9
1 Pwen Yesu ipwai iya kili hu, ipa, <<Upwai ndrokonan isa kili wawu, tehe hu hayah mepo hutopo tine iye, ara andre hu kanhingorowe kimat kileh pwi, kipoo hu kanime kolo King Ngindrai mepo ngara kiro mu kiya aliy kisa kiya sura pwoke tan.>>
Nombuwe Yesu ipiy
2 Pe lang manonoh ihipwen, Yesu iwiri Pita, Yamis, pe Yohanes huya polo yiy, pe iluwani hu huya ngondron sih paingan. Yihu kopu huya pe huro aliy. Pe nombuwe Yesu ipiy iro mbulmarahu.
3 Pe koiwen, ara irayah pallen pe ngannganan iya. Kinlahi ndramat hamou para kol pwan kisungani koyau kisarayah pallen tehen tora, ara pwi.
4 Pe Eliyah iyasura Mose ara hilsarayah hilsa mbulmarahu, pe hilro wong iyasura Yesu.
5 Pe Pita ipwai iya kili Yesu, ipa, <<Ndramat para Hinonou, hiyan para yowu koro iye. Pwen yowu kapuli yopai matiwum—hawum atam, pe hawum ata Mose, pe hawum ata Eliyah.>>
6 Pita ipa toro, paratesah, hunoh mimiri hu, pe ikowu sehe nongan para kiwong kiya aliy.
7 Pwen kokom hasai isa pe iramburuhi hu, pe yoholai sahin iyau nondriya kokom ara ipa, <<Iye, ara noru mepo ndriyo imbuluhi yiy. Wawu kahalingi yiy.>>
8 Pwen indrou pwi ko, pe marahu ihiselep, pe hu kannime hamou pwi; Yesu ko iro surahu.
9 Pwen hutali ngondron pe huro tuh nakamui kasa pwan, pe Yesu ipwatisingiy iya kili hu tehe hu mbuna kanese ndrainga hamou kiya sehe melit hu kannimei, kipoo Noru Ndramat kimat pe kitine paiwe.
10 Humbultuwe tisingi nongan ara, pe huro panguluwaniy mwalingahu mbukenan hupa, <<Ndroiyi nongan ara, ara ipa tesah ndrokonan—<kimat pe kitine paiwe>?>>
11 Pwen husok Yesu hupa, <<Paratapeh pe hu ndramat para hinuwani nongan para pwahanou ngara hu kapwai tehe Eliyah andre kisa kimu?>>
12 Pwen Yesu ipwai iya kili hu, ipa, <<Nongan ara ndrokonan; Eliyah andre kimu kisa pe kimwaniyani hu melit masih. Hapeko tehen tapeh, nongan ita nongna Ngindrai koluw, ara kinpwai tehe Noru Ndramat andre kikuni nopwaran pe andre hu ndramat kamwisnani yiy?>>
13 Hapeko upwai isa kili wawu toro: Eliyah, ara kinsa pwen. Pe hu kanmbusi kultuw handra-handra kinna kili yiy tehe pwayan hu kantatuluwiy kinnatan.
Yesu isopwoyani wihou hamou mepo payit iro ndritan
14 Pwen Yesu iyasura hu matimou, ara humui husarayah husa kili ndramiran hu hayah i; pe hunime hu ndramat soyon iya hurahakowahu. Pe hu ndramat para hinuwani nongan para pwahanou hayah, ara huro takekei iyasura hu ndramira Yesu.
15 Pe iro mwonen hu ndramat ara huho nime Yesu ko, huteleh mwomwan, pe hungap huya para kapa ndrokolang kiya kili yiy.
16 Pe Yesu isike hu, ipa, <<Wawu tora takekei iyapolohu, ara ndroiyin tesah ndrokonan?>>
17 Ndramat hamou iro mwalingahu isomwi Yesu ipa, <<Ndramat Para Hinonou, yo uwiri noru kamai isa kili wou, paratesah, payit para pohomum iripo ndritan.
