Da 17. Psalm.
En Gebayt Fa Di Unshuldicha
En gebayt fumm Dawfit.
1 Heich mich ab, oh Hah,
heich vann ich roof.
Dray dei oah zu meim gebayt,
es nett kumd funn uneahlichi leftz.
2 Loss mei gericht kumma funn diah;
dei awwa sayna vass recht is.
3 Du hosht mei hatz ausbroviaht;
du bisht zu miah kumma deich di nacht;
du hosht mich broviaht un hosht nix kfunna.
Ich habb ausgmacht es mei maul zayld nett sindicha.
4 So veit es di verka funn mensha oh gayn,
havvich kenn evil gedu mitt gvald,
bei's vatt funn dei leftz halda.
5 Hald mei fees uf dei pawda,
so es mei fees nett shlibba.
6 Ich habb groofa zu diah, oh Gott, fa du gebsht miah andvat,
dray dei oah zu miah un heich mei vadda oh.
7 Veis dei shtandhaftichi grohsi leevi,
du Heiland vo selli saylich machsht mitt dei rechtsi hand
es zu diah shpringa, vekk funn iahra feinda.
8 Hald mich es da abbel funn dei awk,
fashtekkel mich im shadda funn dei flikkel.
9 Hald mich funn di gottlohsa es mich nunnah dredda,
un funn mei maddahrei feinda es um mich rumm kumma.
10 Si henn iahra haddi hatza zu gmacht;
iahra meilah shvetza shtolsi vadda.
11 Si henn uns umringd vo-evvah es miah sinn;
si henn iahra awwa ksetzt fa uns uf da bodda shmeisa.
12 Si sinn vi en layb es fareisa vill,
vi en yungah layb am voahra im shadda.
13 Shtay uf, oh Hah, shtell dich fannich si un bring si nunnah,
dray mich lohs funn di gottlohsa mitt dei shvatt.
14 Mitt dei hand, oh Hah, hald mich funn sohwichi mennah;
funn veldlichi mennah es iahra dayl greeya in demm layva.
Du filsht iahra bauch mitt vass du ufkshtoaht hosht fa si;
un gebsht iahra kinnah aw genunk,
un losht samm ivvahrich fa iahra kinds-kinnah.
15 Avvah fa mich, ich in mei gerechtichkeit zayl dei ksicht sayna,
un zayl zufridda sei fa dei gleichnis sayna vann ich uf vekk.