8
Yesu itaingani anandrinai iya kili hu ndramat mahaapou (4,000)
1 Pwen iho nondriya hu lang ara, hu ndramat soyon iya yi, husa rawure hu paiwe, pe anandrinahu pwi. Pe Yesu iyoh ndramiran hu husa, pe ipwai iya kili hu, ipa,
2 <<Koyu isikirani hu ndramat aripo. Hu topo sura yo lang maroyoh pwen ara, pe hapesah para hu kayan, ara pwi.
3 Pe kapa kupwandrisa hu kamui kaya wum mamundruwahu, pwen andre marahu kawuh pe andre hu kaya yos kaya sai, paratesah, hayah tahu, ara hupwen mwanan husa.>>
4 Pwen ndramiran hu husomwi yiy, pe hupa, <<Worou turopo kol mwanan, pe andre tukawiri ndrinanohun kiyau aleheh kisa, para kaikiy kiya ana hu ndramat masih kene tora kaliy?>>
5 Pe Yesu isok hu, ipa, <<Ndrinanohun ita kili wawu, ara masahayeh?>>
Pe husomwi yiy, hupa, <<Ndrinanohun manandrtoyoh iripo.>>
6 Pwen Yesu ipwai iya kili hu ndramat masih para hu kampwan ndrita pwan. Pwen iwiri ndrinanohun manandrtoyoh ara, pe irawuloh; pwen iramburingiy, pe iykiy iya kili ndramiran hu para hu katainganiy kiya kili hu ndramat masih. Pwen hutainganiy.
7 Pe anahu ni hayah mendreheh iro sura hu yi. Pwen Yesu iwiri hu pe irawuloh, pe ipwai iya ta ndramiran hu para hu kaya tainganiy yi.
8 Pe yihu masih, ara hunamnam pe isihi hu. Iyamulan ndramiran hu hurawurani ndritike anandrinai tahu iyawule, pe hunihiy iya ndrop manandrtihat.
9 Pwen ndromwoya hu ndramat masih kene huro ara, ara iho pakeh tehe mahaapou (4,000). Pwen ipwandrisa hu huyau,
10 pwen Yesu ihis iya nondriya ndroi iyasura ndramiran hu, pe huyau huya pwen te kol namandran hape Talmanuta.
11 Pe hu Parisiy husa pe humu iya ndroiyi takokowai iyapolo Yesu. Hu pakanohonou yiy, pwen pe husike yiy para kipwaingani kaipisa pwoke handra kiyau kol paingan yang.
12 Yesu ihiri kunuwen pwokeyan iya, pe ipa, <<Tehen tapeh pe hu ndramat hasap para mahapo husok para hu pakanime kaipisa pwoke? Upwai ndrokonan isa kili wawu, andre yihu kannime kaipisa hapesah pwi.>>
13 Pwen Yesu itali hu pe ihis iya nondriya ndroi paiwe, pe humui huya haroh para ndran makaiye.
Yis tahu Parisiy pe ta Herot
14 Pwen ndramiran hu koyuhu imayit para kapo ndrinanohun. Ndrinanohun hapus opu iro nondriya ndroi surahu.
15 Pe Yesu ipa nongan pwandrendrehe, ipa, <<Akoro rapapahan paratesah, iya yis tahu Parisiy pe ata Herot.>>
16 Pwen pe huro panguluwaniy mwalinga hu hamou-hamou, huro pa, <<Ndrinanohun pwi pwen tunan ara ko pe ita wong tora.>>
17 Pe Yesu ara kinpahasaniy pwen sehe nongan huro wong yaliy. Pwen ipwai iya kili hu ipa, <<Paratesah wawu tora panguluwaniy tehe ndrinanohun pwi? Wawu kannimei mapu pe lohonga wawu kinileu mapu, ndre? Pe ndriya wawu pwokeyan iya, ndre?
18 Mamara wawu, hapeko wawu konoho nimei pwi, ndre? Pe mandrainga wawu, hapeko wawu konoho hilingiy pwi, ndre? Pe wawu kanlohonganiy pwi, ndre?
19 Tandrohonga uramburingi ndrinanohun mayimah iya kili hu ndramat mayipou ara (5,000), ara wawu nihi ndritiken iya ndrop masahayeh?>>
Pe husomwiy hupa, <<Songui pe luhat.>>
20 <<Pe tandrohonga uramburingi ndrinanohun manandrtoyoh iya kili hu ndramat mahaapou ara, ara wawu nihi ndritikehu iya ndrop masahayeh?>>
Pe husomwiy hupa, <<Manandrtihat.>>
21 Pwen ipwai iya kili hu, ipa, <<Lohonga wawu kinileu mapu ko, ndre?>>
Yesu isopwoyani ndramat hamou para kol Petsaita mepo maran iyoh
22 Pe Yesu iyapolo ndramiran hu huya kol mendreheh Petsaita, pe hu ndramat hayah huwiri ndramat hamou maran iyoh isa kili Yesu. Pe hurakekeyani para kiyki niman kiyahatek kili ndramat ara.
