Es 7. Gabiddel.
1 “Muss nett da mensh hatt shaffa uf di eaht:
sinn nett sei dawwa vi di dawwa funn en gnecht?
2 Es is vi en gnecht es en falanga hott fa in da shadda gay,
adda vi en gnecht es am voahra is fa sei lohn greeya.
3 So is es miah ausgedayld fa moonet noch moonet nix havva zu layva difoah.
Nacht noch nacht mitt aylenda sinn miah gevva.
4 Vann ich mich anna layk, denk ich, ‘Vee lang biss ich ufshtay?’
Di nacht hald oh, un ich dray mich biss meiyets.
5 Mei leib is geglayt mitt veahm un grinda,
mei haut is ufgebrocha un am auslawfa.
6 Mei dawwa gayn kshvindah fabei es en shoddel funn en loom,
un si enda unni hofning.
7 Fagess nett, oh Gott, es mei layva is vi en ohften,
mei awwa zayla nee nimmi goodes sayna.
8 Es awk es mich saynd zayld mich nimmi sayna,
dei awwa gukka fa mich, avvah ich zayl nimmi sei.
9 Vi en volk fagayt un is nimmi,
so gayt en mensh nunnah in's grawb un kumd nimmi zrikk.
10 Eah kumd nimmi zrikk an sei haus,
nimmand zayld een may sayna.
11 Fasell zayl ich nett shtill sei,
ich zayl shvetza veil mei geisht angsht hott,
un mich faglawwa veil mei sayl biddah is.
12 Binn ich da say, adda en veesht diah im say,
es du en vatshah ivvah mich gedu hosht?
13 Vann ich denk es mei bett miah drohsht gebt,
un ich fagess mei dreebsawl mitt shlohf,
14 even no fagelshtahsht du mich mitt drohma,
un machsht es ich mich feich mitt visions,
15 so es mei sayl leevah fashtikka vett,
un shtauva es vi dee shmatza havva.
16 Ich hass mei layva, ich vill nett on layva,
loss mich gay, mei dawwa henn kenn mayning.
17 Vass is da mensh es du so feel machsht funn eem,
es du so bekimmaht bisht fa een?
18 Du guksht een ivvah alli meiya,
un broviahsht een aus alli minutt.
19 Guksht du nee nett vekk funn miah,
adda losht mich laynich even fa en awwa-blikk?
20 Vann ich ksindicht habb, vass habb ich gedu zu diah,
oh du mensha-heedah?
Favass hosht du mich da meik funn dei zeel gmacht,
binn ich en lasht vadda zu diah?
21 Favass fagebsht du nett mei ivvah-dreddes,
un nemsht mei sinda vekk?
Ich zayl glei nunnah in da shtawb leiya,
du zaylsht gukka fa mich, avvah ich zayl nimmi sei.”