Es 10. Gabiddel.
1 “Mei ayya layva aykeld miah.
Ich zayl mich gay lossa un mich beglawwa,
un ich zayl shvetza mitt en sayl es biddah is.
2 Ich zayl sawwa zu Gott: Du mich nett fadamma,
loss mich vissa vass du geyyich mich hosht.
3 Kfald's diah fa mich fafolka,
fa di eahvet funn dei hend nunnah drayya,
diveil es du froh bisht mitt di shkeems funn di gottlohsa?
4 Hosht du menshlichi awwa?
Dusht du sayna vi da mensh dutt?
5 Sinn dei dawwa vi di dawwa fumm mensh,
adda dei yoahra vi di yoahra funn en mann,
6 es du suchsht fa mei faylah,
un am gukka bisht fa mei sinda?
7 Du vaysht es ich nett shuldich binn,
un es nimmand mich aus dei hand nemma kann.
8 Dei hend henn mich zammah gedu un mich gmacht,
draysht du nau rumm un fadaubsht mich?
9 Denk droh es du mich gmacht hosht aus eaht.
Zaylsht du mich nau viddah zu shtawb drayya?
10 Hosht du mich nett ausgleaht vi millich,
un mich shaydich gmacht vi kays?
11 Hosht du mich nett geglayt mitt haut un flaysh,
un mich zammah gedu mitt gnocha un flexa?
12 Du hosht miah layva gevva un voahsht bamhatzich zu miah;
un hosht ivvah mei geisht gvatsht.
13 Un doch hosht du dee sach in deim hatz katt,
ich vays es dess in dei meind voah:
14 Du bisht am vatsha fa sayna eb ich sindicha du,
un dusht's nett fa mei shuld fagevva.
15 Vann ich gottlohs binn, dann vay zu miah!
Un even vann ich gerecht binn, dann dauf ich mei kobb nett uf hayva,
fa ich binn ivvah-gnumma mitt mei shohm un dreebsawl.
16 Vann ich mei kobb uf hayb, dann hundsht du mich vi en layb,
un veisht viddah dei vundahboahri macht geyyich mich.
17 Du bringsht neiyi zeiya geyyich mich,
un dei zann geyyich mich vatt graysah;
du shiksht druvvel uf mich ivvah un ivvah.
18 Favass hosht du mich aus em muddahs-leib gebrocht?
Ich vott ich veah kshtauva eb ennich awk mich ksenna hett.
19 Oh, vann ich yusht nee nett gvest veah,
adda vann ich yusht grawt in's grawb ganga veah fumm muddahs-leib!
20 Sinn nett mei poah dawk shiah goah ivvah?
Loss mich gay, so es ich bissel frayt havva kann
21 eb ich anna gay vo ich nee nett zrikk kumm,
in's land funn shadda un dunkelheit,
22 in's land funn di deefsht nacht
un deefah shadda, vo alles deich-nannah is,
vo even's licht is vi's dunkla.”