Lukas
Ke̱tɔ ne̱ Lukas a kyo̱rɛɛ bo̱ le̱e̱ ase̱ŋ timaa‑o si‑o
1
1-4 Bre̱sɛ Tiyufilus, mo̱ e̱ ka fo̱ kanɔ. Ke̱tɔ se̱ ne̱ mo̱ e̱ kyo̱rɛɛ wo̱re̱ mɔ mo̱ e̱ sa fo̱‑ɔ e̱ gye̱ fe̱yɛ mo̱ e̱ kpa a fo̱ nya ŋu fe̱yɛ ke̱tɔ ne̱ baa kaapo̱ fo̱ bo̱ le̱e̱ atɔ biribiri ne̱ aa waa ane̱ ase̱‑ɔ gye̱ kase̱ŋtiŋ. Ase̱sɛ bwe̱e̱tɔ a kyo̱rɛɛ amo̱ pɛɛɛ ase̱ŋ bo̱ be̱ya fe̱yɛ ane̱ŋ ne̱ baa nu amo̱ pɛɛɛ le̱e̱ bamo̱ ne̱ baa gye̱ ŋkpɛɛ nu ne̱ baa ŋu amo̱‑ɔ ne̱ baa tɔwe̱ abware̱se̱ŋ‑ɔ ase̱‑ɔ. M fe̱raa mo̱ a de̱e̱re̱, ne̱ mo̱ a kare̱ ase̱ŋ‑ɔ pɛɛɛ‑rɔ dame̱naŋsɛ le̱e̱ amo̱ ke̱gye̱ŋkpɛɛ‑rɔ, ne̱ mo̱ a waa mfɛɛre̱ fe̱yɛ a bware fe̱yɛ ŋ gbaa n kyo̱rɛɛ amo̱ pɛɛɛ mɔ ke̱gyase̱ ke̱gyase̱ bo̱ sa fo̱.
Ane̱ŋ ne̱ Wuribware̱ a suŋ tɔwe̱ Yohanee Osuubɔpo̱‑ɔ ko̱ko̱we̱ ase̱ŋ‑ɔ
5 To, saŋ ne̱ Hɛrɔd gye̱ Yude̱ya swe̱e̱re̱ se̱ owure‑o, Wuribware̱ ɔlɔŋŋɔpo̱ ko̱ mɔ bo̱‑rɔ ne̱ ba te̱e̱ mò̱ ɛ Sakariya. Ɔɔ le̱e̱ Isireelii awuye bo̱ko̱ ne̱ bo̱ gye̱ Wuribware̱ alɔŋŋɔpo̱ pɛɛɛ a kasuro‑o‑ro. Kasuro mɔ ne̱ baa ke‑ro mbuno si mbuno si‑o. Sakariya mɔ gye̱ mbuno‑o‑ro kako̱ ne̱ ba te̱e̱ kamo̱ ɛ Abiya‑o kigyi. Mò̱ ka ne̱ ba te̱e̱ ɛ Ilisabɛt ne̱ mò̱ gbaa a le̱e̱ kasuro‑o‑ro dɛɛ.
6 Abɛɛ anyɔ mɔ kakye̱na‑rɔ a waa Wuribware̱ daŋ, a le̱e̱ fe̱yɛ baa gya mò̱ mbraa‑ɔ pɛɛɛ se̱ kyɛɛkyɛɛ.
7 Amaa bo̱ mo̱ŋ de gyi, a le̱e̱ fe̱yɛ Ilisabɛt maa ko̱we̱. Amɔ bamo̱ anyɔ‑ɔ pɛɛɛ a kyɔ be̱re̱ lo̱we̱.
8-9 Saŋ a fo̱ fe̱yɛ Abiya kabuno‑o suŋ Wuribware̱ mò̱ suŋkpa. Fe̱yɛ ane̱ŋ ne̱ bamo̱ ade̱daase̱ŋ bo̱ le̱e̱ Wuribware̱ alɔŋŋɔpo̱ se̱ e̱ kaapo̱‑ɔ, ne̱ baa twe̱e̱ abu bo̱ lee Sakariya fe̱yɛ mò̱ e̱ gye̱ ne̱ o lwee Wuribware̱ suŋkpa‑ɔ ya kywɛɛ nyoŋku sa Wuribware̱.
