Da 119. Psalm.
Es Ksetz Fumm Hah Is Heilich
Aleph
1 Ksaykend sinn selli es en unshuldich layva fiahra,
selli es lawfa im ksetz fumm Hah.
2 Ksaykend sinn selli es sei zeiknisa halda,
selli vo een sucha mitt iahra gans hatz,
3 selli es nix letzes doon,
un lawfa in sei vayya.
4 Du hosht dei adnunga nunnah glaykt,
un si sella fleisich kalda sei.
5 Oh es mei vayya yusht shtandhaftich veahra,
fa dei gebodda eahnshtlich halda!
6 No breicht ich mich nett shemma,
veil ich mei awwa uf dei gebodda hett.
7 Ich zayl dich danka mitt en ufrichtich hatz,
vann ich di adnunga funn dei gerechtichkeit lann.
8 Dei gebodda zayl ich halda,
oh du mich nee nett falossa.
Beth
9 Vi kann en yungah mann sei vayk sauvah halda?
Bei layva vi dei vatt sawkt.
10 Ich such dich mitt mei gans hatz,
loss mich nett vekk gay funn dei gebodda.
11 Ich hald dei vatt in meim hatz,
so es ich nett sindich geyyich dich.
12 Glohbt bisht du, oh Hah,
lann mich dei gebodda.
13 Mitt mei leftz fazayl ich
awl di adnunga funn deim maul.
14 Ich froi mich ivvah da vayk funn dei zeiknissa,
may es fa oahrich reich sei.
15 Ich denk dei adnunga ivvah,
un nemm dei vayya zu hatz.
16 Ich habb frayt in dei gebodda,
un zayl dei vatt nett fagessa.
Gimel
17 Sei goot zu miah, dei gnecht,
so es ich layb un dei vatt halda du.
18 Mach mei awwa uf so es ich
di vundahboahra sacha in deim ksetz sayna kann.
19 Ich binn en fremdah do uf di eaht,
fashtekkel dei gebodda nett funn miah.
20 Mei sayl fazeaht sich mitt en falanga
fa dei adnunga di gans zeit.
21 Du zanksht di shtolsa es faflucht sinn,
selli es vekk lawfa funn dei gebodda.
22 Loss si mich nett fa'achta un fashpodda,
fa ich hald dei zeiknisa.
23 Even vann roolahs hokka un geyyich mich shvetza,
dann hald dei gnecht sich alsnoch uf mitt dei gebodda.
24 Ich habb frayt mitt dei zeiknisa,
si sinn mei roht-gevvah.
Daleth
25 Mei sayl is niddah glaykt in da shtawb,
mach mich viddah shteik deich dei vatt.
26 Ich habb diah ksawt veyyich mei vayya,
un du hosht mich keaht;
lann mich dei gebodda.
27 Mach mich da vayk funn dei adnunga fashtay,
no hald ich oh denka an dei vundahra.
28 Mei sayl heild mitt dreebsawl,
mach mich shteik vi dei vatt sawkt.
29 Hald mich funn falshi vayya,
un sei gnaydich zu miah deich dei ksetz.
30 Ich habb da vayk funn dei voahheit uf gnumma;
ich habb dei adnunga fannich mich ksetzt.
31 Ich hayb oh zu dei zeiknisa, oh Hah,
loss mich nett fashohmd sei.
32 Ich lawf im vayk funn dei gebodda,
fa du hosht mei hatz gedraysht.
He
33 Lann mich da vayk funn dei gebodda, oh Hah,
un ich zayl si halda biss an's end.
34 Mach mich fashtay, so es ich dei ksetz halda kann,
un's du mitt meim gans hatz.
35 Fiah mich in di pawt funn dei gebodda,
fa si is miah kfellich.
36 Dray mei hatz zu dei zeiknisa,
un nett zu lusht fa sacha.
