15
Mahoka bha Chapanga na mipinguhi ya kuuhiko
1 Mbole nikibhona naho yingi ngulu na ya kukangachwa kubhwelo. Mahoka saba bhakiyegha mipinguhi saba ya kuuhiko, kiyaha mbole ya mipinguhi mikulu ayi saba, kiyaghabhu kya Chapanga kyapela.
2 Mbole, nikibhona kilibhi kibhonekanite handa lihibha lya lindala lihangananitwe na mwoto. Nikiabhona bhubho bhandu bhanhotolite yula likokolo na ling'omong'omo lyake, ywene lihina lyake likikambukwa kwa ghula mmalango. Bhandu abho bhakiyima pambwegha ya lila lihibha lya lindala, bhakibhegha na migombo yaapeghitwe na Chapanga,
3 nabho bhakiyimba luyimbo lwa Musa, nndumitumi ghwa Chapanga na luyimbo lwa Mwanamene paalongela.
“Bambo Chapanga Yuna Makakala,
mandendelo ghako ndo makulu na gha kukangachwa muno.
Ghwenga Mutwa ghwa milima yoha,
njila hyako hibhegha telatea na hya hoto.
4 Bambo, ndo ghani katakuhokamila ng'obhe ghwenga?
Na kulikweha lihina lyako?
Ghwenga ghweka chako ghwa maha kyanalumu.
Bhandu ghwa milima yoha bhatahika
na kughutundamila ghwenga
Kiyaha mandendelo ghako gha hoto ghabhonekana kwa bhoha.”
5 Mbole ya agho, nikilolekeha kangi, nikibhona Nyumba ya Chapanga lihughulighwa kunani. Nyumba ayo likibhegha handa lihema, lyene Chapanga kakibhegha kangutama na nkati ya bhandu kukibhala.
6 Bhala andumitumi saba bha Chapanga bha Chapanga, bhaabheghite na mipinguhi saba bhakihuma mula mu Nyumba ya Chapanga, bhakihwala mapinda mahuhu mbulete na muihubha hyabhe bhakibhopwa mikungi ya sahabu.
7 Mbole, yumu ywa bhala hibhumbe ncheche bhanaubhumi kakiapegha bhala andumitumi saba bha Chapanga mabakuli saba gha sahabu ghaamemite kiyaghabhu kya Chapanga ywombe yunaubhumi manjubha ghoha kyanga uhiko.
8 Ukulu na makakala gha Chapanga ghukitenda Nyumba ya Chapanga yimeme lyohi, na kahone mundu ywakahotolite kuyingila mu Nyumba mbaka kuuhiko ghwa mipinguhi saba ya bhala andumitumi saba bha Chapanga.