10 Saŋ a fo̱, ne̱ oo lwee mfe̱ŋ ɔ ye̱re̱ ɔ kywɛɛ nyoŋku ɔ sa Wuribware̱‑ɔ, na lamaŋ‑ɔ mɔ ye̱re̱ kawu ba ko̱re̱ ke̱bware̱ko̱re̱.
11 Nyoŋku mɔ bo̱ kakyaŋse̱gyii ne̱ ka ye̱re̱ lɔŋŋɔkpa se̱‑ɔ‑rɔ ɔ kywɛɛ. Ne̱ Sakariya ye̱re̱ lɔŋŋɔkpa‑ɔ akatɔ‑rɔ. Puri amo̱‑rɔ ne̱ Wuribware̱ kabɔɔ ko̱ a le̱e̱ mò̱ se̱, na ɔ ye̱re̱ mò̱ kigyisesare̱e̱ se̱.
12 Amɔ Sakariya a ŋu Wuribware̱ kabɔɔ amo̱ ane̱ŋ‑ɔ, ne̱ mò̱ duŋ a te̱ŋ mò̱, ne̱ kufu a nya mò̱.
13 Ne̱ Wuribware̱ kabɔɔ‑ɔ yɛ,
“Sakariya, fo̱ ma sa a kufu nya fo̱.
Wuribware̱ a nu fo̱ a ko̱re̱ mò̱ fe̱yɛ ɔ sa fo̱ kayaagyi.
Amo̱se̱‑ɔ fo̱ aa fo̱ ka Ilisabɛt e̱ ko̱we̱ ɔnyare̱.
Na fo̱ sa mò̱ ke̱nyare̱ fe̱yɛ Yohanee.
14 Mò̱ ya ko̱we̱ mò̱, a sa a fo̱ akatɔ gyi bwe̱e̱tɔ
na a sa a ase̱sɛ bwe̱e̱tɔ gbaa akatɔ gyi,
15 a le̱e̱ fe̱yɛ o kii se̱sɛ dabe̱ a ɔ bo̱ sa Wuribware̱.
O kisi nta ke̱maa.
Na Wuribware̱ a kufwiiŋe timaa‑o sa mò̱ mò̱ ke̱yaale̱ŋ
pwɛɛ gbaa na mo̱ne̱ dɛɛ ko̱we̱ mò̱.
16 Na ɔ kpɔwe̱ ane̱ Isireelii awuye
ne̱ baa te̱ŋŋe̱ bamo̱ aa ane̱ nyaŋpe̱ Wuribware̱
mbo̱ŋtɔ‑rɔ‑ɔ bwe̱e̱tɔ baa Wuribware̱ ase̱.
17 Na ɔ nya ke̱yaale̱ŋ le̱e̱ Wuribware̱ a kufwiiŋe timaa‑o ase̱,
fe̱yɛ ane̱ŋ ne̱ Wuribware̱ a akyaamɛɛ‑ɔ Iliya a nya‑ɔ dɛɛ.
Na ɔ gye̱ ane̱ nyaŋpe̱ ŋkpɛɛ,
na ɔ nya waa Wuribware̱ a ase̱sɛ‑ɔ siraa gywii mò̱.
Na ɔ sa a ŋyaagyi na bamo̱ ase̱ a be̱e̱ kpa abɛɛ,
na bo̱ waa kanɔ ko̱ŋko̱.
Na ɔ sa a katɔmaabu awuye kyurowi bamo̱ mfɛɛre̱
bo̱ gya ase̱sɛ timaa e̱kpa se̱.”
18 Ne̱ Sakariya a bise Wuribware̱ kabɔɔ‑ɔ fe̱yɛ, “Mo̱ aa mo̱ ka pɛɛɛ mɔ a be̱re̱. Ne̱ e̱me̱ne̱ ne̱ mo̱ e̱ waa a m bo̱ ŋu fe̱yɛ amo̱‑ɔ gye̱ kase̱ŋtiŋ ne̱e̱?”
