Es 4. Gabiddel.
Di Eahsht Sett Kshvetzah:
Da Eliphas Shvetzt
1 No hott da Eliphas funn Theman ksawt,
2 “Vann ebbah en vatt havva vill mitt diah, nemsht du's geahn oh?
Doch veah kann shtill sei un nett shvetza?
3 Du hosht feel leit gland,
un hosht shvachi hend shteik gmacht.
4 Dei vadda henn selli ufkohva es kshtolbaht henn;
du hosht selli mitt shvachi gnee shteik gmacht.
5 Avvah nau is druvvel zu diah kumma, un du hosht moot faloahra,
's hott dich gedroffa, un du hosht angsht.
6 Sett nett dei Gottes-furcht dich shteik psunna macha,
un dei unshuldichi vayya diah hofning gevva.
7 Denk moll droh, veah is selayva umkumma es unshuldich voah?
Adda vo is en gerechtah mann doht gmacht vadda?
8 Dess havvich shund ksenna, selli es ungerechtichkeit bloowa,
un selli es druvvel sayya, doon's aw eahnda.
9 Bei Gott sei ohften kumma si um,
un bei da vind funn sei zann kumma si an's end.
10 Da layb roaht un gnatt,
un di zay funn di yunga layva sinn abgebrocha.
11 Unni diahra es eah doht macha kann, gayt da layb doht,
un di layb-muddah iahra glenni vadda ausnannah kshtroit.
12 Nau en vatt voah hinna rumm gebrocht zu miah;
mei oahra henn en pishbah keaht difunn.
13 Deich engshtlichi drohma in di nacht,
vann deefah shlohf uf leit fald,
14 is furcht un ziddahres ivvah mich kumma
un hott mei gnocha gmacht shidla.
15 En geisht is an mei ksicht fabei ganga;
di hoah uf meim leib henn sich ufkshteld.
16 Es hott kshtobt, avvah ich habb nett gvist vass es voah.
En gleichnis hott fannich mei awwa kshtanna,
un ich habb en gansi niddahri shtimm keaht:
17 ‘Kann en mensh may gerecht sei es Gott?
Kann en mann may rein sei es deah vo een gmacht hott?
18 Vann Gott kenn fadrauwa in sei gnechta dutt,
un pshuldicht sei engel fa letz du,
19 vi feel may dutt eah's zu selli es gmacht sinn funn di eaht,
zu selli es gegrund sinn im shtawb,
un es kshvindah fadrikt sinn es en shawb!
20 Kshvissich meiyets un ohvets kenna si in shtikkah fabrocha sei,
si shtauva ayvichlich, un nimmand nemd's acht.
21 Di shtrikk funn iahra tents vadda ruff gezowwa;
un si shtauva unni veisheit.’ ”