37 Dray mei awwa vekk funn sacha gukka es nix veaht sinn,
mach mich shteik in dei vayya.
38 Folfill vass du fashprocha hosht zu deim gnecht,
so es ich di furcht funn diah habb.
39 Nemm vekk da shohm es ich feich,
fa dei adnunga sinn goot.
40 Gukk moll, ich habb en falanga fa dei adnunga,
gebb miah layva in dei gerechtichkeit.
Vau
41 Loss dei shtandhaftichi-leevi zu miah kumma, oh Hah,
mach mich saylich so vi du fashprocha hosht.
42 No kann ich andvat gevva zu sellah es mich fashpodda dutt,
fa ich faloss mich uf dei vatt.
43 Nemm nett's vatt funn di voahheit aus meim maul,
fa ich hoff in dei adnunga.
44 Ich zayl dei ksetz di gans zeit halda,
immah un ayvichlich.
45 Ich zayl rumm lawfa in freiheit,
veil ich dei adnunga such.
46 Ich zayl shvetza veyyich dei zeiknisa fannich kaynicha,
un ich zayl mich nett shemma.
47 Ich habb frayt in dei gebodda,
veil ich si leeb habb.
48 Ich hayb mei hend uf zu dei gebodda,
dee es ich leeb habb,
un denk dei gebodda ivvah.
Zain
49 Denk an's vatt zu deim gnecht,
sell es miah hofning gebt.
50 Mei drohsht in dreebsawl is dess,
es dei vatt miah layva gebt.
51 Di shtolsa doon mich veesht fashpodda,
avvah ich dray nett vekk funn deim ksetz.
52 Vann ich an dei adnunga denk funn lang zrikk, oh Hah,
dann binn ich gedraysht.
53 Haysah zann kumd ivvah mich veyyich di gottlohsa,
veil si dei ksetz falossa henn.
54 Dei gebodda sinn mei leet,
vo-evvah es ich mei haymet mach.
55 In di nacht denk ich an dei nohma, oh Hah,
un ich zayl dei ksetz halda.
56 Dess is zu miah kfalla,
veil ich dei adnunga hald.
Cheth
57 Du bisht mei dayl, oh Hah,
un ich fashprech fa dei vadda halda.
58 Ich such fa kfellich sei zu diah mitt meim gans hatz,
sei gnaydich zu miah vi dei vatt sawkt.
59 Ich habb an mei vayya gedenkt,
un habb mei fees noch dei zeiknisa gedrayt.
60 Ich dummel mich un du's nett ab
fa dei gebodda halda.
61 Di gottlohsa henn mich gebunna mitt shtrikk,
avvah ich habb dei ksetz nett fagessa.
62 Am halb-nacht shtayn ich uf un dank dich,
fa dei gerechti adnunga.
63 Ich binn en freind zu awl selli es dich firchta,
zu awl selli es dei gebodda halda.
64 Di eaht is kfild mitt dei shtandhaftichi-leevi, oh Hah,
lann mich dei gebodda.
Teth
65 Du hosht goot gedu zu deim gnecht, oh Hah,
un hosht dei vatt kalda.
66 Lann mich goodi eisicht es ich sach fashtay,
fa ich glawb an dei gebodda.
67 Eb ich gedaymeedicht voah, binn ich als letz ganga,
avvah nau hald ich dei vatt.
68 Du bisht goot un dusht goot,
lann mich dei gebodda.
69 Di shtolsa henn mei nohma fashmiaht mitt leeya,
ich hald dei adnunga mitt mei gans hatz.
70 Iahra hatz is hatt un fashtokt,
avvah ich habb frayt in deim ksetz.
71 Es voah goot es ich gedaymeedicht voah,
so es ich dei gebodda lanna habb kenna.
72 Es ksetz funn dei maul is miah leevah,
es dausends funn shtikkah silvah un gold.
Yod
73 Dei hend henn mich gmacht un kshaffa,
gebb miah eisicht, so es ich dei gebodda lanna kann.