18 Kiro mwonen lang para memelit mwomwan ngara kikohis kiya ndritan, ara ngara kimbultuwe yiy pwokeyan pe kipiyani yiy kiya pwan. Pe ngara mbusas kiro wet pohon, pe kiyantani koltan, pe mandran kisiyan. Pwen usok ndramiram hu para hu karasses payit ara kiya mawen, hapeko hu kanwenei pwi.>>
19 Pwen Yesu iwong imui iya kili hu, ipa, <<O wawu hasap para mahapo, wawu kanpwotisingi lohonga wawu pwi, pe lohonga wawu imwakaikai. Mwalaiheh pe andre kuro sura wawu ko yeh? Pe maporosahayeh andre kuro kuni nopwaran tawawu ko yeh? Wawu kawiri mbunah kamai ara kisa kili yo.>>
20 Pwen huwiri wihou ara iya kili Yesu. Pe payit ariya inime Yesu pe indrou pwi ko, ilosani wihou iya mwomwan; ipiyani yiy iya pwan pe iro tiriyani yiy, pe mbusas iro wet pohon.
21 Pwen Yesu isike taman, ipa, <<Maporosahayeh kintayah kili yiy?>>
Pe taman isomwiy, ipa, <<Yiy mamendreheh o pe irayah.
22 Lang hitun kinna ngara kipiyani yiy kiya mwan pe ndran kene, pe pakitingundrun kimat. Hapeko kapa alahiy para amwaniyani yiy, pwen koyum kisikirani youlu pe asopwat youlu.>>
23 Pe Yesu ipwai iya kili yiy, ipa, <<Paratapeh pe apa, <Kapa alahiy?> Melit masih andre kirayah kapa ndramat hamou kipwotisingi lohongan.>>
24 Indrou pwi ko, tama wihou ara, ara iwayeh ipa, <<Yo upwotisingi lohongo; hapeko lohongo, ara mulai opu. Asopwat yo.>>
25 Pwen Yesu inime hu ndramat soyon huro ngap husa pakeh kili hu, pwen ipomate payit ara, pe ipwai iya kili yiy, ipa, <<Wou payit para pohomum pe ndrainga pwi, upwandrandrahaniy isa kili wou, atali yiy aya mawen, pe mbuna amui asa ndritan paiwe.>>
26 Pwen payit ara, iwayeh iya namandran masih, pe wihou ara, iro lokuwai pwokeyan iya. Pe payit isa mawen kili yiy. Pe wihou ara, imbuyei tehe kinimat pwen. Pe hu ndramat soyon iya hunime yiy pe hupa ndre kinimat.
27 Hapeko Yesu iyki niman iya kili yiy pe isoli yiy pe itine.
28 Iyamulan para aliy, Yesu iya nondriya seu, pe ndramiran hu husok yiy nokule ko, hupa, <<Paratapeh pe yowu kanlahiy para karasses payit ara, kiyau pwi?>>
29 Pwen Yesu ipwai iya kili hu ipa, <<Melit iye ara andre kirayah kiyau kultuw para katohun opu.>>
30 Pwen hutali kol ara, pe husayau nondriya kol namandran hape Kaliliy. Pe Yesu, ara mbuwalin para ndramat hamou kipahasani sehe kol ndrokonan huro aliy,
31 paratesah, yiy iro hinuwani ndramiran hu. Yesu ipwai iya kili hu, ipa, <<Noru Ndramat, ara andre hu karatuni yiy pe andre kaiki yiy kiya kili hu ndramat pe andre hu katingundrun, pe lang maroyoh kihipwen, andre kitine paiwe.>>
32 Hapeko ndramiran hu ara hu kanpahasani ndroiyi nongan ara pwi, pe hunoh para kasok yiy kiya aliy.
33 Pe husarayah husa Kapernawum pe husoro nondriya seu. Pwen Yesu isike hu, ipa, <<Wawu ro tokai sai wawu sa, pe wawu ro takekei iya nongna tesah?>>
