Da 118. Psalm.
Dankboah Fa Gott Sei Hilf
1 Gevvet dank zumm Hah, fa eah is goot;
sei shtandhaftichi-leevi is ayvich.
2 Loss Israel sawwa,
“Sei shtandhaftichi-leevi is ayvich.”
3 Loss es haus fumm Aaron sawwa,
“Sei shtandhaftichi-leevi is ayvich.”
4 Loss selli es da Hah firchta sawwa,
“Sei shtandhaftichi-leevi is ayvich.”
5 In meim angsht habb ich da Hah ohgroofa,
un eah hott miah andvat gevva bei mich frei setza.
6 Da Hah is bei miah, ich zayl mich nett feicha.
Vass kenna di mensha du zu miah?
7 Da Hah is bei miah un helft miah,
un ich zayl zufridda uf mei feinda gukka.
8 Es is bessah fa em Hah drauwa,
es vi em falossa uf mensha.
9 Es is bessah fa em Hah drauwa,
es vi em falossa uf di foah-gengah.
10 Awl di heida sinn um mich rumm kumma,
avvah im nohma fumm Hah habb ich si abkshnidda.
11 Si voahra um mich rumm uf alli seit,
avvah im nohma fumm Hah habb ich si abkshnidda.
12 Si voahra um mich rumm vi eema,
avvah vi en danna-feiyah sinn si kshvind ausgebrend;
im nohma fumm Hah habb ich si abkshnidda.
13 Ich voah hatt zrikk kshohva un shiah am falla,
avvah da Hah hott miah kolfa.
14 Da Hah is mei macht un mei Psalm,
un eah is mei saylichkeit vadda.
15 Di leit singa veyyich di ivvah-hand greeya mitt frayt,
in di tents funn di gerechta:
“Em Hah sei rechtsi hand hott mechtichi sacha gedu!
16 Em Hah sei rechtsi hand is hohch uf kohva;
em Hah sei rechtsi hand hott mechtichi sacha gedu.”
17 Ich zayl nett shtauva, avvah layva,
un zayl fazayla vass da Hah gedu hott.
18 Da Hah hott mich shveah kshtrohft,
avvah eah hott mich nett ivvah-gevva zumm doht.
19 Mach di doahra funn gerechtichkeit uf fa mich,
so es ich deich nei gay kann un da Hah danka.
20 Dess is es doah fumm Hah
es di gerechta deich nei gayn.
21 Ich dank dich es du mich keaht hosht,
un bisht mei saylichkeit vadda.
22 Da shtay es di shaff-leit zrikk kshmissa henn,
is da ekk-shtay vadda.
23 Da Hah hott dess gedu,
un's is en vundah fannich unsah awwa.
24 Dess is da dawk es da Hah gmacht hott,
miah zayla uns froiya un froh sei drinn.
25 Helf uns, oh Hah,
helf, so es es goot ausshaft fa uns, oh Hah.
26 Ksaykend is sellah vo kumd im nohma fumm Hah,
miah saykna eich fumm Hah sei haus.
27 Da Hah is Gott,
eah hott uns licht gevva.
Mitt shtrikk in eiyah hend, binnet's opfah,
un gaynd nuff an di hanna fumm awldah.
28 Du bisht mei Gott, un ich gebb diah dank;
du bisht mei Gott, un ich hayb dich hohch uf.
29 Gevvet dank zumm Hah, fa eah is goot;
sei shtandhaftichi-leevi is ayvich.