16
Mabakuli saba gha kiyaghabhu kya Chapanga
1 Mbole, nikiyihwa lilobhe likulu kuhuma mu Nyumba ya Chapanga akwo kunani palibhaghombela bhala andumitumi saba bha Chapanga, likilongela “Nng'ende mukayite kunnima agha mabakuli saba gha kiyaghabhu kya Chapanga.”
2 Lihoka ghwa ulongohi kakighenda, kakiyita libakuli lyake unani mwa nnima. Maputi ghaabhinite kwa ubhabho, ghakibhatula bhandu bhoha bhaabheghite na mango ya likokolo yula na bhala bhaalitundamilite ling'omong'omo lyake.
3 Lihoka ghwa ubhili kakiyita libakuli lyake mulihibha, nagho machi ghakighalambuka kubhegha handa mwahi ghwa mundu ywakahweghite, na kukoma hibhumbe hyoha hya mulihibha hiibheghite na ubhumi.
4 Lihoka ghwa ndatu kakiyita libakuli lyake mumikemba na muhinyopa hya machi, nahyo hikighalambuka kubhegha mwahi.
5 Nikinnyihwa lihoka kilongohi ghwa machi pakalongela, “Ghwenga ghutenda tela kutosa milando ayi. Ghwenga Nng'anyimo, ghuubheghite hinu na ghuubheghite.
6 Kiyaha bhabhatenda bhandu bhako bhayitike mwahi na kuhwegha, hinu ghubhapegha bhandu bhako ahakata mwahe ili bhaghunyweghe handa muyinoghwa.”
7 Mbole, nikiyihwa lilobhe kuhuma ku likuta palilongela, “Bambo Chapanga yunamakakala. Toso yako ndo hya hoto na yingunoghwa.”
8 Lihoka ghwa ncheche kakiyita libakuli lyake kulichubha, nalyo lichubha likipeghwa makakala gha kubhalunguha bhandu kwa mwoto ghwake.
9 Bhandu bhakilunguhwa kwa lupyupo lukalipa, bhandu abho bhakinnligha Chapanga yuna likalama lya kutenda mipinguhi ayi. Peni kahone hata yumu ywakalipetulite ebu kunkweha Chapanga.
10 Mbole, lihoka ghwa nhano kakiyita libakuli lyake unani mwa kiteho kya ghubhutwa ghwa yula likokolo. Ghghubhutwa ghwake ghukigubikwa na lubhindo, bhandu bhakihyaghula milimi yabhe kubhuka na mabhino,
11 bhakinligha Chapanga ghwa kunani kubhukana na mabhino gha malonda ghabhe. Peni kahone hata yumu ywkwakalipetulite kwa mandendelo ghabhe mahokelo.
12 Mbole, lihoka ghwa sita kakiyita libakuli lyake ku lukemba lukulu luukemwa Flati. Machi ghake ghakiyuma ili kutendekeha njila kwakya abhatwa bhanakuhuma ku ngeha.
13 Kangi, nikibhona mandilu andatu bhaabheghite handa madokwa, paapolotoka mungulo ya lila lijabali, na mu ngulo ya yula likokolo na mu ngulo ya yula mbuye ghwa uhwangi.
14 Ahyo ndo mihuki ya mandilu bhanakutenda mihabho. Ndo bhanakughenda kwa abhatwa bha milima na kubhayegha papamu kwakya ngondo mu linjubha lila likulu lya Chapanga Yunamakakala.
15 “Ghuyihwe! Nenga nunguhika handa mwihi. Kanonelwa Ywombe ywakakilukiha na kughabhika kala mapinda ghake ili kakotoke kutyanga uhula kunu na kunu na kuyuyuhwa pakindandabhanji.”
16 Basi, mihuki abho bhakiakwemula abhatwa abho mbaka pahala kwa Kihebulania pangukemwa Halmagedoni.
17 Lihoka ghwa saba kakiyita libakuli lyake kubhwelo, ndo lilobhe likulu likihuma mula mu nyumba, mu kila kiteho kya ghubhutwa, palilongela, “Yitendekwa kala.”
18 Kukibhegha na ming'ali ya njahe, milundumo, kyobho na lingwanhwaliko likulu lya lutupi. Kutandila kubhubwa mundu yinabwitukila ng'obhe lutingihiko handa alwo bhula palubheghite lukulu.
19 Kitami kila kikulu kikighabhanika hipalamande hindatu, na hitami hikulu hya milima yingi hikihanjaghanika. Chapanga kakikikulungwa kitami kila kikulu kya Babeli. Kakikipegha nteko ghwa difwai, difwai ya kiyaghabhu kya kukalala kwake.
20 Higunguli hyoha hikidibala, nahyo hitumbi hikibhonekana ng'obhe kangi.
21 Kangi hula ngulu ya magangalabho ghaabheghite na utopo ghwa kilo salasini na ncheche yikibhakomela bhandu, nabho bhakinnligha Chapanga kubhukana na ayo hula ya magangalabho, kulyaghila mpinguhi aghwo ghwa hula ya magangalabho ghukibhegha nkulungwa muno.