19 Ne̱ ɔɔ be̱ŋŋaa fe̱yɛ, “Mo̱ e̱ gye̱ Gabriyɛl ne̱ ŋ ye̱re̱ Wuribware̱ fɔŋfɔŋ ase̱‑ɔ, ne̱ oo suŋ mo̱ fe̱yɛ m bo̱ tɔwe̱ ase̱ŋ kɔne̱kɔne̱sɛ mɔ gywii fo̱.
20 Amaa fo̱ a mo̱ŋ kɔɔre̱ mo̱ kase̱ŋtiŋ ase̱ŋ mɔ ne̱ amo̱ ke̱be̱e̱ maa paŋ‑ɔ se̱‑ɔ, fo̱ i kii kpawu na kamu ya bo̱ fo̱ ŋke nsi ne̱ mo̱ne̱ e̱ ko̱we̱ kayaagyi‑o, ne̱ fo̱ i ŋu fe̱yɛ ase̱ŋ ne̱ mo̱ a tɔwe̱ gywii fo̱‑ɔ e̱ ba kase̱ŋtiŋ‑o.”
21 Saŋ mɔ pɛɛɛ na ase̱sɛ‑ɔ ye̱re̱ bo̱ gywii Sakariya, na ba fa ke̱tɔ se̱ ne̱ ɔɔ ko̱ŋ kyee Wuribware̱ suŋkpa‑ɔ bwe̱e̱tɔ ane̱ŋ‑ɔ.
22 Saŋ ne̱ ɔɔ bo̱ le̱e̱‑ɔ, ne̱ ɔɔ ye̱re̱ ba asare̱e̱ bo̱ sa se̱ŋsa. Ne̱ baa pini fe̱yɛ Wuribware̱ a lee mò̱ e̱ye̱e̱ bo̱ kaapo̱ mò̱ mò̱ suŋkpa‑ɔ mfe̱ŋ, a le̱e̱ fe̱yɛ ɔ mo̱ŋ lɛɛ taare̱ yaye̱ kanɔ sa se̱ŋsa gywii bamo̱.
23 Ŋke ne̱ Sakariya e̱ waa mò̱ kusuŋ Wuribware̱ suŋkpa‑ɔ a kyo̱ŋ‑ɔ, ne̱ ŋkee ɔɔ yɔ mò̱ aye̱.
24 Bo̱ fo̱ saŋ ko̱‑ɔ ne̱ mò̱ ka a nya kame, ne̱ ŋkee ɔɔ kwe̱e̱rɔ ke̱kyaŋ‑nɔ aferi anuu, na ɔ maa le̱e̱ kawu.
25 Ne̱ ɔɔ tɔwe̱ gywii mò̱ e̱ye̱e̱ fe̱yɛ, “Ŋkee fe̱raa Wuribware̱ a kya mo̱‑rɔ, ne̱ ɔɔ be̱e̱ lee mo̱ le̱e̱ ipeere‑ro ase̱sɛ ase̱!”
Ane̱ŋ ne̱ Wuribware̱ a suŋ tɔwe̱ Yeesuu ko̱ko̱we̱ ase̱ŋ‑ɔ
26 Amɔ Ilisabɛt a kame‑o aferi asiye‑o‑ro‑o, ne̱ Wuribware̱ a be̱e̱ suŋ mò̱ kabɔɔ Gabriyɛl fe̱yɛ ɔ yɔ Galile̱ya swe̱e̱re̱ se̱ a maŋ ko̱ ne̱ ba te̱e̱ mò̱ ɛ Nasarɛt‑ɔ‑rɔ,
27 na ɔ yɔ kabregyii ko̱ ne̱ ba te̱e̱ mò̱ ɛ Mariya‑o ase̱. Kabregyii mɔ ne̱ baa ke̱re̱ mò̱ sa ɔnyare̱ ko̱ ne̱ ba te̱e̱ mò̱ ɛ Yo̱sɛf ne̱ ɔɔ le̱e̱ Yudaa awuye ɔde̱daapo̱ Deefid a kabuno‑o.
28 Amo̱ fe̱raa kabɔɔ‑ɔ a yɔ kabregyii amo̱ ase̱ mfe̱ŋ ne̱ ɔ bo̱‑ɔ, ne̱ ɔɔ ka mò̱ kanɔ tɔwe̱ gywii mò̱ fe̱yɛ, “Wuribware̱ a gya fo̱ kamɛɛ, ne̱ oo yure fo̱.”
