Da 53. Psalm.
Ungettlichi Mensha
Zumm foah-singah. En lanning fumm Dawfit.
1 Da grohs-feelich sawkt in seim hatz,
“Es hott kenn Gott.”
So leit sinn unrein, iahra verka sinn evil,
's is nimmand es goot dutt.
2 Gott gukt runnah fumm himmel
uf di mensha-kinnah,
fa sayna eb ennich ebbah fashtayt,
eb ennich ebbah Gott sucht.
3 Alli-ebbah is vekk gedrayt,
si sinn awl zammah unrein vadda;
's is nimmand es good dutt,
nett even aynah.
4 Doon selli es evil shaffa nett fashtay,
selli es mei leit uf fressa vi broht,
un roofa nett zu Gott?
5 Datt zayla si in grohsi furcht sei,
vo nix is zu feicha diveyya.
Gott zayld di gnocha funn di ungettlicha fashtroiya,
si zayla fashohmd sei,
veil Gott si vekk kshtohsa hott.
6 Oh vann yusht hilf aus Zion kumma dayt fa Israel!
Vann Gott moll sei leit frei macht,
no dutt da Jakob sich froiya un Israel zayld froh sei.