Da 29. Psalm.
Di Shtimm Fumm Hah Im Shtoahm
En Psalm fumm Dawfit.
1 Bringet zumm Hah, diah himlishi,
bringet zumm Hah hallichkeit un graft.
2 Bringet zumm Hah di hallichkeit es zu seim nohma heaht,
baydet da Hah oh, in sei heilich glayt.
3 Di shtimm fumm Hah drawkt ivvah di vassahra,
da Gott funn hallichkeit dimmeld,
da Hah dimmeld ivvah di grohsa vassahra.
4 Di shtimm fumm Hah is greftich,
di shtimm fumm Hah is hallich.
5 Di shtimm fumm Hah fabrecht di cedar-baym,
da Hah fabrecht in shtikkah di cedar-baym funn Lebanon.
6 Eah macht Lebanon rumm tshumba vi en hamli,
un Sirion vi en yungah vildah ox.
7 Di shtimm fumm Hah shikt feiyah-flamm naus.
8 Di shtimm fumm Hah shiddeld di vildahnis;
da Hah shiddeld di Vildahnis funn Kades.
9 Di shtimm fumm Hah shiddeld di aycha-baym,
un blohst di bleddah funn di busha.
In seim tempel greisht alli-ebbah, “Halichkeit zu Gott!”
10 Da Hah hokt ivvah di flott uf seim kaynich-shtool;
da Hah hokt es Kaynich fa'immah.
11 Da Hah gebt grefta zu sei leit;
da Hah saykend sei leit mitt fridda.