29 Ne̱ Mariya duŋ a te̱ŋ mò̱ bo̱ le̱e̱ ke̱tɔ ne̱ Wuribware̱ a kabɔɔ‑ɔ a tɔwe̱‑ɔ se̱, ne̱ ɔɔ fa mfɛɛre̱ kpo̱ne̱ fe̱yɛ o nu ke̱mo̱ ne̱ kabɔɔ amo̱ a tɔwe̱‑ɔ kaase̱ aaa.
30 Ne̱ kabɔɔ amo̱ a tɔwe̱ gywii mò̱ fe̱yɛ,
“Mariya, fo̱ ma sa a kufu nya fo̱.
Wuribware̱ a waa fo̱ atɔ.
31 Fo̱ e̱ nya kame na fo̱ ko̱we̱ ɔnyare̱,
na fo̱ sa mò̱ ke̱nyare̱ fe̱yɛ Yeesuu.
32 Na o kii se̱sɛ dabe̱, na bo̱ te̱e̱ mò̱ ɛ
Nyiŋkpe̱ŋ-kyo̱ŋ-atɔ‑pɛɛɛ-Bware̱ mò̱ gyi‑o.
Na Nyaŋpe̱ Wuribware̱ sa a ɔ kye̱na
mò̱ nana Deefid a kuwure‑o si.
33 Na o kii mo̱ne̱ ɔde̱daapo̱ Yakubu a ananagyi‑o
owure nsu pɛɛɛ.
Mò̱ kuwure‑o maa gye̱ kɛɛ daa!”
34 Ne̱ Mariya yɛ, “Mo̱ŋ nyi anyare̱, ne̱ e̱me̱ne̱ ne̱ a waa na a ba ane̱ŋ?”
35 Ne̱ Wuribware̱ kabɔɔ‑ɔ mɔ yɛ,
“Wuribware̱ a kufwiiŋe timaa‑o e̱ ywe̱e̱ fo̱ se̱,
na Nyiŋkpe̱ŋ-kyo̱ŋ-atɔ‑pɛɛɛ-Bware̱
a ke̱yaale̱ŋ‑ɔ sii fo̱ se̱.
Amo̱se̱‑ɔ fo̱ kayaagyi‑o, ba te̱e̱ mò̱ ɛ
ke̱yaafɔre̱ timaa, Wuribware̱ mò̱ gyi‑o.
36 Nu, fo̱ ko̱we̱bɛɛ Ilisabɛt ne̱ ɔɔ be̱re̱, ne̱ bo̱ yɛ ɔ maa ko̱we̱‑ɔ, de ɔnyare̱ kame. Kamo̱ aferi asiye ne̱e̱.
37 Na sɛye̱ mo̱ŋ bo̱‑rɔ ne̱ Wuribware̱ maa taare̱ a ɔ waa!”
38 Ne̱ Mariya yɛ, “Wuribware̱ kabre e̱ gye̱ mo̱, amo̱se̱‑ɔ a waa sa mo̱ fe̱yɛ ane̱ŋ ne̱ fo̱ a tɔwe̱‑ɔ mɔ dɛɛ.” Ne̱ Wuribware̱ kabɔɔ amo̱ a le̱e̱ mò̱ ase̱.
Ane̱ŋ ne̱ Mariya a ya ka Ilisabɛt kanɔ‑ɔ
39 Ke̱tɔ mo̱ŋ kyee ne̱ Mariya a waa siraa, ne̱ ɔɔ da e̱ye̱e̱ se̱ yɔ Yude̱ya maŋ ko̱ ne̱ ɔ bo̱ abe̱e̱‑ɔ‑rɔ‑ɔ, mfe̱ŋ ne̱ Sakariya na mò̱ ka Ilisabɛt te‑o.
40 Ne̱ ɔɔ yɔ Sakariya lɔŋ‑nɔ ya ka Ilisabɛt kanɔ.
41 Ilisabɛt ke̱de̱ŋ nu Mariya kanɔka‑ɔ, ne̱ kayaagyi ne̱ o de mò̱ kame‑o a dabo̱rɔ mò̱ e̱ye̱e̱ mò̱ nyi kame‑ro. Ne̱ Wuribware̱ a sa ne̱ mò̱ kufwiiŋe timaa‑o a le̱e̱ so̱so̱ bo̱ kye̱na Ilisabɛt se̱ puri amo̱‑rɔ.
