13
Ndo Jesús néma ndo tutée sen chrikao ndo
1 Titjáña naa nchakon tsi̱i̱ kia pascua ko ndo Jesús ó noꞌe ndo kuiji hora satsjixin ndo nunte xasintajni, ko satsji ndo ti Ndotée ndo. Kain nchakon tjueꞌe ndo sen chujnie ndo ste nunte xasintajni, ko jai ícha tjakoxin ndo ixi tjueꞌe ndo sen.
2 Ko ó kui̱i̱ hora sine sen tsokjín, ko Xixronꞌanxrée ó tsixraxinꞌin xa aséen xi Judas Iscariote, ndotée xa ndatinꞌin Simón, sinchekji xa ndo Jesús.
3 Ndo Jesús noꞌe ndo ixi tsiki̱xi̱nꞌin ndo ti jii ndo Dio ko ti no xrokjan ndo. Ko noꞌe ndo ixi Ndotée ndo kuajon ndo juachaxin tsetuenꞌen ndo kain ngeꞌe.
4 Tjumeꞌe bingatjen ndo ti no stene sen ko kuantsje ndo manta jitsáa ndo, ko kua ndo naa manta xemaxinni, ko bingatóxin ndo manta.
5 Ko bikia ndo inda ngaya naa tjatuꞌo, ko kuaxi ndo junéꞌma ndo tutée ngujngu sen chrikao ndo, ko juinchexemaxin ndo ixi manta jingatoxin ndo.
6 Ko hora kuiji ndo ti jii ndo Pedro, ndo Pedro ndachro ndo:
―Nchána, ¿á jaꞌanta sinémanta tutéena?
7 Ko juatingíexin ndo Jesús:
―Jai tienxinꞌa ngeꞌe rintaꞌa. Tjumeꞌe tsienxian sonda rintaꞌa jiꞌi.
8 Ko ndachro ndo Pedro:
―Naiꞌa sinémanta tutéena.
Ko ndachro ndo Jesús:
―Siá sinémaꞌi tutáa, ningeꞌo tsikinixinꞌa ngaji̱n.
9 Ko juateꞌe ndo Simón Pedro:
―Naꞌi, Nchána. Jeꞌa jeꞌo tutéena néꞌmanta. Kaxon néꞌmanta tjáana ko jáana.
10 Ko ndo Jesús ndachro ndo:
―Ngisen tsikengi xrokondaꞌi tsengi sen íjngo. Jeꞌo tutée sen tsijma ixi nchijíi sen tjúá sen. Ko jaꞌanta tjúánta, maski jeꞌa kainnta.
11 Ndachro ndo Jesús jeꞌa kainnta tjúánta, ixi noꞌe ndo ngisen xrojuinchekji ndo.
12 *Juexin junéꞌma ndo tutée kain sen, tjumeꞌe itsé ndo mantée ndo, manta jitsáa ndo, ko ikjan ndo bakeꞌe ndo nunte ti no stene sen ko ndachro ndo:
―¿Á tienxinnta ngeꞌe juintaꞌa?
13 Jaꞌanta tiyaꞌnantana ngisen tjakoꞌanta ko Ncháanta, ko ndako ndachronta ixi janꞌan ngisen meꞌe.
14 Siá janꞌan ngisen tjakoꞌanta ko Ncháanta janꞌan, ko junéꞌma tutáanta, kaxon jaña jaꞌanta xrojuinémeꞌe kichuunta tutáanta.
15 Ixi janꞌan juako xranchi juintaꞌa, kaxon jaꞌanta sincheꞌenta jaña.
16 *Naa ngeꞌe nduaxin ntatjunta ixi ni ncheꞌe ixra̱, jeꞌa ícha tjintee na̱ ixi ni xrée, ko ninaa ngisen tikao naa juajna, tjinteꞌa na̱ ícha ixi ni tsixruaꞌan juajna.
17 Siá tienxinnta ko siá sincheꞌenta jiꞌi, juaxruxin tsakeꞌenta.
18 ’Jeꞌa ixi kainnta ndachrja̱n jiꞌi. Janꞌan nóna ngisen kuinchaꞌa. Ko xrokonda tsonꞌen xranchi tsikjin sen saꞌó: “Ngisen nekiꞌan, ni meꞌe tsingaxiton na̱ ngaji̱n.”
19 Janꞌan ntatjunta ixi nchakon tsonꞌen jiꞌi, jaꞌanta tsitikaonnta ixi janꞌan ngisen ntatjunta ngisen najanꞌan.
20 *Naa ngeꞌe nduaxin ntatjunta, ixi ngisen tayéꞌe naa sen xruanꞌan janꞌan, kaxon janꞌan tayéꞌena sen, ko ngisen tayéꞌena janꞌan, tayéꞌe sen ngisen tsixruanꞌanna juiꞌi.
