon kui̱xi̱n ndo nunte Judea, ikjan ndo nunte Galilea.