42 Ne̱ Ilisabɛt a tɔwe̱ keŋkeŋ gywii Mariya fe̱yɛ,
“Akye̱e̱‑rɔ pɛɛɛ fo̱ ne̱ Wuribware̱ a yure bwe̱e̱tɔ,
Wuribware̱ a yure kayaagyi
ne̱ fo̱ e̱ ba a fo̱ bo̱ ko̱we̱‑ɔ.
43 Mo̱ a nya kuŋu timaa fe̱yɛ
mo̱ nyaŋpe̱ Kristoo mò̱ nyi a ba
na ɔ bo̱ ka mo̱ kanɔ.
44 Mo̱ a de̱ŋ nu fo̱ kanɔka‑ɔ,
ne̱ kayaagyi ne̱ ɔ bo̱ mo̱ kame‑ro‑o a dabo̱rɔ e̱ye̱e̱
bo̱ le̱e̱ fe̱yɛ aa waa mò̱ kɔne̱.
45 Fo̱ a kɔɔre̱ gyi fe̱yɛ ke̱tɔ ne̱ Wuribware̱ a suŋ
bo̱ tɔwe̱ gywii fo̱‑ɔ e̱ ba‑rɔ kase̱ŋtiŋ‑o si‑o,
o yure fo̱.”
Ane̱ŋ ne̱ Mariya a kyo̱rɔ Wuribware̱‑ɔ
46-48 Ne̱ Mariya yɛ,
“Mo̱ e̱ kyo̱rɔ Wuribware̱ mo̱ kakpo̱nɔ‑rɔ.
Mo̱ akatɔ a gyi mo̱ ɔmo̱rɔwe̱po̱ Wuribware̱ se̱.
A le̱e̱ fe̱yɛ, hare̱e̱ mo̱ a gye̱ mò̱ kabre wo̱rɔba‑ɔ
gbaa ooo, oo nyiŋŋi mo̱ se̱.
Le̱e̱ ndɔɔ bo̱ yɔ, ase̱sɛ ne̱ bo̱ te mbe̱yɔmɔ‑ɔ
na bamo̱ ne̱ ba ba a bo̱ bo̱ ko̱we̱‑ɔ,
e̱ te̱e̱ mo̱ ɛ N‑de‑ŋyure.
49 Bo̱ le̱e̱ atɔ dabe̱ ne̱ Ɔyaale̱ŋpo̱-Bware̱ a waa sa mo̱‑ɔ se̱,
mo̱ e̱ kyo̱rɔ mò̱ ke̱nyare̱ kpe̱yaa.
50 Le̱e̱ de̱daa‑ɔ bo̱ fo̱ mbe̱yɔmɔ
ɔ kpa ke̱nana ke̱maa‑rɔ ase̱sɛ ne̱ ba bu mò̱‑ɔ ase̱ŋ.
51 Ne̱ o teyi mò̱ ke̱sare̱e̱ dabe̱‑ɔ bo̱ waa atɔ dabe̱,
ne̱ ɔɔ brawe̱ bamo̱ ne̱ ba kaapo̱ bamo̱ e̱ye̱e̱‑ɔ‑rɔ.
52 Ɔɔ baa awure kaase̱,
ne̱ ɔɔ yase̱ ase̱sɛ laŋgyaŋ so̱so̱.
53 Ɔɔ sa atiripo̱ atɔ timaa,
ne̱ ɔɔ gya atɔ awuye bo̱ kyo̱ŋwe̱ asare̱e̱ kpaŋkpaŋ.
54-55 Oo nyiŋŋi ke̱tɔ ne̱ ɔɔ tɔwe̱ gywii
ane̱ nana Abraham mò̱ aa mò̱ ananagyi‑o si,
fe̱yɛ o yure bamo̱ nsu pɛɛɛ‑ɔ.
Ne̱ ŋkee ɔɔ ba na ɔ bo̱ kya ane̱ Isireelii awuye,
Wuribware̱ mò̱ gyi‑ana‑ɔ‑rɔ.”