74 Selli es dei furcht henn, froiya sich vann si mich sayna,
veil ich hofning in dei vatt du.
75 Oh Hah, ich vays es dei richta gerecht sinn,
un es du mich gedaymeedicht hosht veil du shtandhaftich bisht.
76 Loss dei shtandhaftichi-leevi mei drohsht sei,
so vi du deim gnecht fashprocha hosht.
77 Loss dei bamhatzichkeit zu miah kumma so es ich layb,
fa ich habb frayt in deim ksetz.
78 Loss di shtolsa sich shemma
fa miah letz du unni shuld,
avvah ich hald mich uf mitt dei adninga.
79 Loss selli es dich firchta sich zu miah drayya,
awl selli es dei zeiknisa vissa.
80 Loss mei hatz unshuldich sei in dei gebodda,
so es ich mich nett shemma muss.
Kaph
81 Mei sayl hott en falanga fa dei saylichkeit,
ich du mei hofning in dei vatt.
82 Mei awwa sinn dreeb funn dei vatt vatsha,
un ich sawk, “Vann zaylsht du mich drayshta?”
83 Ich binn am vadda vi en leddah vei-sakk im shmohk,
avvah doch ich habb dei gebodda nett fagessa.
84 Vi lang muss dei gnecht voahra?
Vann zaylsht du selli richta es mich fafolka?
85 Di shtolsa grawva lechah es ich nei falla soll,
un doon nett dei ksetz nohch gay.
86 Dei gebodda kenna awl gedraut sei;
helf miah, fa mennah fafolka mich mitt leeya.
87 Si henn mich shiah umgebrocht uf di eaht,
avvah ich habb dei adnunga nett falossa.
88 Deich dei shtandhaftichi-leevi, mach mei layva viddah shteik,
so es ich di zeiknisa funn deim maul halda kann.
Lamed
89 Dei vatt, oh Hah, is ayvichlich im himmel,
un shtayt fesht fa'immah.
90 Dei shtandhaftichkeit shtayt fa'immah un immah,
du hosht di eaht fesht gegrund un si bleibt shtay.
91 Si shtayt heit noch deich dei adnunga,
fa alles muss dich deena.
92 Vann dei ksetz nett mei drohsht gvest veah,
dann veah ich kshtauva in mei aylend.
93 Ich zayl nee nett dei adnunga fagessa,
fa deich si hosht du miah layva gevva.
94 Helf miah, fa ich binn dei,
ich habb dei adnunga ausksucht.
95 Di gottlohsa sinn am voahra fa mich umbringa,
avvah ich hald mich uf mitt dei zeiknisa.
96 Ich habb ksenna es alles en end hott,
avvah dei gebott is oahrich brayt.
Mem
97 Oh, vi leeblich is dei ksetz zu miah!
Ich denk drivvah da gans dawk lang.
98 Dei gebott gebt miah may veisheit es mei feinda henn,
fa's is immah bei miah.
99 Ich habb may eisicht es awl mei teetshahs,
veil ich mich uf hald mitt dei zeiknisa.
100 Ich fashtay sacha bessah es di eldahra,
veil ich dei gebodda hald.
101 Ich hald mei fees vekk funn alli evili pawt,
so es ich dei vatt halda kann.
102 Ich habb mich nett vekk gedrayt funn dei adnunga,
fa du selvaht hosht mich gland.
103 Oh, vi sees sinn dei vadda zu miah,
seesah es hunnich zu mei maul.
104 Ich fashtay sacha deich dei adnunga,
fasell hass ich alli falshah vayk.
Nun
105 Dei vatt is en licht zu mei fees,
un helling fa mei pawt.
106 Ich habb kshvoahra, un zayl's du,
es ich dei gerechti adnunga halda zayl.
107 Ich binn am feel leida deich macha,
gebb miah layva, oh Hah, vi dei vatt fashprecht.