34 Hapeko humun opu, paratesah, huro pwen sai , ara huro takekei mwalingahu para hiyeh tahu iho hin.
35 Pwen Yesu impwan pe iyoh hu Songui pe Lumou husa kili yiy, pe ipwai iya kili hu ipa, <<Kapa hamou tawawu nakiho hin, pwen andre kiyki yiy kisa pwan masih, pe kirayah tehe ndramat para poya mbulya hu ndramat masih.>>
36 Pwen iwiri mbunah hamou mendreheh, pe iyki yiy iro tine mwalingahu. Pe ipwokarani yiy iro niman, pe ipwai iya kili ndramiran hu, ipa,
37 <<Yiy mepo kirawulohani mbunah mendreheh hamou tehen iye kiya ngolo, pwen imbusi hiyan isa kili yo; pe yiy mepo imbusi hiyan sato, ara kinmbusiy sato ko pwi, hapeko imbusiy iya kili yiy mepo ipwandrisa yo usa.>>
Ndramat mepo kinhingasi worou pwi, ara yiy para sura tou
38 Pwen Yohanes ipwai ipa, <<Ndramat Para Hinonou, yowu nime ndramat hamou iro rasses hu payit huyau iya ngalam. Pe yowu pwayi yiy para kihitohai, paratesah, yiy hamou para sura tou pwi.>>
39 Hapeko Yesu ipwai, ipa, <<Wawu mbuna akasingori yiy. Paratesah, ndramat hamou kimbusi ndraikiya melit kiya ngolo, pwen kinlahiy para kipwahaltani yo kileh pwi.
40 Paratesah, yiy mepo kintasisingat anarou pwi, ara yiy para susura tou.
41 Pe upwai ndrokonan isa kili wawu, ndramat mepo kinime wawu, paratesah, wawu ndramira Messayah, pe kihang wawu ndran wawen hape kiya ngolo, ara andre kiwiri kenen.
Mbuna akambusi hamou kiyos kiya pakut mwomwan
42 Pe kapa ndramat hamou kimbusi hamou tahu mbunah mendreheh iye, mepo hupwotisingi lohongahu isa kili yo, para kiyos kiya pakut mwomwan, ara hiyan para hu kandruyani pat sih namandran kiya koyun, para kora tandroindroi tan, pe kapiyani yiy kiya nondriya ndras.
43-44 Kapa nimam hakai kimbusi wou ayos aya pakut mwomwan, pwen hiyan para asondriti nimam ara kiyau. Hiyan para aya paingan kapolo nimam hakai o. Matisan aya kapolo nimam malkai pe hu kapiyani wou aya nondriya ngat mepo mwan itayat aliy.
45-46 Pe kapa ndrikam hakai kimbusi wou ayos aya pakut mwomwan, pwen hiyan para asondriti ndrikam ara, kiyau. Hiyan para aya paingan kapolo ndrikam hakai o. Matisan aya kapolo ndrikam malkai, pe kapiyani wou aya nondriya ngat mepo mwan itayat aliy.
47 Tehen aliy opu, kapa maram sih kimbusi wou pe ayos aya pakut mwomwan, pwen hiyan para atangihi maram ara kiyau. Hiyan para wou aya kolo King Ngindrai mepo ngara kiro mu kiya aliy kiyapolo maram sih o, Matisan maram malwoh kiro hiyan, hapeko hu kapiyani wou kiya nondriya ngat mepo mwan ita yat aliy.
48 Kol ara,
<wiy ipep ita aliy pe hu konoho mat pwi.
Pe mwan ita yat aliy ara andre kinto-kinto.>
49 Paratesah, ndramat masih andre mwan kitimwi hu kaya hiyan tehe ndras ngara kimbusi melit kirayah hiyan.
50 Ndras para kanyai ara hiyan, hapeko kapa ndras kankanan pwi, pwen andre tukambusi tesah para kana ndras kimui? Pwen wawu karayah tehe ndras, pe ndriya wayis kiro sura wawu hamou-hamou.>>