56 Ne̱ Mariya a kye̱na mfe̱ŋ ka Ilisabɛt kanɔ waa aferi asa pwɛɛ ne̱ ɔɔ dɛɛ kiŋŋi yɔ pe̱.
Ane̱ŋ ne̱ baa ko̱we̱ Yohanee Osuubɔpo̱‑ɔ
57 Ilisabɛt ko̱ko̱we̱ saŋ a fo̱‑ɔ, ne̱ ɔɔ ko̱we̱ ɔnyare̱.
58 Mò̱ akye̱nabɛɛpo̱ na mò̱ ako̱we̱bɛɛ a nu fe̱yɛ Wuribware̱ a waa atɔ timaa sa mò̱‑ɔ, ne̱ aa waa bamo̱ aa mò̱ kakatɔgyi.
59 Bamo̱ a ko̱we̱ kayaagyi‑o, ke̱mo̱ kake buruwase̱po̱‑ɔ, ne̱ baa te̱ŋ mò̱ ko̱twe̱e̱tu, ne̱ bo̱ yɛ bo̱ ba mò̱ se̱ Sakariya ke̱nyare̱ bo̱ sa mò̱.
60 Ne̱ mò̱ nyi yɛ, “Daabii. Weetee mò̱ ke̱nyare̱ e̱ gye̱ Yohanee.”
61 Ne̱ baa be̱ŋŋaa mò̱ fe̱yɛ, “Ne̱e̱ bo̱ maa te̱e̱ mo̱ne̱ ako̱we̱bɛɛ‑ɔ ɔko̱ mɔ ane̱ŋ ɛ?”
62 Mò̱ se̱ a mo̱ŋ tɛɛ taare̱ sa se̱ŋsa‑ɔ se̱‑ɔ, ne̱ baa ba asare̱e̱ bo̱ bise mò̱ ke̱nyare̱ ne̱ ɔ kpa fe̱yɛ bo̱ bo̱ sa mò̱ gyi amo̱‑ɔ.
63 Ne̱ ɔɔ ba asare̱e̱ bo̱ tɔwe̱ fe̱yɛ bo̱ sa mò̱ kataabo̱o̱ ne̱ ba kyo̱rɛɛ se̱‑ɔ, ne̱ ɔɔ kyo̱rɛɛ fe̱yɛ, “Mò̱ ke̱nyare̱ e̱ gye̱ Yohanee.” Ne̱ e̱ye̱e̱ a kpe̱ŋ bamo̱ pɛɛɛ.
64 Mò̱ a de̱ŋ kyo̱rɛɛ amo̱ puri amo̱‑rɔ lo̱we̱‑ɔ, ne̱ mò̱ kanɔ a buŋŋi, ne̱ ɔɔ be̱e̱ le̱e̱ ɔ sa se̱ŋsa, ne̱ ɔɔ me̱raa se̱ ɔ kyo̱rɔ Wuribware̱.
65 Ne̱ aa waa mò̱ akye̱nabɛɛpo̱‑ɔ pɛɛɛ kufu, ne̱ ase̱ŋ amo̱ a lweero fo̱ Yude̱ya abe̱e̱‑ɔ‑rɔ a e̱maŋ‑ɔ ɔke̱maa se̱.
66 Ɔke̱maa ne̱ oo nu ase̱ŋ amo̱‑ɔ a fa amo̱ mfɛɛre̱, ne̱ bo̱ yɛ, “Ntɔ se̱sɛ ne̱ kayaagyi mɔ e̱ ba a ɔ bo̱ kii‑o ne̱e̱?” A le̱e̱ fe̱yɛ ɔke̱maa a ŋu fe̱yɛ Wuribware̱ ke̱yaale̱ŋ bo̱ mò̱‑rɔ.
Ane̱ŋ ne̱ Sakariya a kyo̱rɔ Wuribware̱‑ɔ
67 Ne̱ Wuribware̱ a kufwiiŋe timaa‑o a bo̱ ywe̱e̱ Sakariya si, ne̱ ɔɔ le̱e̱ ɔ tɔwe̱ ke̱tɔ ne̱ Wuribware̱ e̱ tɔwe̱ o gywii mò̱‑ɔ. Ne̱ ɔ yɛ,
68 “Mo̱nꞌ sa a ane̱ Isireelii awuye
kyo̱rɔ ane̱ nyaŋpe̱ Wuribware̱,
a le̱e̱ fe̱yɛ ɔɔ bo̱ lee mò̱ ase̱sɛ le̱e̱ ase̱ŋ‑nɔ,
ne̱ baa nya bamo̱ e̱ye̱e̱.