108 Nemm di opfahra oh funn meim maul, oh Hah,
un lann dei adnunga zu miah.
109 Mei layva is immah in di kfoah,
avvah ich fagess dei ksetz nett.
110 Di gottlohsa henn en shtrikka-shling ksetzt fa mich,
avvah ich habb dei adnunga nett falossa.
111 Dei zeiknisa sinn mei eahbshaft fa'immah,
fa si sinn di frayt funn meim hatz.
112 Ich habb mei hatz ksetzt fa dei gebodda halda,
fa'immah biss an's end.
Samek
113 Ich hass zvay-ksichtichi mennah,
avvah dei ksetz is miah leeblich.
114 Du bisht mei shield un da blatz es ich mich fashtekla kann,
ich du mei hofning in dei vatt.
115 Gaynd vekk funn miah, diah gottlohsi,
so es ich di gebodda funn meim Gott halda kann.
116 Hayb mich uf vi du fashprocha hosht in deim vatt, so es ich layb,
un loss mich nett nunnah glost sei in mei hofning.
117 Mach mich shteik, so es ich frei gmacht binn,
un dei gebodda immah uf hayva kann.
118 Du draysht nunnah awl selli es vekk drayya funn dei gebodda,
fa iahra shkeems sinn alles fa nix.
119 Du shmeisht awl di gottlohsa naus vi trash,
fasell sinn dei zeiknisa miah leeblich.
120 Ich feich mich so veyyich diah es ich ziddah,
ich feich mich veyyich dei gerichtes.
Ayin
121 Ich du vass gerechtich un recht is,
dray mich nett ivvah zu selli es mich nunnah dredda vella.
122 Shtay goot fa dei gnecht un draysht een,
Loss di shtolsa mich nett nunnah dredda.
123 Mei awwa sinn dreeb funn gukka fa dei saylichkeit,
un fa's vatt funn dei gerechtichkeit.
124 Shaff mitt deim gnecht noch dei shtandhaftichi-leevi,
un lann dei gebodda zu miah.
125 Ich binn dei gnecht, gebb miah eisicht,
so es ich dei zeiknisa fashtay kann.
126 Es is zeit es du, da Hah, ebbes dusht,
fa dei ksetz is am gebrocha vadda.
127 Fasell habb ich dei gebodda leeblich,
may es gold, yau, may es fei gold.
128 Un fasell lawf ich pinklich noch dei adnunga,
un ich hass alli falshah vayk.
Pe
129 Dei zeiknisa sinn vundahboah,
un fasell dutt mei sayl si halda.
130 Vann dei vatt fashtanna vatt, gebt's licht,
un's gebt eisicht zu selli es nett fashtayn.
131 Ich shnauf hatt mitt mei maul grohs uf,
veil ich en falanga habb fa dei gebodda.
132 Dray dich zu miah un sei gnaydich zu miah,
so vi du dusht zu awl selli es dich leeb henn.
133 Hald mei fees am dei vatt nohch gay,
un loss evil mich nett ivvah-kumma.
134 Hald mich funn nunnah gedrikt sei bei mensha,
so es ich dei adnunga halda kann.
135 Loss dei ksicht uf dei gnecht sheina,
un lann dei gebodda zu miah.
136 Es awwa-vassah lawft aus mei awwa,
veil leit dei ksetz nett halda.
Tsade
137 Du bisht gerecht, oh Hah,
un dei richtes is recht.
138 Du hosht dei zeiknisa gevva in gerechtichkeit,
si kenna folshtendich gedraut sei.
139 Mei eahnsht veaht mich aus,
veil mei feinda dei vadda fagessa henn.
140 Dei vatt kann falossa sei druff,
un dei gnecht hott's leeb.
141 Ich binn nett hohch ufkohva un leit gukka nunnah uf mich,
avvah ich fagess dei adnunga nett.