23 Pwen Yesu imbultuwe nima ndramat mepo maran iyoh ara, pe iluwi yiy pe hiltali kol mendreheh ara hilya ngawan. Pwen Yesu isokombunuhi maran, pe iyki niman iya ndritan. Pwen isike yiy, ipa, <<Anime hapesah, ndre pwi?>>
24 Pe ndramat ara maran itandras pe ipa, <<Unime hu ndramat, hapeko nimnim tahu ara tehe hu kei hutora tokai huya-husa.>>
25 Pwen Yesu iyki niman paiwe yi iya mara ndramat ara. Pe maran isa leu, pe isarayah hiyan paiwe, pe inime memelit masih ileu.
26 Pwen Yesu ipwandrisa yiy iyau iya wum pe ipwatisingiy iya kili yiy ipa, <<Mbuna amui aya nondriya kol mendreheh ara.>>
Pita iwong ngawan tehe Yesu, ara yiy Messayah
27 Pwen Yesu iyapolo ndramiran hu huyau huya kol hayah mendreheh mepo pakeh kili kol ngawan Sisariya Pilipai. Huro tokai sai huya, pe Yesu isike hu ipa, <<Akapwai kisa kili yo na, hu ndramat masih hutora pa ndre yo hiyeh?>>
28 Pwen husomwi yiy hupa, <<Hu hayah hupa wou Yohanes Ndramat para Paptais; pe hu hayah i, hupa wou Eliyah; pe hu hayah i, ara hupa wou hamou tahu poropet.>>
29 Pwen Yesu isike hu, ipa, <<Pe wawu, ara wawu pa ndre yo hiyeh?>>
Pwen Pita isomwi yiy ipa, <<Wou ara Messayah.>>
30 Pwen Yesu ipwandrandrahani hu para hu mbuna katiyaniy kiya kili hamou tehe yiy hiyeh.
Yesu iranonoye tehe andre kimat pe kitine
31 Pwen Yesu iro hinuwani hu tehe Noru Ndramat, ara andre kiya nondriya hu ngandran soyon, pe andre hu yapane kol, hu pris huhohin ta hu pris masih, pe hu ndramat para hinuwani nongan para pwahanou, ara andre hu kamwisnani yiy, pe andre hu katingundrun kimat; pe lang maroyoh kihipwen, andre kisa tine paiwe.
32 Pe itiyani nongan ara, ara ileu masih iya kili hu. Pwen Pita iwiri yiy iya pwakin pe iro pomate yiy.
33 Hapeko Yesu ipaiwani maran iya kili ndramiran hu, pwen ipomate Pita, ipa, <<Sinai, asaya ndruwo! Wou anto ndruwa lohonga Ngindrai pwi, hapeko ata ndruwa lohonga ndramat opu.>>
34 Pwen Yesu iyoh hu ndramat masih husa kili yiy, iyapolo ndramiran hu, pe ipwai iya kili hu ipa, <<Kapa sehe ndramat pakiho ndruwo, ara andre kipa pwi katan mbukenan, pe kisap kei tondrih tan, pe kisa kiho ndruwo.
35 Paratesah, yiy mepo kihimbusani mwoiwan mbukenan, andre mwoiwan kitali yiy. Pe yiy mepo kilohongani yo, pe kirikai kiya nongan hiyan ato, pe kitali mwoiwan kisa kili yo, ara andre kisopwat mwoiwan mbukenan.
36 Sehe melit hiyan andre ndramat hamou kiwiriy kapa memelit masih para kol pwan kiya mbukenan yiy, hapeko kitali mwoiwan pe kimat?
37 Ndre sehe melit ndrokonan ndramat hamou ilahiy para kiykiy para kisuliyani taleh tan kimui?
38 Pe kapa ndramat hamou kimasi to, pe kimasi kiya nongno kiya nondriya hu lang mwomwan aripo—hu lang para pilah pe pakut mwomwan tahu hasap mahapo—ara andre Noru Ndramat kimasi ta ndramat ara yi, kiya lang mulan—kirahihini lang para yiy nakisa, kiyapolo nonowa ngana Taman pe kiyapolo hu angelou haiyan.>>