69 Ɔɔ sa ane̱ ɔmo̱rɔwe̱po̱ dabe̱
bo̱ le̱e̱ mò̱ ke̱yaafɔre̱, ane̱ ɔde̱daapo̱ Deefid, a ke̱nana‑ɔ‑rɔ,
70-71 fe̱yɛ ane̱ŋ ne̱ ɔɔ bo̱rɔ mò̱ akyaamɛɛ timaa si
tɔwe̱ kyee bo̱ be̱ya ane̱‑ɔ,
fe̱yɛ o lee ane̱ a ɔ bo̱ le̱e̱ ane̱ ado̱ŋ
na bamo̱ ne̱ ba kisi ane̱‑ɔ ke̱sare̱e̱‑rɔ.
72-75 Wuribware̱ yɛ ɔ waa ane̱ ade̱daapo̱ ke̱dame̱naŋsɛ,
na ɔ ma taŋ e̱taŋ dabe̱ ne̱ ɔɔ waa bo̱ be̱ya
mò̱ aa ane̱ nana Abraham mbo̱ŋtɔ‑rɔ‑ɔ se̱,
fe̱yɛ ɔ kɔɔre̱ ane̱ a ɔ bo̱ le̱e̱ ane̱ ado̱ŋ ase̱,
na ɔ sa a ane̱ suŋ mò̱ bo̱ fo̱ ane̱ ŋkpake kɛɛ,
na kufu mo̱ŋ de ane̱,
na ane̱ nya ŋkpo̱nɔfwiiri mò̱ ase̱
na ane̱ de̱e̱ kii itimaa awaapo̱.”
76 Ne̱ Sakariya a sa se̱ŋsa gywii mò̱ gyi‑o fe̱yɛ,
“Mo̱ gyi, fo̱ fe̱raa ba te̱e̱ fo̱ fe̱yɛ
Nyiŋkpe̱ŋ-kyo̱ŋ-atɔ‑pɛɛɛ-Bware̱ a kyaamɛɛ‑ɔ,
a le̱e̱ fe̱yɛ fo̱ e̱ gye̱ Wuribware̱ ŋkpɛɛ,
na fo̱ ya lɔŋŋɔ mò̱ kpa bo̱ be̱ya mò̱.
77 Na fo̱ ya tɔwe̱ gywii ane̱ ne̱ ane̱ gye̱ mò̱ ase̱sɛ‑ɔ fe̱yɛ,
ɔ kpa fe̱yɛ ane̱ nu ane̱ e̱ye̱e̱,
na ɔ nya taa ane̱ e̱bɔye̱ bo̱ ke ane̱ na ɔ mo̱rɔwe̱ ane̱.
78-79 Mò̱ a ŋu ane̱ e̱wɛɛ‑ɔ se̱‑ɔ,
ane̱ŋ a ɔmo̱rɔwe̱po̱ ne̱ o suŋ a ɔ bo̱ kyo̱ŋwe̱ ane̱‑ɔ,
ba te̱e̱ mò̱ ɛ Gye̱gyaye̱-kyɔwe̱-a‑ke̱laŋŋe̱rɔ‑ɔ,
a le̱e̱ fe̱yɛ mò̱ ke̱laŋŋe̱rɔ e̱ we̱e̱ ane̱
ne̱ ane̱ te kibugyii‑ro, ne̱ ane̱ se̱re̱ lowi‑o si,
na ɔ laŋŋe̱ ane̱ e̱kpa‑rɔ
na ane̱ nya kye̱na ŋkpa na alaŋfiya‑ro.”
80 Kayaagyi‑o a daŋ‑ɔ, ɔɔ nya kanyiase̱ŋ na daa timaa. Ne̱ ŋkee ɔɔ yɔ ya kye̱na kimukee‑ro ane̱ŋ‑aaa, bo̱ fo̱ saŋ ne̱ o lee mò̱ e̱ye̱e̱ ifuri bo̱ kaapo̱ Isireelii awuye‑o.