Ndo Jesús chronga ndo ixi xi Judas sinchekji xa ndo
(Mt. 26:20-25; Mr. 14:17-21; Lc. 22:21-23)
21 Ko juexin ndachro ndo Jesús jiꞌi, tsango koniꞌe aséen ndo ko ndako ichro ndo:
―Nduaxin ntatjunta ixi naa jaꞌanta sinchekjintana.
22 Ko sen teyuu chrikao ndo kuaxi tsjeꞌe kichuu sen ixi noeꞌa sen ngisen sincheꞌe ti ndachro ndo.
23 Ko naa ndo chrikao ndo Jesús, ndo meꞌe ndo Jesús tsango tjueꞌe ndo, jii ndo nunte tjenka ndo Jesús ti no stene sen.
24 Ko ndo Simón Pedro jinchetengi ndo ndo meꞌe ixi tjanchangíꞌe ndo ndo ngisen sincheꞌe ti ndachro ndo Jesús.
25 Tjumeꞌe jeꞌe ndo konchjiñeꞌe ndo ti jii ndo Jesús, ko juanchangi ndo:
―Ncháina, ¿ngisen sincheꞌe meꞌe?
26 Juateꞌe ndo Jesús:
―Ngisen xrotjáꞌa tuꞌo nutja tsikontjao, meꞌe jeꞌe xa.
Méxin, juinchetjao ndo tuꞌo nutja ko kuajon ndo ngajin xi Judas Iscariote, chjenꞌen ndo Simón.
27 Ko kuayéꞌe xi Judas nutja, ko tuinxin Xixronꞌanxrée kuixinꞌin xa aséen xi Judas. Ko ndo Jesús ndache ndo xa:
―Ngeꞌe sincheꞌe, jaiko xakonꞌan ncheꞌe meꞌe.
28 Ko ninaa sen stene ntiꞌa kuienxin sen sonda jaña ndachro ndo.
29 Kaxin sen xraxaon sen ixi xi Judas tsjeꞌe xa ti jitjinga tomi, méxin ndo Jesús kuetuenꞌen ndo xa ixi tsikeꞌna xa ngeꞌe ixi ó tsi̱i̱ kia, o̱ xrokuajon xa ngeꞌe ngajin ni nóa.
30 Juexin kuayéꞌe xi Judas nutja, tuinxin kuachrje xa ko ó tiie meꞌe.
Naa ngeꞌe natjúá kuetuanꞌan ndo Jesús
31 Ko ó juexin satsikji xi Judas, ndachro ndo Jesús:
―Jai tsonoxin juachaxien Chjenꞌen ndo Dio, xjan jongíꞌe xranchi chujni, ko tsjakoxin ndo juachaxin ijié chónda ndo Dio.
32 Siá Chjenꞌen ndo Dio, xjan jongíꞌe xranchi chujni, tsjakoxin ndo juachaxin neꞌe ndo Dio, ko meꞌe jaña ndo Dio tsjakoxin ndo juachaxin chónda Chjenꞌen ndo, ko tuinxin tsonꞌen meꞌe.
33 *Chjanꞌna, xranaanchion tsakeꞌe ngajinnta ntiꞌi. Tjéentana ko xranchi ntatjan ni judío, jaña ntatjunta kaxon: Ti no itsji janꞌan, juaꞌi itsjinta.
34 *Naa ngeꞌe natjúá tetuanꞌannta ixi xrotjueꞌenta kichuunta xranchi janꞌan tjuaꞌanta.
35 Jiꞌi tsjakoxin ngajin kain ni xasintajni ixi jaꞌanta chujninanta siá xrotjueꞌenta kichuunta.
Ndo Jesús ndachro ndo ngeꞌe sincheꞌe ndo Pedro
(Mt. 26:31-35; Mr. 14:27-31; Lc. 22:31-34)
36 Tjumeꞌe juanchangiꞌe ndo Simón Pedro ndo Jesús:
―Nchána, ¿no itsjinta?
Ko juateꞌe ndo Jesús:
―Ti no satsji, juaꞌi itsjia jai. Ko tjumeꞌe xroruana̱na ntiꞌa.
37 Ko ndachro ndo Pedro:
―¿Sonda juaꞌi xroruaꞌa jai? Janꞌan chao tsenxinna ixi jaꞌanta.
38 Ko ndo Jesús juateꞌe ndo:
―¿Á nduaxin tsenxian ixi janꞌan? Nduaxin ntatjua xraxrotsje̱ꞌa kuntaxichíká, níi xrondachrua chuxinꞌana.