Da 105. Psalm.
Gott Un Sei Leit
1 Gevvet dank zumm Hah,
un roofet sei nohma oh;
fazaylet unnich di heida vass eah gedu hott.
2 Singet zu eem, un lohvet een,
sawwet veyyich awl sei vundahboahri verka!
3 Hallichet sei heilichah nohma;
loss di hatza funn selli es da Hah sucha sich froiya.
4 Suchet da Hah un sei graft,
suchet immah sei ksicht.
5 Denket an di vundahboahra verka es eah gedu hott,
an sei zaycha un's richtes funn seim maul,
6 diah nohch-kummashaft funn sei gnecht, da Abraham,
diah kinnah fumm Jakob, sei raus-groofeni.
7 Eah is da Hah, unsah Gott,
sei richtes is in di gans veld.
8 Eah denkt immah an sei bund,
an's vatt es eah gebodda hott
zu dausends funn dee es nohch kumma zayla,
9 sell bund es eah gmacht hott mitt em Abraham,
un vass eah fashprocha un kshvoahra hott zumm Isaac.
10 Eah hott's viddah ivvah fashprocha un fesht gmacht zumm Jakob,
un zu Israel es en ayvich bund.
11 Eah hott ksawt, “Ich gebb eich's land funn Kanaan;
es zayld eiyah dayl funn eahbshaft sei.”
12 Vo si noch vennich voahra un nett feel in nambah,
un noch fremd voahra im land,
13 sinn si funn land zu land gezowwa,
un funn ay kaynich-reich zumm anra.
14 Eah hott nimmand glost si nunnah dredda,
un fa iahra sayk hott eah kaynicha gezankt.
15 Eah hott ksawt, “Layyet eiyah hend nett uf mei ksalbdi,
un doond kenn shawda zu mei brofayda.”
16 Eah hott hungahs-noht in's land kumma gmacht,
un hott awl iahra ess-sach vekk gnumma.
17 Eah hott en mann fannich eena heah kshikt,
dess voah da Joseph, deah vo fakawft is vadda es en bunds-gnecht.
18 Sei fees voahra in kedda gedu,
un en eisichah kallah um sei hals rumm,
19 biss voah kumma is vass eah foahksawt katt hott,
un biss em Hah sei vatt gvissa hott es eah recht voah.
20 Da kaynich hott vatt kshikt fa een lohs lossa,
da roolah funn di leit hott een frei ksetzt.
21 Eah hott een ivvah-saynah gmacht funn sei haus,
un hott een roolah gmacht ivvah awl sei sach,
22 so es eah sei feddahshti gland hott vi eah hott vella,
un hott sei eldishti veisheit gland.
23 No is Israel nunnah in Egypta kumma,
un da Jakob is en fremdah vadda im land fumm Ham.
24 Da Hah hott sei leit oahrich fruchtboah gmacht,
un hott si mechtichah gmacht es iahra feinda.
25 Eah hott di Egyptah gmacht sei leit hassa,
un si henn shlichtich kshaft geyyich sei gnechta.
26 Eah hott da Mosi, sei gnecht, kshikt,
un da Aaron, deah es eah raus glaysa hott.
27 Si henn sei zaycha gedu unnich eena,
un sei vundahra im land fumm Ham.
28 Eah hott's dunkla kshikt un hott's land dunkel gmacht,
un si henn nett geyyich sei vatt kshaft.
29 Eah hott iahra vassah in bloot gedrayt,
un hott iahra fish gmacht doht gay.
30 Iahra land hott kshvoahmd mitt fresh,
even in di kammahra funn di kaynicha.
31 Eah hott kshvetzt, un shvoahms funn mukka sinn kumma,
shtech-mukka deich's gans land.
32 Eah hott shlohsa kshikt fa reyyah,
un's gviddah voah ivvahrawlich im land.
33 Eah hott iahra drauva-shtekk un feiya-baym kshlauwa,
un hott awl di baym im land nunnah gebrocha.
34 Eah hott kshvetzt, un di hoi-shrekka un locusts sinn kumma,
so feel es ma si nett zayla hott kenna.
35 Si henn alles greenes kfressa im land,
un henn aw's frucht fumm grund kfressa.
36 Eah hott awl di eahsht-geboahrana im land doht gmacht,
datt vo's eahshta funn iahra graft drinn voah.
37 No hott eah Israel raus gebrocht mitt silvah un gold,
un's voahra kenn shvachi leit unnich iahra shtamma.
38 Egypta voah froh vo si falossa henn,
veil si sich kfeicht henn veyyich di Israeliddah.
39 Eah hott en volk anna gedu fa si zu dekka
un en feiyah fa helling macha nachts.
40 Si henn kfrohkt, un eah hott badreeslen gebrocht,
un hott si satt gmacht mitt broht fumm himmel.
41 Eah hott da felsa uf gmacht, un vassah is raus gloffa,
in drukkani bletz is es gloffa vi en revvah.
42 Eah hott an sei heilichi fashprechung gedenkt,
un an da Abraham, sei gnecht.
43 Eah hott sei leit raus gebrocht mitt frayt,
sei raus-groofeni diveil es si am singa voahra.
44 Eah hott eena di lendah funn di heida gevva,
un si henn ivvah-gnumma vass anri kshaft henn difoah,
45 so es si sei gebodda halda sella,
un du vass sei ksetza sawwa.
Halleluja!