Es 9. Gabiddel.
Da Hiob Shvetzt
1 No hott da Hiob ksawt,
2 “Yau, ich vays es awl sell voah is,
avvah vi kann en mensh gerecht sei fannich Gott?
3 Vann ebbah gleicha dayt shtreida mitt eem,
kend eah eem nett ay moll aus en dausend moll andvat gevva.
4 Eah hott grohsi veisheit un is mechtich,
veah kann sich geyyich een shtella unni sich selvaht shawda du?
5 Eah kann berga rumm setza un si vissa's nett,
un kann si ivvah-drayya in seim zann.
6 Eah shiddeld di eaht aus iahra blatz
un macht iahra poshta ziddahra.
7 Eah shvetzt zu di sunn un si sheind nett,
un macht's licht funn di shtanna ausgay.
8 Eah laynich dutt di himla ausshtrekka,
un drett di vella fumm say nunnah.
9 Eah macht da Beah, da Orion un di Pleiades,
un aw awl di shtanna in di saut.
10 Eah dutt grohsi sacha es nett begreiflich sinn,
un vundahra es nett gezayld sei kenna.
11 Eah gayt an miah fabei, un ich kann een nett sayna,
eah lawft fabei, un ich habb's nett acht.
12 Vann eah ebbes vekk nemd, veah kann een shtobba?
Veah kann sawwa, ‘Vass bisht du am du?’
13 Gott dutt sei zann nett zrikk hayva,
di helfah fumm Rahab missa sich beeya unnich sei fees.
14 Vee soll ich eem dann andvat gevva?
Vee kann ich vadda finna fa shvetza geyyich een?
15 Even vann ich recht binn, kann ich eem kenn andvat gevva,
ich kann yusht mei richtah frohwa fa bamhatzichkeit.
16 Vann ich een roofa dayt, un eah dayt miah andvat gevva,
dann kend ich alsnoch nett glawva es eah mich abheicha dayt.
17 Eah dayt ivvah mich foahra mitt en shtoahm,
un dayt mei vayyi blakka noch shlimmah macha unni uahsach.
18 Eah dayt mich nett lossa mei ohften zrikk greeya,
avvah eah dayt mich filla mitt dreebsawl.
19 Vann's kumd zu macht un gvald, dann is eah mechtich;
vann's kumd zu vass recht is, veah kann een bei roofa?
20 Vann ich sawk es ich gerecht binn,
doch dutt mei ayya maul mich fadamma,
diveil es ich unshuldich binn,
dutt eah mich alsnoch shuldich hayva.
21 Even diveil es ich unshuldich binn,
gebb ich nix may um mei layva;
ich hass mei ayya layva.
22 Es is alles ayns; fasell sawk ich,
‘Eah dutt di unshuldicha un di ungettlicha awl zvay umbringa.’
23 Vann unglikk bletzlich kumd un bringd da doht,
dann dutt eah shpodda ivvah di unshuldicha.
24 Vann's land in di hend funn di ungettlicha fald,
dann dekt eah di ksichtah funn di richtah zu.
Vann's nett een is, dann veah is es?
25 Mei dawwa gayn kshvindah fabei es vi ebbah am shpringa,
si fleeya fatt un sayna nix goodes.
26 Si gayn fabei vi shiffah es gmacht sinn funn vassah-shtengel,
vi en awdlah es nunnah fleekt uf en diah.
27 Vann ich sawk, ‘Ich zayl mei beglawk fagessa,
zayl ufheahra en lang ksicht havva, un zayl fraylich sei,’
28 dann dayt ich mich feicha veyyich mei shmatza,
fa ich vays es du mich shuldich haybsht.
29 Siddah es ich shund shuldich kfunna binn,
favass sett ich shtravla fa nix?
30 Even vann ich mich vesha dayt mitt shnay-vassah,
un mei hend vesha dayt mitt lawk,
31 daytsht du mich in en drekkich loch shmeisa,
un mei aykni glaydah dayda mich hassa.
32 Eah is nett en mensh vi ich binn,
es ich eem andvat gevva kann.
Miah kenna nett mitt-nannah in's gericht-haus gay.
33 Es hott kenn middel-mann es zvishich uns kumma kann,
un es sei hand uf uns layya kann.
34 Ich vott eah dayt sei shtekka vekk nemma funn miah,
so es ich nimmi angsht hett funn eem.
35 No dayt ich shvetza un mich nett feicha veyyich eem,
avvah ich selvaht binn nett aynah es so du kann.”