4
1 Méxin, siá ndo Dio xrajitajon ndo juachaxin tsatsingana ti tsjokéꞌeni ti tetuanꞌan jeꞌe ndo, xrokonda jian xrotsjeꞌena xranchi tsojuna ixi ba xrojan jai̱na tsixinꞌana ti juinchekonchjian ndo Dio tsjokéꞌeni.
2 Kao jai̱na kuinꞌenna chijnie ndo, chijni jian xranchi kuinꞌen sen tachríꞌina, ko jeꞌe sen maski kuinꞌen sen chijni jian, xroꞌan kondeꞌe sen chijni ixi chúntiaꞌi sen.
3 Ko jai̱na ti kuitikaonna chijnie ndo, meꞌe tsixinꞌinna tsjokei̱na ntiꞌa. Ixi jaꞌin tsindachro ndo Dio:
Ixi juincheñaona sen,
méxin, ndachrja̱n tsi̱xi̱nꞌa sen tsjokéꞌe sen ti ritjén janꞌan.
Jaña ndachro ndo ixi maski ó noꞌe ndo ixi jaña xrojuincheꞌe sen ti nchakon xrangíxixión kóña kain ngeꞌe ko nunte xasintajni.
4 Jaꞌin nichja xroon chijnie ndo Dio ti jokeꞌe ndo nchakon ya̱to̱:
Juexin juincheꞌe ndo Dio kain xrée ndo,
tjumeꞌe jokeꞌe ndo ti nchakon ya̱to̱.
5 Ko íjngo ndachro xroon chijnie ndo Dio:
Tsajonꞌa juachaxin tixinꞌin sen tsjokéꞌe sen ti ritjén janꞌan.
6 Ko xratitjáña tsayéꞌe ikaxin chujni juachaxin tsatsinga sen tsjokéꞌe sen ntiꞌa. Ixi sen saꞌó kuinꞌen chijni jian, kuayéꞌa sen juachaxin kuatsinga sen ti tsjokéꞌeni ixi kuitikaonꞌa sen chijnie ndo.
7 Méxin, ndo Dio íjngo kuajon ndo inaa nchakon, meꞌe jai, ko chijnie ndo jaꞌin ndachro ti tsikjin ndo David ícha tjumeꞌe ti ó kuinꞌenna ícha seno:
Siá jai tsinꞌennta chijni tsinichja ndo Dio
nchechaꞌi asáanta.
8 Siá ndo Josué xrokuajon ndo ti xrojukeꞌe sen israelita, sen tjajnée ndo Dio, íxrondachroꞌa ndo Dio ixi xrokuajon ndo inaa nchakon xrochonda sen juachaxin tsitikaon sen.
9 Ko jai xra jii inaa juachaxin tixinꞌin sen titikaon ndo Dio tsjokéꞌe sen ti no jii jeꞌe ndo;
10 ixi sen tsayéꞌe juachaxin tixinꞌin sen tsjokéꞌe sen ti jii ndo Dio, sen meꞌe ó tsjokéꞌe sen ti ixra̱ kuancheꞌe sen, xranchi ndo Dio jokeꞌe ndo ti ixra̱ juincheꞌe ndo.
11 Méxin xrokonda jai̱na soji tsitikaonna ndo Dio ko jaña tsayéꞌena juachaxin tsixinꞌinna tsjokei̱na ti jii ndo, ko sincheꞌana xranchi juincheꞌe sen tachríꞌina, ti kuitikaonꞌa sen ndo.
12 Ixi chijnie ndo Dio, jichón chijni ko chónda chijni ijié juachaxin ko ícha yao chijni ixi chika espada yaoxin yuxin lado, ko titoꞌo chijni ícha ngaxinꞌin aséei̱na ko espíritui̱na. Ko jian nchexraxaonni chijni ko nduaxin noꞌe chijni kain ti ngeꞌe tjaun sincheꞌe aséei̱na.
13 Xroꞌan ngeꞌe ti juinchéña ndo Dio tsjacha tsemá ngajin ndo, ixi jeꞌe ndo chúxin ndo kain ngeꞌe, ko kain ngeꞌe ti ndakoꞌa ncheꞌe na̱ maski xroxrabaatja, jeꞌe ndo chao tikon ndo, ko ngajin ndo xrokonda xrondachrona kain ngeꞌe sinkana.
Ndo Jesús meꞌe ndotaana tsango tituanꞌan
14 Ndo Jesús, Chjenꞌen ndo Dio, meꞌe ndotánai̱na ícha tetuanꞌan; jeꞌe ndo kuixinꞌin ndo ngajní ti jii ndo Dio. Méxin, jai̱na xrokonda soji tsojuna ko tsintueꞌana ngeꞌe ti kuinꞌenna ko kuitikaonna.
15 Ko ndotánai̱na, ndo ícha tetuanꞌan, chao tsikonóaꞌina ndo nchakon Xixronꞌanxrée tjaun xa sincheyai̱na xa xranchi tjaun xa xrojuincheyeꞌe xa ndo Jesús ko jeꞌe ndo juacha ndo ko xroꞌan ijie̱ kuama ndo.
16 Méxin, chao tsonchjiñeꞌena ti tetuanꞌan ndo Dio ixi jeꞌe ndo tsango tjuai̱na ndo, ko tsikonóaꞌina ndo ko tsingijnana ndo nchakon xrokondai̱na xrojan ngeꞌe.