142 Dei gerechtichkeit is en ayvichi gerechtichkeit,
un dei ksetz is voahheit.
143 Angsht un druvvel sinn ivvah mich kumma,
avvah dei gebodda bringa miah frayt.
144 Dei zeiknisa sinn gerecht fa'immah,
helf mich fashtay, so es ich layva kann.
Qof
145 Ich roof zu diah mitt mei gans hatz, gebb andvat, oh Hah;
ich zayl dei gebodda halda.
146 Ich roof naus zu diah, helf miah,
ich zayl dei zeiknisa halda.
147 Ich shtay uf eb dawk un roof fa hilf,
ich du mei hofning in dei vadda.
148 Ich lei vakkah di gans nacht,
fa ivvah dei vatt denka.
149 Deich dei shtandhaftichi-leevi, heich mei shtimm ab,
deich dei gerechtich richtes, hald mei layva sayf, oh Hah.
150 Mei shneekichi fafolkah, sinn am nayksht kumma,
si sinn veit vekk funn deim ksetz.
151 Avvah du bisht nayksht, oh Hah,
un awl dei gebodda sinn voahheit.
152 Lang zrikk habb ich gland veyyich dei zeiknisa,
un es du si shtay gmacht hosht fa'immah.
Resh
153 Gukk an mei aylend un setz mich frei,
fa ich habb dei ksetz nett fagessa.
154 Shvetz fa mich un setz mich frei,
gebb miah layva deich dei vatt.
155 Di saylichkeit is veit vekk funn di gottlohsa,
fa si heicha dei gebodda nett.
156 Dei bamhatzichkeit is grohs, oh Hah,
gebb miah layva so vi dei adnunga sawwa.
157 Ich habb feel feinda un fafolyah,
avvah ich dray nett vekk funn dei zeiknisa.
158 Vann ich di unglawvicha sayn dutt's miah vay,
veil si dei vatt nett halda.
159 Gukk moll vi leeb es ich dei adnunga habb;
gebb miah layva, oh Hah, deich dei shtandhaftichi-leevi.
160 Dei vatt is di gans voahheit,
un awl funn dei gerechti adnunga sinn ayvich.
Shin
161 Evvahshti fafolka mich unni shuld,
avvah mei hatz shtayt in furcht funn deim vatt.
162 Ich froi mich ivvah dei vatt,
so es vi ebbah es oahrich keshtlich sach find.
163 Ich hass un gleich nett falshheit,
avvah ich habb dei ksetz leeb.
164 Ich lohb dich sivva mohl da dawk,
fa dei gerechti adnunga.
165 Selli es dei ksetz leeb henn, henn grohsah fridda,
un nix kann si shtolbahra macha.
166 Ich voaht fa dei saylichkeit, oh Hah,
un hald dei gebodda.
167 Mei sayl hald dei zeiknisa,
un ich habb grohsi leevi fa si.
168 Ich hald dei adnunga un dei gebodda,
fa awl mei vayya sinn fannich diah.
Taw
169 Loss mei roof fa hilf fannich dich kumma, oh Hah,
gebb miah eisicht fa fashtay deich dei vatt.
170 Loss mei gebayt fannich dich kumma,
mach mich frei deich dei vatt.
171 Mei leftz zayla diah lohb gevva,
veil du mich dei gebodda lansht.
172 Mei zung zayld singa funn deim vatt,
fa awl dei gebodda sinn gerecht.
173 Loss dei hand grisht sei fa miah helfa,
fa ich habb dei adnunga ohgnumma.
174 Ich habb en falanga fa dei saylichkeit, oh Hah,
un ich habb frayt in deim ksetz.
175 Loss mei sayl layva, so es ich dich lohva kann,
un loss dei adnunga miah helfa.
176 Ich binn vekk gloffa vi en faloahra shohf,
so kumm un gukk fa dei gnecht,
fa ich zayl dei gebodda nett fagessa.