Da 101. Psalm.
Vass Da Kaynich Fashprocha Hott
En Psalm fumm Dawfit.
1 Ich vill singa veyyich bamhatzichkeit un veyyich feah sei;
zu diah, Oh Hah, vill ich lohb singa.
2 Ich vill acht gevva un mich unshuldichah uf fiahra;
vann kumsht du zu miah?
Ich vill in meim haus lawfa mitt en unshuldich hatz.
3 Ich loss kenn evil ding fannich mei awwa kumma;
ich hass di eahvet funn selli es vekk falla,
un ich loss iahra sacha nett ivvah-nemma in miah.
4 En falsh hatz soll veit vekk bleiva funn miah;
ich zayl nix zu du havva mitt evil.
5 Ich zayl ennich ebbah shtill macha
es hinna rumm shvetzt veyyich sei nochbah.
Ich vill nix zu du havva mitt ebbah
es grohs-feelich un hohchmeedich is.
6 Mei awwa zayla uf di shtandhafticha im land sei,
so es si bei miah bleiva sella;
sellah es lawft in en unshuldichah vayk,
soll mich deena.
7 Falshi leit sella nett in meim haus bleiva;
ebbah es leekt zayld nett bei miah sei.
8 Alli meiya butz ich vekk
awl di gottlohsa im land;
ich yawk awl di evil-shaffah
aus em Hah sei shtatt.